ރާއްޖެޓީވީ އިން މާލެސިޓީ މޭޔަރ ބަހުސް ބޭއްވުމުގެ ތައްޔާރީތައް ފަށައިފި
ކުރިއަށް އޮތް މާލެ ސިޓީގެ މޭޔަރު ބަހުސް މާރޗް މަހުގެ ފަހުކޮޅު ބޭއްވުމަށް ރާއްޖެޓީވީން ތައްޔާރުވަމުންދާ އިރު މި ބަހުސްގައި ބައިވެރިވުމަށް ފަސް ކެނޑިޑޭޓުންނަށް ވެސް ދައުވަތު ދީފަވޭ. ރާއްޖެޓީވީން މަސައްކަތް ކުރަމުން ގެންދަނީ ބަހުސް ވަރަށް ފުރިހަމަ ކޮށް ކުރިއަށް ގެންދެވޭތޯ.
މާލޭ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓުން. | ރާއްޖެއެމްވީ ގްރެފިކްސް
ރާއްޖެޓީވީ އިން ކުރިއަށް އޮތް ކައުންސިލް އިންތިޚާބުގައި މާލެސިޓީ މޭޔަރގެ މަޤާމަށް ކުރިމަތިލައްވާ ކެންޑިޑޭޓުންގެ ބަހުސް ބޭއްވުމުގެ ތައްޔާރީތައްވާން ފަށައިފި އެވެ.
ރާއްޖެޓީވީ ގެ ޑެޕިއުޓީ ޗީފް އޮޕަރޭޓިންގ އޮފިސަރ (ޑެޕިއުޓީ ސީއޯއޯ) ނާޒްމީ ސައީދު ވިދާޅުވީ ރާއްޖެ ޓީވީ އިން ކުރިއަށް ގެންދާ މި ބަހުސްގެ އެންމެ ފަހުގެ ތައްޔާރީތައް މިހާރު ވަމުންދާ ކަމަށެވެ. މާލޭ ސިޓީ ކައުންސިލް ގެ މޭޔަރު ކަމަށް ވާދަކުރައްވާ ހުރިހާ ބޭފުޅުންނަށް މި ބަހުސް ގައި ބައިވެރިވުމަށް ދައުވަތު ފޮނުވާފައިވާ އިރު، މިހާތަނަށް 1 ކެންޑިޑޭޓް ފިޔަވާ ހުރިހާ ކެންޑިޑޭޓުން އެ ދައުވަތު ޤަބޫލުކޮށްފައިވާ ކަމަށް ނާޒްމީ ވިދާޅުވި އެވެ.
މި ބަހުސްގައި ބައިވެރިވުމުގެ ދައުވަތު ޤަބޫލުކުރުމާއި މެދު ގޮތެއް ނިންމުމަށް ދީފައިވާ މުއްދަތު ހަމަވާނީ 15 ފެބްރުއަރީ 2026 ވަނަ ދުވަހުގެ 16:00 އަށެވެ.
ބަހުސް ބާއްވާނެ ތާރީޚް ކަނޑައަޅާނީ، ބައިވެރިވުމަށް ދީފައިވާ މުއްދަތު ހަމަވުމުން ކަމަށް ނާޒްމީ ވިދާޅުވި އެވެ.
"މި ބަލަނީ މި ބަހުސް މާރޗް މަހުގެ ފަހުކޮޅު ބޭއްވޭތޯ. ސްޓޭޝަނުން ވަރަށް ބޮޑަށް ތައްޔާރީތައް ވަމުން މިހާރުވެސް މި ގެންދަނީ ފުރިހަމަ ބަހުސް އަކަށް ހެދޭތޯ" ނާޒްމީ ވިދާޅުވި އެވެ.
މި ބަހުސް ގެ ފޯމެޓާއި ބަހުސް ކުރިއަށް ދާނެ ގޮތުގެ އިތުރު ތަފްސީލް ތައް ފައިނަލް ކުރާނީ ވެސް ބައިވެރިންނާ މަޝްވަރާ ކުރުމަށް ފަހު ކަން އޭނާ ވަނީ ފާހަގަކުރައްވާފަ އެވެ. ރާއްޖެ ޓީވީ އިން ވަނީ މީގެ ކުރިން ވެސް މިފަދަ ބޮޑެތި ބަހުސްތައް ކާމިޔާބުކަމާއި އެކު ކުރިއަށް ގެންގޮސްފަ އެވެ. އޭގެ ތެރޭގައި ރައްޔިތުންގެ ދަރުބާރު، އެމްޑީޕީގެ ޗެއަރޕަރސަން ހޮވުމަށް ބޭއްވި ބަހުސް ފަދަ ބަހުސްތައް ފާހަގަކޮށްލެވެ އެވެ.
މާލޭ ސިޓީ ގެ މޭޔަރ ކަމަށް ވާކުރައްވާ ކެންޑިޑޭޓުންނަކީ، އާދަމް އާޒިމް (އެމްޑީޕީ)، މޫސާ އަލީ ޖަލީލް (ޕީއެންސީ), އަހްމަދު އައިހަމް (އަމިއްލަ ކެންޑިޑޭޓް)، އިސްމާއިލް ޒަރިޔަންދު (އަމިއްލަ ކެންޑިޑޭޓް)، އަދި އަބްދުﷲ މަހްޒޫމް މާޖިދު (އެމްޑީއޭ) އެވެ.
