ޔޫކްރެއިން ހަނގުރާމަ ހުއްޓުވުމުގެ އާ ހުށަހެޅުމަކާއެކު ވައިޓް ހައުސްގެ މަންދޫބު ޕުޓިންއާ ބައްދަލުކުރައްވަނީ
21 އޮކްޓޯބަރު 2026 | ބުދަ 07:02ޔޫކްރެއިން ހަނގުރާމަ ހުއްޓުމަކަށް ގެނައުމަށް އެމެރިކާއާއި ވިލާތުގެ އިސްވެރިން އެކުލަވާލާފައިވާ ހުށަހެޅުންތަކާ ގުޅޭގޮތުން ރަޝިޔާގެ ރައީސް ޕުޓިންއާ ބައްދަލުކުރައްވާނެކަން ނޯވޭގެ ބޮޑުވަޒީރު ހާމަކުރައްވައިފި. މި މަޝްވަރާތަކުގެ ސަބަބުން ސުލްޙައިގެ އެއްބަސްވުމަކަށް މަގުފަހިވެދާނެ ކަމަށް ބެލެވޭއިރު، ރަޝިޔާއިން ވެސް މިހާރު ބޭނުންވަނީ ހަނގުރާމަ ނިންމާލަން ކަމަށް އެމެރިކާގެ ރައީސް ޓްރަމްޕް ވަނީ ވިދާޅުވެފައި
އެމެރިކާގެ ޚާއްސަ މަންދޫބު ސްޓީވް ވިޓްކޮފް | ގެޓީ އިމޭޖަސް
ޔޫކްރެއިންގައި ކުރަމުންދާ ހަނގުރާމަ ހުއްޓުމަކަށް ގެނައުމަށް އެކުލަވާލާފައިވާ އާ ހުށަހެޅުމެއް ހިއްސާކުރެއްވުމަށް ޓަކައި، އެމެރިކާގެ ވައިޓް ހައުސްގެ މަންދޫބު ސްޓީވް ވިޓްކޮފް ރަޝިޔާގެ ރައީސް ވްލަޑިމިޔަރ ޕުޓިންއާ ބުދަ ދުވަހު ސެއިންޓް ޕީޓަރސްބާގުގައި ބައްދަލުކުރައްވާނެ ކަމަށް އެމެރިކާގެ ނޫހެއް ކަމަށްވާ އެކްސިޔޮސްއިން ރިޕޯޓުކޮށްފި އެވެ. އެމެރިކާ ސަރުކާރުގެ އިސް އޮފިޝަލަކާ ހަވާލާދީ އެ ނޫހުން ބުނީ، މި ބައްދަލުވުމުގައި ރައީސް ޑޮނަލްޑް ޓްރަމްޕްގެ ދަނބިދަރިކަލުން ޖެރަޑް ކުޝްނަރ ވަރޗުއަލްކޮށް ބައިވެރިވެވަޑައިގަންނަވާނެ ކަމަށެވެ. މި ބައްދަލުވުމަކީ، ހަނގުރާމަ ނިމުމަކަށް ގެނައުމަށް ޓަކައި ޓްރަމްޕްގެ ސަރުކާރުން ކުރިއަށްގެންދާ ޑިޕްލޮމެޓިކް މަސައްކަތްތަކުގެ ތެރެއިން، ޔޫކްރެއިންގެ ރައީސް ވޮލޮދްމީރް ޒެލެންސްކީއާއެކު ވިޓްކޮފް ބޭއްވެވި މަޝްވަރާތަކަށްފަހު ބާއްވާ ބައްދަލުވުމެކެވެ.
ނޯވޭގެ ބޮޑުވަޒީރު ޔޯނަސް ގާ ސްޓޯރ އަންގާރަ ދުވަހު ވިދާޅުވީ، ރަޝިޔާގެ އިސްވާރުންނާ ބައްދަލުކުރެއްވުމަށާއި، ނޯވޭގައި ޔޫކްރެއިން އަދި ނޯޑިކް ޤައުމުތަކުގެ ވެރިންނާއެކު ދެކެވުނު ވާހަކަތަކުގެ ޚިޔާލުތައް ހިއްސާކުރެއްވުމަށް ވިޓްކޮފް ބުދަ ދުވަހު ސެއިންޓް ޕީޓަރސްބާގަށް ވަޑައިގަންނަވާނެ ކަމަށެވެ. ޒެލެންސްކީ އަދި ފިންލެންޑުގެ ރައީސް އަލެކްސަންޑަރ ސްޓޫބްއާއެކު އޮސްލޯގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން، ވިލާތުގެ އަދި އެމެރިކާގެ އޮފިޝަލުން އެކުލަވާލާފައިވާ ހުށަހެޅުންތަކާ ގުޅޭގޮތުން ވިޓްކޮފް ޚިޔާލު ބަދަލުކުރައްވާނެ ކަމަށާއި، މި ކަމުގެ ސަބަބުން ލީޑަރުންގެ ފެންވަރުގެ ބައްދަލުވުމަކަށް މަގުފަހިވެގެން ހިނގައިދާނެ ކަމަށް ސްޓޯރ ވަނީ ވިދާޅުވެފަ އެވެ.
ނޯވޭގައި ކުރިއަށްދިޔަ މަޝްވަރާތަކަކީ "ރަނގަޅު އަދި ބިނާކުރަނިވި" މަޝްވަރާތަކެއް ކަމަށް ސްޓޯރ ވިދާޅުވި އެވެ. ހަމަމިއާއެކު، ޔޫކްރެއިން ހަނގުރާމަ ނިންމުމަށް ކުރެވޭ ޑިޕްލޮމެޓިކް މަސައްކަތްތައް ކުރިއަށް ގެންދިއުމަށް ޓަކައި އެއްބާރުލުން ދެމެހެއްޓުމުގެ މުހިންމުކަން އޭނާ ވަނީ ފާހަގަކުރައްވާފަ އެވެ.
ވިލާތުގެ އިއްތިހާދު (އީޔޫ) އޮތީ ޔޫކްރެއިނަށް ފައިސާ ޚަރަދުކުރުމުން "ވަރުބަލިވެފައި" ކަމަށް ވިދާޅުވެ، ރަޝިޔާއާއެކު ހިނގަމުންދާ ހަނގުރާމަ ނިންމުމަށް އެއްބަސްވުމަކަށް އައުމަށް ޒެލެންސްކީއަށް ބާރުއަޅުއްވާފައިވާ ކަމަށް އަންގާރަ ދުވަހު ޓްރަމްޕް ވަނީ ވިދާޅުވެފަ އެވެ. އޮސްލޯގެ މަޝްވަރާތަކަށްފަހު ސުލްޙައިގެ މަރުހަލާ އަލުން އަމާޒަށް ރުޖޫއަވެއްޖެތޯ ސުވާލުކުރުމުން، "އަޅުގަނޑަށް ހީވަނީ މިހާރު ވާގޮތަކީ ރަޝިޔާއިން ބޭނުންވަނީ މި ކަން ނިންމާލަން،" ކަމަށް ޓްރަމްޕް ވަނީ ވިދާޅުވެފައެވެ.
"ރަޝިޔާއަކީ ބޮޑު މެޝިނެއް. އެ ޤައުމުން އެ ދަނީ ކުރިއަށް ޖެހެމުން. އެ ޤައުމުގައި ނިމުމެއް ނެތް މިންވަރަށް މީހުން [ސިފައިން] އެބަތިބި،" ޓްރަމްޕް ވިދާޅުވި އެވެ.
މަސްދަރު: އަނަދޮލު އޭޖެންސީ
