އިތުރު އެފް-16 ޖެޓު ހޯދަން ޒެލެންސްކީ ބެލްޖިޔަމްގެ އެހީތެރިކަމަށް އެދިވަޑައިގަންނަވައިފި
16 އޮކްޓޯބަރު 2026 | ހުކުރު 04:57ރަޝިޔާގެ ހަމަލާތަކާ ގުޅިގެން ޔޫކްރެއިނުގެ ހަކަތައިގެ ނިޒާމަށް ބޮޑެތި ގެއްލުންތަކެއް ލިބެމުންދާތީ، ވައިގެ ދިފާޢީ ނިޒާމު ވަރުގަދަކުރުމަށް އިތުރު އެފް-16 މަތިންދާބޯޓާއި ވަޒަން ހޯދުމަށް ބެލްޖިޔަމްގެ އެހީތެރިކަމަށް ރައީސް ޒެލެންސްކީ އެދިވަޑައިގަންނަވައިފި. މީގެ އިތުރުން، ހަނގުރާމައިގެ ޚަރަދުތަކަށް ރަޝިޔާއިން ބޭނުންކޮށްފާނެތީ، ހިފަހައްޓާފައިވާ އެ ޤައުމުގެ މުދާތައް އެ ގޮތުގައި ބެހެއްޓުމުގެ މުހިންމު ކަން ވެސް އޭނާ ފާހަގަކުރެއްވި
ޔޫކްރެއިންގެ ރައީސް ވޮލޮދްމީރް ޒެލެންސްކީ ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
ރަޝިޔާގެ ހަމަލާތައް ޔޫކްރެއިނުގެ ހަކަތައިގެ ބިނާރާއި އުމްރާނީ ވަސީލަތްތަކަށް އަމާޒުވަމުންދާ ދަނޑިވަޅެއްގައި، އިތުރު އެފް-16 މަރުކާގެ އަސްކަރީ މަތިންދާބޯޓުތަކާއި ވަޒަން ފޯރުކޮށްދިނުމަށް ބެލްޖިޔަމްގެ ރަސްގެފާނު ފިލީޕް އަދި ބޮޑުވަޒީރު ބާޓް ޑެ ވެއިވަރގެ އަރިހުން ޔޫކްރެއިންގެ ރައީސް ވޮލޮދްމީރް ޒެލެންސްކީ އެދިވަޑައިގަންނަވައިފި އެވެ.
ހަކަތައިގެ ވަސީލަތްތަކަށް ރަޝިޔާއިން ދެމުންދާ ހަމަލާތަކާ ގުޅިގެން ވޮލީން ސަރަހައްދުން ގާތްގަނޑަކަށް 15،000 މީހުން ކަރަންޓުގެ ޚިދުމަތުން މަހުރޫމުވެފައިވާ ކަމަށާއި، ވެރިރަށް ކީވް އަދި އެ ސިޓީގެ ވަށައިގެންވާ ބައެއް ސަރަހައްދުތަކުން ވެސް ބައެއް ވަގުތުތަކުގައި ކަރަންޓު ކެނޑެމުންދާ ކަމަށް، ބޮޑުވަޒީރު ޑެ ވެއިވަރއާ އެކު ބޭއްވެވި މަޝްވަރާތަކަށް އިޝާރާތްކުރައްވައި ބުރާސްފަތި ދުވަހުގެ ރޭ ޒެލެންސްކީ ވިދާޅުވި އެވެ.
ރަޝިޔާއިން ތަކުރާރުކޮށް ހަމަލާދީފާނެ ކަމުގެ ބިރު އޮތުމުގެ ސަބަބުން، ގެއްލުން ލިބިފައިވާ ބައެއް ސަރަހައްދުތަކުގައި މަރާމާތުކުރުމުގެ މަސައްކަތް ފެށުމަށް މަރާމާތުކުރާ ޓީމުތަކަށް ހުރަސްއެޅިފައިވާ ކަމަށް އޭނާ އިންޒާރުދެއްވި އެވެ.
ރަޝިޔާގެ ޖެޓް އިންޖީނު އެޅި ޑްރޯންތައް ހުއްޓުވުމުގައި އެފް-16 މަރުކާގެ މަތިންދާބޯޓުތަކުން މުހިންމު ދައުރެއް އަދާކުރަމުންދާ ކަމަށާއި، ވީހާވެސް އަވަހަކަށް އިތުރު މަތިންދާބޯޓުތައް ހޯދުމަށް ބެލްޖިޔަމްއާ ގުޅިގެން ޔޫކްރެއިނުން މަސައްކަތްކުރަމުންދާ ކަން ޒެލެންސްކީ ފާހަގަކުރެއްވި އެވެ. އަދި، އަސްކަރީ މަތިންދާބޯޓުތަކަށް އިތުރު ވަޒަން ފޯރުކޮށްދިނުމުގެ ފުރުސަތުތަކާ ގުޅޭގޮތުން ވެސް ދެ ޤައުމުގެ ލީޑަރުން މަޝްވަރާކުރެއްވި ކަމަށް އޭނާ ވިދާޅުވި އެވެ.
މިއާއެކު، ބެލްޖިޔަމްގެ ރަސްގެފާނު ފިލީޕްގެ އަރިހަށް ކުރެއްވި ޒިޔާރަތުގައި، ބެލްޖިއަމުން ޔޫކްރެއިނަށް ދެމުންގެންދާ މެދުކެނޑުމެއްނެތް އެހީތެރިކަމަށް ޓަކައި ޒެލެންސްކީ ޝުކުރުއަދާކުރެއްވި އެވެ. ރަޝިޔާއިން ދެމުންދާ މިސައިލާއި ޑްރޯން ހަމަލާތަކުން ދިފާޢުވުމަށް ޓަކައި ޔޫކްރެއިނުގެ ވައިގެ ދިފާޢީ ނިޒާމުތައް ވަރުގަދަކުރުމުގެ މުހިންމުކަން އޭނާ މި ބައްދަލުވުމުގައި ފާހަގަކުރެއްވި އެވެ.
ހަނގުރާމަ ކުރިއަށްދާ މުޅި މުއްދަތުގައި، ހިފަހައްޓާފައިވާ ރަޝިޔާގެ މުދާތައް އެ ގޮތުގައި ބެހެއްޓުމަށް ގޮވާލެއްވި ކަމަށް ވެސް ޒެލެންސްކީ ވިދާޅުވި އެވެ. އިތުރު ހަމަލާތަކަށް ޚަރަދުކުރުމަށް ނުވަތަ ވިލާތުގެ ސަރަޙައްދު ހަލަބޮލިކުރުމަށް ބޭނުންކުރެވިދާނެ މާލީ ވަސީލަތްތަކުގެ ބާރު މޮސްކޯއަށް އަލުން ލިބިގެން ނުވާނެ ކަމަށް އޭނާ ބަޔާންކުރެއްވި އެވެ.
މަސްދަރު: އަނަދޮލު އޭޖެންސީ
