ޔޫކްރެއިން މައްސަލައިގައި އެމެރިކާއާއި ޗައިނާއާއެކު ސަމިޓެއް ބާއްވަން ޕުޓިން ހުށަހަޅުއްވައިފި
19 އޮކްޓޯބަރު 2026 | ހޯމަ 03:12ޔޫކްރެއިން ހަނގުރާމަ ނިމުމަކަށް ގެނައުމާ ގުޅޭގޮތުން އެމެރިކާއާއި ޗައިނާގެ ރައީސުންނާއެކު ޚާއްސަ ސަމިޓެއް ބޭއްވުމަށް ރަޝިޔާގެ ރައީސް ލަފާދެއްވާފައިވާއިރު، މި ބައްދަލުވުން އޭޕެކް ސަމިޓުގެ ހަވާސާގައި ބޭއްވުމަށް ކްރެމްލިނުން ދަނީ މަސައްކަތް ކުރަމުން. މި މަޝްވަރާތަކުގެ ތެރެއިން ތެލުގެ ވިޔަފާރި ފުޅާކުރުމާއި ދަތިކުރުމުގެ ފިޔަވަޅުތަކަށް ލުއި ހޯދުމަށް ރަޝިޔާއިން އުންމީދުކުރި ނަމަވެސް، ބައްދަލުވުމުގެ އެޖެންޑާއާ މެދު ތިން ޤައުމުގެ މެދުގައި އަދި ރަސްމީ އެއްބަސްވުމަކަށް އާދެވިފައެއް ނުވޭ
ރަޝިޔާގެ ރައީސް ވްލަޑިމިޔަރ ޕުޓިން ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
މޮސްކޯއަށް ފަހިވާނޭ ގޮތަށް ޔޫކްރެއިން ހަނގުރާމަ ނިމުމަކަށް ގެނައުމުގެ މަގުސަދުގައި، އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގއާއެކު އަންނަ މަހު ތިން ބޭފުޅުންގެ ޚާއްސަ ސަމިޓެއް ބޭއްވުމަށް ރަޝިޔާގެ ރައީސް ވްލަޑިމިއާ ޕުޓިން ހުށަހަޅުއްވައިފި އެވެ. މި ކަން ފުރަތަމަ ރިޕޯޓުކޮށްފައި ވަނީ އެމެރިކާގެ ނޫހެއް ކަމަށްވާ ދި ވޯލް ސްޓްރީޓް ޖަރނަލުންނެވެ. ދުނިޔޭގެ އެންމެ ބޮޑު ތިން ބާރުގެ ވެރިން އެއް މޭޒަކަށް ގެނައުމަށް ޕުޓިން މި ހުށަހެޅުއްވުން ހުށަހެޅުއްވީ، ހަނގުރާމައިގެ ސަބަބުން ބައިނަލްއަގުވާމީ ގުޅުންތައް ނުތަނަވަސްވެފައިވާ ދަނޑިވަޅެއްގަ އެވެ.
މި މަޝްވަރާތަކުގެ ތަފުސީލު އިނގޭ ރަޝިޔާގެ ކުރީގެ ޖާސޫސީ އޮފިޝަލަކާ ހަވާލާދީ ޖާރނަލްއިން ހާމަކުރި ގޮތުގައި، ޕުޓިން މި ހުށަހެޅުން ހުށަހެޅުއްވީ އޮކްޓޫބަރު 9 ގައި ޓްރަމްޕާއެކު ފޯނުން ދެއްކެވި ވާހަކަފުޅުގަ އެވެ. އެ ދެ ބޭފުޅުންގެ މި މުއާމަލާތުގެ ތެރެއިން، އެމެރިކާއިން ރަޝިޔާގެ ޑީސަލް ގަތުމަށާއި ދުނިޔޭގެ ބާޒާރުގައި އެ ތެޔޮ ވިއްކުމަށް އެހީތެރިވެދިނުމުގެ އެއްބަސްވުމަކަށް ވެސް ވާސިލުވެވިފައިވެ އެވެ.
ކްރެމްލިންގެ ތަރުޖަމާނު ވިދާޅުވީ އަދި ވަކި ގޮތެއް ނުނިމޭ ކަމަށް
ތިން ޤައުމުގެ ވެރިން ބައިވެރިވެވަޑައިގަންނަވާ ބައްދަލުވުމަކާ ގުޅޭ ގޮތުން ވާހަކަތައް ދެކެވޭކަން ކްރެމްލިންގެ ތަރުޖަމާނު ދްމިތުރީ ޕެސްކޯވް ވަނީ ކަށަވަރުކޮށްދެއްވާފަ އެވެ. "އެ ފަދަ ބައްދަލުވުމެއް ބޭއްވުމުގެ މުހިންމުކަން އޮތް ކަމަށް ތިން ޤައުމުން ވެސް ގަބޫލުކުރި ނަމަވެސް، ބައްދަލުވުމާ ގުޅޭ ގޮތުން ނުވަތަ މަޝްވަރާކުރާނެ އެޖެންޑާއަކާ މެދު އަދި ސާފު އެއްބަސްވުމަކަށް ނާދެވޭ،" ޕެސްކޯވް ވިދާޅުވި އެވެ.
މި ސަމިޓް ބޭއްވުމަށް ޓްރަމްޕް އަދި ރަސްމީކޮށް އެއްބަސްވެވަޑައިގަންނަވާފައި ނުވާ ކަމަށް އެމެރިކާގެ އިސް އޮފިޝަލަކު ވިދާޅުވި އެވެ. ނަމަވެސް، ޔޫކްރެއިން ހަނގުރާމަ އަވަހަށް ނިންމަވާނެ ކަމަށް ވެވަޑައިގެންނެވި ކެމްޕޭން ވައުދު ފުއްދެވުމުގެ މަގުސަދުގައި، މި ފަދަ މަޝްވަރާއަކަށް ފުރުސަތު ދެއްވުމަށް ޓްރަމްޕް ފަސްޖެހިވަޑައިނުގަންނަވާނެ ކަމުގެ އިޝާރާތެއް އެ އޮފިޝަލް ދެއްވިއެވެ.
އޭޕެކްގެ ހަވާސާގައި ބައްދަލުވުން ބޭއްވުމުގެ ހުށަހެޅުމެއް
މި މަޝްވަރާތަކާ ގުޅުންހުރި ފަރާތްތަކުން ބުނާ ގޮތުގައި، ޗައިނާގެ ޝެންޒެންގައި ނޮވެންބަރު 18 އިން 19 އަށް އޮންނަ އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގެ ހަވާސާގައި މި ތިން ބޭފުޅުންގެ ބައްދަލުވުން ބޭއްވުމަށް ކްރެމްލިނުން ވަނީ ހުށަހަޅާފަ އެވެ. ރަޝިޔާގެ ޑިޕްލޮމެޓިކް މުއާމަލާތްތަކުގެ ތެރެއިން މި ހުށަހެޅުން ބެއިޖިންގއަށް ވެސް ހުށަހަޅާފައިވާއިރު، ޓްރަމްޕް ބައިވެރިވެވަޑައިގަންނަވާ ނަމަ އެ ކަމާ ދެކޮޅު ނުހަދާނެ ކަމަށް ޗައިނާއިން ބުނެފައިވާ ކަމަށް މޮސްކޯއާއި ބެއިޖިންގެ މަޝްވަރާތަކުގެ މައުލޫމާތު އެނގޭ ފަރާތްތަކުން ކަށަވަރުކޮށްދެ އެވެ.
ޓްރަމްޕާއި ޝީއާއެކު މި ފަދަ ސަމިޓެއް ބޭއްވުމުގެ ޝައުގުވެރިކަން މީގެ ކުރިން ވެސް އެކި ފަހަރު މަތިން ޕުޓިން ފާޅުކުރައްވާފައިވާ ކަމަށް ކުރީގެ ޖާސޫސީ އޮފިޝަލް ފާހަގަކުރި އެވެ.
ތެލުގެ ވިޔަފާރިއާއި ދަތިކުރުމުގެ ފިޔަވަޅުތައް މަޑުޖައްސައިލުން
އެމެރިކާގެ އިގުތިސާދަށް އުނދަގޫތަކާ ކުރިމަތިވެ، ކުރިއަށް އޮތް މިޑްޓަރމް އިންތިޚާބުގައި ރިޕަބްލިކަން ޕާޓީއަށް އޮތް ތާއީދު ދަށްވަމުންދާތީ، ތެލުގެ އަގު ކޮންޓްރޯލްކުރުމަށް ޓަކައި ރަޝިޔާގެ ޑީސަލް ގަތުމުގެ އެއްބަސްވުމެއް ޓްރަމްޕް ދާދިފަހުން ވަނީ ޕުޓިންއާއެކު ހައްދަވާފަ އެވެ. އަދި ދެ ޕާޓީގެ އިއްތިފާގުން ފާސްކޮށް މިދިޔަ މަހު ޓްރަމްޕް ތަސްދީގުކުރެއްވި ގާނޫނެއްގެ ދަށުން ރަޝިޔާއާ ދެކޮޅަށް އަޅަން ހަމަޖެހިފައިވާ ދަތިކުރުމުގެ ފިޔަވަޅުތައް ތަންފީޒުކުރުން ވެސް، މިދިޔަ ހުކުރު ދުވަހު އޭނާ ވަނީ ފަސްކުރައްވާފަ އެވެ.
މި ސަމިޓާ މެދު ޕުޓިން ގެންގުޅުއްވާ ތަސައްވުރަކީ ދެވަނަ ބޮޑު ހަނގުރާމައަށް ފަހު ދުނިޔެ ބައިކޮށް ނުފޫޒުގެ ދާއިރާތައް ކަނޑައެޅި 'ދެވަނަ ޔާލްޓާ ސަމިޓެއްގެ' ގޮތުގައި އެ ކަން ކުރުން ކަމަށް ކުރީގެ ޖާސޫސީ އޮފިޝަލް ސިފަކުރި އެވެ. ނަމަވެސް، އެއީ ހަގީގަތަކަށް ވާން ދަތި، އުންމީދީ އަމާޒެއް ކަމަށް އޭނާ ފާހަގަކުރެ އެވެ.
ބެއިޖިންގގެ ކަންބޮޑުވުންތަކާއި ޚާރިޖީ ހަމަހަމަކަން
އޭޕެކް ސަމިޓް މެދުވެރިކޮށް ދެކުނު އިރުމަތީ އޭޝިޔާ ސަރަހައްދުގައި ޗައިނާގެ އިސް ދައުރު ދައްކައިލުމަށް ބެއިޖިންގއިން ރާވާފައިވާ ރޭވުންތަކުގެ ސަމާލުކަން، މި ފަދަ ބޮޑު ޖިއޯޕޮލިޓިކަލް ހަމަނުޖެހުމަކަށް ބަދަލުވެގެން ހިނގައިދާނެ ކަމުގެ ކަންބޮޑުވުން ޗައިނާގެ އޮފިޝަލުންގެ މެދުގައި އެބައޮތް ކަމަށް މި މައްސަލައިގެ މައުލޫމާތު އެނގޭ ބައެއް ފަރާތްތަކުން ބުނެ އެވެ.
ޝީ މި ވަގުތު މަސައްކަތްޕުޅު ކުރައްވަމުން ގެންދަ ވަނީ ޕުޓިންއާ އޮތް ގާތް ގުޅުން ދަމަހައްޓަވަމުން، ހަމައެއާއެކު ޗައިނާގެ އިގުތިސާދަށް ކޮންމެހެން ބޭނުންތެރި ޔޫރަޕްގެ އިގުތިސާދީ ގުޅުންތަކަށް ލޮޅުމެއް ނާންނާނެހެން ދެ ފަރާތުގެ ހަމަހަމަކަން ދެމެހެއްޓެވުމަށެވެ.
މަސްދަރު: އަނަދޮލު އޭޖެންސީ
