ޖަލު އަދަބުން ސަލާމަތްވާން ނަތަންޔާހޫ އުޅެނީ އެމެރިކާ އަލުން ހަނގުރާމައިގެ ތެރެއަށް ވައްޓާލަން: ޢިރާޤިޗީ
19 އޮކްޓޯބަރު 2026 | ހޯމަ 06:47އީރާނާ ދެކޮޅަށް އަސްކަރީ ފިޔަވަޅު ނޭޅުމަށް އެމެރިކާއަށް އިންޒާރު ދެއްވަމުން، ނަތަންޔާހޫ މަސައްކަތް ކުރަނީ އަމިއްލަ ސަލާމަތަށް ޓަކައި އެމެރިކާ ހަނގުރާމައެއްގެ ތެރެއަށް ވައްޓާލަން ކަމަށް އީރާނުގެ ޚާރިޖީ ވަޒީރު ތުހުމަތު ކުރައްވައިފި. މި ދަނޑިވަޅަކީ އީރާނާ ދެކޮޅަށް ހަނގުރާމަ ކުރުމުގައި ނަތަންޔާހޫއަށް ޓްރަމްޕްގެ ތާއީދު އޮތްކަން ހާމަކޮށް، ދެ ޤައުމުގެ މަޝްވަރާތައް ހުއްޓި އަނެއްކާ ވެސް ހަމަލާތައް ބަދަލުކުރަން ފަށާފައިވާ ވަގުތެއް
އީރާނުގެ ޚާރިޖީ ވަޒީރު ޢައްބާސް ޢިރާޤިޗީ ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
ޖަލުގެ އަދަބުން ސަލާމަތްވުމަށް ޓަކައި އެމެރިކާއާއި އީރާން އިތުރު ހަނގުރާމައެއްގެ ތެރެއަށް ވައްޓައިލަން އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ މަސައްކަތްކުރަމުންދާ ކަމަށް ވިދާޅުވެ، އީރާނާ ދެކޮޅަށް އަލުން އަސްކަރީ ފިޔަވަޅުތައް ނޭޅުމަށް އެ ޤައުމުގެ ޚާރިޖީ ވަޒީރު ޢައްބާސް ޢިރާޤިޗީ ވޮޝިންގޓަނަށް އިންޒާރުދެއްވައިފި އެވެ.
"ޖަލަށް ދިޔުމުން ސަލާމަތްވުމަށް ޓަކައި ނަތަންޔާހޫ އެ ދަނީ އެމެރިކާ އިތުރު ހަނގުރާމައެއްގެ ތެރެއަށް ވައްޓައިލަން މަސައްކަތް ކުރަމުން،" އެކްސްގައި ކުރެއްވި ޕޯސްޓެއްގައި ޢިރާޤިޗީ ލިޔުއްވި އެވެ. މިއާއެކު، އިސްރާއީލަށާއި އެމެރިކާގެ ރައީސް ޑޮނަލްޑް ޓްރަމްޕަށް މީގެ ސަބަބުން ކުރިމަތިވެދާނެ ނަތީޖާތަކަށް އިސްރާއީލްގެ ވެރިޔާ ފަރުވާލެއް ނުބަހައްޓާ ކަމަށް ޢިރާޤިޗީ ތުހުމަތުކުރެއްވި އެވެ. "އެންމެ ފަހުން ތިޔަބައިމީހުން 'މަސައްކަތް ނިންމާލަން' ބޭނުންވި ފަހަރު، އީރާން ފެނިގެންދިޔައީ ކުރިއަށް ވުރެވެސް ވަރުގަދަކޮށް. އަނެއްކާ ވެސް ނަސީބުގެ އަޖުމަބަލަން ބޭނުންވަނީތޯ؟ މަރުހަބާ! އެކަމަކު ސަމާލުވާތި! އަޅުގަނޑުމެންގެ ވެސް ނުނިމި ހުރި މަސައްކަތްތަކެއް އެބަހުރި،" އެމެރިކާއަށް އިންޒާރު ދެއްވަމުން ޢިރާޤިޗީ ލިޔުއްވި އެވެ.
ޢިރާޤިޗީގެ މި ވާހަކަފުޅުތައް އަމާޒުކުރެއްވީ، އިސްރާއީލްގައި އޮކްޓޫބަރު 27 ގައި ބާއްވާ އިންތިޚާބުގެ ކުރިން، ނަތަންޔާހޫއަށް ތާއީދުކުރައްވައި ޓްރަމްޕް ދެއްކެވި ވާހަކަފުޅުތަކާ ގުޅިގެންނެވެ. އީރާނާ ދެކޮޅަށް ކުރިމަތިލުމުގައި ދެ މީހުންގެ މެދުގައި އޮތް ބައިވެރިވުމަށް ތައުރީފުކުރައްވައި، އިސްރާއީލްގެ ރައްޔިތުން އެހެން ލީޑަރަކު އިންތިޚާބުކޮށްފިނަމަ އެ މަސައްކަތް އެމެރިކާ އަމިއްލައަށް ކުރަން ޖެހިދާނެ ކަމަށް ޓްރަމްޕް ވަނީ ވިދާޅުވި އެވެ.
"އިސްރާއީލްގައި ހުންނެވީ ނުބައި ލީޑަރެއް ކަމަށްވާނަމަ، އަދި އެއީ ބީބީ [ނަތަންޔާހޫ] ފިޔަވައި އެހެން ކޮންމެ މީހަކަށް ވިޔަސް، އެމެރިކާއަށް މި މަސައްކަތް [އީރާނާ ދެކޮޅަށް ހަނގުރާމަ] ކުރަން ޖެހޭނީ އަމިއްލައަށް. އަދި، އަޅުގަނޑުމެން އެ ކަން [އެކަނި] ކުރާކަށް ބޭނުމެއް ނޫން،" ޓްރުތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ލިޔުއްވި އެވެ.
ނަތަންޔާހޫ މިހާރުގެ ސަރުކާރުގެ ވެރިކަމާ ހަވާލުވީ 2022 ގެ ފަހުކޮޅުން ފެށިގެން ކަމަށްވާއިރު، އެ ސަރުކާރަކީ އިސްރާއީލްގެ ތާރީޚުގައި ވެސް އެންމެ ކަނާތުފިޔައިގެ އަދި ހައްދުފަހަނައެޅި ސަރުކާރުގެ ގޮތުގައި ވަނީ ސިފަވެ އެވެ . ކުށް ސާބިތުވެއްޖެނަމަ ޖަލު ހުކުމެއް އަންނާނެ ކޮރަޕްޝަންގެ ދައުވާތަކެއްގެ ޝަރިޢަތް ނަތަންޔާހޫއާ ދެކޮޅަށް ހިނގަމުންދާއިރު، ފަލަސްތީނުގެ ޣައްޒާގައި ހިންގަމުންދާ ޤަތުލުއާންމާ ގުޅިގެން 2024 އިން ފެށިގެން އިންޓަނޭޝަނަލް ކޯޓް އޮފް ޖަސްޓިސްއިން ވެސް އޭނާ ހައްޔަރުކުރަން ވަނީ އަމުރު ނެރެފަ އެވެ. މި ދަނޑިވަޅުގައި، ވޯޓުފޮށީގެ ޒަރިއްޔާއިން ނަތަންޔާހޫގެ ސަރުކާރު ބަދަލުކުރުމުގެ މަސައްކަތުގައި، އިދިކޮޅު ޕާޓީތަކުން ވަނީ ގުޅުން ބަދަހިކޮށް ހަރަކާތްތައް ވަރުގަދަކޮށްފަ އެވެ.
އެމެރިކާއާއި އިސްރާއީލުން ފެބުރުވަރީ 28 ގައި އީރާނަށް އަސްކަރީ ހަމަލާތަކެއް ދިނުމާ ގުޅިގެން، ތެހެރާނުން ވެސް ވަނީ ބަދަލުހިފުމުގެ ހަމަލާތަކެއް ދީފަ އެވެ . އެޕްރީލު މަހު ހަނގުރާމަ ހުއްޓާލުމަކަށް އައިސް، ޖޫން މަހު އެއްބަސްވުމަކާ ހަމައަށް ވާސިލުވި ނަމަވެސް، ވޮޝިންގޓަނާއި ތެހެރާނާ ދެމެދު ކުރިއަށްދިޔަ މަޝްވަރާތައް ހުއްޓުމަކަށް އައުމުން ފަހުން އަނެއްކާ ވެސް ހަނގުރާމަ ވަނީ ފެށިފަ އެވެ.
މަސްދަރު: އަނަދޮލު އޭޖެންސީ
