ރަޝިޔާއާއެކު އަލުން މަޝްވަރާތައް ފަށަން އެމެރިކާއިން އިސްނަގައިގެން އޮސްލޯގައި ބޮޑު މަޝްވަރާތަކެއް
20 އޮކްޓޯބަރު 2026 | އަންގާރަ 05:55ޔޫކްރެއިން ހަނގުރާމަ ހުއްޓުވުމަށް އެކުލަވައިލާ ހުށަހެޅުމަކާ ގުޅޭގޮތުން މަޝްވަރާކުރުމަށް އެމެރިކާގެ މަންދޫބު ސްޓީވް ވިޓްކޮފް، ޒެލެންސްކީއާއި ވިލާތުގެ އިސްވެރިންނާ ނޯވޭގައި ބައްދަލުކުރައްވަނީ. މި ބައްދަލުވުމަށްފަހު ރަޝިޔާއަށް ދަތުރުކުރެއްވުމަށް ވިޓްކޮފް ރާއްވަވާފައިވާއިރު، މަޝްވަރާތަކަށް ޒެލެންސްކީ ނޫން އެހެން މަންދޫބަކު ހަމަޖެއްސުމަށް ޑޮނަލްޑް ޓްރަމްޕް ވަނީ ބާރުއަޅުއްވާފައި
އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް | އަނަދޮލު އޭޖެންސީ
ޔޫކްރެއިންގެ ރައީސް ވޮލޮދްމީރް ޒެލެންސްކީއާއެކު އަންގާރަ ދުވަހު މަޝްވަރާތައް ބޭއްވެވުމަށް ޓަކައި، އެމެރިކާގެ ޚާއްސަ މަންދޫބު ސްޓީވް ވިޓްކޮފް ނޯވޭއަށް ދަތުރުކުރައްވަމުން ގެންދަވާ ކަމަށް އެ ޤައުމުގެ މީޑިއާތަކުން ހޯމަ ދުވަހު ރިޕޯޓުކޮށްފި އެވެ.
އޮސްލޯގައި ބާއްވާ މި މަޝްވަރާތަކުގައި ޒެލެންސްކީގެ އިތުރުން ނޯވޭގެ ބޮޑުވަޒީރު ޔޯނަސް ގާ ސްޓޯއާއި، އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް އަދި ޕޮލެންޑް ހިމެނޭ އީ4 ގެ ޤައުމުތަކުގެ މަންދޫބުންނާއި، ވިލާތުގެ އިއްތިހާދު (އދ) އަދި ނޭޓޯ ބައިވެރިވާނެ ކަމަށް ބެލެވޭ ކަމަށް އެމެރިކާގެ އޮފިޝަލަކާ ހަވާލާދީ އެ ރިޕޯޓުތަކުގައި ބަޔާންކޮށްފައިވެ އެވެ. މި ބައްދަލުވުމުގެ މައިގަނޑު ބޭނުމަކީ ރަޝިޔާއާއެކު އަލުން މަޝްވަރާތައް ފެށުމަށް އަސާސެއްގެ ގޮތުގައި ބޭނުންކުރެވިދާނެ ފުރިހަމަ ހުށަހެޅުމެއް އެކުލަވައިލުމުގައި ގުޅިގެން މަސައްކަތްކުރުން ކަމަށް އެ އޮފިޝަލު ވިދާޅުވި އެވެ.
މި މަޝްވަރާތަކުގެ ކުރިން، މިހާތަނަށް ހޯދިފައިވާ ކުރިއެރުންތައް ދިރާސާކުރެއްވުމަށާއި ދެން އަޅާނެ ފިޔަވަޅުތަކާ ގުޅޭގޮތުން ވާހަކަފުޅު ދެއްކެވުމަށް ޓަކައި، ވިޓްކޮފް އަދި ރައީސް ޑޮނަލްޑް ޓްރަމްޕްގެ ދަނބިދަރިކަލުން ޖެރަޑް ކުޝްނަރ ވަނީ އާދީއްތަ ދުވަހު ޒެލެންސްކީއާ މަޝްވަރާކުރައްވާފަ އެވެ. ނަމަވެސް، ކުޝްނަރއަށް ރޯގާ ޖެހިފައިވާތީ، ބަލި ފެތުރުނަ ނުދިނުމުގެ ގޮތުން މީހުންނާ ބައްދަލުކުރެއްވުމުން ދުރުހެލިވެވަޑައިގަންނަވާތީ، އޮސްލޯގެ މަޝްވަރާތަކުގައި އޭނާ ބައިވެރިވެވަޑައިގަންނަވާނީ ވަރޗުއަލްކޮށް ކަމަށް އެ އޮފިޝަލާ ހަވާލާދީ ރިޕޯޓުތަކުގައި ބުނެފައިވެ އެވެ.
އޮސްލޯގެ ބައްދަލުވުންތަކަށް ފަހު، ރަޝިޔާގެ ރައީސް ވްލަޑިމިޔަރ ޕުޓިންއާ ބައްދަލުކުރައްވައި، ޔޫކްރެއިނާއި ވިލާތުގެ ބައިވެރިންނާ މަޝްވަރާކޮށްގެން އެކުލަވައިލެވުނު ޚިޔާލުތައް ހުށަހެޅުއްވުމުގެ އުންމީދުގައި ވިޓްކޮފް ރަޝިޔާއަށް ދަތުރުކުރެއްވުމަށް ރާއްވަވަމުން ގެންދަވާ ކަމަށް އެ އޮފިޝަލު ވިދާޅުވި އެވެ.
ޔޫކްރެއިންގެ މައްސަލަ ހައްލުކުރުމަށް އެމެރިކާއިން ކުރަމުންދާ މެދުވެރިއެއްގެ މަސައްކަތްތަކަށް ރަޝިޔާއިން ވަރަށް ބޮޑަށް އަގުވަޒަންކުރާ ކަމަށް ކްރެމްލިންގެ ތަރުޖަމާނު ދްމިތުރީ ޕެސްކޮވް ހޯމަ ދުވަހު ވިދާޅުވި އެވެ. މި މައްސަލައަށް ދާއިމީ ހައްލެއް ހޯދުމަށް ޓަކައި ޒިންމާ ނަގަން ތައްޔާރަށް ހުރި ކީވްގެ މަންދޫބަކު ބައިވެރިވާންޖެހޭނެ ކަމަށް، މޮސްކޯގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޕެސްކޮވް ވިދާޅުވި އެވެ.
މިއާއެކު، ކީވްގެ ފަރާތުން މަޝްވަރާކުރުމަށް ޒެލެންސްކީ ނޫން އެހެން ފަރާތަކަށް ފުރުސަތު ދޭންވީ ވަގުތު ޖެހިފައި އޮވެދާނެ ކަމަށް ޓްރަމްޕް ވިދާޅުވި އެވެ. "އަޅުގަނޑު ދެކޭގޮތުގައި ޔޫކްރެއިންގެ ފަރާތުން އެހެން މީހަކު މަޝްވަރާކުރަންވީ ވަގުތު މިއޮތީ ޖެހިފައި، ސަބަބަކީ ކޮބައިތޯ؟ ވަރަށް ގިނަ އަދަދެއްގެ ބަޔަކު މަރުވެއްޖެ. އެ ޤައުމުގެ ފިރިހެން އާބާދީ ދަނީ ގެއްލެމުން،" އޭނާ ވިދާޅުވި އެވެ. "މަޝްވަރާތަކަށް އެހެން މީހަކު ހަމަޖެއްސުމުގެ ވަގުތު ޒެލެންސްކީއަށް ޖެހިފައި އޮވެދާނެ."
މަސްދަރު: އަނަދޮލު އޭޖެންސީ
