ބޮމެއް އޮތް ކަމަށް ބުނުމުން އިސްރާއީލުން ފުރި މަތިންދާބޯޓެއް ބަލްގޭރިޔާއަށް ކުއްލި ހާލަތުގައި ޖައްސައިފި

އިސްރާއީލުން ފުރައިގެން އޮސްޓްރިޔާގެ ވިއެނާއަށް ދަތުރުކުރި އޮސްޓްރިޔަން އެއާލައިންސްގެ ފްލައިޓަކަށް ބޮމުގެ އިންޒާރެއް ލިބުމާ ގުޅިގެން، އަސްކަރީ މަތިންދާބޯޓުތަކުގެ ހިމާޔަތުގައި އާދީއްތަ ދުވަހުގެ ރޭ ދަންވަރު އެ ބޯޓު ބަލްގޭރިޔާއަށް ކުއްލި ހާލަތުގައި ޖައްސައިފި އެވެ. މި ކަން ފުރަތަމަ ރިޕޯޓުކޮށްފައި ވަނީ އިސްރާއީލުގެ 'ވައިނެޓް' ނޫހުންނެވެ. ތެލް އަވީވުން ފުރި OS82 ނަންބަރު އެއާބަސް A320 މަރުކާގެ މި ބޯޓު، 51 ފަސިންޖަރުންނާއި ހަ ފަޅުވެރިންނާއެކު ބަލްގޭރިޔާގެ ވެރިރަށް ސޯފިޔާއަށް ރައްކާތެރިކަމާއެކު ޖައްސާފައިވާ ކަމަށް އެ އެއާލައިނުން ވަނީ ކަށަވަރުކޮށްދީފަ އެވެ.

އިސްރާއީލުން އެ ބޯޓު ފުރިފަހުން، އޭގައި ބޮމެއް އޮތް ކަމަށް ބުނެ އޮސްޓްރިއާގެ ރައްޔިތަކު އޮސްޓްރިޔަން އެއާލައިންސަށް އިންޒާރު ދީފައިވާ ކަމަށް ވައިނެޓުން ވަނީ ރިޕޯޓުކޮށްފަ އެވެ. މި އިންޒާރު ދިން މީހާއަކީ އެ ބޯޓުގެ ފަސިންޖަރެއް ނޫން ކަމަށް އެ ނޫހުން ބުންޏެވެ. ބޯޓުގެ މިސްރާބު ބަދަލުކުރަން ޖެހުނީ ވަނަވަރު ނޭނގޭ ފަރާތަކުން ދިން ބޮމުގެ އިންޒާރަކާ ގުޅިގެން ކަމަށް، އެހެން ފަސިންޖަރުން ބުންޏެވެ. އަދި, އދ. ގައި ވާހަކަދެއްކުމަށް ހަމަޖެހިފައިވާ ޒުވާނުންގެ ވަފުދެއް ވެސް އެ ބޯޓުން ދަތުރުކުރި މީހުންގެ ތެރޭގައި ހިމެނޭ ކަމަށް އެ ނޫހުން ވަނީ ރިޕޯޓުކޮށްފަ އެވެ.

Advertisement

ރުމޭނިޔާގެ ބޯޑަރު ކައިރިން ބޯޓު ދަތުރުކުރަމުން ދަނިކޮށް ބޮމުގެ އިންޒާރެއް ލިބިފައިވާ ކަމަށް ފަޅުވެރިން މައުލޫމާތު ދިނުމުން، ބޯޓުގެ މިސްރާބު ސޯފިޔާއަށް ބަދަލުކުރަން ނިންމީ ކަމަށް ބަލްގޭރިޔާގެ ދަތުރުފަތުރާ ބެހޭ ވުޒާރާއިން ބުންޏެވެ. ސްޕެއިންގައި ހުންނަ ނޭޓޯގެ ކޮމްބައިންޑް އެއާ އޮޕަރޭޝަންސް ސެންޓަރާ ގުޅިގެން ހިންގި އޮޕަރޭޝަނެއްގައި، ބޯޓު އެއާޕޯޓަށް ގެންދިއުމަށް ޓަކައި އެ ބޯޓަށް ހިމާޔަތް ދިނުމަށް މިގް-29 މަރުކާގެ އަސްކަރީ މަތިންދާބޯޓުތައް ފޮނުވި ކަމަށް ބަލްގޭރިޔާގެ ދިފާޢީ ވުޒާރާއިން ބުންޏެވެ.

ބޯޓު ޖެއްސުމާއެކު ފަސިންޖަރުން ބޯޓުން ބާލާފައިވާއިރު، ބަލްގޭރިޔާގެ ކަމާބެހޭ އިދާރާތަކުން ވަނީ އެ ބޯޓުގެ ސަލާމަތީ ކަންކަން ޗެކްކުރުމުގެ މަސައްކަތް ފަށައިފަ އެވެ. ސަލާމަތީ ގޮތުން ބަލަންޖެހޭ ކަންކަން ބެލުމަށް ފަހު ފަސިންޖަރުންނަށް އެހެން ފްލައިޓްތަކުން ދަތުރުކުރެވޭނެ އިންތިޒާމު ހަމަޖައްސައިދޭނެ ކަމަށް، ލުފްތަންސާ ގްރޫޕުގެ ދަށުން ހިންގާ އޮސްޓްރިޔަން އެއާލައިންސުން ބުންޏެވެ. ތަހުގީގުގެ ނަތީޖާ ކަމާބެހޭ އިދާރާތަކުން އަދި ހާމަކޮށްފައި ނުވި ނަމަވެސް، ފުރަތަމަ ލިބުނު ނިޝާންތަކަށް ބަލާއިރު އެއީ ދޮގު އިންޒާރަކަށް ވުން އެކަށީގެންވާ ކަމަށް 'ވައިނެޓް' އިން ވަނީ ރިޕޯޓުކޮށްފަ އެވެ.

މި ހާދިސާ ހިނގާފައި މިވަނީ، ނިއުޔޯކުން ފުރައިގެން އިސްރާއީލުގެ ބެން ގޫރިއަން އެއާޕޯޓަށް ވޭތުވެދިޔަ އަންގާރަ ދުވަހު ޖެއްސި ޑެލްޓާ އެއާ ލައިންސްގެ ފްލައިޓަކަށް ވެސް މިފަދަ ބޮމުގެ ބިރުވެރިކަމެއް ކުރިމަތިވެފައި ވަނިކޮށެވެ. ވަނަވަރު ނޭނގޭ ފަރާތަކުން ދިން އިންޒާރަކާ ގުޅިގެން، އެ ފްލައިޓުން ފަސިންޖަރުން ބޭލުމަށްފަހު، ބޯޓު ޗެކްކުރުމަށް ވަކި ޚާއްސަ ސަރަހައްދަކަށް ގެންދިޔަ އެވެ. އަދި, ސަލާމަތީ ގޮތުން ބެލި ބެލުމުން އެއީ ދޮގު އިންޒާރެއްކަން ފަހުން ވަނީ ކަށަވަރުވެފަ އެވެ.