އީރާނުގެ ބަނދަރަކުން ފުރަން އުޅުނު އާގުބޯޓަކަށް އެމެރިކާގެ އަސްކަރިއްޔާއިން ހަމަލާދީފި

އީރާނާ ދެކޮޅަށް ވޮޝިންގޓަނުން އަޅާފައިވާ ކަނޑުގެ ހިސާރު ފޫއަޅުވާލަން މަސައްކަތްކޮށް، ތަކުރާރުކޮށް ދިން އިންޒާރުތަކަށް ބޯނުލެނބުމުގެ ސަބަބުން، ހޮނިހިރު ދުވަހު އޮމާން ކަނޑުގެ ސަރަހައްދުގައި ދަތުރުކުރަމުންދިޔަ ވިޔަފާރި މުދާ އުފުލާ އާގުބޯޓަކަށް އެމެރިކާގެ ސިފައިން ހަމަލާދީ އެ ބޯޓު ހުއްޓުވައިފި އެވެ.

ޕެނަމާގެ ދިދައިގެ ދަށުން ދަތުރުކުރަމުންދިޔަ 'އެމްވީ އޯޝަން މޮލިކާ' ނުވަތަ 'އަރީކާ ސަން' ގެ ނަން ދީފައިވާ އުޅަނދަށް އެމެރިކާގެ އަސްކަރީ މަތިންދާބޯޓުތަކުން ހަމަލާދީ، އެ ބޯޓުގެ އިންޖީނު ހުއްޓުވާލާފައިވާ ކަމަށް އެމެރިކާގެ ސެންޓްރަލް ކޮމާންޑުން (ސެންޓްކޮމް) ބުންޏެވެ. މި ހަމަލާގައި ބޯޓުގެ އެއްވެސް ފަޅުވެރިއަކަށް ގެއްލުމެއް ލިބިފައިނުވާ ކަމަށް ވެސް އަސްކަރިއްޔާއިން ބުންޏެވެ. އަދި، މި ބޯޓު ހުއްޓުވާފައި ވަނީ އީރާނުގެ ބަނދަރަކުން ފުރައިގެން ސަރަހައްދީ ކަނޑުގެ މަގުން ދަތުރުކުރަން އުޅެނިކޮށް ކަމަށް ވެސް ސެންޓްކޮމުން ބުންޏެވެ.

Advertisement

މި ހާދިސާ ހިނގާފައި ވަނީ، ޖުލައި 8 ގައި އެމެރިކާއިން އަލުން އީރާނަށް ހަމަލާތައް ދޭން ފެށުމާ ގުޅިގެން ކަނޑުގެ މަގު ބަންދުކޮށްފައިވާ ކަމަށް އީރާނުން ބުނިތާ ދެ ދުވަސް ފަހުން، ޖުލައި 14 ވަނަ ދުވަހު ވޮޝިންގޓަނުން އީރާނުގެ ބަނދަރުތަކާ ދެކޮޅަށް އަލުން ފެށި ހިސާރުގެ ތެރެއިންނެވެ. މި ހިސާރު ތަންފީޒުކުރަން ފެށިފަހުން ވޭތުވެދިޔަ ތިން މަސް ދުވަހުގެ ތެރޭގައި ވިޔަފާރި މުދާ އުފުލާ ހަތަރު ބޯޓެއް ހުއްޓުވައި، 135 ބޯޓު އަނބުރާ ފޮނުވާލާފައިވާ ކަމަށް ސެންޓްކޮމުން ބުންޏެވެ. މީގެ އިތުރުން، ހަމަ މި މުއްދަތުގެ ތެރޭގައި އިސްލާމިކް ރިވޮލޫޝަނަރީ ގާޑް ކޯގެ (އައިއާރުޖީސީ) ތެޔޮ އުފުލާ ވިއުގަޔާ ގުޅުންހުރި 10 ޓޭންކަރެއް އެމެރިކާގެ ސިފައިން ނައްތާލާފައިވާ ކަމަށް ވެސް، އެމެރިކާގެ އަސްކަރިއްޔާއިން ބުންޏެވެ.

މީގެ އިތުރުން، ހުރްމުޒް ކަނޑުއޮޅީގައި ދަތުރުކުރަމުންދިޔަ ޓޭންކަރަކަށް ހަމަލާދިނުމުގެ ސަބަބުން އެ އުޅަނދުގައި އަލިފާން ރޯވެފައިވާ ކަމަށް، ޔޫކޭ މެރިޓައިމް ޓްރޭޑް އޮޕަރޭޝަންސްއިން (ޔޫކޭއެމްޓީއޯ) އާދީއްތަ ދުވަހު ބުންޏެވެ. މި ހާދިސާގައި ބޯޓުގެ ފަޅުވެރިންނަށް އެއްވެސް ގެއްލުމެއް ލިބިފައިނުވާ ކަމަށް ރިޕޯޓުކޮށްފައިވެ އެވެ. އީރާނުން ހުއްދަކޮށްފައި ނުވާ މަގަކުން ކަނޑުއޮޅި ހުރަސްކޮށް ދާން އުޅުނު ތެޔޮ އުފުލާ ބޮޑު ޓޭންކަރެއް ކަނޑުމަތީގެ މައިންއެއްގައި ޖެހި ގޮވާފައިވާ ކަމަށް، އައިއާރުޖީސީން ހޮނިހިރު ދުވަހުގެ ރޭ ވަނީ ބުނެފަ އެވެ. ޔޫކޭއެމްޓީއޯ އަދި އައިއާރުޖީސީން ރިޕޯޓުކޮށްފައި ވަނީ، އެއް ބޯޓެއްގެ ވާހަކަ ކަމެއް، ނުވަތަ މި ހާދިސާތަކާއި 'އޯޝަން މޮލިކާ' އަށް އެމެރިކާއިން ދިން ހަމަލާއާ ގުޅުމެއް ވާކަން ކަށަވަރުކުރެވިފައެއް ނުވެ އެވެ.

ހިސާރުގެ އިރުޝާދުތަކަށް އަމަލުކުރުމަށް ސެންޓްކޮމުން ވިޔަފާރި އުޅަނދުފަހަރަށް އިންޒާރުދީފައިވާއިރު، އޮމާން ކަނޑާއި ހުރްމުޒް ކަނޑުއޮޅި ސަރަހައްދުގައި ހަރަކާތްތެރިވާ ފަޅުވެރިން ކަނޑުމަތީގެ އެންގުންތަކަށް ސަމާލުވުމަށާއި އެމެރިކާގެ ކަނޑުގެ ސިފައިންނާ ގުޅުން ބޭއްވުމަށް ވަނީ ގޮވާލާފަ އެވެ. އީރާނުގެ ކަމާބެހޭ ފަރާތްތަކުން ކަނޑައަޅާފައިވާ މަގުތައް ފިޔަވައި އެހެން މަގުތަކުން ދަތުރުކުރާ އުޅަނދުފަހަރަށް، ނުވަތަ ތެހްރާނުގެ ހުއްދައާ ނުލައި ކަނޑުއޮޅި ހުރަސްކުރަން މަސައްކަތްކުރާ ބޯޓުފަހަރަށް ހަމަލާދޭނެ ކަމުގެ އިންޒާރު ތެހެރާނުން ވެސް ވަނީ ދީފަ އެވެ.

ފެބުރުވަރީ 28 ގައި އެމެރިކާއާއި އިސްރާއީލުން އީރާނާ ދެކޮޅަށް ފެށި ޣައިރުގާނޫނީ ހަނގުރާމައިގައި 3،000 އަށް ވުރެ ގިނަ މީހުން ޝަހީދުކޮށްލާފައިވާ ކަމަށް ތެހެރާނުން ބުނެ އެވެ. އެޕްރީލް މަހު ހަމަލާތައް ބަދަލުކުރުން ހުއްޓާލުމުގެ ވަގުތީ އެއްބަސްވުމަކަށް އައުމުގެ ކުރިން، އީރާނުން ދިން ރައްދު ހަމަލާތަކުގައި އެމެރިކާ ސިފައިންނާއި އިސްރާއީލްގެ ރައްޔިތުން ވަނީ މަރުވެފަ އެވެ. ޖޫން މަހު ފްރޭމްވޯކް އެއްބަސްވުމެއްގައި ސޮއިކޮށްފައިވީ ނަމަވެސް، ވޮޝިންގޓަނާއި ތެހެރާނާ ދެމެދު ކުރިއަށްދިޔަ މަޝްވަރާތައް މަޑުޖެހިފައިވާ ދަނޑިވަޅެއްގައި، އެމެރިކާއިން ވަނީ އީރާނުގެ އަމާޒުތަކަށް އިތުރު ހަމަލާތަކެއް ދީފަ އެވެ. އިސްތިރާޖީ ގޮތުން މުހިންމު މި ކަނޑުއޮޅީގައި ދަތުރުފަތުރުކުރުމާ ގުޅޭގޮތުން އުފެދިފައިވާ ޚިޔާލުތަފާތުވުންތަކުގެ ސަބަބުން، މަޝްވަރާތައް ވަނީ ކުރިއަށް ނުގޮސް ހުއްޓިފަ އެވެ.