ހުރްމުޒް ކަނޑުއޮޅީގެ ނުތަނަވަސްކަން ބޮޑުވެ، ތިންވަނަ ތެޔޮ ޓޭންކަރެއް މައިނެއްގައި ޖެހި ރޯވެއްޖެ
12 އޮކްޓޯބަރު 2026 | ހޯމަ 05:12ހުރްމުޒް ކަނޑުއޮޅިން ދަތުރުކުރާ އުޅަނދުފަހަރު ނެވިގޭޝަން ނިޒާމު ނިއްވާލައިފިނަމަ އެއީ ދުޝްމަނުންގެ އުޅަނދުތަކެއްގެ ގޮތުގައި ބަލާނެކަމުގެ އިންޒާރު އީރާނުން ވަނީ އާކޮށްފައި. އެމެރިކާއާއެކު ވެފައިވާ އެއްބަސްވުންތަކަށް އަމަލުކުރުން ހުއްޓިފައިވާއިރު، ހުއްދަނެތި އެ ސަރަހައްދުން ދަތުރުކުރާ އުޅަނދުތަކަށް ހަމަލާދޭނެ ކަމަށް ބުނެ ތެހެރާނުން ވަނީ އިންޒާރު ދީފައި
ހުރްމުޒް ކަނޑުއޮޅި ހުރަސްކުރަން އުޅުމުގެ ތެރެއިން މައިނެއްގައި ޖެހި، އަލިފާން ރޯވެފައިވާ ތެޔޮ ޓޭންކަރެއް | ޕްރެސް ޓީވީ
ހުރްމުޒް ކަނޑުއޮޅި ހުރަސްކުރަން މަސައްކަތްކުރި ތެޔޮ ޓޭންކަރެއް މައިނެއްގައި ޖެހި، އެ އުޅަނދުގެ އިންޖީނު ރޫމުގައި ގޮވުމެއް ގޮވާފައިވާ ކަމަށް އީރާނުގެ އިސްލާމިކް ރިވޮލޫޝަނަރީ ގާޑް ކޯގެ (އައިއާރްޖީސީ) ކަނޑުގެ ސިފައިން އާދީއްތަ ދުވަހު ހާމަކޮށްފި އެވެ.
ގާތްގަނޑަކަށް ދެ މިލިޔަން ފީފާގެ ތެޔޮ އުފުލުމުގެ ގާބިލުކަން ލިބިފައިވާ މި ސުޕަޓޭންކަރު، މި މުހިންމު ކަނޑުއޮޅިން ދަތުރުކުރަން މަސައްކަތްކުރީ އޭގެ ނެވިގޭޝަން ނިޒާމު ނިއްވާލައިގެން ކަމަށް އައިއާރްޖީސީގެ ކަނޑުގެ ސިފައިން ނެރުނު ބަޔާނެއްގައި ބުންޏެވެ. މިއީ، ހޮނިހިރު ދުވަހުން ފެށިގެން ހުރްމުޒް ކަނޑުއޮޅީގެ މަނާ މަގުތަކުން ދަތުރުކުރަނިކޮށް މައިނެއްގައި ޖެހުނު ތިންވަނަ އުޅަނދު ކަމަށް ވެސް އެ ބަޔާނުގައި ބުނެފައިވެ އެވެ. ނަމަވެސް، މި ބަޔާނުގައި އެ އުޅަނދަކީ ކޮބައިކަމެއް، ނުވަތަ އެއީ ކޮން ޤައުމެއްގެ، ނުވަތަ ކޮން ޤައުމެއްގެ ދިދައެއްގެ ދަށުން ދަތުރުކުރި އުޅަނދެއްކަން ހާމަކޮށްފައެއް ނުވެ އެވެ.
މި ކަނޑުއޮޅިން ދަތުރުކުރާއިރު ނެވިގޭޝަން ނިޒާމު ނިއްވާލާ އުޅަނދުފަހަރަކީ "ދުޝްމަނުންގެ އުޅަނދުފަހަރު" ގެ ގޮތުގައި ކަނޑައަޅާނެކަމުގެ އިންޒާރު އައިއާރްޖީސީގެ ކަނޑުގެ ސިފައިން ވަނީ އާކޮށްފަ އެވެ. މި އިއުލާނު ނެރެފައި މި ވަނީ، އެމެރިކާގެ ސިފައިން އީރާނުގެ މައިންތައް ނެގުމަށްފަހު، ހުރްމުޒް ކަނޑުއޮޅީގެ ބައިނަލްއަގުވާމީ ޝިޕިންގ ރޫޓުތައް އަލުން ހުޅުވާލާފައިވާ ކަމަށް އޮގަސްޓް މަހުގެ ފަހުކޮޅު އެމެރިކާގެ ސެންޓްރަލް ކޮމާންޑުން (ސެންޓްކޮމް) ބުނެފައި ވަނިކޮށެވެ.
ޖުލައި 8 ގައި އެމެރިކާއިން އަލުން އީރާނަށް ހަމަލާތައް ދޭން ފެށުމާ ގުޅިގެން، ކަނޑުއޮޅި އަނެއްކާ ވެސް ބަންދުކޮށްފައިވާ ކަމަށް އީރާނުން ވަނީ ޖުލައި 12 ގައި އިއުލާނުކޮށްފަ އެވެ. އީރާނުގެ ކަމާބެހޭ ފަރާތްތަކުން ކަނޑައަޅާފައިވާ މަގުތައް ފިޔަވައި އެހެން މަގުތަކުން ދަތުރުކުރާ އުޅަނދުފަހަރަށް، ނުވަތަ ހުއްދައާ ނުލައި ކަނޑުއޮޅި ހުރަސްކުރަން މަސައްކަތްކުރާ އުޅަނދުފަހަރަށް ހަމަލާދޭނެ ކަމުގެ އިންޒާރު ވެސް ތެހެރާނުން ވަނީ ދީފަ އެވެ.
އެމެރިކާއާއި އިސްރާއީލުން އީރާނާ ދެކޮޅަށް ޣައިރުގާނޫނީ ހަނގުރާމައެއް ފަށާފައި ވަނީ ފެބުރުވަރީ 28 ގަ އެވެ. މި ކަމަށް ރައްދުދިނުމުގެ ގޮތުން ތެހެރާނުން ވަނީ މުޅި ސަރަހައްދަށް މިސައިލާއި ޑްރޯން ހަމަލާތައް ދީ، ހުރްމުޒް ކަނޑުއޮޅި ބަންދުކޮށްފަ އެވެ. އަދި, އޭގެ ފަހުން ވޮޝިންގޓަނުން ވަނީ އީރާނުގެ ބަނދަރުތައް ހިސާރުކޮށްފަ އެވެ. އޭގެ ފަހުން އެމެރިކާއާއި އީރާނުން ވަނީ ކަނޑުއޮޅީގައި މިނިވަންކަމާއެކު ދަތުރުފަތުރުކުރުމާ ގުޅޭގޮތުން ޖޫން މަހު ފަހުމުނާމާއެއްގައި ސޮއިކޮށްފަ އެވެ. ނަމަވެސް، މި މުހިންމު ކަނޑުއޮޅީގެ ސަލާމަތާއި ރައްކާތެރިކަމާ ގުޅޭގޮތުން އުފެދުނު ޚިޔާލުތަފާތުވުންތަކާ ހެދި އެ އެއްބަސްވުން ތަންފީޒުކުރުން ވަނީ ހުއްޓިފަ އެވެ.
މަސްދަރު: އަނަދޮލު އޭޖެންސީ
