ނިޒާމުތައް ބޮއްސުންލާ އެންމެ އާދައިގެ ދިރިއުޅުމަށްވެސް ދިވެހިން ސަލާން ޖަހަނީ!

ދިވެހިރާއްޖޭގެ ޙާލަތުފެނި ހިތާމަކުރަމެވެ. ރައްޔިތުން ބިކަވެއްޖެ އެވެ. ރައްކާތެރިކަމެއް ނެތެވެ. ހިނގާބިގާވެ އުޅުމަށް ނުކުޅަދާނަވާވަރަށް އަމަން ގެއްލިއްޖެ އެވެ.

މާބަނޑު އަންހެނުންނަށް ބޭނުންވާ އެންމެ އަސާސީ ބޭސްފަރުވާއާއި ބޭސް ލިބުމުގައި ދަތިތަކާ ކުރިމަތިލާންޖެހިފައިވާއިރު، ބޭރު ފައިސާގެ ބާޒާރުގައި ޑޮލަރުގެ އަގު ވަނީ އިންތިހާއަށް އުފުލިފަ އެވެ. ޑޮލަރެއް ނުލިބެ އެވެ. އެކަށީގެންވާ އުޖޫރައެއް ލިބޭ ވަޒީފާއެއް ހޯދުމަށްޓަކައި ތަހައްމަލުކުރަން ޖެހޭ ތަކްލީފް އިންތިހާއަށް ބޮޑެވެ. ވަޒީފާ އެއް ލިބެން އޮތީ އަޅުދާސްވެގެންނެވެ.  ރައްޔިތުންގެ ދިރިއުޅުމުގެ ހާލަތު ވަނީ މީގެކުރިން ދުވަހަކުވެސް ނުވެއްޓޭހާ ނާޒުކު ފައްތަރަކަށް ވެއްޓިފަ އެވެ.

ސައީދުގެ ބަނޑުހައިހޫނުކަމުގެ ހަޅުތާލަކީ މިއަދުގެ ހާލަތު ވަޒަންކޮށްދޭ ބޮޑު ހެއްކެކެވެ. ރާއްޖޭގެ އެއްވެސް ރަށެއްގައި އަމާންކަމާއި ހަމަޖެހުމާއެކު ދިރިއުޅެވޭކަށް ނެތެވެ. ފުލުހުންގެ ޚިދުމަތަށް ބޮޑު ބަޖެޓަކާއި ގިނަ އަދަދެއްގެ ވަސީލަތްތައް ފޯރުކޮށްދީފައި ވީނަމަވެސް، ފެންނަ ނަތީޖާ ވަރަށް ދަށެވެ. ވަކިން ހާއްސަކޮށް ވެރިރަށް މާލޭގެ އަމަންއަމާންކަމުގެ ހާލަތު އޮތީ އިންތިހާއަށް ގޯސްވެފަ އެވެ.

ގޭންގު ކުށްތަކާއި މަސްތުވާތަކެތީގެ މައްސަލަތައް ހައްލުކުރުމުގެ ވައުދާއެކު އައި ސަރުކާރަށް މިކަމުގައި އެދެވޭ އެއްވެސް ނަތީޖާއެއް ނުނެރެވުނެވެ. މަސްތުވާތަކެތީގެ ވަބާ މުޖުތަމައުގައި އިންތިހާއަށް އާންމުވެފައިވާއިރު، ގޭންގުތަކުގެ އިސް ފަރާތްތައް ވަނީ ބޮޑެތި ވިޔަފާރިވެރިންނަށް ބަދަލުވެފަ އެވެ. މަސްތުވާތަކެތީގެ މައި ނެޓްވޯކްތައް އަތުލައިގަތުމުގެ ނަމުގައި ވަޒީރު އިޙްސާން ކުޅުއްވާ ޑްރާމާތަކާ ދައްކަވާ ވާހަކަތަކުގެ ހަގީގަތް ކޯޓު މަރުހަލާއާ ހަމައަކަށް ނުފޯރަ އެވެ. މި ނާކާމިޔާބީގެ އަސަރު ވަޒީރުގެ އަމިއްލަ ރަށުން ވެސް ފެންނަމުންދެ އެވެ.

މީގެ އިތުރުން، ކުށުގެ ވެށީގައި ނަން މަޝްހޫރު ފަރާތްތައް ބެންކޮކާއި މެލޭޝިޔާ ފަދަ ޤައުމުތަކުގައި ދިރިއުޅުން ޤާއިމުކޮށް، އިމްޕޯޓް-އެކްސްޕޯޓް ވިޔަފާރިތަކާއި ކެފޭތައް ހިންގަމުންދަނީ ބޮޑެތި މަހުޖަނުންގެ ގޮތުގަ އެވެ.

ގަވާއިދާ ޚިލާފަށް އުޅޭ ބިދޭސީންގެ މައްސަލައަކީ މިއަދު ޤައުމަށް ދިމާވެފައިވާ ނުހަނު ބޮޑު ގޮންޖެހުމެކެވެ. 'ކުރަނގި' އޮޕަރޭޝަން ފަދަ މަޝްރޫއުތައް އިއުލާނުކުރެވުނު ނަމަވެސް، އަހަރުތަކެއް ފާއިތުވެގެން ދިޔައިރުވެސް މިކަމަށް އެދެވޭ ހައްލެއް ލިބިފައެއް ނުވެ އެވެ. ރަށްރަށުގެ އާންމު ވިޔަފާރިތަކާއި ކުޅިވަރު ދަނޑުތައް ފަދަ ޚިދުމަތްތައް ހިންގުމުގައިވެސް ބިދޭސީންގެ ނުފޫޒު މިހާރު ވަނީ އިންތިހާއަށް އިތުރުވެފަ އެވެ. މީގެއިތުރުން، ޚާއްސަ އިގްތިސާދީ ސަރަޙައްދުތަކުގެ ނަމުގައި ބޭރުގެ ފަރާތްތަކަށް، ޚާއްސަކޮށް އިސްރާއީލާ ގުޅުންހުރި ފަރާތްތަކަށް ފުރުސަތު ފަހިވެގެންދާ ގޮތަށް ކަންކަން ރޭވެމުންދާ ކަމުގެ ކަންބޮޑުވުން ވެސް އެބައޮތެވެ. ޤާނޫނު ތަންފީޒުކުރުމުގެ ވާހަކަ ދެކެވޭއިރު، ވެލާނާގޭ ކުރިމަތީގައި ގަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ނެގުން ފަދަ ކުދިކުދި ކަންކަން ވެސް އޮތީ ބެލެހެއްޓޭ ގޮތް ނުވެފަ އެވެ. އަދި ޤާނޫނު ތަންފީޒުކުރަން ތިބި ބައެއް ފަރާތްތަކާއި ގަވާއިދާ ޚިލާފަށް އުޅޭ ބިދޭސީންނާ ދެމެދު އޮންނަ ނޭދެވޭ ގުޅުންތަކުގެ ސަބަބުން މި މައްސަލަ އިތުރަށް ގޯސްވަމުންދާކަމީ އިންކާރު ކުރެވެން ނެތް ހަގީގަތެކެވެ.

ޒަރޫރީ ބޭސްފަރުވާއަށް މިވަނީ އިންތިހާއަށް ދަތިވެފަ އެވެ. ބޭސް ސިޓީއަކަށް ބޭސް ހޯދުމަށްޓަކައި ހަތަރު ގަޑިއިރު ވަންދެން ކިއޫގައި ޚުދުު އަހަރެންވެސް މަޑުކުރީމެވެ. ފެނިގެންދިޔައީ ރައްޔިތުންގެ މާޔޫސްކަމާއި ހިތްދަތި ހާލަތެވެ. މާބަނޑު އަނބިމީހާއަށް ކޮންމެހެން ބޭނުންވާ ފޮލިކް އެސިޑް ކޮޅުވެސް މުޅި ރަށުން ލިބޭކަށް ނެތެވެ. އެނދުމަތިވެފައިވާ ބަލި ބައްޕަގެ މުހިންމު ބޭސްތައްވެސް އެއްވެސް ދިމާއަކުން ލިބޭނެ ގޮތެއް ނުވި އެވެ. އަދި ކުޑަ ދަރިފުޅަށް ކޮންމެހެން ދޭންޖެހޭ ބޭސް ގުޅަވެސް ހޯދަން މިޖެހެނީ ރާއްޖެއިން ބޭރުން އެތައް ވޭނަކާއި އުނދަގުލަކުންނެވެ. ސޫތު ކުޅި ނުވަތަ ސީނުކަރައިންނެވެ. އަސާސީ ޚިދުމަތެއް ކަމުގައިވާ ބޭސްފަރުވާގެ މިފަދަ ދަތިކަމެއްގެ ސަބަބުން ރައްޔިތުން މިވަނީ ނުހަނު ބޮޑު ތަކުލީފެއްގެ ތެރޭގައި އެވެ. ސަރުކާރަކުން އަހަރެމެން ހަމަ ރަނގަޅަށްވެސް ވޭނުގައި ޖައްސައިފި އެވެ.

އިންޑިއާގައި ހުންނަ ރަހުމަތްތެރިޔާ މެދުވެރިކޮށް ގެންނަ ޒަރޫރީ ބޭހަށް ދައްކަންޖެހޭ ފައިސާ ދެއްކޭނެ މިންވަރަށް ވެސް، ރަސްމީ ރޭޓުގައި ޑޮލަރު ލިބޭކަށް ނެތެވެ. ފުރާނަ ސަލާމަތްކުރުމަށާއި ސިއްޙީ ފަރުވާއަށް ބޭސް ހޯދުން މަޖުބޫރުވާއިރު، އެ ތަކެތި ލިބެން އޮތީ ބޭރު ފައިސާއިން އަގު އަދާކޮށްގެންނެވެ. ނަތީޖާއެއްގެ ގޮތުން، މަޖުބޫރީ ހާލަތުގައި ނުރަސްމީ ރޭޓުން ޑޮލަރު ގަންނަން ޖެހި، ޤާނޫނާ ޚިލާފު އަމަލުތަކަށް އަރައިގަނެވެނީ އެވެ. އެހެން ނުހަދައި ވާކަށްވެސް ނެތެވެ. ސުބްރަމާނިއަން ފޮނުވާ ތަރުކާރީ އެތެރެކޮށް ވިއްކައިގެން ދިރިއުޅުމުގެ ޚަރަދުތައް ބަލަހައްޓަމުންދާއިރު، އެ ތަކެތި ފޮނުވާ ފަރާތްތަކަށް ފައިސާ ދެއްކޭނެ ގޮތެއް ނެތި، ވިޔަފާރިތައް ވަނީ މުޅިން ހުއްޓުމަކަށް އައިސްފަ އެވެ. ރަސްމީ ނިޒާމުގެ ތެރެއިން ޓީ.ޓީ ހެދުމުގައި ހުރި ދަތިތަކާއި އުނދަގޫތަކުގެ ވާހަކަ ދެއްކުމުގެ ވެސް މިހާރު މާނައެއް ނެތެވެ. 

ތައުލީމީ ފެންވަރާ އެކަށޭނަ އާމްދަނީއެއް ލިބޭނެ މަގެއް މިއަދަކު ނެތެވެ. ކިޔެވި ނަމަވެސް އަދި ނުކިޔެވި ނަމަވެސް އޮތީ ހަމަ އެއް ހާލަތެކެވެ. ރަށުގައި ހުރެ، ކުޑަ މުސާރައަކަށް ފުއްދާލައިގެން ސިޔާސީ ނުފޫޒުގެ ދަށުވާން ބޭނުންނުވާތީ، އައިޓީ ދާއިރާއިން ހާސިލުކުރި ޑިގްރީއާއެކު މިއަދު މަޖުބޫރުވެފައި މިވަނީ ކަންނެލި މަސްވެރިކަމަށް ނުކުންނާށެވެ. އެއްވެސް މީހެއްގެ ފަހަތުން ސަލާންޖަހައި، އާދޭސްކޮށްގެން އުޅެން ބޭނުން ނުވާތީ އެވެ. 

ޤައުމުގެ ހާލަތު މިހާ ނާޒުކު ފައްތަރަކަށް ވެއްޓިގެން ގޮސްފައިވަނީ މި ސަރުކާރުގެ ހިންގުންތެރިކަމުގެ ދޯހަޅިކަމުގެ ސަބަބުންނެވެ. ވެރިންގެ ނާގާބިލްކަމުންނެވެ. އާންމު ޚިދުމަތްތަކުގެ ނިޒާމުތައް ބޮއްސުންލައި، ރައްޔިތުންނަށް އުނދަގުލަކާ ނުލައި އެއްވެސް ކަމެއް ހަމަޖެހޭނެ އިންތިޒާމެއް ނެތެވެ. މިފަދަ ކަންކަން ފެނިވަޑައިގަންނަވާ ހާލުވެސް، ސަރުކާރުން އިސްލާހީ ފިޔަވަޅުތަކެއް ނާޅުއްވަނީ ކީއްވެގެންތޯ ސުވާލު އުފެދެ އެވެ. މިކަމުގެ ސަބަބުން ރައްޔިތުންގެ ނަފްސާނީ ދުޅަހެޔޮކަމަށް ނޭދެވޭ އަސަރުކޮށް، ކެތްތެރިކަން ކޮޅުންލުމުގެ ކުރިން، މިކަމަށް އެކަށީގެންވާ ދެމެހެއްޓެނިވި ހައްލެއް ހޯދަންޖެހެ އެވެ. މިއީ ތަޙައްމަލުކުރެވޭ ވަރުގެ ވޭނެއް ނޫނެވެ.