މި ސަރުކާރުގެ ތެރޭގައި ދޮގުހެދުން ބޮޑު ބަލިމަޑުކަމަކަށް!

ދޮގު ހެދުމާއި ރައްޔިތުންނަށް ކަންކަން އޮޅުވާލުމަކީ ރައީސް މުއިއްޒުގެ މި ސަރުކާރުގެ އާންމު ސަގާފަތަކަށް މިހާރު މިވަނީ ވެފަ އެވެ. ވެރިމީހާއިން ފެށިގެން ގޮސް ދަށުގައި ތިބި މީހުންނާ ހަމައަށް ވެސް މިއަދު ފެންނަމުންދަނީ އެއްވެސް ޖެހިލުމެއްނެތި، މޫނަށް ރުލެއް ވެސް އަރުވާނުލައި ދޮގު ހަދަމުންދާ މަންޒަރެވެ. އެކުގައި އެއް މޭޒެއްދޮށުގައި އުޅޭ ވަޒީރުން ވިދާޅުވި ކަމަށް ބުނެ ހަދަނީ ވެސް ކަނޑައެޅިގެން ދޮގެވެ. މި ސަރުކާރުގެ ތެރޭގައި ދޮގު ހެދުން ބޮޑު ބަލިމަޑުކަމަކަށް ވެފައިވާއިރު، އެންމެ ފަހުން ގަބޫލުކުރަންވީ ކާކުގެ ވާހަކައެއް ކަން ނޭނގޭ ހިސާބަށް ކަންކަން މިވަނީ ގޯސްވެފަ އެވެ. އިގުތިސާދީ ހާލަތާއި، ގައުމުގެ މާލީ ކަންކަމާއި، މަޝްރޫއުތަކާ ގުޅޭގޮތުން ރައްޔިތުންނަށް ދެމުންދާ ޔަގީންކަމަކީ ހަގީގަތެއް ނެތް ވާހަކަތަކެއްކަން ދަނީ ސާބިތުވަމުންނެވެ.

ސަރުކާރެއްގެ އިތުބާރު ގެއްލިގެންދާ އެންމެ ބޮޑު އެއް ސަބަބަކީ ރައްޔިތުންނަށް ހަދާ ދޮގުތަކެވެ. ތަރައްގީގެ ނަމުގައާއި، ރައްޔިތުންގެ ފައިދާއަށް ކަމަށް ބުނެ ފަތުރާ މިފަދަ ދޮގު މައުލޫމާތުތަކުގެ ސަބަބުން ގައުމުގެ ހަމަޖެހުމަށާއި، ރައްޔިތުންގެ އިތުބާރަށް ބޮޑެތި ލޮޅުންތަކެއް އަރަ އެވެ.

ވެރިން މިސާލު ދައްކަން ވާހަކަ ދައްކާއިރު، ބަހާއި އަމަލާ އެއްވެސް ވަރަކަށް ދިމަލެއް ނުވެ އެވެ. މީގެ އެންމެ ފަހުގެ މިސާލަކަށް ފެނިގެން މިދިޔައީ ޕީއެންސީގެ ޖަލްސާއެއްގައި މެންބަރު އިބްރާހީމް ސުޖާއު ދެއްކި ވާހަކަތަކެވެ.

ޕީއެންސީ އިން ބޭއްވި ޖަލްސާއެއްގައި ވާހަކަދައްކަވަމުން ސުޖާއު ވިދާޅުވީ، ޖަލްސާއަށް ވަޑައިގަތުމަށް ބްރިޖަށް އަރަނިކޮށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން އޭނާއަށް ގުޅުއްވި ކަމަށެވެ. އަދި މިނިސްޓަރު އަމީން ވިދާޅުވި ކަމަށް ބުނެ ސުޖާ ވިދާޅުވީ، "ބްރަދަރ އޭ މިރޭ ވާހަކަ ދައްކަވަންހޭ؟ ރައީސް ޔާމީނަށް ދެއްވަންވީ މެސެޖެއް އެބައިނޭ. ވައިޑް ބޮޑީ ދެ ވަނަ ފްލައިޓް އެބަ ގެންނަމޭ. ޓާގެޓަށް ﷲގެ ހެޔޮ ރަހުމަތުން ޓްރެވަލް އެރައިވަލް ރީޗްވާނެއޭ. ޕެސިފިކަށް ދަތުރުކުރަން ފަށައިފީމޭ،" މިފަދައިން ރައީސް ޔާމީނަށް ރައްދުވާ ގޮތަށް ވިދާޅުވި ކަމަށެވެ.

ނަމަވެސް، މެންބަރު ސުޖާއުގެ މި ވާހަކަތައް މިނިސްޓަރު އަމީން ދޮގުކުރެއްވި އެވެ. އަމީން ވިދާޅުވި ގޮތުގައި، އޭނާއަކީ އެއްވެސް މީހަކު މެދުވެރިކޮށް އެހެން މީހަކަށް މެސެޖު ފޮނުވަން ޖެހޭ ފަދަ ބޭފުޅެއް ނޫނެވެ. "އަޅުގަނޑަކީ އެއްވެސް މީހަކު މެދުވެރިކޮށް އެއްވެސް މީހަކަށް މެސެޖެއް ދީގެން އަޅުގަނޑު ދޭން ބޭނުންވާ މެސެޖެއް، އަޅުގަނޑަށް ދެވޭނެ އެފަރާތަކަށް. އަޅުގަނޑު ދޭން ބޭނުންވާ މެސެޖު ދޭން ދެވަނަ ފަރާތް ބޭނުން ކޮށްގެން ދިނުމުގެ ބޭނުމެއް އޮތް މީހެއް ނޫން،" މިނިސްޓަރު ވިދާޅުވި އެވެ.

މިނިސްޓަރު އަމީންގެ މި ވާހަކަތަކުން ސާފުވެގެން ދަނީ، ސިޔާސީ ޕޯޑިއަމްތަކުގައި ސަރުކާރުގެ އިސް މެންބަރުން ހަދަނީ ކަނޑައެޅިގެން ބުހުތާނު ދޮގު ކަމެވެ. ވަޒީރު ވިދާޅުނުވާ ވާހަކަ އެއް، އޭނާގެ ނަން ބޭނުންކޮށްގެން ރައްޔިތުންގެ މަޖިލީހުގެ މެންބަރަކު އެގޮތަށް ވިދާޅުވުމުން އުފެދޭ ސުވާލަކީ، ސުޖާ މި އޮޅުވާލީ ކާކަށް ހެއްޔެވެ؟ އަދި މިފަދަ ބޮޑެތި ދޮގުތައް ހަދައިގެން ރައްޔިތުންގެ ލޮލުގައި އަނދުން އަޅުވަން މި ސަރުކާރުން މަސައްކަތް ކުރަނީ ކޮން މަގުސަދެއްގައި ހެއްޔެވެ؟ މިފަދަ ވާހަކަތަކުން ހާމަވެގެން ދަނީ ސަރުކާރުގަ އޮތް ހަގީގަތް އޮޅުވާލުމުގެ ނުރައްކާތެރި ސަގާފަތެވެ.

ސުޖާއު މި އޮޅުވާލީ ހަމައެކަނި ވަކި ބަޔަކަށް ނޫނެވެ. މުޅި ދިވެހި ރައްޔިތުންނަށެވެ. ވެރިކަމުގެ ބާރުތައް ދެމެހެއްޓުމަށްޓަކައި ދޮގު ހެދުން ސިޔާސީ އާދައަކަށް ހެދުމަކީ ޑިމޮކްރެޓިކް ހަމަތަކާ ޚިލާފު އަދި އިސްލާމީ ރިވެތި އަޚުލާގީ މިންގަނޑުތަކާވެސް ބީރައްޓެހި އަމަލެކެވެ. މިއަދު ރައްޔިތުން އެދެނީ ދޮގާއި އޮޅުވާލުމުގެ ބަދަލުގައި، ހަގީގަތް ހާމަކޮށް، ޒިންމާދާރުކަމާއެކު ގައުމު ހިންގުމެވެ.