ބްރިޖުގައި ހިންގަވައި، ފޮޓޯ ނެންގެވިޔަސް، މަޝްރޫއުގެ ކްރެޑިޓެއް ނުނެންގެވޭނެ!
31 އޯގަސްޓު 2026 | ހޯމަ 13:03ކުރީގެ ސަރުކާރުތަކުން ފަށާފައިވާ ބޮޑެތި އުމްރާނީ މަޝްރޫއުތައް ނިމުމުން، އޭގެ ކްރެޑިޓް ރައީސް ޑރ. މުއިއްޒު ނަންގަވާ. ވެލާނާ އެއާޕޯޓާއި ހަނިމާދޫ އެއާޕޯޓު އަދި ތިލަމާލެ ބްރިޖުގެ މަސައްކަތްތައް ލަސްވުމުން ކުރީ ސަރުކާރު އިހުމާލުވާކަމަށް ބުނާއިރު، އެ މަޝްރޫއުތައް ނިމުމުން އެއީ މި ސަރުކާރުގެ ކާމިޔާބީއެއްގެ ގޮތުގައި ސިފަކުރޭ
ރައީސް މުއިއްޒު، ތިލަމާލެ ބްރިޖު މަޝްރޫއުގެ މަސައްކަތްތައް ކުރިއަށްދާގޮތް ބައްލަވާލެއްވުން | ރައީސް އޮފީސް
ކަމެއް ކާމިޔާބުވެއްޖެނަމަ އެއީ ރައީސް ޑރ. މުހައްމަދު މުއިއްޒުގެ ކަމެކެވެ. ނާކާމިޔާބުވެއްޖެނަމަ އެއީ އެހެން ބައެއްގެ އިހުމާލެކެވެ. ރައީސް ޑރ. މުހައްމަދު މުއިއްޒުގެ ސަރުކާރުގައި ސިޔާސީ ޒިންމާ އުފުލުމުގެ އުސޫލުތައް ހުރިގޮތަކީ މިއީ އެވެ.
ކަމެއް ލަސްވެ، ނުނިމި، ނުވަތަ މައްސަލައެއް ކުރިމަތިވެއްޖެނަމަ، އެކަމުގެ ފަހަތުގައި އޮންނަނީ ކުރީގެ ސަރުކާރެއް، ކޮންޓްރެކްޓަރެއް، މުއައްސަސާއެއް ނުވަތަ ކުރީގެ ސަރުކާރުން ވާރުތަވި ކޮންމެ ވެސް ކަމެއްގެ ވާހަކަ އެވެ.
ރައީސް މުއިއްޒު ސަރުކާރަށް ތިން އަހަރު ފުރެން ގާތްވަމުންދާއިރު، މުޅިންވެސް ފެންނަން އޮތީ ހަމަ މި މަންޒަރެވެ. އުމްރާނީ ބޮޑެތި މަޝްރޫއުތައް ކަމަށްވާ ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލާއި، ހަނިމާދޫ އިންޓަނޭޝަނަލް އެއާޕޯޓުގެ އިތުރުން، އެންމެ ފަހުން ތިލަމާލެ ބްރިޖާ ގުޅޭގޮތުންވެސް ފެންމަތިވަމުންދަނީ ހަމަ މި ވާހަކަތަކެވެ.
ސަރުކާރުތަކުގެ ދައުރަކީ ފަސް އަހަރެވެ. ނަމަވެސް އެއާޕޯޓުތަކާއި ބްރިޖުތަކާއި ބަނދަރުތަކާއި ބޯހިޔާވަހިކަމުގެ މަޝްރޫއުތައް ފަދަ ބޮޑެތި އުމްރާނީ މަސައްކަތްތައް ނިންމުމަށް އެއަށްވުރެ ގިނަ ދުވަސް ނަގަ އެވެ. ވީއިރު ކުރީގެ ސަރުކާރަކުން ފަށާފައިވާ މަޝްރޫއުތައް އައު ސަރުކާރަކުން ނިންމުމަކީ ހިންގުންތެރި ދައުލަތެއް މަސައްކަތް ކުރަންޖެހޭ އުސޫލެވެ.
އެހެންނަމަވެސް، ރައީސް ޑރ. މުއިއްޒުގެ އުމްރާނީ ތަރައްގީ މިހާރު ވެފައިވަނީ "ރިލޭ ރޭހެއް" ފަދަ ކަމަކަށެވެ. ހަމަ ބޭނުންފުޅުވަނީ ނިންމާ ރޮނގު ކައިރީގައި ހުއްޓި ހުންނަވައިގެން ފޮޓޯއެއް ނަންގަވާށެވެ.
ވެލާނާ އިންޓަނޭޝަނަލް އެއާޕޯޓުގެ އައު އިންޓަނޭޝަނަލް ޓާމިނަލަށް ބަލާލަމާ ހިނގާށެވެ.
މި މަޝްރޫއަކީ ރައީސް މުއިއްޒު ވެރިކަމަށް ވަޑައިގަތުމުގެ ކުރިން ފެށި މަޝްރޫއެކެވެ. ނަމަވެސް، ޓާމިނަލް ހުޅުވުނުއިރު، ރައީސް ދައްކަވާފައިވާ ވާހަކަތައް އަޑުއަހާލުމުން، އެއީ ހުދު ރައީސް މުއިއްޒު އެތަނަށް ވަޑައިގެން ނިންމެވި ޓާމިނަލްއެކޭ ވެސް ހީވާކަހަލަ އެވެ.
ރައީސް މުއިއްޒު ވިދާޅުވާގޮތުންނަމަ އެއަރޕޯޓަކީ އެމަނިކުފާނުގެ މަސައްކަތެވެ. އެއަރޕޯޓް ނިންމުމުގެ ވިސްނުމެއް ވެސް އަދި އެކަމުގެ ޕްލޭނެއް ވެސް ކުރީގެ ސަރުކާރުތަކުން ނުކުރާކަމަށް ވިދާޅުވެ ރައީސް މުއިއްޒު ވިދާޅުވީ، ކުރީ ސަރުކާރުތަކުން އޮތީ ހަމައެކަނި ސިމެންތި މަސައްކަތުން އެއަޕޯޓް ނިންމާލުން އެކަނި ކަމަށެވެ.
ހަނިމާދޫ އިންޓަނޭޝަނަލް އެއާޕޯޓުގެ މަޝްރޫއުގައިވެސް ރައީސްގެ ބަސްމަގު ފެނިގެން ދިޔައީ ހަމަ އެހެންނެވެ. އެހެނަސް އެއީ ރައީސް އިބްރާހީމް މުހައްމަދު ސޯލިހުގެ ސަރުކާރުގައި، 2023 ވަނަ އަހަރުގެ ޖެނުއަރީ މަހު އިންޑިއާގެ އެގްޒިމް ބޭންކުގެ ފައިނޭންސްގެ ދަށުން ފެށި މަޝްރޫއެކެވެ.
ނަމަވެސް، ވެރިކަމާ ހަވާލުވެވަޑައިގަތުމަށްފަހު، ރައީސް މުއިއްޒު ވަނީ ކުރީގެ ސަރުކާރުން ވާރުތަވި މި މަޝްރޫއަށް ވަރަށް ބޮޑަށް ފާޑުވިދާޅުވެފަ އެވެ. 2024 ވަނަ އަހަރުގެ ފެބްރުއަރީ މަހު އެމަނިކުފާނު ވިދާޅުވީ، ކުރީގެ ސަރުކާރުން މި މަޝްރޫއު ހަވާލުކޮށްފައިވަނީ އެކަށީގެންނުވާ ބޮޑު އަގަކަށް ކަމަށާއި، މަޝްރޫއުގެ ފެންވަރު ވެސް ދަށް ކަމަށެވެ.
އެހެންނަމަވެސް، އެއާޕޯޓު ނިމި އިފްތިތާހުކުރިއިރު، ވާހަކަ ހުރީ މުޅިން ތަފާތު ގޮތަކަށެވެ.
ދެން އޮތީ ތިލަމާލެ ބްރިޖެވެ. ރައީސް މުއިއްޒު ވިދާޅުވީ، މި ސަރުކާރުން މަސައްކަތް ފެށީ "ސުމަކުން" ކަމަށް ބުނެވިދާނެ ކަމަށެވެ. އެމަނިކުފާނު ވިދާޅުވީ ހަމަ ސީދާ ސުމަކުން ފެށި ވާހަކަ އެވެ.
އެހެންނަމަވެސް ކުރީ ސަރުކާރު ނިމުނުއިރު ބައެއް ސަރަހައްދުތަކުގައި ސްޓީލް ކޭސިންގްތައް ހުރީ ޖަހާފަ އެވެ. އަދި ކާސްޓިންގ ފެސިލިޓީތަކާއި ބްރިޖުގެ ގިނަ އަދަދެއްގެ ޕްރީކާސްޓް ބައިތައް ވެސް ހުރީ އުފައްދާފަ އެވެ.
ރައީސް މުއިއްޒު މަގާމާ ހަވާލުވެވަޑައިގަތުމުގެ ކުރިން، ބްރިޖުގެ އޮނިގަނޑުގެ ބޮޑެތި ބައިތައް އުފައްދައި، ކާސްޓިން ފެސިލިޓީތައް ގާއިމުކޮށް، ދަގަނޑު ހޮޅި ނުވަތަ ސްޓީލް ކޭސިންގްތައް ޖެހުމަށްޓަކައި ކުރަންޖެހޭ މަސައްކަތްތައް ކުރެވިފައި ހުރިކަން ރެކޯޑުތަކުން ފެންނަން ހުރިއިރު، އެ މަޝްރޫއަކީ އެމަނިކުފާނުގެ ސަރުކާރުން އަލުން ފެށި މަސައްކަތެއްގެ ގޮތުގައި ސިފަކުރެއްވުމަކީ، ކްރެޑިޓް ނެގުން ނޫން ކޮން ކަމެއްތޯ އެވެ؟
އެހެންކަމުން މިއަދު ފެންނަނީ ކޮންމެ ކަމެއްގައި ވެސް ކްރެޑިޓް ނެގުމުގެ އިންތިހާ އެވެ. މަޝްރޫއެއް ނިމުމުން އެއީ ސަރުކާރުގެ ހިންގުންތެރިކަމެވެ. މަޝްރޫއެއް ލަސްވުމުން އެއީ ކުރީ ސަރުކާރުގެ ނާގާބިލުކަމެވެ. އެހެންނަމަވެސް، ކިތަންމެ ވަރަކަށް ބްރިޖުގައި ހިންގަވާފައި ފޮޓޯ ނެންގެވިޔަސް، އެ މަޝްރޫއުގެ ކްރެޑިޓެއް ރައީސް މުއިއްޒަކަށް ނުނެންގެވޭނެ އެވެ.
