ހޫޘީންގެ ހަމަލާތައް ކުށްވެރިކޮށް އދ. ގެ ސަލާމަތީ މަޖިލީހުން ނެރުނު ބަޔާނަށް ސައުދީން މަރުހަބާ ކިޔައިފި
17 އޮކްޓޯބަރު 2026 | ހޮނިހިރު 04:53ހޫޘީންނަށް ހަތިޔާރު ލިބުން ހުއްޓުވުމަށް އދ. އިން ގޮވާލި ގޮވާލުމަށް ސައުދީން މަރުހަބާ ކިޔައި، އެ ޖަމާއަތުން ދޭ ހަމަލާތަކުން ރައްކާތެރިވުމަށް ބައިނަލްއަގުވާމީ ގާނޫނުގެ ދަށުން ފިޔަވަޅު އެޅުމުގެ ހައްގު އޮތްކަން އެ ގައުމުން ވަނީ ހާމަކޮށްފައި. ސައުދީގެ އެއާޕޯޓުތަކަށް އަމާޒުކޮށް ދިން ހަމަލާތަކުގައި ގިނަ ބަޔަކު މަރުވެފައިވާއިރު، ހޫޘީން ހިފާފައިވާ ސަރަހައްދުތަކުން ފައިބައި ހަނގުރާމަ ހުއްޓާލުމަށް އދ. ގެ ގަރާރުގައި ބާރުއަޅާފައިވޭ
އދ. ގެ ސަލާމަތީ މަޖިލީހުގެ ބައްދަލުވުމެއް ކުރިއަށް ދަނީ | ޔޫއެން ފޮޓޯ
ސައުދީ އަރަބިއްޔާއަށް ހޫޘީން ދެމުންދާ ހަމަލާތައް ކުށްވެރިކޮށް، އެ ޖަމާއަތަށް ހަތިޔާރު ލިބުން ހުއްޓުވުމަށް އެއްބާރުލުން ދިނުމަށް ގޮވާލައި އދ. ގެ ސަލާމަތީ މަޖިލީހުގެ ރައީސް ނެރުއްވި ބަޔާނަށް ސައުދީ އަރަބިއްޔާއިން މަރުހަބާ ކިޔައިފި އެވެ. ސައުދީ އަރަބިއްޔާއަށް އަމާޒުކޮށް ހޫޘީން މެދުނުކެނޑި ދެމުންދާ އަދި އިތުރަށް ގޯސްވަމުންދާ ހަމަލާތައް، ޚާއްސަކޮށް އެއާޕޯޓުތަކާއި ހަކަތައިގެ އުމްރާނީ ވަސީލަތްތަކަށް އަމާޒުކޮށް ދޭ ހަމަލާތައް ކުށްވެރިކުރުމުން އެ މަޖިލީހުގެ ނިންމުމަށް މަރުހަބާ ކިޔާކަން ސައުދީ އަރަބިއްޔާގެ ޚާރިޖީ ވުޒާރާގެ ބަޔާނުގައި ބުންޏެވެ. އަދި، ރަތް ކަނޑާއި ބާބު އަލް-މަންދަބުގެ ކަނޑު ދަތުރުފަތުރަށް ކުރިމަތިވަމުންދާ ނުރައްކާތައް ކުށްވެރިކޮށްފައިވާ ކަން ފާހަގަކުރި އެވެ.
"ސަލާމަތީ މަޖިލީހުގެ 2216 ނަންބަރު ގަރާރާއި އެއާ ގުޅިގެން ފާސްކޮށްފައިވާ ގަރާރުތައް ފުރިހަމައަށް ތަންފީޒުކުރުމުގެ މުހިންމުކަން ބަޔާންކޮށްފައިވުމާއި، 'ޓެރަރިސްޓު' ހޫޘީ ޖަމާއަތަށް ހަތިޔާރާއި އެހެނިހެން އެހީތެރިކަން ލިބުން ހުއްޓުވުމަށް އަމަލީ އެއްބާރުލުން ދިނުމަށް ގޮވާލާފައިވާ ގޮވާލުންތައް ހިމެނޭ ގޮތުން، އެ ބަޔާނުގައިވާ ކަންކަމުގެ މުހިންމު ކަން ސައުދީ އަރަބިއްޔާއިން ކަށަވަރުކޮށްދެން،" ބަޔާނުގައި ބުންޏެވެ.
2216 ނަންބަރު ޤަރާރުގައި ގޮވާލާފައި ވަނީ ހޫޘީން އެއްވެސް ޝަރުތަކާ ނުލައި ވަގުތުން ހަނގުރާމައިގެ އަމަލުތައް ހުއްޓާލުމަށާއި، ޔަމަނުގެ ވެރިރަށް ޞަންޢާ ހިމެނޭ ގޮތަށް އެ ޖަމާއަތުން ހިފާފައިވާ ސަރަހައްދުތަކުން ފައިބައިގެން ދިއުމަށާއި، އަސްކަރީ އަދި ސަލާމަތީ މުއައްސަސާތަކުން އަތުލައިގެންފައިވާ ހަތިޔާރުތައް ހަވާލުކުރުމަށާއި، ޔަމަނުގެ ބައިނަލްއަގުވާމީ ގޮތުން ބަލައިގަނެފައިވާ ސަރުކާރުގެ ބާރުތައް ހިންގުން ހުއްޓާލުމަށާއި، އާންމުންނަށް އިންސާނީ އަދި ސިއްހީ އެހީތެރިކަން ފޯރުކޮށްދިނުމުގެ ފުރުސަތު ދިނުމަށެވެ.
އަމިއްލަ ސަލާމަތާއި ރައްކާތެރިކަން ކަށަވަރުކުރުމަށާއި، ރައްޔިތުންނާއި ޤައުމުގައި ދިރިއުޅޭ މީހުން ހިމާޔަތް ކުރުމަށް ޓަކައި ބައިނަލްއަގުވާމީ ގާނޫނުގެ ދަށުން ލިބިދޭ "އަސާސީ ހައްގުގެ" ދަށުން އަޅަންޖެހޭ އެންމެހައި ފިޔަވަޅުތައް އެޅުމުގެ ހައްގު ސައުދީ އަރަބިއްޔާއަށް ލިބިގެންވާ ކަން އެ ޤައުމުން ތަކުރާރުކޮށް ކަށަވަރުކޮށްދިން ކަމަށް ވެސް އެ ވުޒާރާއިން ބުންޏެވެ.
އދ. ގެ ސަލާމަތީ މަޖިލީހުގެ ރައީސް މި ހަފުތާގެ ކުރީކޮޅު ފާސްކުރެއްވި ބަޔާނުގައި ސައުދީ އަރަބިއްޔާއަށް ހޫޘީން ދެމުންދާ ހަމަލާތައް ކުށްވެރިކޮށް، ހޫޘީންނަށް ހަތިޔާރާއި އެއާ ގުޅުންހުރި ސާމާނު ލިބުން ހުއްޓުވުމަށް "ޔަމަނުގެ ސަރުކާރު ހިމެނޭ ގޮތަށް އެއްބާރުލުން ދިނުމަށް" ގޮވާލާފައިވެ އެވެ. 2022 އޭޕްރީލު މަހު ފެށުނު ހަނގުރާމަ ހުއްޓާލުމުގެ އެއްބަސްވުމާ ގުޅިގެން ލިބުނު މަޑުޖެހުމަކަށްފަހު، ސައުދީ އަރަބިއްޔާ އިސްވެ އޮވެ އުފައްދާފައިވާ އަސްކަރީ އިއްތިހާދެއްގެ އެއްބާރުލުމާއެކު ސަރުކާރާއި ހޫޘީންނާ ދެމެދު ޖުލައި މަހުން ފެށިގެން އަސްކަރީ ހަމަނުޖެހުންތައް ވަނީ އިތުރުވެފަ އެވެ. ސައުދީ އަރަބިއްޔާގެ ވައިގެ ބަނދަރުތަކަށް އަމާޒުކޮށް ހޫޘީން ދިން ހަމަލާތަކުގައި 19 މީހުން މަރުވެ 364 މީހުން ޒަޚަމުވެފައިވާ ކަމަށް ބުރާސްފަތި ދުވަހު އެ އިއްތިހާދުން ބުންޏެވެ.
މަސްދަރު: އަނަދޮލު އޭޖެންސީ
