ހޫޘީންގެ ހަމަލާތަކާ ގުޅިގެން ކޮންމެ ފަދަ ހާލަތެއް ކުރިމަތިވި ނަމަވެސް ސައުދީ އަރަބިއްޔާ އެ ކަމަކަށް ތައްޔާރު!
13 އޮކްޓޯބަރު 2026 | އަންގާރަ 05:29ޔަމަނުގެ ހޫޘީން ސައުދީ އަރަބިއްޔާގެ އެއާޕޯޓުތަކާއި މުހިންމު މަރުކަޒުތަކަށް އަމާޒުކޮށް ދެމުންދާ ހަމަލާތަކުގައި ގިނަ ބަޔަކު މަރުވެ ގެއްލުންތައް ލިބެމުންދިޔަ ނަމަވެސް، އެ ގައުމުގެ އާންމު ދިރިއުޅުމާއި ތަރައްގީގެ މަޝްރޫއުތައް މެދުކެނޑުމެއްނެތި ކުރިއަށްދާކަމަށް ސަރުކާރުން ބުނެފި. ހަމަލާތަކާ ގުޅިގެން ސަލާމަތީ ފިޔަވަޅުތައް ވަރުގަދަކޮށްފައިވާއިރު، ރިޔާޟުގައި ބައިނަލްއަގުވާމީ ބޮޑެތި ކޮންފަރެންސްތައް ބާއްވައި އިގްތިސާދީ ހަރަކާތްތައް އަންނަނީ ފުޅާކުރަމުން
ސައުދީ އަރަބިއްޔާގެ ވައިގެ ސިފައިންގެ އަސްކަރީ މަތިންދާބޯޓެއް | އަނަދޮލު އޭޖެންސީ
ޔަމަނުގެ ހަތިޔާރުއެޅި ހޫޘީ ޖަމާއަތުގެ ފަރާތުން ތަކުރާރުކޮށް ހަމަލާތައް ދެމުންދިޔަ ނަމަވެސް އާންމު ދިރިއުޅުން އާދައިގެ މަތިން ކުރިއަށްދާކަން ފާހަގަކުރައްވައި، ކިތަންމެ ކުޑަ ފުރުސަތެއް އޮތް ނަމަވެސް އެކި ހާލަތްތަކަށް ސައުދީ އަރަބިއްޔާއިން އޮތީ ތައްޔާރަށްކަމަށް، އެ ޤައުމުގެ އިންފޮމޭޝަން މިނިސްޓަރު ސަލްމާން އަލް-ދައުސަރީ ހޯމަ ދުވަހު ވިދާޅުވެއްޖެ އެވެ.
"މާތްރަސްކަލާނގެއަށް ޙަމްދުހުރި، ސައުދީ އަރަބިއްޔާގައި ދިރިއުޅުން އާދައިގެ މަތިން ކުރިއަށް އެބަދޭ،" ވެރިރަށް ރިޔާޟުގައި ބޭއްވި ނޫސްވެރިންގެ ބައްދަލުވުމެއްގައި އަލް-ދައުސަރީ ވިދާޅުވި އެވެ. "ތައްޔާރީ ހާލަތު މަތިކުރުމަކީ ކަންބޮޑުވުމެއް ނޫން، އޭގެ ބަދަލުގައި އެއިން ދައްކުވައިދެނީ، ކަންކަން ހިނގާފާނެ ކަމުގެ ފުރުސަތު ކިތަންމެ ކުޑަ ނަމަވެސް، އެކި ހާލަތްތަކަށް ދައުލަތް ތައްޔާރަށް އޮތް މިންވަރު."
ފާއިތުވި ދުވަސްތަކުގައި ރިޔާޟަށް ވަނީ ތަކުރާރުކޮށް ހޫޘީންގެ ހަމަލާތަކާ ކުރިމަތިލާންޖެހިފަ އެވެ. ދެ ދުވަސް މަތިން ކިންގް ޚާލިދު އިންޓަނޭޝަނަލް އެއާޕޯޓަށް ދިން ހަމަލާތަކުގެ ސަބަބުން ވަގުތީ ގޮތުން އޮޕަރޭޝަންތައް މެދުކަނޑާލަން ޖެހުނެވެ.
މި ހަމަލާތަކާ އެކުވެސް، ބައިނަލްއަގުވާމީ ފުޅާ ބައިވެރިވުމަކާއެކު ވޯލްޑް ޕެޓްރޯލިއަމް ކޮންގްރެސް އާދީއްތަ ދުވަހު ރިޔާޟުގައި ވަނީ ފަށާފަ އެވެ. ސައުދީ އަރަބިއްޔާއިން ފުރަތަމަ ފަހަރަށް ހޯސްޓްކުރާ މި އިވެންޓުގެ ކަންކަން ބުރާސްފަތި ދުވަހު ނިންމުމަށް ވަނީ ތާވަލުކޮށްފަ އެވެ. ވެރިރަށަށް އަންނަމުންދާ ބަދަލުތަކަށް ވެސް އަލް-ދައުސަރީ ވަނީ އަލިއަޅުއްވާލައްވާފަ އެވެ.
"ރިޔާޟަކީ މިއަދު އޭގެ މަގުތަކުން ދަތުރުކުރާއިރު އެންމެ ސާފުކޮށް ބަދަލުތައް ފެންނާނެ އެއް ސިޓީ: ދަތުރުފަތުރުގެ ހަރަކާތްތަކާއި، އުމްރާނީ ތަރައްގީއާއި މަޝްރޫއުތައް އިތުރުވުމުގެ އިތުރުން، ވިޔަފާރިއާއި، އިންވެސްޓްމަންޓާއި އަދި ނިންމުންތައް ނިންމުމުގެ ވެރިރަށެއްގެ ގޮތުގައި ދުނިޔޭގައި އޮތް ހައިސިއްޔަތު އޭގެ ތެރޭގައި ހިމެނޭ،" އޭނާ ވިދާޅުވި އެވެ.
އޮކްޓޫބަރު 5 ގެ ފަހުން ސައުދީ އަރަބިއްޔާގެ ފަސް އެއާޕޯޓަކަށް އަމާޒުކޮށް ހޫޘީ ޖަމާއަތުން ދިން 10 ހަމަލާއެއްގައި 20 މީހުން މަރުވެ އެތައް ސަތޭކަ ބަޔަކު ޒަޚަމްވެފައިވާކަމަށް ރިޕޯޓުތައް ބުނެ އެވެ. އަދި, މި ހަމަލާތަކުގެ ސަބަބުން މާއްދީ ގެއްލުންތަކެއް ލިބި، ވައިގެ ދަތުރުފަތުރަށް ވެސް ވަނީ ބުރޫއަރާފަ އެވެ.
މި ހަމަލާތައް ދީފައި ވަނީ ޖުލައި މަހުން ފެށިގެން ސައުދީ އަރަބިއްޔާއާއި ހޫޘީންނާ ދެމެދު ހިނގަމުންދާ އަސްކަރީ ކުރިމަތިލުންތަކުގެ ތެރެއިންނެވެ. އޭގެ ތެރޭގައި އެ ޤައުމުގެ މަދަނީ އޭވިއޭޝަން ފެސިލިޓީތަކާއި ހަކަތައިގެ މަރުކަޒުތަކަށް ދީފައިވާ ހަމަލާތައް ވެސް ހިމެނެ އެވެ.
2015 މާރިޗުން ފެށިގެން ހޫޘީންނާ ދެކޮޅަށް ޔަމަނުގެ ސަރުކާރަށް ތާއީދުކުރާ އަސްކަރީ އިއްތިހާދެއް ސައުދީ އަރަބިއްޔާއިން ދަނީ ލީޑުކުރަމުންނެވެ. 2014 ސެޕްޓެންބަރުން ފެށިގެން ޔަމަނުގެ ވެރިރަށް ޞަންޢާއާއި އެހެނިހެން ބައެއް ޕްރޮވިންސްތައް ކޮންޓްރޯލްކުރަމުން ދަނީ ހޫޘީ ޖަމާއަތުންނެވެ.
މަސްދަރު: އަނަދޮލު އޭޖެންސީ
