ހޫޘީންގެ ބެލިސްޓިކް މިސައިލެއް ސައުދީން ވައްޓާލައިފި، އެއާޕޯޓުތަކަށް ހަމަލާދިން ކަމަށް ހޫޘީން ބުނޭ!
13 އޮކްޓޯބަރު 2026 | އަންގާރަ 01:56ޔަމަނުގެ ހޫޘީން ސައުދީގެ ކިންގް ޚާލިދު އެއާޕޯޓަށާއި ޚަމީސް މުޝައިޠު އެއާ ބޭސްއަށް މިސައިލާއި ޑްރޯން ހަމަލާތަކެއް ދީފައިވާ ކަމަށް ބުނެފި. މި ހަމަލާތަކާ ގުޅިގެން ސައުދީގެ ވައިގެ ސަރަހައްދަކީ ރައްކާތެރި ތަނެއް ނޫން ކަމަށް ބުނެ ހޫޘީން ވަނީ އެއާލައިންތަކަށް އިންޒާރު ދީފައި. ނަމަވެސް، މައްކާއާއި މަދީނާގެ އެއާޕޯޓުތައް މި އިންޒާރުން އިސްތިސްނާވާނެ ކަމަށް އެ ޖަމާއަތުން ހާމަކުރޭ
ސައުދީ އަރަބިއްޔާގެ ވެރިރަށް ރިހާޟުގައި އޮންނަ ކިންގް ޚާލިދް އިންޓަނޭޝަނަލް އެއާޕޯޓު | ޓާސް
ސައުދީ އަރަބިއްޔާގެ ވެރިރަށް ރިޔާޟަށް އަމާޒުކޮށް ޔަމަނުގެ ހަތިޔާރުއެޅި ހޫޘީ ޖަމާއަތުން ފޮނުވާލި މިސައިލެއް ދިފާއުކޮށް ވައްޓާލާފައިވާނެ ކަމަށް ސައުދީ އަރަބިއްޔާގެ އަސްކަރީ އިއްތިހާދުން ހާމަކޮށްފި އެވެ. އެކްސްގައި ކުރި ޕޯސްޓެއްގައި އެ އިއްތިހާދުން ބުނީ، ރިޔާޟަށް ހަމަލާދިނުމަށް ހޫޘީން ބޭނުންކޮށްފައި ވަނީ ބެލިސްޓިކް މިސައިލެއް ކަމަށެވެ.
ހަމަލާގެ ވަގުތުގައި ރިޔާޟުގައި ވަނީ އިންޒާރުގެ ރަނގަބީލު އަޅާފަ އެވެ. ނަމަވެސް، އޭގެ ކުޑަ ހިނދުކޮޅެއް ފަހުން، އެ ސަހަރަށް އޮތް ނުރައްކާ ފިލާފައިވާ ކަން ސައުދީ ސިވިލް ޑިފެންސުން ވަނީ އިއުލާނުކޮށްފަ އެވެ. ފާއިތުވި ދުވަސްތަކުގައި ރިޔާޟަށް ވަނީ ހޫޘީންގެ ގިނަ ހަމަލާތަކަކާ ކުރިމަތިލާން ޖެހިފަ އެވެ. މި ގޮތުން، ޖެހިޖެހިގެން ދެ ދުވަހު ކިންގް ޚާލިދު އިންޓަނޭޝަނަލް އެއާޕޯޓަށް ދިން ހަމަލާތަކާ ގުޅިގެން އެ ތަނުގެ އޮޕަރޭޝަންތައް ވަގުތީ ގޮތުން މެދުކަނޑާލަން ޖެހުނެވެ.
ނަމަވެސް، ބެލިސްޓިކް މިސައިލެއް ބޭނުންކޮށްގެން ރިޔާޟަށް ހަމަލާދީފައިވާނެ ކަމަށް ހޫޘީން ދައުވާކުރެެ އެވެ. އެ ޖަމާއަތުން ބުނީ، ހަމަލާ އަމާޒުކޮށްފައި ވަނީ ކިންގް ޚާލިދު އިންޓަނޭޝަނަލް އެއާޕޯޓަށް ކަމަށެވެ. މީގެ އިތުރުން، ސައުދީ އަރަބިއްޔާގެ ދެކުނުގައި އޮންނަ ޚަމީސް މުޝައިޠު އެއާ ބޭސްއަށް ޑްރޯނަކުން ހަމަލާދީފައިވާނެ ކަމަށް ވެސް އެ ޖަމާއަތުން ބުނެފައިވެ އެވެ.
ހޫޘީންގެ އަސްކަރީ ތަރުޖަމާނު ޔަހްޔާ ސަރީޢު ވިދާޅުވީ، އެ ޖަމާއަތުން އެއާޕޯޓަށް ބެލިސްޓިކް މިސައިލެއް ފޮނުވާލާފައިވާ ކަމަށާއި، އެ ހަމަލާއަކީ "ސީދާ އަމާޒަށް" ވާސިލުވެފައިވާ ކަމަށެވެ. އެ ޖަމާއަތުން ޚަމީސް މުޝައިޠު އެއާ ބޭސްއަށް ޑްރޯން ހަމަލާއެއް ވެސް ދީފައިވާ ކަމަށާއި، މިއީ ވެސް "ސީދާ އަމާޒަށް" ދިން ހަމަލާއެއް ކަމަށް ސަރީޢު ވިދާޅުވި އެވެ. އެއާ ބޭސްއާ ގުޅޭ ގޮތުން ކުރި މި ދައުވާއަށް ސައުދީ އަރަބިއްޔާއިން އެއްޗެއް ބުނެފައެއް ނުވެ އެވެ.
ސައުދީ އަރަބިއްޔާގެ އެއާޕޯޓުތަކާއި ވައިގެ ސަރަހައްދަކީ "ރައްކާތެރި ނޫން" ތަންތަން ކަމަށް ބުނެ، އެ ތަންތަން ބޭނުން ނުކުރުމަށް އެއާލައިންތަކަށާއި މުވައްޒަފުންނަށާއި ދަތުރުވެރިންނަށް އެ ޖަމާއަތުން ދީފައިވާ އިންޒާރު ސަރީޢު ވަނީ ތަކުރާރުކުރައްވާފަ އެވެ. ނަމަވެސް، މައްކާއާއި މަދީނާގެ އެއާޕޯޓުތަކާއި ވައިގެ ސަރަހައްދު މީގެ ތެރެއިން އިސްތިސްނާކޮށްފައިވާނެ ކަމަށް އޭނާ ވިދާޅުވި އެވެ. ހޫޘީންނާ ދެމެދު ހިނގަމުންދާ އަސްކަރީ ކުރިމަތިލުންތައް އިތުރުވަމުންދާ މި ދަނޑިވަޅުގައި، ފާއިތުވި ދުވަސްތަކުގައި ސައުދީ އަރަބިއްޔާގެ އެއާޕޯޓުތަކަށާއި އާންމުން ބޭނުންކުރާ ތަންތަނަށް ވަނީ ގިނަ ހަމަލާތަކެއް ދީފަ އެވެ.
މަސްދަރު: އަނަދޮލު އޭޖެންސީ
