ރަޝިޔާއާ ދެކޮޅަށް އަޅާފައިވާ ފިޔަވަޅުތައް ހަރުކަށިކުރަން އެމެރިކާގެ އެއްބާރުލުން މުހިންމު: އީޔޫ
12 އޮކްޓޯބަރު 2026 | ހޯމަ 08:34ރަޝިޔާއަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ޤައުމަށް ބޮޑެތި ގެއްލުންތަކެއް ވަމުންދާކަން ފާހަގަކުރައްވައި، ހަކަތައިގެ ވަސީލަތްތަކަށް ހަމަލާނުދިނުމަށް ވެފައިވާ އެއްބަސްވުމަށް ވިލާތުގެ އިއްތިހާދުން މަރުޙަބާ ކިޔާފައިވޭ. މީގެ އިތުރުން، މެދުއިރުމަތީގެ ހަމަޖެހުމަށް ޓަކައި ލުބުނާނުގައި އައު މިޝަނެއް ފެށުމަށާއި، ރަތް ކަނޑުގެ ރައްކާތެރިކަން ކަށަވަރުކުރުމަށް އިތުރު ފިޔަވަޅުތައް އެޅުމަށް އެ އިއްތިހާދުން ދަނީ މަޝްވަރާކުރަމުން
ވިލާތުގެ އިއްތިހާދުގެ ޚާރިޖީ ސިޔާސަތާ ބެހޭޭ އިސް މުޝީރު ކާޔާ ކައްލާސް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ | ރޮއިޓަރސް
ރަޝިޔާއާ ދެކޮޅަށް ވިލާތުގެ އިއްތިހާދުން (އީޔޫ) އަޅަމުންދާ ދަތިކުރުމުގެ ފިޔަވަޅުތަކުގެ ސިޔާސަތާ އެއްގޮތަށް އެމެރިކާއިން ވެސް އަމަލުކުރުމަށް އެ އިއްތިހާދުގެ ޚާރިޖީ ސިޔާސަތާ ބެހޭ މުޝީރު ކާޔާ ކައްލާސް ހޯމަ ދުވަހު ގޮވާލައްވައިފި އެވެ. ވޮޝިންގޓަނާއި ވިލާތުގެ ބައިވެރިން ގުޅިގެން ފިއްތުންތައް ކުރިމަތިކުރުވައިފި ނަމަ، ޔޫކްރެއިންގައި ކުރަމުންދާ ހަނގުރާމަ ނިމުމަކަށް ގެނައުމަށް އެހީތެރިވެދޭނެ ކަމަށް އޭނާ ވިދާޅުވި އެވެ.
ލުގްޒެމްބާގުގައި ބޭއްވި ވިލާތުގެ އިއްތިހާދުގެ ފޮރިން އެފެއާޒް ކައުންސިލްގެ ބައްދަލުވުމުގެ ކުރިން ނޫސްވެރިންނާ ވާހަކަފުޅު ދައްކަވަމުން ކައްލާސް ވިދާޅުވީ، ރަޝިޔާއަށް އިތުރު ފިޔަވަޅުތައް އެޅުމުގައި ވިލާތުގެ އިއްތިހާދާއި އިނގިރޭސިވިލާތާއެކު އެމެރިކާ ބައިވެރިވެއްޖެ ނަމަ، މޮސްކޯއަށް ކުރިމަތިކުރާ ފިއްތުންތަކުގެ ނަތީޖާ ބޮޑުވާނެ ކަމަށެވެ.
"އިނގިރޭސިވިލާތާއި އެމެރިކާގެ ބައިވެރިން އަޅުގަނޑުމެންނާ އެއް ސިޔާސަތެއް ގެންގުޅޭ ނަމަ މިއަށް ވުރެ މާ ބޮޑަށް ވެސް ކަންކަން ރަނގަޅުވާނެ،" އޭނާ ވިދާޅުވި އެވެ. މިއާއެކު، ރަޝިޔާއާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށިކުރުމަށް ފާސްކޮށްފައިވާ 'ގްރެހެމް ބިލު' ތަސްދީގުކޮށް އަމަލުކުރަން ފަށައިފި ނަމަ، މޮސްކޯއަށް ކުރިމަތިކުރާ ފިއްތުންތައް ވަރަށް ބޮޑަށް ވަރުގަދަވެގެންދާނެ ކަމަށް ވެސް އޭނާ ފާހަގަކުރެއްވި އެވެ. "ރަޝިޔާއިން މި ހަނގުރާމަ ނިންމުމަށް މަޖުބޫރުވާ ވަރަށް އަޅުގަނޑުމެންނަށް ފިއްތުންތައް ކުރިމަތިކުރެވިދާނެ،” ކައްލާސް ވިދާޅުވި އެވެ.
އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާއަށް 1.1 ޓްރިލިޔަން އެމެރިކާ ޑޮލަރުގެ ގެއްލުން ވެފައިވާ ކަމަށް ވެސް ކައްލާސް ވިދާޅުވި އެވެ. އަދި، އެ ޤައުމުގެ ޝެޑޯ ފްލީޓް ނުވަތަ ވަގު އުޅަނދުފަހަރަށް އަމާޒުކޮށް އަޅަމުންދާ ފިޔަވަޅުތަކުގެ ސަބަބުން، ހަނގުރާމައަށް ޚަރަދުކުރުމަށް މޮސްކޯއަށް ދުވަހެއް ދުވަހަކަށް ދަތިވަމުންދާ ކަމަށް ވެސް އޭނާ ވިދާޅުވި އެވެ.
ރަޝިޔާއާއި ޔޫކްރެއިނާ ދެމެދު ހަކަތައިގެ ވަސީލަތްތަކަށް ހަމަލާނުދިނުމުގެ އެއްބަސްވުމެއް ޤާއިމުކުރެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާނުކުރެއްވި ކުރުމާ ގުޅޭގޮތުން ކައްލާސް ވިދާޅުވީ، އެ އިންތިޒާމަށް ވިލާތުގެ އިއްތިހާދުން މަރުޙަބާ ކިޔާ ކަމަށެވެ. ނަމަވެސް، މޮސްކޯއިން އެ ކަމަށް އަމަލުކުރޭތޯ އަދި ބަލަންޖެހޭ ކަމަށް އޭނާ ފާހަގަކުރެއްވި އެވެ.
އެ އެއްބަސްވުމަކީ ހަމައެކަނި ހަކަތައިގެ އުމްރާނީ ވަސީލަތްތަކަށް އަމާޒުވާ ކަމަކަށް ވުމުގެ ބަދަލުގައި، "މީހުން މެރުން ހުއްޓުވުން" ވެސް މީގެ ތެރޭގައި ހިމެނޭ ގޮތަށް ފުޅާކުރަންޖެހޭ ކަމަށް އޭނާ ބާރުއަޅުއްވައި ވިދާޅުވި އެވެ. މި އިންތިޒާމު ހަމަޖެހިފައިވާ ދާއިރާއާމެދު ސުވާލު އުފައްދަވަމުން ކައްލާސް ވިދާޅުވީ، ޔޫކްރެއިންގައި ހުރީ ތެޔޮ ސާފުކުރާ އެންމެ ކާރުޚާނާއެއް ކަމަށާއި، ނަމަވެސް ރަޝިޔާގައި އެ ފަދަ އެތައް ތަނެއް އެބަހުރި ކަމަށެވެ. އެހެންކަމުން، މި ހަނގުރާމަ ހުއްޓާލުމުގެ ފައިދާ މޮސްކޯއަށް ލިބިގެން ނުވާނެ ކަމަށް އޭނާ ވިދާޅުވި އެވެ.
ޔޫކްރެއިންގައި އާ އިންތިޚާބެއް ބޭއްވުމަށް ޓްރަމްޕް ގޮވާލެއްވި ގޮވާލެއްވުމާ ގުޅިގެން ކައްލާސް ހަނދާންކޮށްދެއްވީ، ހަނގުރާމަ ހުއްޓާލުމުގެ އެއްބަސްވުމެއް ޤާއިމުވެއްޖެ ނަމަ ވީ އެންމެ އަވަހަކަށް އިންތިޚާބު ބޭއްވުމަށް ތައްޔާރަށް ހުންނެވިކަން ޔޫކްރެއިންގެ ރައީސް ވޮލޮދްމީރް ޒެލެންސްކީ ކުރިން ހާމަކުރައްވާފައިވާ ކަމަށެވެ.
މެދުއިރުމަތީގައި ފުޅާވަމުންދާ ހަނގުރާމައާމެދު އީޔޫގެ ކަންބޮޑުވުން
މެދުއިރުމަތީގެ ހާލަތަށް އަލިއަޅުއްވާލައްވަމުން، ސައުދީ އަރަބިއްޔާގެ އެއާޕޯޓުތަކަށް ޔަމަނުގެ ހަތިޔާރުއެޅި ހޫޘީ ޖަމާއަތުން ދެމުންގެންދާ ހަމަލާތައް އިތުރުވަމުންދާތީ އެ ކަން ކައްލާސް ވަނީ ކުށްވެރިކުރައްވާފަ އެވެ. އަދި، ރަތް ކަނޑުގެ ހާލަތާ ގުޅިގެން އިތުރަށް އެޅިދާނެ ފިޔަވަޅުތަކަކީ ކޮބައިތޯ ވިލާތުގެ އިއްތިހާދުގެ ވަޒީރުން މަޝްވަރާކުރައްވާނެ ކަމަށް އޭނާ ވިދާޅުވި އެވެ.
ސައުދީ އަރަބިއްޔާގެ ޚާރިޖީ ވަޒީރު އަމީރު ފައިޞަލް ބިން ފަރްހާން އަލް-ސުޢޫދާއެކު ދާދިފަހުން ފޯނުން ގުޅުއްވައި ވާހަކަފުޅު ދެއްކެވި ކަމަށާއި، އެ ވާހަކަތަކުގެ ތެރޭގައި ވިލާތުގެ އިއްތިހާދުގެ 'އޮޕަރޭޝަން އާސްޕިޑީސް' ވަރުގަދަކުރުމުގެ ފުރުސަތުތަކާ ގުޅޭގޮތުން މަޝްވަރާކުރެވުނު ކަމަށް ކައްލާސް ވިދާޅުވި އެވެ.
މިއާއެކު، މަދަނީ އަދި އަސްކަރީ ބައިތައް ހިމެނޭ ގޮތަށް ލުބުނާނުގައި އާ މިޝަނެއް ޤާއިމުކުރުމާ ގުޅޭގޮތުން ވިލާތުގެ އިއްތިހާދުގެ ޚާރިޖީ ވަޒީރުން މަޝްވަރާކުރައްވާނެ ކަމަށް ވެސް އޭނާ ވިދާޅުވި އެވެ. މި މިޝަން ފާސްވެއްޖެ ނަމަ، ކުރިއަށް އޮތް މަދު މަސްތަކެއްގެ ތެރޭގައި ލުބްނާނުގައި އަމަލީ މަސައްކަތްތައް ފެށުމަށް ތައްޔާރުވާނެ ކަމަށް އުންމީދުކުރައްވާ ކަމަށް ވެސް އޭނާ ވިދާޅުވި އެވެ.
މަސްދަރު: އަނަދޮލު އޭޖެންސީ
