މައިނެއްގައި ޖެހި ހުރްމުޒް ކަނޑުއޮޅިން ދަތުރުކުރި ތެޔޮ ޓޭންކަރެއް ގޮވައި އަނދަނީ
17 އޮކްޓޯބަރު 2026 | ހޮނިހިރު 04:25ހުރްމުޒް ކަނޑުއޮޅިން ދަތުރުކުރި ޓޭންކަރެއް މައިނެއްގައި ޖެހި ގޮވައިފި ކަމަށް އީރާނުން ބުނެފި. އައިއާރްޖީސީން ތުހުމަތުކުރާ ގޮތުގައި މި އުޅަނދަކީ ރާޑަރު ނިއްވާލައިގެން އެމެރިކާގެ އަސްކަރީ އެހީތެރިކަމާއެކު ޤަވާއިދާ ޚިލާފަށް ދަތުރުކުރި އުޅަނދެއް. މި ހާދިސާ ހިނގާފައި ވަނީ އީރާނާއި އެމެރިކާއާ ދެމެދު މަސްރަހު ނުތަނަވަސްވެ، ކަނޑުދަތުރުފަތުރަށް ބުރޫއަރާފައިވާ ދަނޑިވަޅެއްގައި
ހުރްމުޒް ކަނޑުއޮޅިން ދަތުރުކުރަނިކޮށް މައިނެއްގައި ޖެހި އަލިފާން ރޯވިކަމަށް އައިއާރްޖީސީން ބުނާ ތެޔޮ ޓޭންކަރުގެ މަންޒަރުތައް | އާރުޓީ
ހުރްމުޒް ކަނޑުއޮޅިން ދަތުރުކުރި ތެޔޮ އުފުލާ ސުޕަޓޭންކަރެއް ކަނޑުއަޑީގެ މައިނެއްގައި ޖެހި، ބާރުގަދަ ގޮވުމަކާއެކު އަލިފާން ރޯވެފައިވާ ކަމަށް، އީރާނުގެ އިސްލާމިކް ރިވޮލޫޝަނަރީ ގާޑް ކޯގެ (އައިއާރްޖީސީ) ނޭވީން ހާމަކޮށްފި އެވެ. އިސްތިރާޖީ ގޮތުން މުހިންމު އެ ކަނޑުއޮޅިން ދަތުރުކުރަން މަސައްކަތް ކުރި އިރު، އެ އުޅަނދުގައި ދެ މިލިޔަނަށް ވުރެ ގިނަ ފީފާގެ ސާފުނުކުރާ ތެޔޮ ހުރި ކަމަށް، އީރާނުގެ ތަސްނީމް ނޫސް އޭޖެންސީން ނެރުނު ބަޔާނެއްގައި ބަޔާންކޮށްފައިވެ އެވެ.
އެ އުޅަނދަކީ އޭގެ ނެވިގޭޝަނާއި ރާޑަރު ނިޒާމުތައް ނިއްވާލައިގެން ދަތުރުކުރި "ޤަވާއިދާ ޚިލާފު" ޓޭންކަރެއް ކަމަށް، އައިއާރްޖީސީގެ ނޭވީން ވަނީ ސިފަކޮށްފަ އެވެ. އަދި، އެ ކަނޑުއޮޅިން މުދާ އުފުލުމަށް ޓަކައި އެމެރިކާގެ އަސްކަރީ އެހީތެރިކަމުގެ ނާޖާއިޒު ފައިދާ ނެގުމަށް އެ ޓޭންކަރުން މަސައްކަތް ކޮށްފައިވާ ކަމަށް ވެސް އެ ފައުޖުން ދައުވާކުރެ އެވެ.
މި ބަޔާނުގައި އެ އުޅަނދުގެ ނަމާއި، އުޅަނދުގެ މިލްކުވެރިޔާ އަދި އެ އުޅަނދު ނިސްބަތްވާ ޤައުމަކީ ކޮބައިކަން ހާމަކޮށްފައެއް ނުވެ އެވެ. އަދި، މި ހާދިސާގައި އެއްވެސް މީހަކު ޒަޚަމުވި ކަމެއް ނުވަތަ ލިބުނު ގެއްލުމުގެ މިންވަރާ ގުޅޭ އެއްވެސް މައުލޫމާތެއް ވެސް އެ ބަޔާނުގައި ހާމަކޮށްފައެއް ނުވެ އެވެ.
މި ހާދިސާ ހިނގާފައި މި ވަނީ، ދުނިޔޭގެ ތެލާއި ގޭހުގެ ބޮޑު ބައެއް އުފުލާ މައިގަނޑު މަގެއް ކަމަށްވާ ހުރްމުޒް ކަނޑުއޮޅިން ދަތުރުފަތުރު ކުރުމުގެ މިނިވަންކަމާ ގުޅޭގޮތުން، އީރާނާއި އެމެރިކާއާ ދެމެދު މަސްރަހު އިންތިހާއަށް ނުތަނަވަސްވެފައިވާ ދަނޑިވަޅެއްގައި އެވެ. އަދި، އެމެރިކާއާއި އިސްރާއީލުން 2026 ފެބުރުވަރީ 28 ގައި އީރާނަށް ހަމަލާ ދިން ފަހުން، އެ ކަނޑުއޮޅީގެ ކަނޑުދަތުރުފަތުރަށް ވަނީ ބޮޑެތި ބުރޫއެރުންތަކެއް އަރާފަ އެވެ.
މަސްދަރު: އަނަދޮލު އޭޖެންސީ
