އީރާނުގެ އަސްކަރިއްޔާ އެއްކޮށް ބަލިކަށިވެއްޖެ، ހަނގުރާމަ "ވަރަށް އަވަހަށް" ނިމޭނެ: ޓްރަމްޕް

އީރާނާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ފެށްޓެވި ޣައިރުގާނޫނީ ހަނގުރާމަ "ވަރަށް އަވަހަށް" ނިމުމަކަށް އަންނާނެ ކަމަށާއި، މި ހަނގުރާމަ ނިމުމަކަށް އައުމާއެކު ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް ދަށަށްދާނެ ކަމަށް ލަފާކުރައްވާ ބުދަ ދުވަހުގެ ރޭ އޭނާ ވިދާޅުވެއްޖެ އެވެ.

"އީރާނުގެ ހަނގުރާމަ ވަރަށް އަވަހަށް ނިމޭނެ... އެ ޤައުމުން ވެސް މި ހަނގުރާމަ ނިމެން ބޭނުންވާތީ، ވަރަށް އަވަހަށް ނިމޭނެ،" މޮންޓާނާގައި ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވި އެވެ. "އީރާނަށް ދުވަހަކު ވެސް ނިއުކްލިއާ ހަތިޔާރެއް ނުލިބޭނެ. އަދި ތެލުގެ އަގު ހިލަގަނޑެއް ވެއްޓޭ ފަދައިން އިންތިހާއަށް ދަށަށްދާނެ."

Advertisement

ހަނގުރާމަ ނިންމުމަށް ވޮޝިންގޓަނުން މަސައްކަތް ކުރަމުންދާއިރު، އެމެރިކާއިން މިހާރު މަޝްވަރާ ކުރަމުންދަނީ އީރާނުގެ ކޮން އޮފިޝަލުންނަކާ ކަމާމެދު ޔަގީންކަމެއް ނެތް ކަމަށް، މޮންޓާނާގައި ބޭއްވި ކެންޕޭން ޖަލްސާއެއްގައި ވާހަކަފުޅު ދައްކަވަމުން ޓްރަމްޕް ކުރިން ވަނީ ފާހަގަކުރައްވާފަ އެވެ.

"އެ މީހުންގެ [އީރާނުގެ] ކަނޑުގެ ސިފައިންނެއް ނެތް. ވައިގެ ސިފައިންނެއް ނެތް. އެ މީހުންގެ އަސްކަރިއްޔާ ވަނީ އެއްކޮށް ސުންނާފަތިވެފައި. އެ މީހުންގެ ލީޑަރުން މިހާރު ފެންނާކަށް ވެސް ނެތް،" ޓްރަމްޕް ވިދާޅުވި އެވެ. "އަޅުގަނޑަށް އެ މީހުންގެ ލީޑަރުން ނައްތާނުލައި ދޫކޮށްލެވުނު ނަމައޭ ވެސް ހިތަށްއަރާ؛ ސަބަބަކީ އަޅުގަނޑުމެން މި މަޝްވަރާ ކުރަނީ ކޮން ބައެއްކަމެއް ވެސް އަޅުގަނޑަކަށް ނޭނގޭ."

މީގެއިތުރުން، އީރާނަކީ މީގެކުރިން މެދުއިރުމަތީގައި އޮތް ބާރުގަދަ އަސްކަރީ ބާރެއް ކަމަށް ސިފަކުރައްވަމުން، އެމެރިކާގެ އުދުވާނީ ހަމަލާތަކުގެ ސަބަބުން އެ ޤައުމުގެ އަސްކަރީ ގާބިލުކަން ވަރަށް ބޮޑަށް ބަލިކަށިވެފައިވާ ކަމަށް ވެސް ޓްރަމްޕް ދައުވާކުރެއްވި އެވެ. މި ގޮތުން، އެ ޤައުމަކީ ކުރިން އޮތް ފަދަ ބާރުގަދަ ޤައުމެއް ނޫން ކަމަށް ބަޔާންކުރައްވަމުން، "އީރާނަކީ ކުރިން މެދުއިރުމަތީގައި ގަދަދައްކަމުން ދިޔަ ޤައުމު،" ކަމަށް އޭނާ ވިދާޅުވި އެވެ.

އެމެރިކާއިން ދިން ވަރުގަދަ ހަމަލާތަކުގައި އީރާނުގެ ކަނޑުގެ ފައުޖު އެއްކޮށް ނައްތާލައި، އަސްކަރީ މަތިންދާބޯޓުތައް ބޭނުންނުކުރެވޭ މިންވަރަށް ހަލާކުކޮށްލާފައިވާނެ ކަމަށް ވެސް ޓްރަމްޕް ދައުވާކުރެއްވި އެވެ. އީރާނުގައި 159 އަސްކަރީ މަނަވަރު އޮތް ކަމަށާއި، އޭގެ ތެރެއިން އެންމެ އުޅަނދެއް ވެސް މިހާރު އޮޕަރޭޝަނަލް ހާލަތުގައި ނެތް ކަމަށް އޭނާ ވިދާޅުވި އެވެ. އަދި، އެ ޤައުމުގެ އަސްކަރީ މަތިންދާބޯޓުތައް އެއާޕޯޓުތަކުގެ ރަންވޭތަކުގެ މައްޗަށް ހަލާކުވެ ބިމާހަމަވެފައިވާ ކަމަށް ވެސް ވިދާޅުވި އެވެ.

"އެނގޭނެ ފަދައިން، ކުރިން އެ މީހުންނަކީ [އީރާނަކީ] ބާރުގަދަ ބައެއް. އެކަމަކު މިހާރު އެ މީހުން އެހާ ބާރުގަދައެއް ނޫން... އަޅުގަނޑު މި ބުނީ 'އަޅުގަނޑުމެން އެ މީހުން އެއްކޮށް ބަލިކަށިކޮށްލީއޭ'، އެކަމަކު ހަގީގަތުގައި ވެސް އެ މީހުންގެ 159 މަނަވަރު އޮތް. ކަނޑުގެ އަޑީގައި މިހާރު ކިތައް މަނަވަރު އޮތް ކަން އެނގޭތަ؟ 159 މަނަވަރު. އަދި އަޅުގަނޑުމެންގެ ބޯޓުތަކާ އެއްވަރު ނުވި ނަމަވެސް، އެ މީހުންގެ އަތުގައި ފުދޭވަރަކަށް ރަނގަޅު 274 އަސްކަރީ މަތިންދާބޯޓުތައް އޮތް. އޭގެ ތެރެއިން މިއަދު ބޭނުންކުރެވޭ ހާލަތުގައި އޮތީ ކިތައް ޖެޓް؟ ސުމެއް! އެ ތަކެތި ހުރީ ކޮންތާކުކަން އެނގޭތަ؟ އެ ހުރިހާ ޖެޓްތަކެއް ހުރީ އީރާނުގެ ރީތި ރަންވޭތަކުގެ މައްޗަށް އެކި ދިމަދިމާއަށް ބުރައިގެން ގޮސްފައި. ރަންވޭތަކުގެ އެކި ތަންތަނަށް ކުދިކުދި އެތިކޮޅުތަކެއްގެ ގޮތުގައި އެ ހުރީ ބުރައިގެން ގޮސްފައި،" ޓްރަމްޕް ވިދާޅުވި އެވެ.

އޭނާ މި މޭރުމުން ވިދާޅުވަމުންދިޔަ ނަމަވެސް، އީރާނުން ދަނީ އެމެރިކާއިން ދޭ ކޮންމެ ހަމަލާއަކަށް ރައްދު ދެމުންނެވެ. މި ގޮތުން، ގަލްފުގެ ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ބެލިސްޓިކް މިސައިލާއި އަސްކަރީ ޑްރޯން ބޭނުންކޮށްގެން އީރާނުން ވަރުގަދަ ރައްދު ހަމަލާތަކެއް ދީފައިވާއިރު، ތެހްރާންގެ ހުއްދައާ ނުލައި ހުރްމުޒް ކަނޑުއޮޅި ހުރަސްކުރަން މަސައްކަތް ކުރާ އުޅަނދުފަހަރަށް ވެސް އީރާނުން ދަނީ ހަމަލާ ދެމުންނެވެ. މީގެ އިތުރުން، އީރާނުގެ އަސްކަރިއްޔާއިން ވަނީ، އެމެރިކާގެ ގިނަ އަދަދެއްގެ އަސްކަރީ މަތިންދާބޯޓުތަކާއި ޑްރޯންތައް ވައްޓައިލާ، ގަލްފުގެ ޤައުމުތަކުގެ އެއާބޭސްތަކުގައި ހުރި މަތިންދާބޯޓުތަކަށް ވެސް ބޮޑެތި ގެއްލުންތަކެއް ދީފަ އެވެ.