‎ސައުވީސް ގަޑިއިރުތެރޭ ގާނޫނު ބަދަލުކުރާ ގައުމަކުން މި ދައްކަނީ ގާނޫނު އޮތް ގޮތުން ބޭރު މީހުންނަށް ވަޒަންވެރި ނުވެވޭނެ ވާހަކަ، އިތުބާރު ގެއްލި ތަންފީޒުނުކުރެވޭ، ގާނޫނީ އައްޑަނައެއް ހުއްޖަތަކަށް ދައްކައިގެން ރެކެވިދާނެތަ؟

މިއަދު މުޅި ރާއްޖޭގައި ފަތުއަޑުކިޔާފައި، އެއް އަޑަކުން ގުގުމަމުން ދަނީ ރަސްމާލޭގެ ބޮޑު ބައެއް ޔޫއޭއީގެ އީގަލް ހިލްސް ކުންފުންޏަށް ދިން ވާހަކަ އެވެ. ރައްޔިތުން ކަންބޮޑުވެގެން މިއުޅެނީ ގައުމަށް ބޮޑެތި މަޝްރޫއުތައް އަންނާތީ އެއް ނޫނެވެ. މައްސަލައަކީ މިއެއް ނޫނެވެ. މައްސަލައަކީ ދިވެހި ރައްޔިތުންގެ ޓެކްސް ފައިސާއިން ފަޅުތައް ހިއްކައިގެން ތަރައްގީކުރާ ރަސްމާލޭގެ ބިން، ޔަހޫދީންނާ ގާތް ގުޅުމެއް އޮންނަ ފަރާތަކަށް ދިގު މުއްދަތަކަށް ދޫކޮށްލުމެވެ. އަދި މިވަރުގެ ބޮޑު މުއާމަލާތެއް ހިންގާއިރު އަޕްފްރަންޓްކޮށް ގައުމަށް އެއްވެސް އެއްޗެއް ނުލިބޭތީ އެވެ. މިނިސްޓަރު ވިދާޅުވަނީ މިއީ "ވަގުތުން ޗެކް ލިބޭ" މަޝްރޫއެއް ނޫން ކަމަށެވެ. އަނެއްކޮޅުން ރައީސް މުއިއްޒު ވިދާޅުވަނީ ރަސްމާލޭގެ ބިން މި ދެނީ ހަމައެކަނި ކުއްޔަށް ކަމަށެވެ. ވާނުވާ ނޭނގި ސުވާލުތައް ގިނަވެ، ރައްޔިތުންގެ ކަންބޮޑުވުމުގެ އަޑު ގަދަވާން ފެށުމުން، ސަރުކާރާއި ސަރުކާރަށް ވާގިވެރިވާ ފަރާތްތަކުން މިހާރު މިވަނީ މި ނުރައްކާތެރި މުއާމަލާތް ދިފާއުކުރުމުގެ ކެމްޕޭނެއް ފަށާފަ އެވެ.

ސަރުކާރުން މިކަމުގައި ދައްކާ އެންމެ ބޮޑު އެއް ބަހަނާއަކީ، މި މަޝްރޫއުގެ ތެރެއިން އިސްރާއީލް މީހުންނަށް ރާއްޖޭގައި ވަޒަންވެރި ނުވެވޭނެ ކަމަށާއި، ގާނޫނު އެކަމަށް ތަން ނުދޭ ވާހަކަ އެވެ. ނަމަވެސް ބުނަން ހެއްޔެވެ؟ ތިޔަ ދައްކާ ވާހަކަތައް ގަބޫލުކުރަން ދިވެހި ރައްޔިތުންނަށް ދަތިވަނީ ސަބަބުތަކެއް ހުރެގެންނެވެ. ރާއްޖޭގައި މިހާރު ވެސް ހެދިފައި ހުރި އެތައް ގާނޫނަކަށް އަމަލު ނުކުރެވި، ތަންފީޒު ނުވެ އޮތް އިރު، މާދަމާ މި ބިމުގައި އެ ގާނޫނުތައް ހިނގާނެ ކަމަށް ބުނުމަކީ ޖޯކެކެވެ. ފިހާރަތަކުގެ ސޭޓުންނަށް ބޭރު މީހުންނަށް ނުތިބެވޭނެ ކަމަށް ގާނޫނުގައި އޮންނަތާ ކިތައް އަހަރު ވެއްޖެ ހެއްޔެވެ؟ އެކަން ހުއްޓުވުނު ހެއްޔެވެ؟ ނުހުއްޓުވުނެވެ.

ދިވެހިރާއްޖެއަކީ ނިސްބަތުން ގިނަ އަދަދަކަށް ގާނޫނުތައް ހެދިފައިވާ ގައުމަކަށް ވީނަމަވެސް، އެ ގާނޫނުތަކަށް އަވަސްއަވަހަށް ބަދަލު ގެނައުމަކީ އާންމު ކަމެކެވެ. ބައެއް ފަހަރު ވެރިމީހާގެ ފަސޭހައަށްޓަކައި، މިއަދު ފާސްކުރާ ގާނޫނު މާދަމާ އިސްލާހުކޮށް ބަދަލުކުރާތަން ފެނެ އެވެ. މި ހަގީގަތް އެންމެ ބޮޑަށް ހާމަވެގެންދާ އެއް މިސާލަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނެވެ. ދައުލަތް ހިންގުމުގެ މައިބަދަ ކަމުގައިވާ މި މުހިންމު ގާނޫނަށް އެކަނިވެސް މިސަރުކާރުން މިހާތަނަށް ހަތް ފަހަރަށް ވުރެ ގިނައިން ބަދަލު ގެނެސްފި އެވެ. މިފަދައިން ކަންކަން ހިނގަމުންދާ ގައުމެއްގައި، ބޭރުގެ ފަރާތްތަކަށް ރާއްޖޭގައި ވަޒަންވެރި ނުވެވޭނެ ކަމަށް ގާނޫނުގައި އޮތް ނަމަވެސް، އެއީ ބަދަލުނުވެ ދެމިއޮންނާނެ ކަމެއް ކަމަށް ބުނެ ދައްކާ ވާހަކައަކީ މާ ބުރަދަނެއް ހުރި ވާހަކައެއް ކަމަކަށް ނުބެލެވެ އެވެ

ސިޔާސީ ގޮތުން ނުވަތަ ވެރިކަން ހިންގާ ފަރާތަށް ކުރިމަތިވާ ކުދިކުދި ގޮންޖެހުންތަކުން އަރައިގަތުމަށްޓަކައި، މަޖިލީހުގެ އަޣުލަބިއްޔަތު ބޭނުންކޮށްގެން ސައުވީސް ގަޑިއިރު ތެރޭގައި ގާނޫނުތައް ބަދަލުކުރުމަކީ ރާއްޖޭގެ ގާނޫނީ ނިޒާމަށް ރައްޔިތުން ކުރާ އިތުބާރު ކުޑަކޮށްލާފައިވާ ކަމެކެވެ.

އެހެން ކަމުން އަވަސްއަވަހަށް ގާނޫނުތައް ބަދަލުކުރާ ވެއްޓެއްގައި، އެއްވެސް އިތުބާރެއް ނޯންނާނެ ކަމަށް އިންވެސްޓަރުން އަންނަނީ ފާހަގަކުރަމުންނެވެ. މިފަދަ ހާލަތެއްގައި، ބޭރު މީހުންނަށް ރާއްޖޭގައި ވަޒަންވެރި ނުވެވޭނެ ކަމަށް ބުނެ ދައްކާ ވާހަކަތަކަކީ އެއްވެސް އަސާސެއް ނެތް، ބުއްދި ގަބޫލުނުކުރާ ފަދަ ވާހަކަތަކޭ މި ބުނަނީ އެހެންވެގެންނެވެ.

މިފަދަ ހާލަތެއްގައި ގައުމު އޮއްވައި، ރާއްޖޭގައި ބޭރުގެ ފަރާތްތަކަށް ވަޒަންވެރި ނުވެވޭނެ ކަމަށް ބުނެ ސަރުކާރުން ދައްކާ ހުއްޖަތަކީ ގާނޫނުގައި އެކަން މަނާކޮށްފައި އޮތުމެވެ. އެހެންނަމަވެސް، މިއަދު އުފެދޭ އެންމެ ބޮޑު ސުވާލަކީ މިއެވެ. ވެރިމީހާގެ ވިސްނުމާއި ބޭނުމަށްޓަކައި ކޮންމެ ވަގުތަކުވެސް ބަދަލުކޮށްލެވޭ ގޮތަށް އޮތް ގާނޫނެއްގެ މައްޗަށް ބިނާކޮށް ދައްކާ ވާހަކައިގެ އަސްލު ބުރަދަނަކީ ކޮބައިހެއްޔެވެ؟ އިތުބާރު ގެއްލިފައިވާ ގާނޫނީ އައްޑަނައެއް ދައްކައިގެން، ގައުމުގެ މިނިވަންކަމާއި ސިޔާދަތާ ގުޅިފައިވާ ބޮޑު ކަމެއްގައި ރައްޔިތުންނަށް ޔަގީންކަން ދެވިދާނެ ހެއްޔެވެ؟ ހަގީގަތަކީ، އަމިއްލަ އެދުމާއި ވެރިކަމުގެ ބާރު ދެމެހެއްޓުމަށްޓަކައި އަވަސްއަވަހަށް ގާނޫނު ބަދަލުކުރުމުގެ ސަގާފަތެއް އޮތް ގައުމެއްގައި، "ގާނޫނުގައި މިހެން އޮތުމުން މިކަން މިހެން ނުވާނެޔޭ" ބުނެ ދައްކާ ވާހަކައިގެ އިތުބާރު ވަނީ މުޅިން ގެއްލި ފައެވެ.

ދެން ބާރުލާފައި ދައްކަނީ އިސްރާއީލު ޕާސްޕޯޓް މަނާކުރި ވާހަކަ އެވެ. ހަނދާނަށް ގެންނަވާށެވެ. ރައްޔިތުންގެ މަޖިލީހުގައި އެ މައްސަލަ ޕާކު ކޮށްލައިގެން 300 އެތައް ދުވަހެއް ވަންދެން ބާއްވައި، އެކި ބަހަނާތައް ދެއްކީ ކޮން ބައެއް ހެއްޔެވެ؟ ޕީއެންސީގެ މެންބަރުން މަޖިލީހުގައި ތެދުވެ، އެކަމާ ދެކޮޅަށް ވާހަކަދައްކައި، ޕާސްޕޯޓް މަނާކުރުމުގެ ކުރިން ދެވަނަ ވިސްނުމަކަށް ދާންޖެހޭ ކަމަށް ވަކާލާތު ކުރި އަޑު އަދިވެސް ކަންފަތްތަކުން ފިލައިގެން ނުދެއެވެ. އެކަމަކު މިއަދު އެކަމުގެ ކްރެޑިޓް ނަގައި، މި ސަރުކާރުން އެކަން ކުރަން ކެރުނު ވާހަކަ ދައްކަން ލަދެއް ވެސް ނުގަނޭ ހެއްޔެވެ؟

ހަގީގަތަކީ މުޅި ގައުމު މިއޮތީ "އަލައްބާރެއް" ގައި ޖެހި، މަޅިއެއްގައިތާށިވެފަ އެވެ. ބޭރުގެ އިންވެސްޓަރަކާއެކު އެއްބަސްވުމެއްގައި ސޮއިކުރިއިރު، އެކަމަށް އަމަލުކުރާނެ ހަރުދަނާ ގާނޫނީ އޮނިގަނޑެއް ނެތެވެ. އެއްބަސްވުން އޮތީ ހަތަރު ފާރުގެ އެތެރޭގައި ސިއްރުކޮށްފަ އެވެ. ދުވާލަކު ވާހަކައެއް ދައްކަމުން އަލައްބާރުވެސް އަދި މި ސަރުކާރުންވެސް ދަނީ ރައްޔިތުންގެ ލޮލުގައި އަނދުން އަޅުވަމުންނެވެ. އެހެން ނަމަވެސް، މަޑުމަޑުން އެތި އެތިކޮޅު މިދަނީ ތިލަވަމުންނެވެ. މިހާރު ބުނަނީ ޕްރޮޖެކްޓުން ލިބޭ ލާރިވެސް ހުންނާނީ ދިވެހިރާއްޖޭގެ ބޭންކުތަކުގައި ކަމަށެވެ.

ނިމުމެއް ނެތް 99 އަހަރަކީ ކުޑަ މުއްދަތެއް ނޫނެވެ. ދިވެހިންގެ އެންމެ އަގުބޮޑު ބިން، ދިވެހި ދަރިންގެ ހައްގެއްގެ ގޮތުގައި އޮތް ބިން، 99 އަހަރަށް ކުއްޔަށްދީފައި މި ވެރިން ވެރިކަން ނިންމާފައި ދާއިރު، އަންނަން އޮތް ޖީލުތަކަށް މިކަމުގެ ސަބަބުން ކުރިމަތިވާނެ ބިރުވެރިކަމާއި ނުރައްކާ އިންތިހާއަށް ބޮޑެވެ. މިއީ ސީދާ ގައުމުގެ މިނިވަންކަމާއި އިސްތިގުލާލަށް އޮތް ބޮޑު ގޮންޖެހުމެކެވެ.