އެއްބަސްވުމެއްގައި އޮންނަ އަކުރެއްވެސް ނުފޮރުވާނެ ކަމަށް ވިދާޅުވެ ވެރިކަމަށް އައި ރައީސް މުއިއްޒު، ރާއްޖޭގެ ބިމެއް ވިއްކާލުމަށްފަހު މުޅި އެއްބަސްވުން ފޮރުވައިފި: ދީދީ

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތީ އެ މަނިކުފާނު ގާއިމްކުރައްވާ އެއްބަސްވުމެއްގެ އެންމެ އަކުރެއް ވެސް ނުފޮރުވާނެ ކަމަށް ވިދާޅުވުމަށްފަހުގައި ކަމަށާއި އެހެން ނަމަވެސް ރަސްމާލޭގެ ބޮޑު ބައެއް ވިއްކާލުމަށްފަހު މުޅި އެއްބަސްވުން ފޮރުވާފައިވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހްމަދު ދީދީ  ވިދާޅުވެއްޖެ އެވެ. 

ރާއްޖެޓީވީ އިން ގެނަސްދޭ "ދިވެހީންގެ ބިން ދިވެހީންނަށް" ކަވަރޭޖްގައި ވާހަކަދައްކަވަމުން މެންބަރު ވިދާޅުވީ ރަސްމާލޭގެ ބޮޑު ބައެއް 99 އަހަރަށް އީގަލް ހިލްސް ކުންފުންޏަށް ދީފައިވާ ކަމަށް ބުނާ މައްސަލައިގައި ސަރުކާރުން އަދިވެސް ޖަވާބުދާރީވެފައި ނުވާއިރު އެކަމުގެ ކަންބޮޑުވުން ރައްޔިތުން ފާޅުކުރަމުންދާ ކަމަށެވެ. 

Advertisement

މި ސަރުކާރު ވެރިކަމަށް ގެނައުމަށް ރައްޔިތުން ވޯޓު ދިން އެންމެ މުހިއްމު އެއް ސަބަބަކީ މި ސަރުކާރަކީ ރައްޔިތުންނަށް އެއްވެސް ކަމެއް ނުފޮރުވާނެ ކަމަށް ރައްޔިތުންނަށް އެތައް ވައުދެއް ވުމުން ކަމަށާއި އެހެން ނަމަވެސް މި ސަރުކާރު ވެރިކަމަށް އައުމަށްފަހު ކުރިހާ ވެސް ކަމަކީ ރައްޔިތުންނަށް ކަންކަން އޮޅުވާލުމާއި، ފޮރުވުން ކަމަށް މެންބަރު ވިދާޅުވި އެވެ. ސަރުކާރުން މި އެއްބަސްވުމާ ގުޅިގެން ދައްކާ ވާހަކަ އާއި، އީގަލް ހިލްސް އިން ދައްކާ ވާހަކަ ވެސް ދިމާނުވާ ކަމަށް ދީދީ ވިދާޅުވި އެވެ. 

ހަގީގަތުގައި ވެސް ރައްޔިތުންގެ ވަރަށް ގިނަ ބައެއްގެ ކަންބޮޑުވުމެއް. ސޯޝަލް މީޑިއާ އަށް ބަލާލިކަމުގައި ވިޔަސް އަދި އަޅުގަނޑުމެންނަށް ވަކިވަކިން ގުޅާފަ ވެސް ވަރަށް ގިނަ ރައްޔިތުން އެބަ މިކަމާ ބެހޭ މައުލޫމާތު ނޭނގޭ ތީ، އަންސަރޓެނިޓީގައި، ވާއެއް ނުވާއެއް ނޭނގި. އެއްބަޔަކު ބުނަނީ 20 ބިލިއަން ޑޮލަރޭ. އެކަމަކު މި ސަރުކާރުގެ އިސް ބޭފުޅުން އެގޮތަށް ވިދާޅުވަމުން ގެންދަވާއިރު އެ ކުންފުނިން ބުނަނީ 12 ބިލިއަން ޑޮަލަރުގެ ވާހަކަ.  ކިހާ މުއްދަތެއްގައި ކަމެއް ނޭނގެ އިންވެސްޓް ކުރަން މި ޖެހެނީ. ބައެއް މީހުން އެބަ ކިޔާ 99 އަހަރުގެ ތެރޭގަ އޭ.  ސަރުކާރުން ބުނާ ވާހަކައާއި އެ ކުންފުނިން ބުނާ އަދަދުގެ ފަރަގުގައި ވެސް އެބައުޅޭ 8 ބިލިއަން ޑޮލަރު

އަހްމަދު ދީދީ

މި ހުރިހާ ކަމެއް ރައްޔިތުންނަށް އެނގެން ޖެހޭ ކަމަށާއި އެ ފައިސާ އަކީ ރައްޔިތުންގެ ޓެކްސް ފައިސާ އިން މި ސަރުކާރުން ކުރާ ޚަރަދެއް ކަމަށް ވެސް މެންބަރު ވިދާޅުވި އެވެ. އެހެންވީމާ ރައްޔިތުންނަށް އެއްބަސްވުމުގެ ހުރިހާ ކަމެއް އެނގެން ޖެހޭކަން ފާހަގަކުރައްވާ މެންބަރު ވިދާޅުވީ މިއަދު ރައްޔިތުން ކަންބޮޑުވުން ފާޅުކުރަނީ އެހެން ވެގެން ކަމަށެވެ. 

ރަސްމާލޭގައި ވަޒަންވެރިވެވޭގޮތަށް ހަދާއިރު، އިސްރާއީލު މީހުންނަކަށް ވަޒަންވެރި ނުވެވޭނެ ކަމަށް ބުނެ ސަރުކާރުން ދައްކާ ވާހަކައަށް ވެސް މެންބަރު ވަނީ ފާޑުވިދާޅުވެފަ އެވެ. އެގޮތުން އިސްރާއީލު މީހުންނަކީ ޑުއަލް ޕާސްޕޯޓް ގެންގުޅޭ ބައެއް ކަމަށާއި، އެމީހުން ރާއްޖެ އަންނާނީ އެހެން ގައުމެއްގެ ޕާސްޕޯޓް ހިފައިގެން ކަމަށް ވެސް ދީދީ ވިދާޅުވި އެވެ. 

ހަމަ ގޫގުލް ސަރޗެއް ކޮށްލިއަސް އެނގޭނެ ކޮންމެ ދިވެހި ރައްޔިތަކަށް ވެސް ވަރަށް ސިމްޕަލްކޮށް ފެންނަން ހުރި ހަގީގަތަކީ އިސްރާއީލުގެ ވަޒަންވެރިންގެ ވަރަށް ބޮޑު އިންސައްތަ އެއް އެއީ ޑުއަލް ޕާސްޕޯޓް، ނޫނީ ދެ ގައުމެއްގެ ޕާސްޕޯޓް ގެންގުޅޭ ބައެއްކަން. އޭގެތެރެއިން ވަރަށް ގިނަ މީހުންނަކީ 1967 ގެ ފަހުން އިސްރާއީލަށް ހިޖުރަ ކޮށްގެން އުޅޭ މީހުންތަކެއް. އެމީހުން އެހެން ގައުމުތަކަށް ދާއިރު މި ބޭނުން ކުރަނީ އިސްރާއީލުގެ ޕާސްޕޯޓެއް ނޫން. ރާއްޖެއަށް މިގޮތަށް އައިސް، ރާއްޖޭގެ ރެޒިޑެންސީ އެތައް މިލިއަން ޑޮލަރަކަށް ގަނެގެން ދެން އެމީހުންގެ ކަންތައްތައް ހުންނާނީ އެތަނުގައި ވެސް ގަދަ ކުރި ގޮތަށް މިތަނުގައި ވެސް ގަދަކުރަން

އަހްމަދު ދީދީ

އިސްރާއީލު މީހުންނަކީ އެއްވެސް އެހެން ގައުމެއްގެ ނުވަތަ ދުނިޔޭގެ ގާނޫނަކަށް ވެސް ބޯލަނބާ ބައެއް ނޫންކަން ފާހަގަކުރައްވާ ދީދީ ވިދާޅުވީ އެގައުމުގެ 1،000 ނުވަތަ 2،000 މީހުން ރާއްޖެ އައުމުން އެ މީހުން މިގައުމުން ބޭލުމަކީ ކުރެވޭނެ ކަމެއް ނޫންކަމަށެވެ. ރައްޔިތުން ކަންބޮޑުވަނީ މި ސަބަބާހުރެ ކަމަށާ އެހެން ކަމުން އެ އެއްބަސްވުމުގެ ތަފްސީލު ރައްޔިތުންނަށް އެނގެން ޖެހޭ ކަމަށް މެންބަރު ވިދާޅުވި އެވެ. ދީދީ ވަނީ އެހެންކަމުން މި އެއްބަސްވުން ވީހާ ވެސް އަވަހަކަށް ރައްޔިތުންނަށް ހާމަކުރުމަށް ސަރުކާރަށް ގޮވާލައްވާފަ އެވެ.