ރާއްޖޭގައި އިންސާފު ލިބުމަށް ހުރި ހުރިހާ ދޮރުތައް ބަންދުކުރުމަށް ސަރުކާރުން ދަނީ މަސައްކަތް ކުރަމުން: ވަހީދު
15 އޮކްޓޯބަރު 2026 | ބުރާސްފަތި 09:56މި ސަރުކާރުން ޝަރުއީ ނިޒާމާއި މިނިވަން މުއައްސަސާތައް ކޮންޓްރޯލްކޮށް، ބާރުތައް މުށުތެރެއަށްލާން މަސައްކަތް ކުރަމުންދާ ކަމަށް ކުރީގެ ދިއްދޫ ދާއިރާގެ މެންބަރު ވަހީދު ވިދާޅުވި. ރަސްމާލެ މަޝްރޫއުގެ އެއްބަސްވުންތަކުގައި ހުރި ނޭއްގާނީ ކަންކަން ފޮރުވުމަށް ސަރުކާރުން މަސައްކަތް ކުރާކަން ފާހަގަކުރައްވައި، ކޯޓުތަކަށް ނުފޫޒު ފޯރުވުމުގެ ސަބަބުން އިންސާފު ލިބުމުގެ މަގު ބަންދުވަމުންދާ ކަމަށް އޭނާ ވިދާޅުވި
ދިވެހީންގެ ބިން ދިވެހީންނަށް ޚާއްސަ ކަވަރޭޖްގައި ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ވާހަކަ ދައްކަވަނީ | ރާއްޖެއެމްވީ
ރާއްޖޭގެ އަދުލުގެ ނިޒާމު އޭގެ ޒާތުގައި މިނިވަންކަމާއެކު ހިންގުމުގެ ބާރުވެރިކަން ނައްތާލައި، ރައްޔިތުންނަށް އިންސާފު ލިބުމަށް ހުރި ހުރިހާ ދޮރުތަކެއް މި ސަރުކާރުން ބަންދުކުރަމުންދާ ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" ޚާއްސަ ކަވަރޭޖުގައި ވާހަކަ ދައްކަވަމުން ވަހީދު ވިދާޅުވީ، މި ސަރުކާރުގައި ހުރިހާ ކަމެއްގައި ވެސް ވަރަށް ދޯހަޅި ކަމަށާއި، އެ މައްޒަރުންތައް ރައްޔިތުންނަށް ފެނަމުންދާ ކަމަށެވެ.
ރައީސް މުއިއްޒުގެ ސަރުކާރުން ޝަރުއީ ނިޒާމު ފެއިލްކޮށްލުމަށް ފަހު އެ ނިޒާމު ކޮންޓްރޯލް ކުރުމަށް މަސައްކަތް ކުރަމުންދާކަން ފާހަގަކުރައްވައި ވަހީދު ވިދާޅުވީ، ސުޕްރީމް ކޯޓުގެ ފަނޑިޔާރުންގެ މައްޗަށް ސާބިތުނުވާ މައްސަލަތަކެއް ހުރި ކަމަށް ބަލައި، ފަނޑިޔާރުން ސަސްޕެންޑްކޮށް ވަކިކުރުމުގެ ކަންކަން ހިންގާފައިވަނީ ރާއްޖޭގެ ހުރިހާ ބާރެއް ރައީސް މުއިއްޒުގެ އަތްޕުޅަށް ނެންގެވުމުގެ ތެރެއިން ކަމަށް އޭނާ ވިދާޅުވި އެވެ.
ވަހީދު ވިދާޅުވީ ދައުލަތުގެ ތިން ބާރު ވަކިވެފައިވާ ނިޒާމެއްގެ ތެރެއިން، ގާނޫނުއަސާސީއާ އެއްގޮތަށް ވެރިކަން ހިންގާ ނަމަ މިފަދަ ކަންކަން ނުހިނގާނެ ކަމަށެވެ. އަދި ކޯޓުތަކާއި ދައުލަތުގެ މިނިވަން މުއައްސަސާތައް ސަރުކާރުގެ ބާރުގެ ދަށަށް ގެންނަން އުޅެނީ ކޮން ކަމަކާ ބިރުން، ކޮން ކަމެއް ފޮރުވަންތޯ އޭނާ ވަނީ ސުވާލު އުފައްދަވާފަ އެވެ.
މީގެ އިތުރުން ރަސްމާލެ މަޝްރޫއަށް އިޝާރާތް ކުރައްވައި ވަހީދު ވިދާޅުވީ، ރަސްމާލެ މަޝްރޫއާ ގުޅުންހުރި މައްސަލަތަކުގައި ވެސް ކޯޓަށް ހާޒިރުވެ ރައްޔިތުންނަށް ކަންކަން ސާފުކޮށްދިނުމުގެ ބަދަލުގައި، ބަންޑާރަ ނައިބު އުޅުއްވަނީ ފިއްލަވައިގެން ކަމަށެވެ.
ވަހީދު ވިދާޅުވީ ރަސްމާލެ މަޝްރޫއުގެ ފްރޭމްވޯކް އެއްބަސްވުމުގައި ސޮއިކުރުމަށްފަހު އިތުރު އެއްބަސްވުމެއްގައި ސޮއިކުރެވެން އޮތީ ގާނޫނުތަކެއް ހަދައިގެން ކަމަށް ބަންޑާރަ ނައިބު ވިދާޅުވަމުން ގެންދަވާ ކަމަށާއި، މި އެއްބަސްވުމުގެ ތެރޭގައި ހުރި ނޭއްގާނީ ކަންކަން ފޮރުވުމަށް މަސައްކަތް ކުރަމުންދާ ކަމަށެވެ.
ކޮން ކަމަކާ ބިރުންތޯ އެ މަނިކުފާނު އެހާވަރަށް އެ އުޅުއްވަނީ ކޯޓުތައް އެ ބޭފުޅާގެ ބާރުދަށަށް ގެންނަވައިގެން، މި ދައުލަތުގެ މިނިވަން މުއައްސަސާތައް އެ ބޭފުޅާގެ ބާރުދަށަށް ގެންނަވައިގެން ވެރިކަމެއް ކުރައްވާށޭ މި އުޅުއްވަނީ. އުޅުއްވަނީ. ކޮންކަމެއްތޯ މި ފޮރުވަން މި އުޅުއްވަނީ. އަޅުގަނޑުމެންނަށް މި ފެނިގެން މި ދިޔައީ މި ރަސްމާލެއާ ގުޅުންހުރި މައްސަލަތަކުގައިވެސް އެ މައްސަލަ ކޯޓަށް ހުށަހެޅީމާ އެ މައްސަލައިގައި ރައްޔިތުންނަށް އެ ކަންކަން ސާފުކޮށްދިނުމަށްޓަކައި ދެ ފަރާތުން އެ ހާޒިރުވެގެން އެ މައްސަލަ ކުރިއަށް ގެންގޮސްފައި އެ ނިމޭ ގޮތެއްގެ މައްޗަށް ބިނާކޮށް އެ ކަންކަން އިންސާފު ލިބިގެންދާނެ. އެހެންނަމަވެސް، އެ ހިސާބަށް ނުގޮސް ބަންނާ ނައިބު ތި ފާހަގަކުރި ގޮތަށް ފިއްލަވައިގެން މި އުޅުއްވަނީ. އުޅުއްވަނީ. އަޅުގަނޑުމެންނަށް އެނގޭ މި އެއްބަސްވީ އެއްބަސްވުމުގެ ތެރެއިން މުޅި ހުރީ ނޭއްގާނީ ކަންކަން. މި ނޭއްގާނީ ކަންކަން ފޮރުވުމަށްޓަކައި އެ މަސައްކަތް ކުރަމުން ދިޔައީ.އަބްދުﷲ ވަހީދު
ވަހީދު ވިދާޅުވީ، ކޯޓުތަކުގެ ތެރެއަށް ނުފޫޒު ފޯރުވައި، ފަނޑިޔާރުންނަށް މިނިވަންކަމާ އެކު ޝަރީއަތް ކުރެވޭނެ މާހައުލެއް ނެތުމުން މިއަދު ރައްޔިތުންނަށް އިންސާފު ލިބޭނެ މަގުތައް ބަންދުވަމުންދާ ކަމަށެވެ.
