ރަސްމާލެ މައްސަލަ ބޭރުކޮށްލުމަކީ ސަރުކާރުގެ ކޮންޓްރޯލް ދަށަށް ސުޕްރީމް ކޯޓު ގޮސްފައިވާ މިންވަރު ހާމަވާ ކަމެއް، މިއީ ހައްދުފަހަނައަޅައި ދިއުން: ކުރީގެ އުއްތަމަ ފަނޑިޔާރު
13 އޮކްޓޯބަރު 2026 | އަންގާރަ 13:07ރަސްމާލޭގެ ބޮޑު ސަރަހައްދެއް އީގަލް ހިލްސްއަށް ދިން މައްސަލަ ސުޕްރީމް ކޯޓުން ބޭރުކޮށްލުމަކީ، ޝަރުއީ ނިޒާމު ސަރުކާރުގެ ކޮންޓްރޯލްގެ ދަށަށް ގޮސްފައިވާ މިންވަރު ހާމަވާ ކަމެއް ކަމަށް ބުނެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ފާޑުވިދާޅުވެއްޖެ. އާންމު މަސްލަހަތު ހިމެނޭ މިފަދަ މައްސަލަތައް އިޖުރާއީ އަޑުއެހުމަކާ ނުލައި ރަޖިސްޓްރާ ބޭރުކޮށްލުމަކީ ގާނޫނުއަސާސީއާ ހިލާފު، ހައްދުފަހަނައަޅާފައިވާ އަމަލެއް ކަމަށްވެސް އެމަނިކުފާނު ފާހަގަކުރެއްވި
ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ | ރާއްޖެ އެމްވީ
ރަސްމާލޭގެ ބޮޑު ސަރަހައްދެއް ރައީސް މުއިއްޒުގެ ސަރުކާރުން އީގަލް ހިލްސް އަށް ދިން މައްސަލަ ޤާނޫނުއަސާސީއާ ހިލާފުކަމަށް ބުނެ، އެކަން ހުއްޓުވުމަށް އެދި ސުޕްރީމް ކޯޓަށް ހުށަހެޅި ދުސްތޫރީ މައްސަލަ އެ ކޯޓުން ބޭރުކޮށްލުމަކީ، އަދުލުއިންސާފު ގާއިމުކުރުމުގެ ނިޒާމުގެ މިނިވަންކަން ގެއްލި، ސަރުކާރުގެ ކޮންޓްރޯލްގެ ދަށަށް ދައުލަތުގެ އެންމެ މަތީ ކޯޓު ގޮސްފައިވާ މިންވަރު ހާމަކޮށްދޭ ކަމެއް ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވެއްޖެ އެވެ.
ޑރ. އަހުމަދު އަބްދުﷲ ދީދީ މިހެން ވިދާޅުވީ، ސުޕްރީމް ކޯޓުގެ ރަޖިސްޓްރާ އެ މައްސަލަ ބަލައިނުގަނެ ބޭރުކޮށްލުމާ ގުޅިގެން އެކްސް ގައި ކުރެއްވި ޕޯސްޓެއްގަ އެވެ.
މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓާއި، ޔޫނައިޓެޑް އެރަބް އެމިރޭޓްސް (ޔޫއޭއީ) ގެ ކުންފުންޏެއް ކަމަށްވާ އީގަލް ހިލްސްއާ ދެމެދު ސޮއިކުރި އެއްބަސްވުމުގެ ދުސްތޫރީ ސައްހަކަމާ މެދު ސުވާލު އުފައްދައި، ސުޕްރީމް ކޯޓަށް މި ދުސްތޫރީ މައްސަލަ ހުށަހެޅުއްވީ ޤާނޫނީ ވަކީލު އަދި ކެންދޫ ދާއިރާގެ ކުރީގެ މެންބަރު އަލީ ހުސައިން އެވެ. ނަމަވެސް، ސުޕްރީމް ކޯޓުގެ ރަޖިސްޓްރާ ވަނީ އެ މައްސަލައަކީ ދިވެހިރާއްޖޭގެ ކޯޓުތަކުގެ ޤާނޫނުގެ 11 ވަނަ މާއްދާގައި ބަޔާންކޮށްފައިވާ ފަދައިން، ފުރަތަމަ މަރުހަލާގައި އެ ކޯޓަށް ހުށަހަޅަންޖެހޭ ބާވަތުގެ މައްސަލައެއް ނޫން ކަމަށާއި، ސުޕްރީމް ކޯޓުގެ އަސްލީ އިޚްތިސާސް ލިބިގެންވާ ހާލަތްތަކުގެ ތެރޭގައި ނުހިމެނޭ ކަމެއް ކަމަށް ނިންމަވައި މައްސަލަ ބޭރުކޮށްލައްވާފަ އެވެ.
މި ނިންމުމަށް ފާޑުވިދާޅުވަމުން ކުރީގެ އުއްތަމަ ފަނޑިޔާރު ޑރ. ދީދީ ވިދާޅުވީ، މިއީ ކަނޑައެޅިގެން ޤާނޫނުއަސާސީގެ 68 ވަނަ މާއްދާ އާއި، އެނޫންވެސް ކަމާބެހޭ ޤާނޫނުއަސާސީގެ މާއްދާތަކާއި، ކޯޓުތަކުގެ ޤާނޫނުގެ މާއްދާތަކާ ހިލާފު ނިންމުމެއް ކަމާމެދު އެއްވެސް ޝައްކެއްނެތް ކަމަށެވެ.
އަދި މިބާވަތުގެ "ޕަބްލިކް އިންޓަރެސްޓް ލިޓިގޭޝަން" ނުވަތަ އާންމު މަސްލަހަތު ހިމެނޭ މައްސަލައެއް ފަނޑިޔާރުންގެ މަޖިލީހުންވެސް ބަލައިނުގަތުމަށް ނިންމަންވާނީ އިޖްރާއީ އަޑުއެހުމަކަށް ފަހު ޤާނޫނީ ސަބަބުތައް ސާފުކޮށް ބަޔާންކުރުމަށް ފަހުގައި ކަމަށް އެމަނިކުފާނު ފާހަގަކުރެއްވި އެވެ. މީގެއިތުރުން، ރަޖިސްޓްރާ އޭނާގެ އިޚްތިސާސުން ބޭރުވެ ކޯޓަށް ހުށަހެޅޭ މިފަދަ މައްސަލަތައް ބޭރުކުރުމަކީ ހައްދުފަހަނައަޅައި ދިއުމެއްގެ ގޮތުގައި މެނުވީ ނުވާނެ ކަމަށްވެސް ޑރ. ދީދީ ވިދާޅުވި އެވެ.
ރަސްމާލެ މަޝްރޫއަކީ ރައީސް ޑރ. މުޙައްމަދު މުއިއްޒުގެ ސަރުކާރުން އެންމެ އިސްކަމެއް ދީގެން ކުރިއަށްގެންދާ ބޯހިޔާވަހިކަމުގެ ބިޔަ މަޝްރޫއު ކަމަށް ބުނަމުން އައި މަޝްރޫއެވެ. ނަމަވެސް ކުއްލިއަކަށް ފެނިގެން ދިއައީ އީގަލް ހިލްސް އަށް ރަސްމާލޭގެ ބޮޑު ސަރަހައްދެއް 99 އަހަރަށް ދިން ތަނެވެ. އެ އެއްބަސްވުމާ ދެކޮޅަށް ހުށަހެޅުނު މައްސަލަ ކޯޓުން ބޭރުކޮށްލުމުން ސިޔާސީ އަދި ގާނޫނީ ދާއިރާގެ ގިނަ ބައެއްގެ ފާޑުކިޔުން ސަރުކާރަށާއި ޝަރުއީ ދާއިރާއަށް ދަނީ އަމާޒުވަމުންނެވެ.
