ޒެލެންސްކީ ވެރިކަމުން ދުރުކޮށް ޔޫކްރެއިނަށް އާ ރައީސަކު އިންތިޚާބުކުރަން ޖެހޭ: ޓްރަމްޕް
11 އޮކްޓޯބަރު 2026 | އާދީއްތަ 03:07ރަޝިޔާއާއެކު އެއްބަސްވުމަކަށް އައުމަށް ލިބުނު ފުރުސަތުތަކުގެ ބޭނުން ޒެލެންސްކީ ނުހިއްޕަވާ ކަމަށް ތުހުމަތުކުރައްވައި، ޔޫކްރެއިނަށް އާ ރައީސަކު ހޯދުމަށް ޑޮނަލްޑް ޓްރަމްޕް ގޮވާލައްވައިފި. ޓްރަމްޕްގެ މި ވާހަކަތަކަށް ރައްދު ދެއްވަމުން ޔޫކްރެއިންގެ ޚާރިޖީ ވަޒީރު ވިދާޅުވީ ޒެލެންސްކީ މަސައްކަތް ކުރައްވަނީ ޤައުމުގެ މިނިވަންކަމަށް ޓަކައި ކަމަށާއި އޭނާއަށް ރައްޔިތުންގެ ފުރިހަމަ ތާއީދު އެބައޮތް ކަމަށް
ރަޝިޔާގެ ތެޔޮ ކާރުޚާނާތަކަށް ޔޫކްރެއިނުން ދެމުންދާ ހަމަލާތަކަށް އެމެރިކާގެ ރައީސް ޑޮނަލްޑް ޓްރަމްޕް ފާޑުވިދާޅުވަނީ | ސްކައި ނިއުސް
ރަޝިޔާއާ ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމަށް އެއްބަސްވުމަކަށް އައުމަށް ވޮލޮދްމީރް ޒެލެންސްކީ ތަކުރާރުކޮށް ނުކުޅެދިފައިވާ ކަމަށް ތުހުމަތު ކުރައްވައި، ޔޫކްރެއިނަށް "އާ ރައީސަކު ހޯދުމަށް" އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ގޮވާލައްވައިފި އެވެ. ޔޫކްރެއިންގެ ލީޑަރަށް ފާޑުވިދާޅުވަމުން ޓްރަމްޕް ވިދާޅުވީ، "އެއްބަސްވުމަކަށް އާދެވޭނެ އާ ލީޑަރަކު އެ މީހުން [ޔޫކްރެއިންގެ ރައްޔިތުން] ހޯދުމަށް އަޅުގަނޑު ލަފާދެން. ސަބަބަކީ، އޭނާއަށް [ޒެލެންސްކީއަށް] އެއްބަސްވުމެއް ހަދާނެ ގިނަ ފުރުސަތުތަކެއް ލިބުނު ނަމަވެސް އޭނާ އެ ކަން ކޮށްފައި ނުވާތީ."
"ޔޫކްރެއިނަށް އާ ރައީސަކު ހޯދަންވީ ވަގުތު އައިސްފި ކަމަށް އަޅުގަނޑު ދެކެން،" ޓްރަމްޕް ވިދާޅުވި އެވެ. ރަޝިޔާއާއި ޔޫކްރެއިންގެ ހަނގުރާމަ އަކީ ހުއްޓުވިދާނެ ކަމެއް ކަމަށް ވެސް ޓްރަމްޕް ވަކާލާތު ކުރެއްވި އެވެ. "އަޅުގަނޑު ރައީސްކަމުގައި ހުރި ނަމަ، ތިޔަ ހަނގުރާމައެއް ދުވަހަކު ވެސް ނުހިނގާނެ. އެ ހަނގުރާމަ ދުވަހަކު ނުވެސްފެށޭނެ،" އޭނާ ވިދާޅުވި އެވެ. ހަނގުރާމަ ނިމުމަކަށް ގެނައުމަށް ލިބުނު އެތައް ފުރުސަތެއް ޒެލެންސްކީ ދޫކޮށްލައްވާފައިވާ ކަމަށް ވެސް އެމެރިކާގެ ރައީސް ތުހުމަތު ކުރެއްވި އެވެ.
މި ހާލަތަކީ "ވަރަށް އުނދަގޫ" ހާލަތެއްގެ ގޮތުގައި ސިފަކުރައްވަމުން ޓްރަމްޕް ވިދާޅުވީ، "މި ހަނގުރާމަ އެތައް ފަހަރަކު، އެތައް އެތައް ފަހަރަކު ހައްލުކުރުމުގެ ފުރުސަތު ޒެލެންސްކީއަށް ލިބުނު، ނަމަވެސް އޭނާ އިހުތިޔާރު ކުރަނީ އެ ކަން ނުކުރުމަށް."
ރަޝިޔާގެ ތެލާއި ގޭސް އުފައްދާ ވަސީލަތްތަކަށް ޔޫކްރެއިނުން ދެމުންދާ ހަމަލާތަކަށް ފާޑުވިދާޅުވެ ޓްރަމްޕް ވިދާޅުވީ، ތެޔޮ ސާފުކުރާ ކާރުޚާނާތަކަށް ދޭ ހަމަލާތަކުގެ ސަބަބުން ދުނިޔޭގެ ތެލުގެ ދަތިކަން އިތުރަށް ގޯސްވެ، އެމެރިކާގެ ދަނޑުވެރިންނާއި ނައަމްސޫފި ގެންގުޅޭ މީހުންނަށް އޭގެ އަސަރު ފޯރާނެ ކަމަށެވެ. "އަޅުގަނޑުމެން އެ މީހުން [ޒެލެންސްކީގެ ސަރުކާރު] ގާތު ބުނިން، ބޭނުން ކޮންމެ ކަމެއް ކުރާށޭ، އެކަމަކު ޑީސަލް ތެލަށް ހަމަލާ ނުދޭށޭ، އެއީ ވަރަށް ބޮޑު މައްސަލައެއް އޮތީމަ. ވަރަށް ބޮޑު ތަދުމަޑުކަމެއް،" އޭނާ ވިދާޅުވި އެވެ.
ނިއު ޔޯކްގައި ބޭއްވި އދ.ގެ އާންމު މަޖިލީހުގެ ހަވާސާގައި އެމެރިކާގެ ރައީސް ޑޮނަލްޑް ޓްރަމްޕް ޔޫކްރެއިންގެ ރައީސް ވޮލޮދްމީރް ޒެލެންސްކީއާ ބައްދަލުކުރައްވަނީ | ގެޓީ އިމޭޖަސް
ފަހުގެ މަސްތަކުގައި މޮސްކޯ އާއި ކިޔޭވް އިން ވަނީ ހަމަލާތައް ވަރުގަދަކޮށް، އެއް ބަޔަކު އަނެއް ބައެއްގެ ލޮޖިސްޓިކްސް މަރުކަޒުތަކާއި، ބަނދަރުތަކާއި، ހަކަތައިގެ އުމްރާނީ ވަސީލަތްތަކަށް އަމާޒުކޮށްފަ އެވެ.
އާންމުންގެ އުމްރާނީ ވަސީލަތްތަކަށް ގަސްދުގައި ހަމަލާދޭ ކަމަށް ކުރެވޭ ތުހުމަތުތައް މޮސްކޯއާއި ކީވްއިން ދޮގުކުރެ އެވެ. އަދި، އެ ޤައުމުތަކުން ދޭ ހަމަލާތަކަކީ އަސްކަރީ އަމާޒުތަކަށް ނުވަތަ އަސްކަރީ ހަރަކާތްތަކާ ގުޅުން ހުރި ތަންތަނަށް ދޭ ހަމަލާތަކެއް ކަމަށް ދެ ޤައުމުން ވެސް ބުނެ އެވެ.
ޒެލެންސްކީއަށް ފާޑުވިދާޅުވެ ޓްރަމްޕް ވާހަކަފުޅު ދެެއްކެވުމާއެކު، ޔޫކްރެއިންގެ ޚާރިޖީ ވަޒީރު އަންދްރީ ސީބީހާ ވަނީ އެ ކަމަށް ރައްދު ދެއްވާފަ އެވެ. ހަނގުރާމައިގެ މި ދަނޑިވަޅުގައި ޒެލެންސްކީ ޔޫކްރެއިން ލީޑުކުރައްވަމުން ގެންދަވަނީ "މިނިވަންކަމާއި، އަމިއްލަ އިޚުތިޔާރާއި، ކަރާމާތަށް ޓަކައި" ކަމަށް ސީބީހާ ވިދާޅުވި އެވެ.
"އޭނާއަށް [ޒެލެންސްކީ] ޔޫކްރެއިންގެ ރައްޔިތުންގެ ތާއީދު އެބައޮތް، އަދި، ގޮތް ނިންމުމުގެ ހައްގު އެ ރައްޔިތުންނަށް އެބައޮތް. ބޭރު ޤައުމުތަކުން ދޭ ބަޔާންތަކުން ޔަގީން ވަނީ އޭނާ އެ މަސައްކަތް ކުރައްވަމުން ގެންދަ ވަނީ ރަނގަޅަށް ކަން. އޭނާއަށް ތާއީދު ހައްގުވޭ،" ސީބިހާ ވިދާޅުވި އެވެ.
މަސްދަރު: އަނަދޮލު އޭޖެންސީ
