ފިނިމޫސުމުގެ ކުރިން ޔޫކްރެއިންގެ ދިފާޢީ ބާރު ވަރުގަދަކުރަން އާ މިސައިލް ޕެކޭޖެއް އިނގިރޭސިވިލާތުން ފޮނުވަނީ
15 އޮކްޓޯބަރު 2026 | ބުރާސްފަތި 02:15ރަޝިޔާގެ ހަމަލާތަކުން ދިފާޢުވުމަށް ޔޫކްރެއިންގެ ވައިގެ ނިޒާމު ވަރުގަދަކުރުމާ ގުޅޭގޮތުން ދެ ގައުމުގެ ލީޑަރުން މަޝްވަރާކުރައްވައި، އިނގިރޭސިވިލާތުން އާ މިސައިލް ޕެކޭޖެއް ދިނުމަށް ނިންމައިފި. މީގެ އިތުރުން، ފިނި މޫސުމުގެ ކުރިން ދުރު-ރާސްތާގެ ހަތިޔާރު ފޯރުކޮށްދިނުން އަވަސްކުރުމަށާއި، ބައިނަލްއަގުވާމީ އެހީތެރިކަން ހޯދުމަށް ޑިޕްލޮމެޓިކް މަސައްކަތްތައް ވަރުގަދަކުރުމަށް ވެސް ވަނީ އެއްބަސްވެފައި
އިނގިރޭސިވިލާތުގެ ބޮޑުވަޒިރު އެންޑީ ބަރނަމް ލަންޑަނުގައި ހުންނަ ނަންބަރ 10 ޑައުނިންގ ސްޓްރީޓްގައި ޔޫކްރެއިންގެ ރައީސް ވޮލްދްމީރް ޒެލެންސްކީއާ ބައްދަލުކުރަައްވަނީ | އަނަދޮލު އޭޖެންސީ
ޔޫކްރެއިންގެ ރައީސް ވޮލޮދްމިއަރ ޒެލެންސްކީއާއެކު ބޭއްވެވި މަޝްވަރާތަކަށް ފަހު، ލައިޓްވެއިޓް މަލްޓިރޯލް މިސައިލްގެ އާ ޕެކޭޖެއް ހިމެނޭހެން ޔޫކްރެއިނަށް އިތުރު އަސްކަރީ އެހީތެރިކަން ފޯރުކޮށްދެއްވާނެ ކަމަށް އިނގިރޭސިވިލާތުގެ ބޮޑުވަޒީރު އެންޑީ ބަރނަމް ބުދަ ދުވަހު ވައުދުވެވަޑައިގަންނަވައިފި އެވެ. ބަރނަމް ޒެލެންސްކީއާ ބައްދަލުކުރައްވާފައި ވަނީ ލަންޑަނުގައި ހުންނަ ބަރނަމްގެ ރަސްމީ އޮފީސް، ނަންބަރ 10 ޑައުނިންގ ސްޓްރީޓްގަ އެވެ.
ރަޝިޔާއިން އާންމުންނަށާއި ހަކަތައިގެ އުމްރާނީ ވަސީލަތްތަކަށް ދެމުންދާ ހަމަލާތަކާއި، ކީވްއަށް އަސްކަރީ އެހީތެރިކަން ފޯރުކޮށްދިނުމާއި، ފިނި މޫސުމުގެ ކުރިން ޔޫކްރެއިންގެ ވައިގެ ދިފާޢީ ނިޒާމު ވަރުގަދަކުރުމަށް ކުރަމުންދާ މަސައްކަތްތަކާ މެދު ދެ ލީޑަރުން މަޝްވަރާކުރެއްވި ކަމަށް ޑައުނިންގ ސްޓްރީޓުން ނެރުނު ބަޔާނެއްގައި ބުންޏެވެ. "ރަޝިޔާއިން ސުލްހައަށް އެއްވެސް ޝައުގުވެރިކަމެއް ނެތްކަން ސާފުކޮށް އެނގޭކަން ލީޑަރުން ފާހަގަކުރެއްވި،" އެ ބަޔާނުގައި ބުންޏެވެ.
ޖެޓް-ޕަވަރޑް ޑްރޯންތައް ބޭނުންކޮށްގެން ރަޝިޔާއިން ދެމުންދާ ހަމަލާތަކަށް ރައްދުދިނުމުގެ ގޮތުންނާއި، ކީވްއަށް ދޭ އެހީތެރިކަން އިތުރުކުރުމަށް ޔޫކްރެއިންގެ ބައިވެރިން ކުރަމުންދާ މަސައްކަތްތަކުގެ ދަށުން އިނގިރޭސިވިލާތުން ދޭ ލައިޓްވެއިޓް މަލްޓިރޯލް މިސައިލްގެ އެންމެ ފަހުގެ ޕެކޭޖުގެ ތަފްސީލުތައް އެންޑީ ބަރނަމް ހިއްސާކުރެއްވި އެވެ. ޔޫކްރެއިންގެ ހަނގުރާމައިގެ މައިދާނުގައި ބޭނުންކުރުމަށް އީޖާދީ އަސްކަރީ ހައްލުތައް ތަރައްގީކުރުމުގެ މަސައްކަތް އިނގިރޭސިވިލާތުން ކުރިއަށް ގެންދާނެ ކަމަށާއި، އޭގެ ތެރޭގައި އެކުވެރި އެހެން ޤައުމުތަކުން ފޯރުކޮށްދޭ ސާމާނުތަކަށް އިނގިރޭސިވިލާތުގެ އަސްކަރީ ގާބިލުކަން ބައްޓަންކުރުން ހިމެނޭ ކަމަށް ވެސް އޭނާ ވިދާޅުވި އެވެ.
ފިނި މޫސުމުގެ ކުރިން ޔޫކްރެއިނަށް ދުރު-ރާސްތާގެ މިސައިލްތަކާއި ދިފާޢީ އެހެނިހެން އެހީތައް ފޯރުކޮށްދިނުން އިނގިރޭސިވިލާތަށް އަވަސްކުރެވިދާނެ ގޮތްތަކާ މެދު ވެސް ދެ ލީޑަރުން މަޝްވަރާކުރެއްވި އެވެ. އަދި, ކީވްއަށް ބައިނަލްއަގުވާމީ ފެންވަރުގައި ދިފާޢީ ސާމާނު ފޯރުކޮށްދިނުމަށް އެހީތެރިވުމުގެ ގޮތުން ޑިޕްލޮމެޓިކް މަސައްކަތްތައް ކުރިއަށް ގެންދާނެ ކަމަށް ބަރނަމް ވިދާޅުވި އެވެ. ދެ ލީޑަރުން ވެސް ވަރަށް އަވަހަށް އަލުން ވާހަކަފުޅު ދެއްކެވުމަށް އުންމީދުކުރައްވާ ކަމަށް ވެސް ޑައުނިންގ ސްޓްރީޓްގެ ބަޔާނުގައި ބުންޏެވެ.
މަސްދަރު: އަނަދޮލު އޭޖެންސީ
