ގްރީންލެންޑަކީ އެމެރިކާގެ ދިފާޢީ އައްޑަނަ ކަމަށް ވިދާޅުވެ، އެ ރަށުން ތެޔޮ ހޯދުމުގެ ޕްލޭން ޓްރަމްޕް އިއުލާނުކުރައްވައިފި
14 އޮކްޓޯބަރު 2026 | ބުދަ 08:29ގްރީންލެންޑުގެ އިސްތިރާޖީ މުހިންމުކަން ފާހަގަކުރައްވައި، އެ ތަނުގައި ތެލާއި މައުދަން ހޯދުމުގެ ބޮޑު މަޝްރޫއެއް ފެށުމަށް ތައްޔާރުވަމުންދާކަން ޑޮނަލްޑް ޓްރަމްޕް ހާމަކުރައްވައިފި. އެމެރިކާގެ ދިފާޢީ ނިޒާމު ވަރުގަދަކުރުމަށް އެ ޖަޒީރާގައި އަސްކަރީ ހަރަކާތްތައް ފުޅާކުރުމުގެ އެއްބަސްވުމެއް ގާއިމުކޮށްފައިވީ ނަމަވެސް، ތިމާވެށީގެ ސަބަބުތަކަށް ޓަކައި ތެޔޮ ހޯދުމުގެ އާ ހުއްދަ ދޫކުރުން ގްރީންލެންޑުން އޮތީ ހުއްޓާލާފައި
އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ނޫސްވެރިންނާ ވާހަކަފުޅު ދައްކަވަނީ | ގެޓީ އިމޭޖަސް
ދުނިޔޭގެ ބާޒާރުގައި ހަކަތައިގެ އަގުތައް އުފުލިފައިވާ ދަނޑިވަޅެއްގައި، އާކްޓިކް ސަރަހައްދުގެ ޖަޒީރާއެއް ކަމަށްވާ ގްރީންލެންޑުން ތެލާއި ގޭސް އަދި މައުދަން ހޯދުމުގެ ބޮޑު ދިރާސާއެއް ފެށުމުގެ މަސައްކަތް ކުރިއަށްދާ ކަމަށާއި، ފަސޭހައިން ނެގެން ހުރި ތެލުގެ ބޮޑެތި މުއްސަނދިކަމެއް އެ ޖަޒީރާގައި ހުރި ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވެއްޖެ އެވެ.
"އަޅުގަނޑުމެން އާ އަދި ރީތި ގްރީންލެންޑްގައި ތެލާއި، ގޭހާއި، އަދި މައުދަން ހޯދުމުގެ ބޮޑު މަޝްރޫއެއް ފެށުމަށް މި ދަނީ ތައްޔާރުވަމުން،" އީރާނުގެ ހަނގުރާމައަށް ހަތް މަހަށް ވުރެ ގިނަ ދުވަސްވެ، ދުނިޔޭގެ ހަކަތައިގެ އަގުތައް އިންތިހާއަށް އުފުލިފައިވާ ދަނޑިވަޅެއްގައި، ޓްރަމްޕް ވިދާޅުވި އެވެ.
ދުނިޔޭގައި ފަސޭހައިން ނެގެން ހުރި އެންމެ ބޮޑެތި ތެލުގެ ރިޒާވްތަކުގެ ތެރޭގައި ގްރީންލެންޑް ހިމެނޭ ކަމަށް ބައެއް މާހިރުން ޤަބޫލުކުރައްވާ ކަމަށް ވިދާޅުވި ނަމަވެސް، އެ އަންދާޒާތަކާ ގުޅޭގޮތުން ނުވަތަ ރޭވިފައިވާ ހޯދުންތަކުގެ މަސައްކަތްތަކާ ބެހޭ އެއްވެސް ތަފުސީލެއް އޭނާ ހާމަކުރައްވާފައެއް ނުވެ އެވެ. އަދި، އެމެރިކާއާއި ވިލާތުގެ ޤައުމުތަކަށް ކުރިމަގުގައި އަތުވެދާނެ ހަމަލާތަކުން ދިފާޢުކުރުމުގައި ގްރީންލެންޑް މުހިންމު ދައުރެއް އަދާކުރާނެ ކަމަށް ވިދާޅުވެ، އެ ޖަޒީރާ އޮތް އިސްތިރާޖީ ސަރަހައްދުގެ މުހިންމު ކަން ވެސް ޓްރަމްޕް ފާހަގަކުރެއްވި އެވެ.
"އެމެރިކާއަށް އަމާޒުކޮށް ކުރިމަގުގައި ދޭ ކޮންމެ ހަމަލާއެއް ވެސް އަންނަން ޖެހޭނީ ގްރީންލެންޑް ހުރަސްކޮށް. އެ ތަނުގައި އަޅުގަނޑުމެންގެ ދިފާޢީ ބާރުތަކުން ޑްރޯންތަކާއި، މިސައިލްތަކާއި، ނުވަތަ އަދި އުފައްދާފައި ނުވާ ފަދަ ހަތިޔާރެއް ނަމަވެސް އާންމު އުސޫލުން ވައްޓާލާނެ،" އޭނާ ވިދާޅުވި އެވެ. "އެ ތަނުން އަލުގަނޑުމެންނަށް ވަގުތާއި، ލޮކޭޝަނާއި، އަދި މަންޒަރު ފެންނަ ގޮތް، ދުނިޔޭގެ އެހެން އެއްވެސް ތަނަކުން ނުލިބޭ ވަރަށް ލިބިގެންދޭ."
އޭނާ މި މޭރުމުން ވިދާޅުވެފައި މި ވަނީ، ދުނިޔޭގެ އެންމެ ބޮޑު ޖަޒީރާގައި އެމެރިކާގެ އަސްކަރީ ހަރަކާތްތައް ފުޅާކުރުމަށް ޓަކައި، އިތުރު އަސްކަރީ މަރުކަޒުތަކާއި މިސައިލް ދިފާޢީ ގާބިލުކަން އިތުރުކުރުން ހިމެނޭގޮތަށް ވޮޝިންގޓަން، ޑެންމާކް އަދި ގްރީންލެންޑާ ދެމެދު ސެޕްޓެންބަރު މަހު އެއްބަސްވުމެއްގައި ސޮއިކޮށްފައިވާ ދަނޑިވަޅެއްގަ އެވެ.
ގްރީލެންޑަކީ "އަޅުގަނޑުމެންގެ [އެމެރިކާގެ] އާ" ބިމެއްގެ ގޮތުގައި ޓްރަމްޕް ސިފަކުރެއްވި ނަމަވެސް، އެ ޖަޒީރާއަކީ ޑެންމާކުގެ ބާރުގެ ދަށުގައި އޮންނަ އަމިއްލަ ދާޚިލީ ވެރިކަމެއް ހިންގާ ސަރަހައްދެކެވެ. އަދި، އެ އެއްބަސްވުމުގައި ޑެންމާކުގެ ސިޔާދަތާއި، އަމިއްލަ އިޚުތިޔާރު ކަނޑައެޅުމަށް ގްރީންލެންޑްގެ ރައްޔިތުންނަށް ލިބިގެންވާ ހައްގު ބަލައިގަނެފައިވެ އެވެ.
ތިމާވެއްޓާއި މޫސުމަށް ކުރާ ނޭދެވޭ އަސަރުތަކާ ގުޅިގެން ކަންބޮޑުވުން ފާޅުކޮށް، ތެލާއި ގޭސް ހޯދުމުގެ އާ ލައިސަންސްތައް ދޫކުރުން ގްރީންލެންޑުން ވަނީ 2021 ވަނަ އަހަރު ހުއްޓާލާފަ އެވެ. ނަމަވެސް، އޭގެ ކުރިން ދޫކޮށްފައިވާ ލައިސަންސްތައް އަދިވެސް ދެމިއޮތް ކަމަށް މަސްރަހުގެ ދާރިސުން ވިދާޅުވެ އެވެ.
މަސްދަރު: އަނަދޮލު އޭޖެންސީ
