އެމެރިކާއިން ހަމަލާދިނީ "އީރާނުގެ އެއްވެސް ކުށެއްނެތި"، ހަނގުރާމަ ހުއްޓުވަން މަސައްކަތް ކޮށްދޭނަން: ޕުޓިން
9 އޮކްޓޯބަރު 2026 | ހުކުރު 05:55އީރާނާއި އެމެރިކާގެ މަސްރަހު ގޯސްވެފައިވާ ދަނޑިވަޅެއްގައި، މި މައްސަލަ ހައްލުކުރުމަށް ރަޝިޔާއިން ކުރެވެން ހުރި ހުރިހާ މަސައްކަތެއް ކުރާނެ ކަމުގެ ޔަގީންކަން ރައީސް ޕުޓިން ވަނީ ދެއްވާފައި. އީރާނާއި ރަޝިޔާއާ ދެމެދުގައި އޮތް އިސްތިރާޖީ ގުޅުން ބަދަހިވަމުންދާއިރު، މެދުއިރުމަތީގެ ހަމަނުޖެހުންތައް ނިމުމަކަށް ގެނައުމަށް މޮސްކޯއިން މެދުވެރިއެއްގެ ދައުރު އަދާކުރުމަށް ތައްޔާރަށް އޮތްކަން ވެސް ޕުޓިން ވަނީ ހާމަކުރައްވާފައި
ރަޝިޔާގެ ރައީސް ވްލަޑިމިއާ ޕުޓިން ތުރްކްމެނިސްތާނުގައި އީރާނުގެ ރައީސް މަސްޢޫދު ޕީޒިޝްކިޔާންއާ ބައްދަލުކުރައްވަނީ | އާރުޓީ
އެމެރިކާ އިސްވެ އީރާނާ ދެކޮޅަށް ފެށި ޣައިރުގާނޫނީ ހަނގުރާމަ ހުއްޓުވުމަށް ޓަކައި ރަޝިޔާއިން "ކުރެވެން ހުރި ހުރިހާ މަސައްކަތެއް ކޮށްދޭނެ" ކަމަށް، ރަޝިޔާގެ ރައީސް ވްލަޑިމިއާ ޕުޓިން ވިދާޅުވެއްޖެ އެވެ. އޭނާ މި މޭރުމުން ވިދާޅުވީ، އީރާނުގެ ރައީސް މަސްޢޫދު ޕީޒިޝްކިޔާންއާ ބައްދަލުކުރައްވައި ވާހަކަފުޅު ދައްކަވަމުންނެވެ. ރަޝިޔާގެ ނޫސްތަކުން މި ކަން ހާމަކޮށްފައިވާއިރު، މި ދެ ލީޑަރުން ބައްދަލުކުރެއްވީ ބުރާސްފަތި ދުވަހު ތުރުކުމެނިސްތާނުގަ އެވެ. މި ބައްދަލުވުން ބާއްވާފައިވަނީ ކުރީގެ ރޫސީވިލާތުގެ ޤައުމުތަކުގެ މައްޗަށް އެކުލެވޭ ޖަމާއަތެއް ކަމަށްވާ ކޮމަންވެލްތު އޮފް އިންޑިޕެންޑެންޓް ސްޓޭޓްސްގެ ސަމިޓުގެ ހަވާސާގަ އެވެ.
ރަޝިޔާގެ އިންޓަފެކްސް ނޫސް އޭޖެންސީން ރިޕޯޓުކޮށްފައިވާ ގޮތުން، "އަޅުގަނޑުމެންގެ ސްޓޭންޑް ތިޔަބޭފުޅުންނަށް އެނގިވަޑައިގަންނަވާނެ. އަޅުގަނޑުމެންގެ ފަރާތުން، މި މައްސަލަ ހައްލުކުރުމަށް އެހީތެރިވުމަށް ޓަކައި ކުރެވެން ހުރި ހުރިހާ ކަމެއް ކުރުމަށް މިތިބީ ތައްޔާރަށް،" ކަމަށް ޕުޓިން ޕީޒިޝްކިޔާން އަރިގުގައި ދެންނެވި އެވެ. އަދި، "އީރާނުގެ އެއްވެސް ކުށަކާ ނުލައި" އެމެރިކާއިން ފެށި މި ހަނގުރާމަ ނިމުމަކަށް ގެނައުމަށް އީރާނުން ހަގީގީ މާނައިގައި މަސައްކަތްތަކެއް ކުރަމުންދާކަން އެނގިވަޑައިގަންނަވާ ކަމަށް ޕުޓިން ވިދާޅުވި ކަމަށް ރަޝިޔާގެ މީޑިއާތަކުން ރިޕޯޓުކުރެ އެވެ. ހަމަމިއާއެކު، އީރާނާއި ރަޝިޔާގެ ގުޅުމަށް އައިސްފައިވާ "ބިނާކުރަނިވި ކުރިއެރުންތައް" ޕުޓިން ވަނީ ފާހަގަކުރައްވާފަ އެވެ.
ރަޝިޔާގެ ރައީސް ވްލަޑިމިއާ ޕުޓިން ތުރްކްމެނިސްތާނުގައި އީރާނުގެ ރައީސް މަސްޢޫދު ޕީޒިޝްކިޔާންއާ ބައްދަލުކުރައްވަނީ | އޭޕީ
އީރާނުގެ އައިއާރްއެންއޭ ނޫސް އޭޖެންސީން ރިޕޯޓުކޮށްފައިވާ ގޮތުން، ބުދަ ދުވަހު ކުރެއްވި ފޯނު ކޯލެއްގައި މެދުއިރުމަތީގެ ހަނގުރާމަ ނިމުމަކަށް ގެނައުމަށް ކުރެވޭ މަސައްކަތްތަކުގައި މެދުވެރިއެއްގެ ދައުރު އަދާކުރުމަށް މޮސްކޯއިން ތައްޔާރަށް އޮތްކަން ޕުޓިން ވަނީ ޕީޒިޝްކިޔާނަށް އަންގަވާފަ އެވެ. ހުސްވި މަހު ކިރްގިސްތާނުގައި ބޭއްވި ޝަންގހާއީ ކޯޕަރޭޝަން އޯގަނައިޒޭޝަން ސަމިޓުގެ ހަވާސާގައި ވެސް މި ދެ ބޭފުޅުން ބައްދަލުކުރައްވާފައިވެ އެވެ.
ރަޝިޔާއާއި އީރާނާ ދެމެދު އޮތް އިސްތިރާޖީ ގުޅުން
ހުޅަނގުގެ ހަރުކަށި ދަތިކުރުމުގެ ފިޔަވަޅުތަކާ ކުރިމަތިލާންޖެހިފައިވާ މި ދެ ޤައުމުން ވަނީ ސިޔާސީ އަދި އަސްކަރީ ގުޅުންތައް އިތުރަށް ބަދަހިކޮށްފަ އެވެ. މިއާއެކު، ވިޔަފާރިއާއި އަސްކަރީ އެއްބާރުލުމުން ފެށިގެން ސައިންސާއި، ސަގާފަތުގެ އިތުރުން ތައުލީމީ ދާއިރާ ހިމެނޭހެން މިދިޔަ އަހަރު މޮސްކޯއާއި ތެހެރާނުން ވަނީ "ކޮމްޕްރިހެންސިވް ސްޓްރެޓީޖިކް ޕާޓްނަރޝިޕް ޓްރީޓީ" އެއްގައި ސޮއިކޮށްފަ އެވެ.
ނަމަވެސް، ޔޫކްރެއިން ހަނގުރާމައިގައި ބޭނުންކުރުމަށް ރަޝިޔާއަށް ޝާހިދު މަރުކާގެ ޑްރޯންތަކާއި ކުރު-ރާސްތާގެ މިސައިލްތައް އީރާނުން ފޯރުކޮށްދެމުންދާ ކަމަށް ޔޫކްރެއިންއާއި ހުޅަނގުގެ ޤައުމުތަކުން ދަނީ ތުހުމަތު ކުރަމުންނެވެ. އަދި، މެދުއިރުމަތީގައިވާ އެމެރިކާގެ އަމާޒުތަކަށް ހަމަލާދިނުމަށް ބޭނުންވާ ޖާސޫސީ މައުލޫމާތު ރަޝިޔާއިން އީރާނަށް ފޯރުކޮށްދޭ ކަމުގެ ތުހުމަތު ވެސް ރަޝިޔާގެ މައްޗަށް ވަނީ ކޮށްފަ އެވެ.
ޕުޓިންއާއި ޕީޒިޝްކިޔާންގެ މި ބައްދަލުވުން ބާއްވާފައި މި ވަނީ، އީރާނާއި އެމެރިކާއާ ދެމެދު ކުރިއަށްދާ މަޝްވަރާތައް ހުއްޓުމަކަށް އައިސްފައިވާ ދަނޑިވަޅެއްގަ އެވެ. އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވީ ނޮވެންބަރު 3 ގައި އެމެރިކާގައި ބާއްވާ ކޮންގްރެސްގެ މިޑްޓާމް އިންތިޚާބުގެ ކުރިން އެމެރިކާއިން އީރާނަށް ހަމަލާއެއް ނުދޭނެ ކަމަށެވެ. އަދި، މިހާރު ހިނގަމުންދާ ހަނގުރާމަ ނިމުމަކަށް ގެނައުމާ ގުޅޭގޮތުން ދެ ޤައުމުގެ ދެމެދުގައި "ޕްރޮޑަކްޓިވް" ނުވަތަ އުފެއްދުންތެރި މަޝްވަރާތަކެއް ކުރިއަށްދާ ކަމަށް އޭނާ ވިދާޅުވި އެވެ. މި ގޮތުން، ޔޫކްރެއިންގައި ރަޝިޔާއިން ކުރިއަށްގެންދާ އޮޕަރޭޝަން ހައްލުކުރުމަށް ކުރެވޭ ޑިޕްލޮމެޓިކް މަސައްކަތްތައް ވެސް ހުއްޓިފައިވާ ކަމަށް ބެލެވޭއިރު، ދެ ފަރާތުން ވެސް ދަނީ ހަމަލާތައް ވަރުގަދަކުރަމުންނެވެ.
މަސްދަރު: އަލް ޖަޒީރާ
