ލޭބަރުންގެ ކަންކަން ހަމަޔަކަށް ނޭޅުވިގެން އުޅޭއިރު، ބޭރު މީހުން ވަޒަންވެރި ކުރުވުމަކީ ކުރަން ހެޔޮވާވަރުގެ ކަމެއް ނޫން: މެންބަރު ޒިޔާދު
12 އޮކްޓޯބަރު 2026 | ހޯމަ 08:13ރާއްޖޭގައި ބޭރު މީހުންނާ ގުޅޭ ގާނޫނުތައް ތަންފީޒު ނުކުރެވޭއިރު، ބޭރުގެ އިންވެސްޓަރުންނަށް ރާއްޖޭގައި ވަޒަންވެރިވެވޭ ގޮތަށް ކަންކަން މަގުފަހިކުރުމަކީ ބިރުވެރި ކަމެއް ކަމަށް މެންބަރު ޒިޔާދު ވިދާޅުވި. ބޭރުގެ ރިސޯޓުތަކުގައި ދިވެހިންނަށް ވަޒީފާ ދިނުމުގެ ގާނޫނަށް އަމަލުނުކުރާކަން ފާހަގަކުރައްވައި، އާދައިގެ ލޭބަރުންގެ މައްސަލަ ހައްލުނުވެ އޮތް ދަނޑިވަޅެއްގައި ބިމުގެ މިލްކުވެރިކަން ދިނުމަކީ ކޮށްގެންވާނެ ކަމެއް ނޫން ކަމަށް މެންބަރު ޒިޔާދު ވިދާޅުވި
ރައްޔިތުން މަޖިލީހުގެ ޖަލްސާއެއްގައި، ވައިކަރަދޫ ދާއިރާގެ މެންބަރު ހުސެއިން ޒިޔާދު ވާހަކަ ދައްކަވަނީ | މަޖިލިސް
ރާއްޖޭގައި ބޭރު މީހުންނާ ގުޅޭ ގާނޫނުތައް ތަންފީޒު ނުކުރެވިގެން އުޅޭއިރު، ރާއްޖޭގެ ބިމުގައި އެހެން ބަޔަކު ވަޒަންވެރިވާ ގޮތަށް ކަންކަން މަގުފަހިކުރުމަކީ ކޮށްގެންވާނެ ކަމެއް ނޫން ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެ އެވެ.
ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން މެންބަރު ޒިޔާދު ވިދާޅުވީ، ދުނިޔޭގެ އެންމެ މަތީ ފެންވަރުގެ ޓޫރިޒަމް ހިންގާ ރާއްޖޭގައި ބޭރުގެ ގިނަ އިންވެސްޓަރުން އިންވެސްޓްކޮށްގެން ތިބި ނަމަވެސް، ދިވެހިންނަށް ފުރުސަތުތައް ލިބެމުން ދަނީ ދިވެހި އިންވެސްޓަރުންގެ ފަރާތުން ކަމަށެވެ. އަދި ރިސޯޓުތަކުން ވަކި އަދަދަކަށް ދިވެހިންނަށް ވަޒީފާ ދިނުން ގާނޫނުން ލާޒިމުކޮށްފައި އޮތް ނަމަވެސް، ޚާއްސަކޮށް ބޭރު މީހުންގެ ރިސޯޓުތަކުގައި އެ ގާނޫނު ތަންފީޒު ނުކުރެވޭ ކަމަށް މެންބަރު ޒިޔާދު ވިދާޅުވި އެވެ.
ރާއްޖެއަކީ ގާނޫނު ތަންފީޒު ނުކުރުމުގެ އެންމެ މަތީ ދަރަޖައިގެ ގައުމެއްގެ ގޮތުގައި ސިފަކުރައްވައި މެންބަރު ޒިޔާދު ވިދާޅުވީ، އެންމެ ބޮޑަށް އަމަލުނުކުރެވޭ އެއް ގާނޫނަކީ ބޭރު މީހުންނާ ބެހޭ ގާނޫނު ކަމަށެވެ.
އެގޮތުން ގޭގެއަށާއި ކުންފުނިތަކަށް ގެންނަ އާދައިގެ މަސައްކަތު މީހުން ވެސް ގާނޫނީ އިމުގެ ތެރެއަށް ނުފެތި، ލޭބަރުންގެ ކަންކަން ހަމަޔަކަށް ނޭޅުވިގެން އުޅޭ މަންޒަރު ފެންނަމުންދާ ކަމަށް މެންބަރު ޒިޔާދު ވިދާޅުވި އެވެ.
މި ރާއްޖޭގައި މިއީ ދުނިޔޭގެ ނަންބަރު ވަން ޓުއަރިޒަމް، އެންމެ އެންމެ މަތީ ފެންވަރުގެ ޓުއަރިޒަމް ހިންގާ ދާއިރާއެއްގައި. ފޮރިން އިންވެސްޓަރުން ހެސް ކިޔާފައި މިތާ އެބަތިބި. މި ރާއްޖޭގައި އެބަހުރި އިއްޒަތްތެރި ރައީސް 30، 40 ހާސް، ޑޮލަރު ދީފައި އެއް ރޭ ނިދާލެވޭއިރު އެނދު. މިތާނގައި މިއަދުވެސް ދިވެހި އިންވެސްޓަރުންގެ ފަރާތުން ދިވެހިންނަށް ލިބުނު ފުރުސަތެއް ލިބިފައި އޮތީ. އިއްޒަތްތެރި ރައީސް. ގާނޫނަކުން ލާޒިމުކުރިން ދިވެހިންނަށް ވަކި އަދަދަކަށް ވަޒީފާ ދޭން. އެކަން ވޭތޯ؟ އެ ތަންފީޒު ކުރެވޭތޯ؟ އިއްޒަތްތެރި ރައީސް. ގާނޫނު އަޅުގަނޑުމެންނަށް ހެދިދާނެ. މިއަދު އެ ބުނަނީ 15،000 ވަޒީފާ މި ތަނުން ލިބޭނެ. އިއްޒަތްތެރި ރައީސް. ގާނޫނެއް އަޅުގަނޑުމެން ލިޔުނަސް އެކަމެއް އެހެންނޭ އެ މަގަކު ނުހިނގައޭ. އަމުދުން ބޭރުމީހުންގެ ކަންތަކުގައި. ދިވެހިރާއްޖޭގެ އެންމެ ބޮޑަށް އަމަލުނުކުރެވޭ އެއް ގާނޫނަކީ ބޭރުމީހުންނާ ބެހޭ ގާނޫނުހުސެއިން ޒިޔާދު
މެންބަރު ޒިޔާދު ވިދާޅުވީ އިންވެސްޓަރުންނަށް ދެކޮޅު ނޫން ކަމަށާއި އިންވެސްޓަރުން ގެނައުމަކީ މައްސަލައެއް ނޫން ކަމަށެވެ.
ނަމަވެސް ދުނިޔޭގެ އެކި ކަންކޮޅުތަކުން މުއްސަންދިން އައިސް 99 އަހަރަށް މިތަނުގައި ތިބެވޭ ގޮތް ހެދުމުން، އެ މީހުން ގާނޫނަށް ކަމޭނުހިތާނެ ކަމުގެ ބިރު އެބައޮތް ކަމަށް ވިދާޅުވި އެވެ. ރަސްމާލެ މަޝްރޫއަށް އިޝާރާތް ކުރައްވައި މެންބަރު ޒިޔާދު ވިދާޅުވީ، ރާއްޖޭގައި ބޭރު މީހުންނާ ގުޅޭ ގާނޫނުތައް ތަންފީޒު ނުކުރެވޭ ކަމަށާއި، އާދައިގެ ލޭބަރުންގެ ކަންކަން ވެސް ހަމަޔަކަށް ނޭޅުވިގެން އުޅޭ ދަނޑިވަޅެއްގައި ރާއްޖޭގެ ބިމުގައި އެހެން ބަޔަކު ވަޒަންވެރިވާ ގޮތަށް ކަންކަން މަގުފަހިކުރުމަކީ ކޮށްގެންވާނެ ކަމެއް ނޫން ކަމަށެވެ. އެއީ އެއީ ކުރަން ހެޔޮވާވަރުގެ ކަމެއް ނޫން ކަމަށް މެންބަރު ޒިޔާދު ވިދާޅުވި އެވެ.
