އީގަލް ހިލްސް އަކީ ރައްޔިތުންގެ ތާއީދު ގެއްލިފައިވާ، އަޚްލާގީ ގޮތުން ފުނޑުފުނޑުވެފައިވާ ސަރުކާރެއްގެ ނާޖާއިޒު ފައިދާ ނަގަމުންދާ ނުލަފާ ބައެއް: ރައީސް ޔާމީން
11 އޮކްޓޯބަރު 2026 | އާދީއްތަ 16:40ރަސްމާލެ މަޝްރޫއުގެ ބޮޑު ސަރަހައްދެއް އީގަލް ހިލްސް ކުންފުންޏަށް ދޫކުރުމަކީ އިސްރާއީލާ ގުޅުން އޮންނަ ފަރާތްތަކަށް ފުރުސަތު ދިނުން ކަމަށް ވިދާޅުވެ، ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެ. އެ ކުންފުނީގެ ވެރިޔާގެ އަމަލުތަކުން ފަލަސްތީނަށް އިހާނެތިކޮށް ހިތާކަން ހާމަވާތީ، މި މަޝްރޫއު ވަގުތުން ހުއްޓާލުމަށް އެމަނިކުފާނު ވަނީ ގޮވާލައްވާފައި
ކުރީގެ ރައީސް އަބްދުﷲ ޔާމީން | ރާއްޖެ އެމްވީ
އީގަލް ހިލްސް އަކީ ރައްޔިތުންގެ ތާއީދު ގެއްލިފައިވާ، އަޚްލާގީ ގޮތުން ފުނޑުފުނޑުވެފައިވާ ސަރުކާރެއްގެ ނާޖާއިޒު ފައިދާ ނަގަމުންދާ ނުލަފާ ބައެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން މިފަދައިން ވިދާޅުވެފައި ވަނީ "އެކްސް" ގައި ކުރެއްވި ޕޯސްޓެއްގަ އެވެ. އެގޮތުން ރައީސް ޔާމީން ވިދާޅުވީ، ސައްތަ އިންސައްތަ މުސްލިމް، އަދި ފަލަސްތީނުގެ ހައްގުގައި ވަކާލާތުކުރާ މުޖުތަމައެއްގެ ތެރޭގައި ޔަހޫދީން ވަޒަންވެރިކުރުވުމަށް ހިންގާ މި މަޝްރޫއުން ހާމަވަނީ އެބޭފުޅުންގެ މުނާފިގުކަމާއި ނުބައިކަން ކަމަށެވެ.
ރަސްމާލެ މަޝްރޫއު ހުއްޓާލުމަށް ގޮވާލައްވާ ރައީސް ޔާމީން ވިދާޅުވީ، މި މަޝްރޫއާ މެދު ދިވެހީންގެ ހިތްތަކުގައި އޮތީ ނަފުރަތާއި ފޫހިކަން ފިޔަވައި އެހެން އެއްވެސް އެއްޗެއް ނޫން ކަމަށެެވެ.
މީގެ އިތުރުން ރައީސް ޔާމީން ވަނީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ރައްދު ދެެއްވާ، ޔަހޫދީން އާބާދުކުރުމަށް ފަރުމާކޮށްފައިވާ އެއްވެސް މަޝްރޫއަކީ އެއްވެސް އޮއްޓަރެއް ހުރި ކަމެއް ނޫން ކަމަށް ވިދާޅުވެފަ އެވެ.
ރައީސް ޔާމީން މިފަދައިން ވިދާޅުވެފައި މިވަނީ، ރަސްމާލެއިން ބޮޑު ސަރަހައްދެއް އީގަލް ހިލްސް ކުންފުންޏަށް ދޫކޮށްލުމާ ގުޅިގެން އާންމުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާ ދަނޑިވަޅެއްގަ އެވެ. ހާއްސަކޮށް، އެ ކުންފުނީގެ ވެރިޔާ މުޙައްމަދު އަލައްބާރަކީ އިސްރާއީލާ ގުޅުން އޮންނަ ފަރާތެއްކަން ހާމަވާ ފަދަ އިންޓަވިއުތަކެއް ސޯޝަލް މީޑިއާގައި އާންމުވެ، އެކަމާ ގުޅިގެން ރައްޔިތުންގެ ފާޑުކިޔުމާއި ނުރުހުން އޭނާއަށް ވަރަށް ބޮޑަށް އަމާޒުވެފައިވާ ވަގުތެއްގަ އެވެ.
މި ފަހުން ސޯޝަލް މީޑިއާގައި ދައުރުވަމުންދާ އިންޓަވިއުއެއްގައި އަލައްބާރު ވިދާޅުވީ، ޣައްޒާ އަލުން އާރާސްތުކުރުމާ ބެހޭގޮތުން އެއްވެސް ފަރާތަކުން އޭނާއާ މަޝްވަރާކޮށްފައިނުވާ ކަމަށެވެ. އަދި އޭނާ ގަބޫލުކުރާ ފަލްސަފާއަކީ ކޮންމެ މީހަކުވެސް އެމީހަކު އުފައްދާ ކުނިބުނި އަމިއްލައަށް ސާފުކުރުން ކަމަށް އޭނާ ވިދާޅުވި އެވެ.
