ރަސްމާލޭގެ ބޮޑު ސަރަހައްދެއް އީގަލް ހިލްސް އަށް ދިން މައްސަލައިގައި، ރައީސް މުއިއްޒުގެ ކުރީގެ ފޮރިން މިނިސްޓަރު ޚަލީލް ގިނަ ސުވާލުތަކެއް އުފައްދަވައިފި
12 އޮކްޓޯބަރު 2026 | ހޯމަ 10:13ރަސްމާލެ މަޝްރޫއުގެ ދަށުން އީގަލް ހިލްސް ކުންފުންޏަށް ބޮޑު ސަރަހައްދެއް ދިން މައްސަލާގައި، އެ މަޝްރޫއުގެ ހާމަކަން ބޮޑުކުރުމަށާއި ކޮރަޕްޝަނުން ދުރުވުމަށް ގޮވާލައި ކުރީގެ ފޮރިން މިނިސްޓަރު އަބްދުﷲ ޚަލީލް ސަރުކާރަށް ހަތް ސުވާލެއް ކުރިމަތިކުރައްވައިފި. މި މަޝްރޫއުން ދައުލަތަށް ލިބޭނެ ފައިދާއާއި ބިމުގެ މިލްކުވެރިކަމާ ގުޅޭގޮތުން އާންމުންގެ ހުރި ކަންބޮޑުވުންތަކަށް ސަރުކާރުން ސާފު ޖަވާބެއް ދޭންޖެހޭ
ކުރީގެ ފޮރިން މިނިސްޓަރު އަބްދުﷲ ޚަލީލު | ރައީސް އޮފީސް
ރަސްމާލޭގެ ބޮޑު ސަރަހައްދެއް އީގަލް ހިލްސް އަށް ދިން މައްސަލާގައި، ރައީސް ޑރ މުޙައްމަދު މުއިއްޒުގެ ކުރީގެ ފޮރިން މިނިސްޓަރު އަބްދުﷲ ޚަލީލް، ގިނަ ސުވާލުތަކެއް އުފައްދަވައިފި އެވެ.
އެކްސްގަައި ޚަލީލު ކުރެއްވި ޕޯސްޓެއްގައި ވިދާޅުވީ، ރައްޔިތުންގެ މެދުގައި މި މަޝްރޫއާ ގުޅޭގޮތުން ގިނަ ކަންބޮޑުވުންތަކެއް އެބަހުރި ކަމަށެވެ.
އޭނާ ވިދާޅުވި ގޮތުގައި، ރާއްޖެއަށް ބޮޑެތި އިންވެސްޓްމަންޓްތައް ނުގެނެސް ތަރައްޤީގެ ދުވެލީގައި ރާއްޖެ ކުރިއަރައި ދިއުމަކީ ނާދިރު ކަމެކެވެ. ނަމަވެސް، އެފަދަ ބޮޑެތި ޕްރޮޖެކްޓްތައް، ރާއްޖޭގެ ރައްޔިތުން އެދޭ ގޮތަށް، ހާމަކަން ބޮޑު ގޮތެއްގައި ތަންފީޒުވުމަކީ ކޮރަޕްޝަނާއި ފަސާދައިން ދުރުވެ، ޕްރޮޖެކްޓް ކާމިޔާބުވުމަށް އެޅޭނެ މުހިންމު ފިޔަވަޅެއް ކަމަށް އޭނާ ވިދާޅުވި އެވެ. އާންމުވެފައިވާ މައުލޫމާތުތަކަށް ބަލާއިރު ރަސްމާލޭ ޕްރޮޖެކްޓަކީވެސް އާދަޔާ ޚިލާފަށް ބޮޑު މަޝްރޫއެއް ކަމަށް އޭނާ ވިދާޅުވި އެވެ.
ޚަލީލް ވިދާޅުވީ، ރަސްމާލޭގެ އިންވެސްޓްމަންޓްއާ ގުޅޭގޮތުން ރައްޔިތުންގެ މެދުގައި ވަރަށް ބޮޑެތި އަދި ހައްސާސް ކަންބޮޑުވުންތަކެއް އެބަހުރި ކަމަށެވެ. ގައުމާއި ރައްޔިތުންގެ ހައްޤުތައް ހިމާޔަތްކޮށްދޭން އައްޔަންކޮށްފައި ތިބި ވެރިންގެ ހައިސިއްޔަތުން ސަރުކާރުން ކުރަންވީ ކަމަކީ، އެ ކަންބޮޑުވުންތަކަށް ހައްލުތަކެއް ލިބޭނެފަދަ ޖަވާބުތަކެއް ރައްޔިތުންނަށް ދިނުން ކަމަށް ޚަލީލް ވަނީ ހާމަކުރައްވާފަ އެވެ.
އެގޮތުން އޭނާ ވަނީ ސަރުކާރަށް ނިސްބަތްކޮށް ހަތް ސުވާލެއް އުފައްދަވާފަ އެވެ. އެގޮތުން ރަސްމާލެ ހިއްކުމަށް މިހާތަނަށް ދައުލަތުން ޚަރަދުކޮށްފައިވަނީ ކިހާ މިންވަރެއްތޯ އާއި، ރަސްމާލޭގެ ބިމާއި ވަށައިގެންވާ ފަޅުގެ އަގު ކަނޑައެޅިފައިވޭތޯ، އަދި އެއީ ކިހާވަރެއްތޯ ބެލުން މުހިންމު ކަމަށް ސުވާލު އުފައްދާފައިވެ އެވެ. މީގެ އިތުރުން، މި އިންވެސްޓްމަންޓުން އަޕްފުރަންޓް ޕެއިމަންޓެއްގެ ގޮތުގައި އެއްވެސް އަދަދެއް ލިބޭނެތޯއާއި، އެއީ ކިހާ މިންވަރެއްތޯ ވެސް ޚާލީލު ސުވާލު އުފެއްދެވި އެވެ. އިންވެސްޓްކުރާ ފަރާތާއި ސަރުކާރުގެ ބައެއް ވެރިންގެ ފަރާތުން ހާމަކުރެވޭ އަދަދުތަކުގައި ބޮޑެތި ފަރަގުތަކެއް ހުރުމާއެކު، ރާއްޖޭގެ ޤާނޫނީ އޮނިގަނޑުގެ ތެރެއިން ޓެކްސްގެ ގޮތުގައި ލިބޭނެ ކަމަށް ލަފާކުރެވޭ އާމްދަނީއަކީ ކޮބާތޯ ބެލުންވެސް މުހިންމު ކަމަށެވެ. އަދި ވިޔަފާރީގެ ޓެކްސް ހިމަނާފައިނުވާނަމަ، މި ޕްރޮޖެކްޓުން ދައުލަތަށް ނުވަތަ ރައްޔިތުންނަށް ލިބޭނެ ފައިދާއަކީ ކޮބާތޯ އާއި އަދި އެއީ ކިހާ މުއްދަތެއްގެ ތެރޭގައި ލިބޭނެ ފައިދާއެއްތޯ ސުވާލުކުރެވިފައި ވެ އެވެ. ބިމުގެ މިލްކުވެރިކަން ދޫކުރަނީ ދާއިމީ ގޮތެއްގައިތޯ އާއި، ބިމުގެ މިލްކުވެރިކަން ބަދަލުވާ ކޮންމެ ފަހަރަކު 99 އަހަރުގެ މުއްދަތު އަލުން ފެށޭނެތޯ ސާފުކުރުމަށްވެސް އެދިފައިވެ އެވެ. މީގެ އިތުރުން، 5000 ހައުސިންގ ޔުނިޓް ބިނާކުރަނީ ދައުލަތަށް ލިބޭ ފައިސާއިންތޯ ނުވަތަ ނޫންތޯ އާއި، މި އިންވެސްޓްމަންޓްގެ ނަތީޖާއެއްގެ ގޮތުން ދައުލަތުގެ ނުވަތަ ރައްޔިތުންގެ އެއްވެސް ހއްގެއް ގެއްލޭނެތޯ ބެލުން މުހިންމު ކަމަށް އޭނާ ފާހަގަކުރައްވާފައިވެ އެވެ.
ޚަލީލް ވަނީ މިނޫންވެސް ރައްޔިތުންގެ ފަރާތުން ސާފުކުރަން ބޭނުންވާ ކަންކަމަށް އީޖާބީ ޖަވާބުތަކެއް ސަރުކާރުން ދިނުން ލާޒިމް ކަމަށް ވިދާޅުވެފަ އެވެ.
ޚަލީލު މިފަދައިން ވިދާޅުވެފައި މިވަނީ، ރަސްމާލެއިން ބޮޑު ސަރަހައްދެއް އީގަލް ހިލްސް ކުންފުންޏަށް ދިން މައްސަލައާއި ގުޅިގެން އާންމުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާ ދަނޑިވަޅެއްގަ އެވެ. ސަރުކާރުން ކުރިއަށްގެންދާ ރަސްމާލެ މަޝްރޫއުގެ ސިއްރުވެރިކަމުގެ ސަބަބުން ސީރިއަސް ސުވާލުތަކެއް އުފެދޭ ކަމަށާއި، މި މުއާމަލާތް ފުރިހަމައަށް ތަހުގީގުކުރަން ޖެހޭ ކަމަށް މާލީ ތަޖުރިބާކާރުން ވެސް ދަނީ ބުނަމުންނެވެ.
ކެބިނެޓަށް އޭރު ގެންނެވި ބަދަލާއެކު، ރައީސް ޑރ. މުހައްމަދު މުއިއްޒުގެ ފޮރިން މިނިސްޓަރުު ކަމުން އަބްދުﷲ ޚަލީލް އިސްތިއުފާ ދެއްވާފައިވަނީ، 14 އެޕްރީލް 2026 ގަ އެވެ.
