އުތުރު ކޮރެޔާއިން އަނެއްކާ ވެސް ބެލިސްޓިކް މިސައިލެއް ޓެސްޓުކޮށްފި

މުހިންމު ބަޔަކަށް ގެނައި ޓެކްނޮލޮޖީގެ ކުރިއެރުމެއް ކަށަވަރުކުރުމުގެ ގޮތުން ޓެކްޓިކަލް ބެލިސްޓިކް މިސައިލެއް ކާމިޔާބުކަމާއެކު ޓެސްޓުކޮށްފައިވާ ކަމަށް އަންގާރަ ދުވަހު އުތުރު ކޮރެޔާއިން ހާމަކޮށްފި އެވެ. މި ކުރިއެރުންތަކުގެ ސަބަބުން އެ ޤައުމުގެ ހަތިޔާރުތަކުގެ ނިޒާމު ވަރަށް ބޮޑަށް ހަރުދަނާވެގެންދާނެ ކަމަށް އުތުރު ކޮރެޔާއިން ބުނެ އެވެ. އުތުރު ކޮރެޔާގެ އިދާރާތަކާ ހަވާލާދީ މި ކަން ހާމަކޮށްފައި ވަނީ އެ ޤައުމުގެ ދައުލަތުގެ މީޑިއާއިންނެވެ.

މިސައިލް ޓެކްނޮލޮޖީ ޒަމާނީ ކުރުމަށް ކުރަމުންދާ މަސައްކަތްތަކުގެ ތެރެއިން އުތުރު ކޮރެޔާގެ މިސައިލް އެޑްމިނިސްޓްރޭޝަނުން މި ޓެސްޓު ކުރިއަށް ގެންގޮސްފައި ވަނީ ހޯމަ ދުވަހު ކަމަށް، ދައުލަތުން ހިންގާ ކޮރެއަން ސެންޓްރަލް ނިއުސް އޭޖެންސީން (ކޭސީއެންއޭ) ރިޕޯޓުކުރި އެވެ. މި ގެނެވުނު އަޕްގްރޭޑަކީ "ބޮޑު ކާމިޔާބީއެއް" ގެ ގޮތުގައި އެ އިދާރާއިން ސިފަކުރި އެވެ. އަދި, މި ބަދަލުގެ ސަބަބުން ހަތިޔާރުތަކުގެ ނިޒާމުތަކުގެ ފެންވަރާއި ޒަމާނީކަން އިތުރުކުރުމުގައި މުހިންމު ބަދަލެއް އަންނާނެ ކަމަށް އެ އިދާރާއިން ބުންޏެވެ.

Advertisement

މި ޓެސްޓަކީ ހަތިޔާރުގެ ޓެކްނޮލޮޖީ ކުރިއެރުވުމަށް ޓަކައި މިސައިލް އެޑްމިނިސްޓްރޭޝަނާއި އެ އިދާރާއާ ގުޅިފައިވާ އިންސްޓިޓިއުޓްތަކުން ގަވާއިދުން ކުރިއަށްގެންދާ ދިރާސާ ހަރަކާތްތަކުގެ ބައެއް ކަމަށް، އެ އޭޖެންސީން ބުންޏެވެ.

ޕިޔޮންގޔޮންގުން އިރުމަތީ ކަނޑާ ދިމާއަށް ގިނަ އަދަދެއްގެ ބެލިސްޓިކް މިސައިލްތަކެއް ފޮނުވާލާފައިވާ ކަމަށާއި، އޭގެ ތެރެއިން އެއް މިސައިލް 900 ކިލޯމީޓަރަށް ވުރެ ދުރަށް ދަތުރުކުރި ކަމަށް، ދެކުނު ކޮރެޔާގެ އަސްކަރިއްޔާއިން ހޯމަ ދުވަހު ބުންޏެވެ. މި މިސައިލް ޓެސްޓުތަކަކީ ވޭތުވެދިޔަ ހަފުތާގައި އެ ޤައުމުން ކާމިޔާބުކަމާއެކު ކުރިއަށްގެންދިޔަ ހައިޕަސޮނިކް ގްލައިޑް ވެހިކަލް ޓެސްޓަށް ދިން ރައްދަކަށް ވެދާނެ ކަމަށް ސޯލްއިން ވަނީ ފާހަގަކޮށްފަ އެވެ.