އުތުރު ކޮރެޔާއިން އާ ވައްތަރެއްގެ ބެލިސްޓިކް މިސައިލެއް ޓެސްޓުކޮށްފި
22 ސެޕްޓެމްބަރު 2026 | އަންގާރަ 07:04އުތުރު ކޮރެޔާގެ ލީޑަރު ކިމް ޖޮންގ އުންގެ ހާޒިރުގައި އެންމެ ޒަމާނީ ޓެކްނޮލޮޖީ ހިމެނޭ އާ ވައްތަރެއްގެ ހަތިޔާރެއް ކާމިޔާބުކަމާއެކު ޓެސްޓްކޮށްފައިވާކަން އެ ގައުމުން ހާމަކޮށްފި. މި ހަރަކާތްތަކަކީ ބައިނަލްއަގުވާމީ ގާނޫނުތަކާ ހިލާފު އަދި ސަރަހައްދީ ސަލާމަތަށް އޮތް ނުރައްކަލެއް ކަމަށް ބުނެ ދެކުނު ކޮރެޔާ އާއި ޖަޕާނުން ވަނީ އެކަން ހަރުކަށި އިބާރާތުން ކުށްވެރިކޮށްފައި. ނަމަވެސް، އުތުރު ކޮރެޔާއަކީ ނިއުކްލިއާ ބާރެއްގެ ގޮތުގައި ދާއިމީކޮށް އޮންނާނެ ކަމަށާއި، އެ ނިންމުން ބަދަލުނުކުރެވޭނެ ކަމަށް އެ ގައުމުގެ ލީޑަޝިޕުން ތަކުރާރުކޮށް ބުނޭ
އުތުރު ކޮރެޔާގެ ލީޑަރު ކިމް ޖޮންގ އުން އޭނާގެ އަންހެން ދަރިފުޅާއެކު ބެލިސްޓިކް މިސަލެއް ޓެސްޓުކުރާތަން ބަލައިލަނީ | ރޮއިޓާސް
އުތުރު ކޮރެޔާގެ އަސްކަރީ ޓެކްނޮލޮޖީ ކުރިއަރަމުން އަންނަކަމުގެ ހެއްކެއްގެ ގޮތުގައި، "އާ ވައްތަރެއްގެ ހަތިޔާރު" ނިޒާމެއްގެ ޓެސްޓް އެ ގައުމުގެ ލީޑަރު ކިމް ޖޮންގ އުން ބަލާލާފައިވާ ކަމަށް، ދައުލަތުގެ މީޑިއާއިން އަންގާރަ ދުވަހު ރިޕޯޓްކޮށްފި އެވެ. މި އިއުލާން އައިސްފައި މި ވަނީ، ޕިޔޮންގޔަންގއިން އެ ގައުމުގެ އިރުމަތީ އައްސޭރިފަށުގެ ކަނޑުގެ ސަރަހައްދަށް ކުރު-ރާސްތާގެ ދެ ބެލިސްޓިކް މިސައިލް ފޮނުވާލާފައިވާ ކަމަށް ދެކުނު ކޮރެޔާ އަދި ޖަޕާނުން ހާމަކުރިތާ ދެ ދުވަސް ފަހުންނެވެ. މި މިސައިލް ޓެސްޓުތަކަކީ ސަރަހައްދީ ސުލްހައާއި ސަލާމަތަށް އޮތް ނުރައްކަލެއް ކަމަށް ބުނެ އެ ދެ ގައުމުން ވަނީ އެ އަމަލު ކުށްވެރިކޮށްފަ އެވެ. އުތުރު ކޮރެޔާއިން ވަނީ އެ ގައުމަކީ ނިއުކްލިއާ ހަތިޔާރު އޮތް ބާރެއްގެ ގޮތުގައި ގާނޫނީ ގޮތުން ކަނޑައަޅާފަ އެވެ. އަދި، އެ ގައުމުގެ އެޓޮމިކް ހަތިޔާރުގެ ޚަޒާނާއަކީ ދާއިމީ އަދި ބަދަލުނުކުރެވޭނެ އެއްޗެއް ކަމަށް އެ ގައުމުގެ ލީޑަޝިޕުން ތަކުރާރުކޮށް ވަނީ ހާމަކޮށްފަ އެވެ.
ނިއުކްލިއާ ބާރެއްގެ ގޮތުގައި ދައުވާކުރާ އުތުރު ކޮރެޔާގެ މިސައިލް ބިއުރޯއިން، އާދީއްތަ ދުވަހު ލީޑަރު ކިމް ޖޮންގ އުންގެ ހާޒިރުގައި "އާ ވައްތަރެއްގެ ހަތިޔާރެއް ކާމިޔާބުކަމާއެކު ޓެސްޓްކޮށްފައިވާ" ކަމަށް ޕިޔޮންގޔަންގގެ ރަސްމީ ކޮރިއަން ސެންޓްރަލް ނޫސް އޭޖެންސީއިން (ކޭސީއެންއޭ) ވަނީ ބުނެފަ އެވެ. މި ހަތިޔާރުގެ ނިޒާމާ ބެހޭ އެއްވެސް ތަފުސީލެއް ޕިޔޮންގޔަންގއިން ހާމަކޮށްފައެއް ނުވެ އެވެ. ނަމަވެސް، މި މިސައިލަކީ "ޝައްކެއްވެސްނެތް ގޮތުގައި އެންމެ ޒަމާނީ ދިފާއީ ޓެކްނޮލޮޖީގެ ފުރިހަމަ ދެއްކުމެއް" ކަމަށް ބުނެ ކިމް މި ކަމަށް ތައުރީފު ކޮށްފައިވާ ކަމަށް ކޭސީއެންއޭން ރިޕޯޓުކުރެ އެވެ. މި ކުރިއެރުންތަކުގެ ސަބަބުން ދުޝްމަނުންނަށް "ފަސޭހަނުވާނެ ބޮލު ރިހުމަކާއި ވަރަށް އަނިޔާވެރި އަދި ސަލާމަތްނުވެވޭނެ ހަމަލާއެއް" ލިބިގެންދާނެ ކަމަށް އުތުރު ކޮރެޔާގެ ލީޑަރު ވަނީ އިންޒާރުދީފަ އެވެ.
އާދީއްތަ ދުވަހުގެ މިސައިލް ޓެސްޓުކޮށްފައި ވަނީ، އިރުމަތީ ކަނޑަށް އަމާޒުކޮށް ކުރު-ރާސްތާގެ ބެލިސްޓިކް މިސައިލްތަކެއް އުތުރު ކޮރެޔާއިން ފޮނުވާލިތާ އަށް ދުވަސް ފަހުންނެވެ. ފަހުން އެ ގައުމުން ބުނީ، އެއީ ގުޅިފައިވާ ބާރުގެ އަސްކަރީ ތަމްރީނެއްގެ ބައެއް ކަމަށެވެ. ދުރު-ރާސްތާގެ ބަޑިއާއި މިސައިލް ހިމެނޭ އެ ތަމްރީނުތަކުގައި، ހަތިޔާރުތައް "ސައްތައިން ސައްތަ ޔަގީންކަމާއެކު އަމާޒަށް ވާސިލުވެފައިވާ" ކަމަށް ދައުލަތުގެ މީޑިއާއިން ވަނީ ރިޕޯޓްކޮށްފަ އެވެ. އަންގާރަ ދުވަހުގެ ކޭސީއެންއޭ ރިޕޯޓުގައި ކިމް ވަނީ އާދީއްތަ ދުވަހުގެ ޓެސްޓަކީ ގައުމުގެ އަސްކަރީ ތައްޔާރީތަކާ ގުޅިފައިވާ ކަމެއްކަން ފާހަގަކޮށްފަ އެވެ. މި ގޮތުން، "މި ފަދަ ޓެކްނޮލޮޖީއެއް ހާސިލުކުރުމަކީ ދައުލަތުގެ ހަނގުރާމައިގެ ތައްޔާރީތަކަށާއި ސިފައިންގެ މުސްތަގުބަލުގެ ތަރައްގީއަށް ނުހަނު މުހިންމު ކަމެއް" ކަމަށް ކިމް ބުންޏެވެ.
މި މިސައިލް ޓެސްޓުތަކަކީ އދ. ގެ ސަލާމަތީ މަޖިލީހުގެ ގަރާރުތަކާ ކަނޑައެޅިގެން ހިލާފު އަމަލެއް ކަމަށް ބުނެ ސޯލްއިން ވަނީ މި ކަން ކުށްވެރިކޮށްފަ އެވެ. އަދި، ބެލިސްޓިކް މިސައިލާ ގުޅޭ އެންމެހައި ހަރަކާތްތައް ވަގުތުން ހުއްޓާލުމަށް ޕިޔޮންގޔަންގއަށް ގޮވާލާފަ އެވެ. ހަމަމިއާއެކު، މި ޓެސްޓުތަކާ ގުޅިގެން ޖަޕާނުން ވަނީ އުތުރު ކޮރެޔާއަށް ފާޑުކިޔާފަ އެވެ. އަދި، އެއީ ސަރަހައްދީ ސުލްހައާއި ސަލާމަތަށް އޮތް ބޮޑު ނުރައްކަލެއްގެ ގޮތުގައި ޖަޕާނުން ވަނީ ސިފަކޮށްފަ އެވެ.
އުތުރު ކޮރެޔާގެ ނިއުކްލިއާ ހަރަކާތްތައް ހުއްޓާލުމަށް ގޮވާލައި އިންޓަނޭޝަނަލް އެޓޮމިކް އެނާޖީ އެޖެންސީއިން (އައިއޭއީއޭ) ފާސްކުރި ގަރާރަށް، މިދިޔަ ހަފުތާގައި ޕިޔޮންގޔަންގއިން ވަނީ އިންކާރުކޮށްފަ އެވެ. ނިއުކްލިއާ ހަތިޔާރުގެ ހައިސިއްޔަތަކީ ގައުމުގެ ގާނޫނުތަކުން "ބަދަލުނުކުރެވޭނެހެން އަދި ދާއިމީ ގޮތެއްގައި ކަނޑައެޅިފައިވާ" ކަމެއް ކަމަށް އެ ގައުމުން ވަނީ ބުނެފަ އެވެ. އައިއޭއީއޭގެ ގަރާރަކީ "ނިއުކްލިއާ ހަތިޔާރު އޮތް ދައުލަތެއްގެ ގޮތުގައި ޑީޕީއާރްކޭގެ މަގާމަށް އެއްވެސް އަސަރެއް ނުކުރާނެ" އެއްޗެއް ކަމަށް އުތުރު ކޮރެޔާގެ ޚާރިޖީ ވުޒާރާގެ ތަރުޖަމާނު ވެސް ބުންޏެވެ. މީގެއިތުރުން، އެ ގައުމުގެ ނިއުކްލިއާ ދަރަޖައަކީ "މުތުލަގު" އެއްޗެއް ކަމަށް، އުތުރު ކޮރެޔާގެ ލީޑަރު ކިމް ޖޮންގ އުންގެ ނުފޫޒުގަދަ ކޮއްކޮ ކިމް ޔޯ ޖޮންގ ދާދިފަހުން ވަނީ ބުނެފަ އެވެ. އަދި، އެ ގައުމު ނިއުކްލިއާ ހަތިޔާރުން އެއްކިބާވާނެ ކަމަށް އުންމީދުކުރާ ފަރާތްތަކަކީ "މޮޔައިން" ގެ ގޮތުގައި އޭނާ ވަނީ ސިފަކޮށްފަ އެވެ.
މަސްދަރު: ސީއެންއޭ
