އީރާނުން ދެކުނު ކޮރެއާއަށް އިންޒާރުދީފި

ހުރްމުޒް ކަނޑުއޮޅީގައި އެމެރިކާއިން ހިންގާ އަސްކަރީ ހަރަކާތްތަކުގައި ބައިވެރިވުމާ ނުވަތަ އެ ސަރަހައްދަށް ސިފައިން ފޮނުވުމާ ދެކޮޅަށް، އީރާނުގެ ފޮރިން މިނިސްޓްރީން ހޯމަ ދުވަހު ދެކުނު ކޮރެއާއަށް އިންޒާރު ދީފި އެވެ. އީރާނުން ބުނެފައިވަނީ އެފަދަ ފިޔަވަޅެއް އަޅައިފިނަމަ އޭގެ ނަތީޖާ ވަރަށް ހިތިވާނެ ކަމަށެވެ.

ސްޓްރެޓީޖިކް ގޮތުން މުހިންމު ސަރަހައްދެއް ކަމަށްވާ ހުރްމުޒް ކަނޑުއޮޅީގެ ސަލާމަތީ ކަންކަން ބެލެހެއްޓުމަށް އެމެރިކާއިން ކުރަމުންދާ މަސައްކަތްތަކަށް "އެހީތެރިކަން" ފޯރުކޮށްދިނުމާ މެދު ވިސްނަމުންދާ ކަމަށް ސޯލްއިން މިދިޔަ ހުކުރު ދުވަހު ވަނީ ބުނެފަ އެވެ. ފެބްރުއަރީ މަހުގެ 28 ވަނަ ދުވަހު އެމެރިކާއާ ދެކޮޅަށް ހަނގުރާމަ ފެށުނީއްސުރެ، މި ކަނޑުއޮޅީގެ ބޮޑު ބައެއް ކޮންޓްރޯލް ކުރަމުންދަނީ ތެހެރާނުންނެވެ.

ދެކުނު ކޮރެއާއިން ބުނެފައިވަނީ، އެ ގައުމުގެ އަސްކަރީ ތައްޔާރީތަކަށް ބުރޫނާރާނެ ނަމަ އެމެރިކާއަށް އެހީތެރިވުމާ މެދު ގޮތެއް ނިންމާނެ ކަމަށެވެ. ނަމަވެސް މިކަމާ ގުޅޭގޮތުން އަދި ވަކި ގޮތެއް ނިންމާފައި ނުވާކަމަށްވެސް އެ ގައުމުން ބުނެފައިވެ އެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ހޯމަ ދުވަހު ވަނީ، އެމެރިކާގެ "ބިރުދެއްކުމާއި ނުފޫޒަށް" ދެކުނު ކޮރެއާއިން ލެނބިގެން ނުދިއުމަށް އިންޒާރު ދެއްވާފަ އެވެ.

އެކްސްގައި ކުރެއްވި ޕޯސްޓެއްގައި ބަޣާއީ ވިދާޅުވީ، އަރަބި ގަލްފް ނުވަތަ ހުރްމުޒް ކަނޑުއޮޅީގައި އެހެން ގައުމުތަކުން އަސްކަރީ ބާރުތައް ރުކުރުވާލުމަކީ ނުވަތަ އެއްވެސް ހަރަކާތެއްގައި ބައިވެރިވުމަކީ، އުދުވާން ހިންގާ ފަރާތަށް ދެވޭ ސީދާ އެހީތެރިކަމެއްގެ ގޮތުގައި ބެލެވޭނެ ކަމަށެވެ. އަދި މިފަދަ ކަންކަމުގެ ސަބަބުން ނުރައްކާތެރި ނަތީޖާތަކެއް ކުރިމަތިވާނެ ކަމަށްވެސް އޭނާ ވިދާޅުވި އެވެ.

މިދިޔަ އޭޕްރީލް މަހު ހަމަލާތައް މެދުކަނޑާލުމަށް އެއްބަސްވި ނަމަވެސް، އީރާނާއި އެމެރިކާއާ ދެމެދު ހުރްމުޒްކަނޑުއޮޅި ސަރަހައްދުގައި އަދިވެސް ދަނީ ހަމަލާތައް ބަދަލުކުރަމުންނެވެ.

ދުނިޔޭގެ ތެލާއި ގޭހުގެ އެކްސްޕޯޓްގެ ފަސްބައިކުޅަ އެއްބައި އާންމުކޮށް އުފުލާ ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ދެ ގައުމުން ކުރަމުންދާ މަސައްކަތްތަކާ ހެދި، ދެ ފަރާތުގެ މެދުގައި ކުރިއަށްދާ މަޝްވަރާތައް ވަނީ ހުއްޓުމަކަށް އައިސްފަ އެވެ.

ހަނގުރާމަ ފެށުނީއްސުރެ، ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތަކެއް އަރާފައިވާއިރު، މި މުހިންމު ކަނޑުގެ ސަރަހައްދުން ދަތުރުފަތުރު ކުރުން ވަނީ ގާތްގަނޑަކަށް ހުއްޓުމަކަށް އައިސްފަ އެވެ.

ހަނގުރާމައިގެ ކުރިން އޮތް އުސޫލަށް، އެއްވެސް ހުރަހެއް ނެތި ދަތުރުފަތުރު ކުރުމުގެ ފުރުސަތު ދެން ނޯންނާނެ ކަމަށް ބުނެ، އެ ސަރަހައްދުން ދަތުރުކުރާ އުޅަނދުފަހަރު އީރާނުގެ ހުއްދަ ހޯދުމަށް އެ ގައުމުން ވަނީ މަޖުބޫރުކޮށްފަ އެވެ. ނަމަވެސް ވޮޝިންޓަނާއި ސަރަހައްދީ ބައެއް ގައުމުތަކުން ދަނީ އީރާނުގެ މި ނިންމުމާ ދެކޮޅު ހަދަމުންނެވެ.