އުތުރު ކޮރެއާއިން މަނަވަރެއް ޚިދުމަތަަށް ނެރެ "ދުޝްމަނުންނަށް" އިންޒާރުދީފި

އުތުރު ކޮރެއާގެ ލީޑަރު ކިމް ޖޮންގް އުން، ދުޝްމަނުންނަށް "ފަނާކުރަނިވި ރައްދު ހަމަލާއެއް" ދިނުމުގެ ގާބިލުކަން ލިބިގެންވާ ކަމަށް އޭނާ ސިފަކުރާ މަނަވަރެއް ސިފައިންގެ ޚިދުމަތަށް ނެރެފި އެވެ. އުތުރު ކޮރެއާގެ ދައުލަތުގެ މީޑިއާއިން (ކޭސީއެންއޭ) ބުނީ، ކިމް މި މޭރުމުން ބުނެފައި ވަނީ، އެ ގައުމަށް ކުރިމަތިވެފައިވާ "މެދުކެނޑުމެއް ނެތް" ނުރައްކާތަކަށް ރިއާޔަތްކޮށް ކަމަށެވެ. ކޮރެއާ ހަނގުރާމައިގައި މަރުވި އުތުރު ކޮރެއާގެ އަސްކަރީ އިސްވާރަކަށް ނިސްބަތްކޮށް 'ކަންގް ކޮން' ގެ ނަމުން ނަންދީފައިވާ މި މަނަވަރު ރަސްމީކޮށް ޚިދުމަތަށް ނެރެފައި ވަނީ، އާދީއްތަ ދުވަހު ކަންގްވޮން ޕްރޮވިންސްގެ އިރުމަތީ ވޮންސަން ބަނދަރުގައި ބޭއްވި ރަސްމިއްޔާތެއްގަ އެވެ.

މި ރަސްމިއްޔާތުގައި ވާހަކަދައްކަމުން ކިމް ބުނީ، މި މަނަވަރަކީ އުތުރު ކޮރެއާގެ ހައްގުތަކާއި މަސްލަހަތު ދިފާއުކުރުމަށް އެ ގައުމުން ގެންގުޅޭ "އަމިއްލަ އިއްޒަތާއި އަޒުމް" ރަމްޒުކޮށްދޭ އުޅަނދެއް ކަމަށާއި، ކަނޑުގެ ސަތަހައިގައާއި ކަނޑުގެ އަޑީގައި އުތުރު ކޮރެއާގެ ސިޔާދަތީ ބާރު ދެއްކުމުގެ ވަގުތު ޖެހިފައިވާ ކަމަށެވެ. މީގެ އިތުރުން، ކޮރެއާ ޕެނިންސިއުލާގެ އިރުމަތީ ކަނޑާއި މުޅި އެ ސަރަހައްދުގައި އުތުރު ކޮރެއާއަށް މެދުނުކެނޑި ނުރައްކާ އޮތް ކަމަށާއި، އެހެންކަމުން އެ ސަރަހައްދުގައިވާ "ނުރައްކާތެރި ހިޔަނިތައް" ފޮހެލަންޖެހޭ ކަމަށް ކިމް ބުންޏެވެ.

"ކަންގް ކޮން" މަނަވަރުގައި ހަރުކޮށްފައިވަނީ ކޮން ކަހަލަ ހަތިޔާރުގެ ނިޒާމުތަކެއް ކަން ކޭސީއެންއޭއިން ސީދާ ހާމަކޮށްފައެއް ނުވި ނަމަވެސް، އެ އޭޖެންސީން ބުނީ މި މަނަވަރުގައި  ޖޫން މަހު ޚިދުމަތަށް ނެރުނު 5،000 ޓަނުގެ "ޗޯ ހިޔޮން" މަނަވަރުގައި ހުރި ފަދަ ހަތިޔާރުގެ ނިޒާމުތައް މި މަނަވަރުގައި ވެސް ހުންނާނެ ކަމަށެވެ. އެ އޭޖެންސީން ބުނީ، "ޗޯ ހިޔޮން" ކްލާސްގެ ޑިސްޓްރޯޔަރ މަރުކާގެ މަނަވަރުތަކަކީ ތަފާތު އެކި ބާވަތުގެ ހަތިޔާރު އުފުލުމުގެ ގާބިލުކަން ހުރި އުޅަނދުތަކެއް ކަމަށެވެ. މީގެ ތެރޭގައި ނިއުކްލިއާ ހަތިޔާރު އުފުލުމުގެ ގާބިލުކަން ހުރި މިސައިލްތައް ހިމެނޭ ކަމަށް މަސްރަހު ދިރާސާކުރާ ފަރާތްތަކުން ލަފާކުރެ އެވެ.

އާދީއްތަ ދުވަހަކީ 'ކަންގް ކޮން' މަނަވަރު ޚިދުމަތަށް ނެރުނު ތިންވަނަ ފަހަރެވެ. މި ޑިސްޓްރޯޔަރ މަރުކާގެ މަނަވަރު 2025 ވަނަ އަހަރުގެ މޭ މަހު ފުރަތަމަ ފަހަރަށް ޚިދުމަތަށް ނެރުމަށްފަހު، ފެން ވަނުމާ ގުޅިގެން، މަރާމާތު ކުރުމަށްފަހު ޖެހިގެން އައި މަހު އަލުން ޚިދުމަތަށް ނެރުނެވެ. އަދި، އޭގެ ފަހުން އިތުރު މަރާމާތުތަކާއި ކަނޑުގެ ޓެސްޓުތައް ހެދުމަށްފަހު، ހަތިޔާރުގެ ޓެސްޓުތައް ފުރިހަމަކޮށްފައި ވަނީ މި އަހަރުގެ ޖުލައި މަހުގަ އެވެ. މި މަނަވަރާ ގުޅޭ އިތުރު ތަފްސީލެއް ދީފައި ނުވި ނަމަވެސް، ކުރިއަށް އޮތް އަށް މަސް ދުވަހުގެ ތެރޭގައި އުތުރު ކޮރެއާގެ ކަނޑުގެ ސިފައިންގެ ގާބިލުކަން އިތުރުވެގެންދާނެ އާ މަރުހަލާއެއް ދައްކާލާނެ ކަމަށް ކިމް ބުނި ކަމަށް ކޭސީއެންއޭއިން ރިޕޯޓުކުރި އެވެ.

ކިމް ޖޮންގް އުން އުތުރު ކޮރެއާގެ ނިއުކްލިއާ ގާބިލުކަން ހުރި ފައުޖުތައް ފުޅާކުރުމަށް ކުރަމުންދާ މަސައްކަތުގެ ދަށުން، އެ ގައުމުގެ ކަނޑުގެ ސިފައިންގެ ފައުޖު ޒަމާނީ ކުރުމުގެ މަސައްކަތް މިހާރު ވަނީ ވަރަށް ބޮޑަށް އަވަސްކޮށްފަ އެވެ. މީގެ އިތުރުން، އުތުރު ކޮރެއާގެ އިރުމަތީ އައްސޭރީގައި ކަނޑުގެ ސިފައިންގެ މަރުކަޒުތައް ބިނާކުރުމުގެ މަސައްކަތް ކުރިއަށްދާ ކަމަށާއި، ކަނޑުގެ ސިފައިންގެ އާ ޔުނިޓްތައް އުފައްދައި ތަފާތު ފަންތީގެ މަނަވަރުތައް ބަނުމުގެ މަސައްކަތް ކުރާނެ ކަމަށް ވެސް ކިމް ބުންޏެވެ.

ޕްޔޮންގޔަންގުން ސިފަކުރާ ގޮތުގައި އުތުރު ކޮރެއާއަކީ ނިއުކްލިއާ ބާރެކެވެ. އަދި، އެއީ ދެން ބަދަލު ނުކުރެވޭނެ ހާލަތެކެވެ. މީގެ އިތުރުން، އަސްކަރީ ބާރުވެރިކަން އިތުރު ކުރަމުން މި ދަނީ އެމެރިކާއާއި ދެކުނު ކޮރެއާއާ ކުރިމަތިލުމުގެ ގޮތުން ކަމަށް ވެސް ކިމްގެ ސަރުކާރުން ބުނެ އެވެ. އުތުރާއި ދެކުނު ކޮރެއާ އަދިވެސް ރަސްމީކޮށް އޮތީ ހަނގުރާމައިގެ ހާލަތެއްގަ އެވެ. އެ ސަރަހައްދުގައި ނިއުކްލިއާ ހަނގުރާމައެއް ފެށުމުގެ ބިރު ބޮޑު ކަމަށް މަސްރަހު ދިރާސާކުރާ ފަރާތްތަކުން ގަބޫލުކުރެ އެވެ.