ނުކުޅެދުންތެރިކަން ހުންނަ މީހުންނަށް ޖިންސީ ގޯނާކުރި ދެކުނު ކޮރެއާގެ ރައްޔިތަކު 15 އަހަރަށް ޖަލަށް
2 ސެޕްޓެމްބަރު 2026 | ބުދަ 06:32ދެކުނު ކޮރެއާގެ ނުކުޅެދުންތެރިކަން ހުންނަ މީހުން ބަލަހައްޓާ މަރުކަޒެއްގައި ހިނގި ޖިންސީ ގޯނާގެ މައްސަލަތަކާ ގުޅިގެން، މުޅި ގައުމުގައި ހުރި އެ ފަދަ ހުރިހާ ފެސިލިޓީތަކެއް ސަރުކާރުން ވަނީ ބަލައި ފާސްކޮށްފައި. މި ތަހުގީގުތަކުން އިތުރު މަރުކަޒުތަކެއްގައި ވެސް އަނިޔާކުރާކަން ފާހަގަކުރެވިފައިވާއިރު، ކަމާބެހޭ އިދާރާތަކުން މިހާރު ވަނީ އެ މަރުކަޒު ބަންދުކޮށް ހުއްދަ ބާތިލުކުރުމަށް ނިންމާފައި.
ދެކުނު ކޮރެއާގެ ގިނަ ބަޔަކު ދަނީ، އެ ޑައިރެކްޓަރުގެ އަމަލުތައް އެހާ ގިނަ ދުވަސް ވަންދެން އެއްވެސް މީހަކަށް ފާހަގަނުވެ އޮތީ ކިހިނެއްތޯ ސުވާލު އުފައްދަމުން. | ގެޓީ އިމޭޖަސް
ދެކުނު ކޮރެއާގެ ނުކުޅެދުންތެރިކަން ހުންނަ މީހުން ބަލަހައްޓާ މަރުކަޒެއްގައި ދިރިއުޅޭ ގިނަ އަދަދެއްގެ ބަޔަކަށް ޖިންސީ ގޯނާކުރި މައްސަލައެއްގައި، އެ މަރުކަޒުގެ ކުރީގެ ވެރިޔާ ޖަލަށްލުމަށް އެ ގައުމުގެ ކޯޓަކުން ހުކުމްކޮށްފި އެވެ. މުޅި ގައުމު ސިއްސުވާލި މި ހާދިސާއާ ގުޅިގެން، ސޯލްގެ ހުޅަނގުން އޮންނަ އިންޗިއޮން ސިޓީގެ "ސެކްޑޮންގްވޮން" ފެސިލިޓީގައި ދިރިއުޅޭ ތިން މީހަކަށް ޖިންސީ ގޯނާކުރިކަން ސާބިތުވެ، ކިމް ނަމަކަށް ކިޔާ އެ މަރުކަޒުގެ ކުރީގެ ވެރިޔާގެ މައްޗަށް ވަނީ 15 އަހަރުގެ ޖަލު ހުކުމެއް އިއްވާފަ އެވެ.
ފުލުހުން މި މައްސަލަ ތަހުގީގު ކުރަން ފަށާފައިވަނީ، ބުއްދި ހަމަނުޖެހޭ އަންހެނަކު އޭނާއަށް ލިބުނު އަނިޔާތަކުގެ ވާހަކަ މިދިޔަ އަހަރުގެ ފެބްރުއަރީ މަހު ހިއްސާކުރުމާ ގުޅިގެންނެވެ. މި މައްސަލައާ ގުޅިގެން ދެކުނު ކޮރެއާގެ ސަރުކާރުން ވަނީ މުޅި ގައުމުގައި ހުރި ނުކުޅެދުންތެރިކަން ހުންނަ މީހުން ބަލަހައްޓާ 1،507 މަރުކަޒެއް ބަލައި ފާސްކޮށްފަ އެވެ. މި ފާސްކުރުންތަކުގެ ތެރެއިން އިތުރު 33 މަރުކަޒެއްގައި އަނިޔާކުރާ ކަމަށް ތުހުމަތުކުރެވޭ މައްސަލަތަކެއް ވަނީ ފާހަގަކުރެވިފަ އެވެ.
ދެކުނު ކޮރެއާގެ ބޮޑުވަޒީރު ކިމް މިން-ސިއޮކް ވަނީ ސެކްޑޮންގްވޮން މަރުކަޒުގައި ހިނގާދިޔަ މި ހާދިސާއަކީ ދައުލަތެއް އޮތުމުގެ ބޭނުމާމެދު ސުވާލު އުފެދޭ ފަދަ ނުރައްކާތެރި މައްސަލައެއްގެ ގޮތުގައި ސިފަކުރައްވާފަ އެވެ. ގަންގްވާ ކައުންޓީން އިސްނަގައިގެން އެ މަރުކަޒުގައި ދިރިއުޅޭ މީހުންގެ ހާލަތު ބެލުމަށް ކުރިއަށްގެންދިޔަ ތަހުގީގަކުން ހާމަވި ގޮތުގައި، އެ ތަނުގައި މިހާރު ދިރިއުޅޭ އަދި ކުރިން ދިރިއުޅުނު 20 އަންހެނަކަށް ޖިންސީ ގޯނާ ލިބިފައިވުމުގެ ފުރުސަތު އެބައޮތެވެ.
ނުކުޅެދުންތެރިކަން ހުންނަ މީހުން ޖިންސީ ގޯނާއިން ރައްކާތެރިކުރުމަށް 2011 ވަނަ އަހަރު ގާނޫނުތައް ހަރުކަށިކޮށްފައި ވަނިކޮށް، މި ފަދަ ހާދިސާއެއް އަދިވެސް ހިނގަން މެދުވެރިވި ސަބަބާމެދު ގިނަ ބަޔަކު ދަނީ ސުވާލު އުފައްދަމުންނެވެ. މީގެ އިތުރުން، އެ މަރުކަޒުގެ ޑިރެކްޓަރުގެ މި އަމަލުތައް އެހާ ގިނަ ދުވަސްވަންދެން އެއްވެސް މީހަކަށް ނޭނގި ސިއްރުވެފައި އޮތް ގޮތަކާމެދު ވެސް އާންމުންގެ މެދުގައި ވަނީ ކަންބޮޑުވުން އުފެދިފަ އެވެ.
މި މައްސަލައާ ގުޅިގެން ގަންގްވާ ކައުންޓީން ވަނީ ސެކްޑޮންގްވޮން މަރުކަޒު ބަންދުކުރުމަށް އަމުރުކޮށްފަ އެވެ. އަދި އިންޗިއޮން ސިޓީގެ އޮފިޝަލުން ވަނީ އެ މަރުކަޒު ހިންގަމުންދިޔަ މަރުކަޒަށް ދޫކޮށްފައިވާ ހުއްދަ ބާތިލުކޮށްފަ އެވެ. ނަމަވެސް، އެ ތަނުގައި މިހާރު ތިބި މީހުން އެހެން ތަންތަނަށް ބަދަލުކޮށް، އަމިއްލައަށް ދިރިއުޅެވޭނެ އިންތިޒާމުތައް ހަމަޖެހެންދެން މަރުކަޒު ބަންދުކުރުން ވަނީ ފަސްކޮށްފަ އެވެ. އެ މަރުކަޒު މިހާރު ވަނީ ހުއްދަ ބާތިލުކުރި މައްސަލަ އިސްތިއުނާފުކޮށް ކޯޓަށް މައްސަލައެއް ހުށަހަޅާފަ އެވެ.
މަސްދަރު: ބީބީސީ
