އުތުރު ކޮރެޔާއިން އެންމެ ފަހުން ޓެސްޓުކުރީ އަޑަށްވުރެ ފަސްގުނަ ބާރަށް ދަތުރުކުރާ ބެލިސްޓިކް މިސައިލެއް
4 އޮކްޓޯބަރު 2026 | އާދީއްތަ 08:08އުތުރު ކޮރެޔާއިން އަލަށް އުފެއްދި ހައިޕަސޮނިކް މިސައިލެއް ކާމިޔާބުކަމާއެކު ޓެސްޓުކޮށްފައި ވަނީ އެ ގައުމުގެ ދިފާއީ ބާރު ވަރުގަދަކުރުމުގެ ސިޔާސަތުގެ ދަށުން. މި ޓެސްޓާ ގުޅިގެން ދެ ކޮރެޔާގެ މެދުގައި މަސްރަހު ހޫނުވެފައިވާއިރު، މިއީ ހަތިޔާރުގެ ގާބިލުކަން ދައްކާލުމަށް މި އަހަރު އެ ގައުމުން ކުރިއަށްގެންދިޔަ ސިލްސިލާ ހަރަކާތްތަކުގެ ތެރެއިން މުހިންމު ފިޔަވަޅެއް ކަމަށް ޕްޔޮންގޔެންގުން ބުނޭ
އުތުރު ކޮރެޔާއިން އެންމެ ފަހުން ޓެސްޓު ކުރި ހައިޕަސޮނިކް ނުވަތަ އަޑަށްވުރެ ފަސްގުނަ ބާރަށް ދަތުރުކުރުމުގެ ގާބިލުކަން ލިބިފައިވާ މެދު-ރާސްތާގެ މިސައިލް އުދުއްސައިލާ މަންޒަރު | ރޮއިޓަރސް
އުތުރު ކޮރެޔާގެ ލީޑަރު ކިމް ޖޮންގް އުންގެ ބެލުމުގެ ދަށުން، އެ ގައުމުގެ ނިއުކްލިއާ ބާރުގެ އިތުބާރު ދައްކާލުމުގެ ގޮތުން ހައިޕަސޮނިކް ނުވަތަ އަޑަށްވުރެ ފަސްގުނަ ބާރަށް ދަތުރުކުރެވޭ މިސައިލެއް ޓެސްޓުކޮށްފައިވާނެ ކަން އުތުރު ކޮރެޔާއިން ހާމަކޮށްފި އެވެ.
އެ ގައުމުގެ ދައުލަތުގެ މީޑިއާ ކޭސީއެންއޭއިން ބުނީ، ހައިޕަސޮނިކް އިސްތިރާޖީ ހަތިޔާރުގެ ބިނާކުރުރުމުގެ ސިޔާސަތުގެ ދަށުން ޓެސްޓުކޮށްފައިވާ މެދު-ރާސްތާގެ މިސައިލް، އުތުރު ކޮރެޔާގެ އިރުމަތީ ފަރާތުން ހޮނިހިރު ދުވަހު ފޮނުވާލާފައިވާ ކަމަށާއި، ގާތްގަނޑަކަށް 1000 ކިލޯމީޓަރު ދުރަށް އެ މިސައިލް ދަތުރުކޮށްފައިވާ ކަމަށެވެ. އަދި، އޭގެ އަމާޒަށް ވާސިލުވެލައިވާ ކަމަށް ވެސް ކޭސީއެންއޭއިން ރިޕޯޓުކޮށްފައިވެ އެވެ. މި ޓެސްޓުގެ މަގްސަދަކީ އުތުރު ކޮރެޔާގެ ސިފައިން ތަމްރީނުކުރުމާއި، އެ ޤައުމުގެ ދިފާއީ ބާރުތަކުގެ ގާބިލުކަމާއި ހަރަކާތްތެރިކަން ވަޒަންކުރުން ކަމަށް ވެސް ކޭސީއެންއޭގެ ރިޕޯޓުގައި ބުނެފައިވެ އެވެ.
އުތުރު ކޮރެޔާގެ އިސްތިރާޖީ ހަތިޔާރުތަކުގެ "އިތުބާރާއި ނުރައްކާތެރިކަން" ދުޝްމަނުންނަށް އަންގައިދިނުމަށް ކުރަމުންދާ މަސައްކަތްތައް މެދުކެނޑުމެއްނެތި ކުރިއަށް ގެންދަންޖެހޭނެ ކަމަށް، މިސައިލް ޓެސްޓަށް ފަހު ކިމް ބުނި ކަމަށް ކޭސީއެންއޭއިން ރިޕޯޓުކޮށްފައިވެ އެވެ. އަދި, މި ފަދަ ޓެސްޓުތަކަކީ ދިފާއީ ފިޔަވަޅެއްގެ ގޮތުގައި އޭނާ ސިފަކޮށްފައިވެ އެވެ.
ގައުމީ ސަލާމަތަށް ޓަކައި އެ ގައުމުގެ ނިއުކްލިއާ ދިފާއީ ނިޒާމު ތަރައްގީކުރުމަކީ ކޮންމެހެން ކުރަންޖެހޭ ކަމެއްކަން ކިމް ތަކުރާރުކުރި ކަމަށާއި، އެ ސިޔާސަތަށް އެއްވެސް ބަދަލެއް ނާންނާނެ ކަން ކަށަވަރުކޮށްދިން ކަމަށް ވެސް ކޭސީއެންއޭ އިން ބުނެފައިވެ އެވެ.
މިއީ، މި އަހަރުގެ ތެރޭގައި އުތުރު ކޮރެޔާއިން ކުރިއަށްގެންދިޔަ ހަތިޔާރު ޓެސްޓުކުރުމުގެ ސިލްސިލާގެ އެންމެ ފަހުގެ ޓެސްޓެވެ. އުތުރު ކޮރެޔާއިން މިސައިލް ޓެސްޓެއް ހަދާފައި މި ވަނީ، ދެ ކޮރެޔާ ދެމެދުގައި ގާއިމުކޮށްފައިވާ ހަތިޔާރު ގެންގުޅުން މަނާ ޑީމިލިޓަރައިޒް ޒޯންގައި ވަޅުލާފައިވާ މައިނެއް ގޮވައި، ދެކުނު ކޮރެޔާގެ ސިފައިންގެ ބަޔަކު ޒަޚަމްވި ހާދިސާއާ ގުޅިގެން ދެ ޤައުމުގެ ދެމެދުގައި މަސްރަހު ހޫނުވެފައިވާ ދަނޑިވަޅެއްގަ އެވެ.
އުތުރު ކޮރެޔާގެ މިސައިލް ޓްރެކްކުރުަށް ދެކުނަށް ގޮންޖެހުންތަކެއް
ހޮނިހިރު ދުވަހު ކިމް ޖޮންގް އުންގެ ކޮއްކޮ އަދި ވެރިކަންކުރާ ވޯކާސް ޕާޓީގެ އިސް އޮފިޝަލެއް ކަމަށްވާ ކިމް ޔޯ ޖޮންގ ވަނީ މި މިސައިލް ޓެސްޓާ ގުޅޭ އިތުރު މައުލޫމާތު ހާމަކޮށްފަ އެވެ. އޭނާ ބުނީ، އާ މިސައިލް ދަތުރުކޮށްފައިވާ ގޮތް ދެކުނު ކޮރެޔާއާއި ޖަޕާނަށް ޓްރެކްކުރެވިފައި ނުވަތަ ދެނެގަނެވިފައި ނުވާ ކަމަށެވެ. އަދި، އެ މިސައިލަކީ "ރާޅެއް ފަަދަ ޓްރެޖެކްޓަރީ މޯޑު" ގައި ދަތުރުކުރުމުގެ ގާބިލުކަން ލިބިފައިވާ މިސަލެއް ކަމަށް ވެސް އޭނާ ބުންޏެވެ.
ނަމަވެސް، މިސައިލް ޓެސްޓު ހެދުމަށް އުތުރު ކޮރެޔާއިން ކުރަމުންދިޔަ ތައްޔާރީތަކާއި، މިސައިލްގެ ދަތުރު ވަރަށް ގާތުން މޮނިޓަރު ކޮށްފައިވާނެ ކަމަށް ދެކުނު ކޮރެޔާގެ އަސްކަރިއްޔާއިން ބުންޏެވެ. ދެކުނު ކޮރެޔާގެ ދިފާއީ ވުޒާރާއިން ބުނީ، އުތުރު ކޮރެޔާއިން ފަހަކަށް އައިސް ފޮނުވާލި މިސައިލްތަކަކީ ދެކުނު ކޮރެޔާއާއި އެމެރިކާގެ މިސައިލް ދިފާއީ ނިޒާމުތަކަށް ދެނެގަނެވި، ހުއްޓުވުމުގެ ގާބިލުކަން ލިބިގެންވާ މިސައިލްތަކެއް ކަމަށެވެ.
އަދި، އެންމެ ފަހުން ޓެސްޓު ކޮށްފައިވާ މިސައިލް ދެކުނު ކޮރެޔާގެ އައްސޭރިފަށުން 700 ކިލޯމީޓަރުގެ ދުރުމިނަށް ދަތުރު ކޮށްފައިވާ ކަމަށް ވެސް އެ ޤައުމުގެ ދިފާއީ ވުޒާރާއިން ބުންޏެވެ. މި މިސައިލް ޓެސްޓާ ގުޅޭ ގޮތުން ކޭސީއެންއޭއިން ވަނީ، އެހެން ފަހަރުތަކުގައި ހާމަކޮށްފައިނުވާ މިންވަރަކަށް މަައުލޫމާތު އާންމުކޮށްފަ އެވެ.
ކޮރެޔާ އިންސްޓިޓިއުޓް ފޯ ނޭޝަނަލް ޔުނިފިކޭޝަންގެ ދާރިސެއް ކަމަށްވާ ހޮންގ މިން ވިދާޅުވީ، މި މައުލޫމާތު ހާމަކުރުމުގެ ބޭނުމަކީ، މިސައިލް ގާތްގަނޑަކަށް 1,000 ކިލޯމީޓަރަށް ދަތުރުކުރި ކަމަށް އުތުރު ކޮރެޔާއިން ކުރާ ދައުވާއަށް ބާރުދިނުން ކަމަށް ބެލެވޭ ކަމަށެވެ. އަދި, ދެކުނު ކޮރެޔާއާއި ޖަޕާނުގެ ޓްރެކްކުރުމުގައި ހުރި މައްސަލަތައް ކަމަށް ޕިޔޮންގޔަންގއަށް ފެންނަ ކަންކަން ފާހަގަކުރުން ކަމަށް ވެސް އޭނާ ވިދާޅުވި އެވެ.
މިއީ، 2022 ވަނަ އަހަރު ފުރަތަމަ ޓެސްޓުކުރި ހައިޕަސޮނިކް މިސައިލަކާ އެއްފަދަ މިސައިލެއް ކަމަށް ބެލެވޭކަން ފާހަގަކުރައްވައި އޭނާ ވިދާޅުވީ، މިއީ ހަމައެކަނި ޓެސްޓުކުރުމުގެ މަރުހަލާ ދޫކޮށް، އަމަލީ ގޮތުން ބޭނުންކުރުމަށް އުތުރު ކޮރެޔާއިން މިސްރާބު ޖަހާފައިވާކަން އަންގައިދޭ އިޝާރާތެއް ކަމަށެވެ.
މި ދަނޑިވަޅުގައި، ސަރަހައްދީ ރޮނގުގައި މައިނެއް ގޮވި ހާދިސާއާ ގުޅިގެން މާފަށް އެދުމަށް ސޯލްއިން ކުރި ޑިމާންޑަށް އުތުރު ކޮރެޔާއިން ވަނީ ރައްދުދީފަ އެވެ. ކިމް ޖޯ ޔޮންގ ނެރުނު ބަޔާނެއްގައި ބުނީ، ދެކުނު ކޮރެޔާގެ އެ ތުހުމަތުތަކަކީ "އެއްވެސް އަސާސެއް ނެތް" ވާހަކަތަކެއް ކަމަށާއި، ދެކުނު ކޮރެޔާގެ ސިފައިންނަށް ހަމަލާދިނުމުގެ މަގުސަދުގައި ގަސްދުގައި މައިން ވަޅުލާފައި ނުވާނެ ކަމަށެވެ. މި އަހަރުގެ ތެރޭގައި އުތުރު ކޮރެޔާއިން 10 އަށްވުރެ ގިނަ މިސައިލް ޓެސްޓު ހަދާފައިވެ އެވެ.
މަސްދަރު: ރޮއިޓަރސް
