ސައުދީ އިއްތިހާދުން ހޫޘީންނާ ދެކޮޅަށް ބޮޑު އަސްކަރީ އޮޕަރޭޝަނެއް، ވަރުގަދަ ހަމަލާތަކެއް!
10 އޮކްޓޯބަރު 2026 | ހޮނިހިރު 04:27ޔަމަނުގެ ސަރުކާރުގެ ފައުޖުތަކުން ހޫޘީންނާ ދެކޮޅަށް ފަށާފައިވާ 'ޑޯން އޮފް ޔަމަން' އޮޕަރޭޝަނަށް ސައުދީ ކޯލިޝަނުން ވައިގެ މަގުން ވަރުގަދަ އެހީތެރިކަމެއް ފޯރުކޮށްދޭން ފަށައިފި. މި ހަމަލާތަކުގައި ހޫޘީންގެ މިސައިލް ނެޓްވޯކްތަކާއި އަސްކަރީ ގާބިލުކަން ނައްތާލުމަށް މަސައްކަތް ކުރަމުންދާއިރު، ފާއިތުވި 24 ގަޑިއިރު ތެރޭގައި އެތައް ސަތޭކަ ހަނގުރާމަވެރިންނެއްގެ އަސްކަރީ ގާބިލުކަން ނައްތާލާފައި. ޞަންޢާ ހިމެނޭހެން ހޫޘީންގެ އަތްދަށުގައިވާ ސަރަހައްދުތައް މިނިވަންކުރުމަށް ކުރާ މި މަސައްކަތުގައި ގިނަ އަދަދެއްގެ އަސްކަރީ އުޅަނދުތައް ވެސް ވަނީ ހަލާކުކޮށްލާފައި
ޔަމަނުގެ ސަރުކާރު ސިފައިން ހޫޘީ ހަނގުރާމަވެރިންގެ އަމާޒުތަކަށް ހަމަލާދެނީ | އޭއެފްޕީ
ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ވާގިވެރިވާ ސައުދީ އަރަބިއްޔާ އިސްވެ އޮންނަ އަސްކަރީ އިއްތިހާދުން، ހޫޘީ ހަނގުރާމަވެރިންނާ ދެކޮޅަށް ފުޅާ ދާއިރާއެއްގައި އަސްކަރީ އޮޕަރޭޝަނެއް ހިންގަމުންދާކަން ހުކުރު ދުވަހުގެ ރޭ އިއުލާނުކޮށްފި އެވެ. މި ގޮތުން، ހޫޘީންގެ ކޮންޓްރޯލްގެ ދަށުގައިވާ ސަރަހައްދުތަކުން 136 އަސްކަރީ އަމާޒަކަށް ހަމަލާދީ ހަލާކުކޮށްލާފައިވާކަން އެ އިއްތިހާދުން ހާމަކުރި އެވެ.
އެ އިއްތިހާދުގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ ވިދާޅުވީ، މި އޮޕަރޭޝަން އަމާޒުކޮށްފައި ވަނީ ހޫޘީ ހަނގުރާމަވެރިންނާއި އެ މީހުންގެ އަސްކަރީ ގާބިލުކަމަށް ކަމަށެވެ. އަދި، މިހާރު ކުރިއަށްދާ ހަމަލާތަކުގެ ތެރެއިން ޔަމަނުގެ ސަރުކާރުގެ ފައުޖުތަކަށް 24 ގަޑިއިރު މެދުކެނޑުމެއްނެތި ވައިގެ މަގުން އެހީތެރިކަން ފޯރުކޮށްދެމުންދާ ކަން ވެސް އިއްތިހާދުން ފާހަގަކުރި އެވެ.
ހޫޘީންގެ ބެލިސްޓިކް މިސައިލް ނެޓްވޯކް ރޫޅާލައި ހަލާކުކޮށްލުމުގެ މަސައްކަތް ވެސް ކޯލިޝަންގެ ފައުޖުތަކުން ކުރަމުންދާ ކަން އަލް-މާލިކީ ފާހަގަކުރެއްވި އެވެ. އިއްތިހާދުން މި ކަން އިއުލާނުކޮށްފައި ވަނީ، 'ޑޯން އޮފް ޔަމަން' އޮޕަރޭޝަންގެ ދަށުން ޔަމަނުގެ ސަރުކާރުގެ ފައުޖުތަކުން ހަމަލާތައް ވަރުގަދަކޮށްފައިވާ ދަނޑިވަޅެއްގަ އެވެ.
ހުކުރު ދުވަހުގެ ކުރީކޮޅު، ޔަމަނުގެ އަސްކަރިއްޔާގެ ތަރުޖަމާނު ބްރިގޭޑިއަރ ޖެނެރަލް މާޖިދު ޢަބްދުﷲ އަލް-ނާޟިބު ވިދާޅުވީ، ވޭތުވެދިޔަ 24 ގަޑިއިރުގެ ތެރޭގައި ސަރުކާރުގެ ފައުޖުތަކުން ހޫޘީންގެ އަމާޒުތަކަށް 2،750 އަށްވުރެ ގިނަ ހަމަލާ ދީފައިވާ ކަމަށެވެ. މި އޮޕަރޭޝަންތަކުގައި 1،400 އަށްވުރެ ގިނަ ހޫޘީ ހަނގުރާމަވެރިންގެ އަސްކަރީ ގާބިލުކަން ނައްތާލައި، 250 އަށްވުރެ ގިނަ އަސްކަރީ އުޅަނދާއި އާލާތްތައް ހަލާކުކޮށްލާ ނުވަތަ ގެއްލުންދީފައިވާ ކަމަށް ވެސް އޭނާ ވިދާޅުވި އެވެ.
ޔަމަނުގެ ވެރިރަށް ޞަންޢާ ހިމެނޭހެން ހޫޘީންގެ އަތްދަށުގައިވާ ސަރަހައްދުތައް މިނިވަން ކުރުމަށް އަމާޒުކޮށްގެން ކުރިއަށްގެންދާ މި އޮޕަރޭޝަންގައި ސައުދީ އަރަބިއްޔާ އިސްވެ އޮންނަ އިއްތިހާދުން ދަނީ ޔަމަނުގެ ސަރުކާރުގެ ފައުޖުތަކަށް ވައިގެ މަގުން އެހީތެރިކަން ފޯރުކޮށްދެމުންނެވެ. 2014 ވަނަ އަހަރު ހޫޘީން ޞަންޢާ ހިފި ފަހުން ޔަމަން ވަނީ ބޮޑު ހަމަނުޖެހުމެއްގެ ތެރެއަށް ވެއްޓިފަ އެވެ. މިއާއެކު، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް އެހީތެރިވުމުގެ ގޮތުން 2015 ވަނަ އަހަރު ސައުދީ އަރަބިއްޔާ އިސްވެ އޮންނަ އިއްތިހާދުން ވަނީ އެ މައްސަލައިގެ ތެރެއަށް ވަދެފަ އެވެ.
މަސްދަރު: އަނަދޮލު އޭޖެންސީ
