ސައުދީ އަރަބިއްޔާގެ އެއާޕޯޓުތަކަށާއި އަސްކަރީ މަރުކަޒުތަކަށް ހޫޘީން އަނެއްކާވެސް ހަމަލާދީފި
7 އޮކްޓޯބަރު 2026 | ބުދަ 04:56ސައުދީގެ ރިޔާޟް، އަބްހާ އަދި ޚަމީސް މުޝައިތުގެ އެއާޕޯޓުތަކާއި އަސްކަރީ މަރުކަޒުތަކަށް އަމާޒުކޮށް ހޫޘީން ގިނަ އަދަދެއްގެ ޑްރޯނާއި މިސައިލް ހަމަލާތަކެއް ދީފި. މި ހަމަލާތަކާ ގުޅިގެން ވައިގެ ދަތުރުފަތުރަށް ބުރޫއަރާފައިވާ ކަމަށް ހޫޘީން ބުނާއިރު، ސައުދީ ކޯލިޝަނުން ވަނީ ރިޔާޟަށް އަމާޒުކުރި މިސައިލެއް ވައިގެ ތެރޭގައި ނައްތާލައި، ހަމަލާދިން ޕްލެޓްފޯމް ދެނެގަނެފައިވާ ކަމަށް ބުނެފައި
ޔަމަނުގެ ހޫޘީ ހަނގުރާމަވެރިން ސައުދީ އަރަބިއްޔާގެ އަރަމްކޯ ތެޔޮ ކުންފުނީގެ ކާރުޚާނާއަކަށް ދީފައިވާ ކަމަށް ބުނާ ހަމަލާއާ ގުޅިގެން އެ ސަރަހައްދުގައި ބިޔަ އަލިފާންގަނޑެއް ރޯވެފައިވާ މަންޒަރު | އެކްސް
ސައުދީ އަރަބިއްޔާގެ އެއާޕޯޓުތަކަށާއި އަސްކަރީ މަރުކަޒުތަކަށް އަމާޒުކޮށް ޑްރޯނާއި ބެލިސްޓިކް މިސައިލްގެ ހަމަލާތަކެއް ދީފައިވާ ކަމަށް، ޔަމަނުގެ ހަތިޔާރުއެޅި ހޫޘީ ޖަމާއަތުން ބުދަ ދުވަހުގެ ހެނދުނު ބުނެފި އެވެ. ހޫޘީންގެ އަސްކަރީ ތަރުޖަމާނު ޔަހްޔާ ސަރީޢު ވަނީ ރިޔާޟްގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށް އަމާޒުކޮށް ގިނަ ޑްރޯންތަކެއް ފޮނުވާލާފައިވާ ކަމަށް ބުނެފަ އެވެ. އަދި، މި ހަމަލާއަކީ "ސީދާ އަމާޒަށް ދީފައިވާ" ހަމަލާއެއް ކަމަށާއި، އޭގެ ސަބަބުން އެ އެއާޕޯޓުގެ ވައިގެ ދަތުރުފަތުރަށް ބުރޫއަރާފައިވާ ކަމަށް ވެސް އޭނާ ބުންޏެވެ.
އަބްހާ އިންޓަނޭޝަނަލް އެއާޕޯޓަށާއި ޚަމީސް މުޝައިޠު އޭއާ ބޭހަށް އަމާޒުކޮށް ހަމަލާދިނުމަށް ދެ އޮޕަރޭޝަނެއް ހިންގާފައިވާ ކަމަށް ވެސް ސަރީޢު ބުނެފި އެވެ. މި ހަމަލާތަކުގައި ބެލިސްޓިކް މިސައިލާއި ޑްރޯން ބޭނުންކޮށްފައިވާ ކަން އޭނާ ހާމަކުރި އެވެ. މިއާއެކު، އެއާޕޯޓުގެ ވައިގެ ދަތުރުފަތުރަށް ހުރަސްއެޅި، އަސްކަރީ މަރުކަޒަށް ގެއްލުންތަކެއް ލިބިފައިވާ ކަމަށް އޭނާ ބުނެފި އެވެ.
މީގެ އިތުރުން، ގިނަ އަދަދެއްގެ ބެލިސްޓިކް މިސައިލާއި ޑްރޯން ބޭނުންކޮށްގެން އަސްކަރީ ތިން ކޭމްޕަކަށް ހޫޘީން ހަމަލާދީފައިވާ ކަމަށް ވެސް ސަރީޢު ބުންޏެވެ. މި ގޮތުން، ޖީޒާންގައިވާ އަލް-ޒަޣާރީރާއި އަލް-މައުސިމްގެ އިތުރުން އަސީރުގައިވާ އާކިފުގައި ހުރި އަސްކަރީ ކޭމްޕުތަކަށް ހަމަލާދީފައިވާނެ ކަމަށް އޭނާ ބުންޏެވެ.
ސައުދީ އަރަބިއްޔާއަށް ހަމަލާތަކެއް ދީފައިވާނެ ކަމަށް ހޫޘީން ބުނެފައިވާ މި ދަނޑިވަޅުގައި، ސައުދީ އަރަބިއްޔާއިން އިސްވެ އެކުލަވާލި އަސްކަރީ އިއްތިހާދުން ބުނީ، ވެރިރަށް ރިޔާޟަށް އަމާޒުކޮށް ހަމަލާދިނުމަށް ހޫޘީން ފޮނުވާލި ބެލިސްޓިކް މިސައިލެއް ވައިގެ ތެރޭގައި ނައްތާލާފައިވާނެ ކަމަށެވެ. ރިޔާޟަށް ހަމަލާދިނުމަށް ޔަމަނުގެ "ޓެރަރިސްޓު ހޫޘީ ހަނގުރާމަވެރިން" ބެލިސްޓިކް މިސައިލެއް ބޭނުން ކޮށްފައިވާ ކަން އަސްކަރީ އިއްތިހާދުގެ ތަރުޖަމާނު ބްރިގޭޑިއަރ ޖެނެރަލް ތުރުކީ އަލް-މާލިކީ ވެސް ކަށަވަރު ކޮށްދެއްވި އެވެ.
މީގެ އިތުރުން، ޔަމަނުގެ ވެރިރަށް ޞަންޢާއިން މިސައިލްތައް އުދުއްސައިލަން ބޭނުންކުރާ ޕްލެޓްފޯމްތައް އިއްތިހާދުގެ ޖާސޫސީ ނިޒާމުތައް ބޭނުންކޮށްގެން ދެނެގަނެވިފައިވާ ކަމަށް ވެސް އަލް-މާލިކީ ވިދާޅުވި އެވެ. "ކޯލިޝަންގެ އިންޓެލިޖެންސް ނިޒާމު ބޭނުންކޮށްގެން ޞަންޢާގެ މަތިން އަޅުގަނޑުމެން މި ދަނީ އެ ޕްލެޓްފޯމް ޓްރެކްކުރަމުން، އަދި އަޅުގަނޑުމެން އެ ނައްތާލާނަން،" އޭނާ ވިދާޅުވި އެވެ.
މަސްދަރު: އަނަދޮލު އޭޖެންސީ
