"އަދުގެ ރައީސުލްޖުމްހޫރިއްޔާ" އާއި "އަދުގެ ސަރުކާރު"
10 އޮކްޓޯބަރު 2026 | ހޮނިހިރު 18:30ސަރުކާރުން ޚިދުމަތްތައް ފުޅާކުރާ ކަމަށް ބުނެ ތަފާތު ތަފާސްހިސާބުތައް ދެއްކި ނަމަވެސް، އޭގެ އަމަލީ ނަފާ ރައްޔިތުންނަށް ނުލިބޭ ކަމުގެ ޝަކުވާ ވަނީ ބޮޑުވެފައި. ޕާސްޕޯޓު ދޫކުރާ މަރުކަޒުތަކާއި ޑޮލަރު އޭޓީއެމްތައް އިތުރުކުރި ނަމަވެސް، ޕާސްޕޯޓު ފޮތް ނެތުމާއި ބޭންކުތަކުން ޑޮލަރު ނުލިބުމުގެ ސަބަބުން އަސާސީ ޚިދުމަތްތައް ވަނީ ހުއްޓުމަކަށް އައިސްފައި. އެހެންކަމުން، ގިނަ މަޝްރޫއުތަކެއް އިއުލާންކުރި ކަމުގައި ވިޔަސް، ރައްޔިތުންގެ ހާލަތަށް ހަގީގީ ބަދަލެއް ނާންނަކަން މިއީ މިއަދުގެ ހަގީގަތް
ރައީސް ޑރ. މުހައްމަދު މުއިއްޒު އާއި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން | ރައީސް އޮފީސް
ރައީސް ޑރ. މުހައްމަދު މުއިއްޒުގެ ވަޒީރުންގެ ނޫސްވެރިންގެ ބައްދަލުވުންތަކާއި، ދެއްވާ އިންޓަވިއުތަކުން ފާހަގަވާ އެތައް ކަމެއް ހުރެ އެވެ. ބައެއް ވަޒީރުން ރައީސް މުއިއްޒު އަށް ސަނާކިޔާއިރު އަބަދުވެސް ބޭނުންކުރައްވާ ބައެއް ލަފްޒުތަކެއް ފާހަގަވަނީ އަދި މާ ބޮޑަށެވެ. އެގޮތުން އިސްލާމިކް މިނިސްޓަރު ޑރ. ޝަހީމް އަލީ ސައީދު ރައީސް މުއިއްޒު ކުރައްވާ ކަމެއްގެ ވާހަކަދައްކަވާއިރު މުޅީން ވެސް ބޭނުން ކުރައްވަނީ "ރާއްޖޭގެ އިއްޒަތްތެރި، ލޮބުވެތި ރައީސުލްޖުމްހޫރިއްޔާ" އެވެ. އަދި ހޯމް މިނިސްޓަރު އަލީ އިހުސާން މުޅިން ވެސް ބޭނުންކުރައްވަނީ "އަދުގެ ރައީސުލްޖުމްހޫރިއްޔާ" ނުވަތަ "އަދުގެ ސަރުކާރު" މި އިބާރާތެވެ.
އިހުސާން ވިދާޅުވާ ގޮތުގައި އަދުގެ ރައީސުލްޖުމްހޫރިއްޔާ ވަޑައިގެންނެވިިއިރު ރާއްޖޭގައި ޕާސްޕޯޓު ދޫކުރަނީ އެންމެ 5 ތަނުންނެވެ. އެ އަދަދު 39 ތަނަށް ބަދަލުކުރައްވައި، އެއާޕޯޓެއް އޮތް 1000 މީހުން ހަމަވާ ކޮންމެ ރަށެއްގައި އެ ޚިދުމަތް ދިނުމަށް އިތުރު 4 ތަން ހަމަޖައްސަވައި، ޖުމްލަ 43 ތަނުން ޕާސްޕޯޓު ދޫކުރެވޭނެ ގޮތް ހައްދަވާފައިވާ ކަމަށް ބުނެ އެއީ ތާރީޚީ ކާމިޔާބީއެއްގެ ގޮތުގައި ފާހަގަކުރައްވާ "އަދުގެ ރައީސުލްޖުމްހޫރިއްޔާ" އަށް ވަރަށް ބޮޑަށް ތައުރީފު ކުރައްވާފައިވެ އެވެ. ނަމަވެސް، މިފަދަ ބޮޑެތި އިއުލާނުތަކާއި ހިސާބުތަކުގެ ފަހަތުގައިވާ ހަގީގީ ހާލަތަށް ބަލާއިރު އާންމު ރައްޔިތުންނަށް އޭގެ އަމަލީ ނަފާ އެއް ނުލިބެ އެވެ.
ޕާސްޕޯޓު ދޫކުރާ މަރުކަޒުތަކުގެ އަދަދު 50 އަށް އިތުރުކުރިޔަސް ނުވަތަ ކޮންމެ މީހެއްގެ ގެއިން ޕާސްޕޯޓު ލިބޭނެ ގޮތް ހެދިޔަސް، އެކަން ހަގީގަތަކަށް ވަނީ ޕާސްޕޯޓު ފޮތް ހުރެގެން، ޕްރިންޓު ކުރެވިގެންނެވެ. "އަދުގެ ރައީސުލްޖުމްހޫރިއްޔާ" ވަޑައިގެން 39 ތަނުން ޕާސްޕޯޓު ދޫކުރާ ގޮތް ހެއްދެވި ނަމަވެސް، އިމިގްރޭޝަނުގައި ޕާސްޕޯޓު ދޫކުރާނެ ފޮތެއް ނެތުމުގެ ސަބަބުން ޕާސްޕޯޓެއް ޕްރިންޓެއް ނުވެ އެވެ. ކުރިން 5 ތަނުން ދޫކޮށްގެން ރައްޔިތުންނަށް ޕާސްޕޯޓު ލިބުނު ނަމަވެސް، 39 ތަނަށް ބަދަލުކުރުމުން ޕާސްޕޯޓު ނުލިބޭ ހާލަތަށް ކަންކަން ވަނީ ގޮސްފަ އެވެ.
މާލީ އަދި ބޭންކިންގ ޚިދުމަތްތަކަށް ބަލާއިރު ވެސް ފެންނަނީ ހަމަ މިފަދަ މަންޒަރެކެވެ. "އަދުގެ ރައީސުލްޖުމްހޫރިއްޔާ" ވަޑައިގެން ރާއްޖޭގެ ހުރިހާ ރަށެއްގައި ޑޮލަރު އޭޓީއެމް ބަހައްޓަވައިފި އެވެ. ނަމަވެސް، ބޭންކުތަކުގައި ޑޮލަރެއް ނެތެވެ. އާންމުކޮށް އޮންލައިންކޮށް ބޭނުންކުރާ ނެޓްފްލިކްސް ފަދަ ސަބްސްކްރިޕްޝަންތަކަށް ދައްކަންޖެހޭ މަހަކު 9 ޑޮލަރުވެސް ކާޑުން ނުކެނޑެ އެވެ. "އަދުގެ ރައީސުލްޖުމްހޫރިއްޔާ" ކޮންމެ ރަށެއްގައި ޑޮލަރު އޭޓީއެމްތައް ބެހެއްޓުމުގެ ކުރިން ރައްޔިތުންނަށް ބޭންކުތަކުން ޑޮލަރު ލިބި، އަމިއްލަ އެކައުންޓުގައި ހުންނަ ޑޮލަރު އޮންނަ ރޭޓުން ނެގި، ސަބްސްކްރިޕްޝަންތަކަށް ފައިސާ ދެއްކި، އަދި ޓީމޫ ފަދަ ސައިޓްތަކުން ތަކެތި ގެނެވުނެވެ. އޭޓީއެމްތައް ބަހައްޓާ ނިމުނުއިރު ބޭރުން އެއްޗެއް ނުގެނެވޭތާނގައި، ސަބްސްކްރިޕްޝަނަށް ފައިސާ ނުދެއްކި، އެންމެ ފަހުން އަމިއްލަ އެކައުންޓުގައި ހުރި ޑޮލަރު ވެސް ނުނެގޭ ހިސާބަށް ކަންކަން ވަނީ ގޮސްފަ އެވެ.
ސަރުކާރުގެ ކުންފުނިތަކާއި އިދާރީ އޮފީސްތަކަށް ބަލާއިރު ވެސް ފެންނަނީ ހަމަ މި މަންޒަރެވެ. "އަދުގެ ރައީސުލްޖުމްހޫރިއްޔާ" އެގްރޯނެޓަށް ކޮންމެ ރަށަކަށް އެމްޑީއަކާއި 10 ޑީއެމްޑީއިން ހަމަޖެއްސެވި ނަމަވެސް، ރަށްރަށުގައި ހައްދާނެ ތަރުކާރީއެއް ނެތެވެ. އެކި މަޝްރޫއުތަކަށް އަމާޒުކޮށްގެން ގައު އަޅާ ކުންފުންޏެއް އުފެއްދެވި ނަމަވެސް، ރަށްރަށުގައި އަމަލީ ގޮތުން ހިނގާ އެއްވެސް ޕްރޮޖެކްޓެއް ނެތެވެ. "އަދުގެ ރައީސުލްޖުމްހޫރިއްޔާ" ތަންތަން ބިނާކުރައްވައި، ގިނަގުނަ ކަންތައްތަކެއް ކުރައްވަމުންދާ ކަމަށް ދެއްކެވި ނަމަވެސް، އޭގެއިން އެއްވެސް ކަމެއްގެ އަމަލީ ފައިދާއެއް ރައްޔިތުންނަށް ނުލިބެ އެވެ. ކިތަންމެ ބޮޑެތި ނަންތަކެއް ކިޔައި، ގިނަ އަދަދެއްގެ މަރުކަޒުތަކާއި އިދާރާތައް އުފެއްދެވި ކަމުގައި ވީނަމަވެސް، އާންމު ރައްޔިތު މީހާއަށް އޭގެއިން ނުކުތް އެއްވެސް ހަގީގީ ނަތީޖާއެއް ނެތެވެ. "އަދުގެ ރައީސުލްޖުމްހޫރިއްޔާ" އެ ކުރައްވާ ކަންތައްތަކަށް ތައުރީފު ކުރެވި ދާނެ އެވެ. އެހެން ނަމަވެސް "އަދުގެ ރައްޔިތުންނަށް" ލިބޭ ފައިދާ ހަމަ އެއް ގޮތަކަށް ވެސް ނެތީ އެވެ. "އަދުގެ ރައީސުލްޖުމްހޫރިއްޔާ" ކުރައްވާ ކަންކަމުން "އަދުގެ ރައްޔިތުންނަށް" އެއްޗެއް ލިބޭނަމަ އެއީ ޔަގީނުން ވެސް ނިކަމެތި ކަމެވެ.
