ރާއްޖޭގެ ތާރީޚުގައި ވެސް ބޭރު މީހުންނަށް ބިން މިލްކު ކުރެވޭ ގޮތަށް ފުރުސަތު ދީފައިނުވޭ، ރަސްމާލެ މަޝްރޫއުގައި ވެސް ދިވެހީން އެ ފުރުސަތު ނުދޭނެ: ބޮންޑާ
10 އޮކްޓޯބަރު 2026 | ހޮނިހިރު 07:14ރަސްމާލޭގެ ބޮޑު ބައެއް ބޭރުގެ ކުންފުންޏަކަށް 99 އަހަރަށް ދިން މައްސަލައިގައި، އެ އެއްބަސްވުމުގެ ތަފުސީލާއި ބަންޑާރަ ނައިބުގެ ލަފާ ހާމަކުރުމަށް ކުރީގެ މެންބަރު ބޮންޑާ ގޮވާލެއްވި. މި މުއާމަލާތަކީ ރާއްޖޭގެ މިނިވަންކަމާއި ސިޔާދަތަށް ނުރައްކާވެދާނެ ކަމެއް ކަމަށާއި، މިކަން ހިނގާފައިވަނީ ދެފުށް ފެންނަ އުސޫލަކުން ނޫން ކަމަށް އޭނާ ވިދާޅުވި
މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވާހަކަ ދައްކަވަނީ. ފައިލް ފޮޓޯ | ރާއްޖެ އެމްވީ
ދިވެހިރާއްޖޭގެ ތާރީޚުގައި ވެސް ބޭރު މީހުންނަށް ރާއްޖޭގެ ބިން މިލްކު ކުރެވޭ ގޮތަށް ދިވެހީން ފުރުސަތު ދީފައިނުވާ ކަމަށާއި، ރަސްމާލެ މަޝްރޫއުގައި ވެސް ދިވެހީން އެ ފުރުސަތު ނުދޭނެ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" ނަމުގައި ކުރިއަށްގެންދާ ޚާއްސަ ކަވަރޭޖެއްގައި ވާހަކަދައްކަވަމުން ބޮންޑާ ވިދާޅުވީ، ރަސްމާލޭގެ ބޮޑު ބައެއް 99 އަހަރަށް އީގަލް ހިލްސް ކުންފުންޏަށް ދީފައިވާ ކަމަށް ބުނާ މައްސަލައިގައި އެ ތަނުގެ ރަޖިސްޓްރީ ވިއްކާލާފައިވާއިރު، އެ ރަޖިސްޓްރީ ވިއްކާލީ ކިހާވަރަކަށްތޯ ސުވާލު އުފެދޭ ކަމަށެވެ. އަދި އެފަދަ ރިއަލް އެސްޓޭޓް ވިޔަފާރިއަކީ ދިވެހި ރައްޔިތުންނަށް ނުވަތަ ސަރުކާރަށް ވެސް ކުރެވިދާނެ ކަމެއް ކަމަށް ބޮންޑާ ވިދާޅުވި އެވެ.
ބޮންޑާ ވިދާޅުވީ މި މަޝްރޫއާ ގުޅޭގޮތުން ބަންޑާރަ ނައިބު އަހްމަދު އުޝާމް ސަރުކާރަށް ދީފައިވާ ލަފައާއި އިރުޝާދު ދިވެހި ރައްޔިތުންނަށް އެނގެން ޖެހޭ ކަމަށާއި، އެ އެއްބަސްވުން ހާމަކުރަން ޖެހޭ ކަމަށެވެ. އަދި ވިދާޅުވީ ރަސްމާލޭގެ ބޮޑު ބައެއް ބޭރުގެ ކުންފުންޏަކަށް ދީފައިވާ މައްސަލައަކީ ރާއްޖޭގެ މިނިވަންކަމާއި ސިޔާދަތާ ގުޅިފައިވާ ސީރިއަސް މައްސަލައެއް ކަމަށާއި، މި މުއާމަލާތުން ދިވެހި އެއްވެސް ރައްޔިތަކަށް ލިބުނު ފައިދާއެއް ނެތް ކަމަށެވެ.
މީގެއިތުރުން ބޮންޑާ ވިދާޅުވީ، 500 ހެކްޓަރުގެ ސަރަހައްދަކަށް ބޭރު މީހުން ގެނައުމަށް މަސައްކަތް ކުރާއިރު އެ ގެންނަނީ ކޮން ބައެއްކަން ސާފުނުވާ ކަމަށެވެ. އަދި މިއީ ރާއްޖޭގެ މިނިވަންކަމާއި ސިޔާދަތާ ސީދާ ގުޅުންހުރި ކަމަކަށް ވުމުން، މިފަދަ ކަންކަން ހިންގަންވާނީ ދެފުށް ފެންނަ ގޮތަކަށް ކަމަށް އޭނާ ވިދާޅުވި އެވެ.
މިހާރު ދުނިޔޭގައި އިންސާނިއްޔަތުކަމެއް ނެތް. އިންސާނިއްޔަތުކަން ދެން ދުވަހަކު ވެސް ނުދާ ދަރަޖައަށް އިންސާނިއްޔަތުކަމުގެ މި ވަނީ ވަސް ވެސް ދުނިޔޭގައި ނެތޭ. ދުނިޔޭގެ ގައުމުތަކުގެ ބައެއް ލީޑަރުންގެ އަމަލުތައް ހުންނަ ގޮތުން މިހާރު އެހާ ބިރުވެރި ހާލަތްތަކަށް ގޮސްފައި އޮއްވާ، އެ ބަޔަކާ ގުޅޭ ބަޔަކު އައިސް މާލޭގައި ހަމަ ބުޑުގައި އަނެއްކާ ވެސް 500 ހެކްޓަރުގެ ސަރަހައްދަކަށް ބިދޭސީން ގެނެސް އަޅަނީ. ކޮން ބައެއްކަމެއް އަޅުގަނޑުމެންނަކަށް ނޭނގެ ގެންނަނީކީ. އެހެންވީމާ އެ ސިޔާދަތީ ދިވެހިރާއްޖެ މިނިވަންކަމާ ގުޅޭ ވަރަށް ބޮޑެތި ސުވާލުތައް އުފެދޭ މައްސަލައެއްގައި މި ވަރަށް ދެފުށް ފެންނަ ގޮތަށް ހިންގަންޖެހޭ ކަމެއް މިކަމަކީއިބްރާހީމް ރަޝީދު (ބޮންޑާ)
ބޮންޑާ ވިދާޅުވީ، މި މުއާމަލާތް ހިނގާފައިވަނީ ދެފުށް ފެންނަ އުސޫލުން ނޫން ކަމަށާއި، މި ސަރުކާރުން މި ވަނީ މަކަރާއި ހީލަތުން ސަރަހައްދެއް ވިއްކާލާފައި ކަމަށް ގަބޫލުކުރެވޭ ކަމަށެވެ. އަދި މީގެ ކުރިން ރާއްޖޭގެ ތާރީޚުގައި މިފަދަ ކަންކަން ހިންގާފައިވާ ސަރުކާރުތައް ވެސް ޖަވާބުދާރީ ކުރުވާފައިވާކަން އޭނާ ހަނދާންކޮށްދެއްވި އެވެ.
