އީރާނާ ދެކޮޅަށް ކުރާ ޣައިރުގާނޫނީ ހަނގުރާމައިގައި މަރުވި އެމެރިކާ ސިފައިންގެ އަދަދު 21 އަށް!

އީރާނާ ދެކޮޅަށް ކުރަމުންދާ ޣައިރުގާނޫނީ ހަނގުރާމައިގައި މަރުވި އެމެރިކާ ސިފައިންގެ އަދަދު 21 އަށް ޕެންޓަގަންއިން ހުކުރު ދުވަހުގެ ރޭ އިތުރުކޮށްފި އެވެ. ކުރިން މި ހިސާބުތަކުގައި ނުހިމެނޭ އިތުރު ދެ މަރެއް ވާކަމަށް އެ ފަރާތުން ވަނީ އިއުތިރާފުވެފަ އެވެ.

ދި ވޮޝިންގޓަން ޕޯސްޓުން ބުނީ، ހުކުރު ދުވަހާ ހަމައަށް ޑިފެންސް ކެޝުއަލްޓީ އެނޭލިސިސް ސިސްޓަމްގައި މި އޮޕަރޭޝަންތަކާ ގުޅިގެން މަރުވި 21 ސިފައިންގެ ނަން ހިމަނާފައިވާ ކަމަށެވެ. އަލަށް ހިމެނި މަރުތަކުގެ ތެރޭގައި ހިމެނެނީ މާރިޗު މަހުގެ 6 ވަނަ ދުވަހު ކުވައިތުގައި މަރުވި އުމުރުން 46 އަހަރުގެ އާމީ ނޭޝަނަލް ގާޑުގެ މެންބަރެއް ކަމަށްވާ މޭޖަރ ސޯފްލީ ޑޭވިއަސްއާއި، ސެޕްޓެންބަރު މަހު އަމިއްލައަށް މަރުވި ނަން ހާމަކޮށްފައިނުވާ ނޭވީ ސިފައިންގެ މީހެއް ކަމަށް އެ ނޫހުން ބުންޏެވެ. އާ ހިސާބުތަކުން ދައްކާ ގޮތުގައި މި އޮޕަރޭޝަންތަކުގައި އެމެރިކާގެ 865 ސިފައިންނަށް ވަނީ އަނިޔާވެފަ އެވެ.

Advertisement

މީގެ އިތުރުން، އީރާނުގެ މައްސަލައާ ގުޅުމެއް ނެތް ތަމްރީނު ހާދިސާއެއްގައި އެހެން ސިފައިންގެ މީހަކު މަރުވެފައިވާ ކަން އަސްކަރިއްޔާއިން ވަނީ ކަށަވަރުކޮށްދީފަ އެވެ. އުމުރުން 26 އަހަރުގެ ސާޖަންޓް ޑެވިން އޭ ސީބެލް މަރުވީ މެއި މަހު އިރާގުގަ އެވެ. އޭނާގެ މަރު ރެކޯޑުކޮށްފައި ވަނީ އައިސިސް ޓެރަރިސްޓް ޖަމާއަތާ ދެކޮޅަށް އަސްކަރިއްޔާއިން ދިގު މުއްދަތަކަށް ހިންގާ ކެމްޕޭން ކަމަށްވާ 'އޮޕަރޭޝަން އިންހެރެންޓް ރިޒޯލްވް' ގެ ދަށުންނެވެ.

ގާނޫނުހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްގެ އާމްޑް ސާވިސަސް ކޮމިޓީގެ އިސް ދެ ޑިމޮކްރެޓުން ވަނީ، ހުކުރު ދުވަހު ޕެންޓަގަނުން އާންމުކޮށް ހިސާބުތައް އިސްލާހުކުރުމަށް ކުރި މަސައްކަތަށް މަރުހަބާ ކިޔާފަ އެވެ. "މިވަރުގެ ބޮޑު ގޯހެއް ހެދުމަށް އެއްވެސް އުޒުރެއް ނެތް،" ކޮމިޓީގެ އެންމެ އިސް ޑިމޮކްރެޓް ކަމަށްވާ ވޮޝިންގޓަންގެ ރެޕްރެޒެންޓޭޓިވް އެޑަމް ސްމިތު އަދި ސަބްކޮމިޓީގެ އެންމެ އިސް ޑިމޮކްރެޓް ކަމަށްވާ ޕެންސިލްވޭނިޔާގެ ރެޕްރެޒެންޓޭޓިވް ކްރިސީ ހޫލަހަން ވިދާޅުވި އެވެ. އަދި, މި ހިސާބުތައް ރަނގަޅު ކުރުމަށް ކޮންގްރެސްއިން ތަދައްޚުލުވާން ޖެހުމަކީ އަސްކަރިއްޔާއަށް އޮތް "ލަދުވެތިކަމެއް" ކަމަށް އެ ދެ މެންބަރުން ވަނީ ސިފަކުރައްވާފަ އެވެ.

ވޮޝިންގޓަން ޕޯސްޓަށް ޕެންޓަގަނުން ދިން ބަޔާނެއްގައި، އިސްލާހުކުރެވުނު މަރުގެ އަދަދަށް ސީދާ ގޮތެއްގައި އަލިއަޅުވާލާފައެއް ނުވެ އެވެ. އޭގެ ބަދަލުގައި، މަރުވާ މީހުން ރިޕޯޓުކުރާ ނިޒާމަށް ގެނެވުނު ބަދަލުތައް ވަނީ ބަޔާންކޮށްފަ އެވެ. މި ގޮތުން، އަދިވެސް މުރާޖާކުރަމުންދާ ރެކޯޑުތަކަށް 'ޕެންޑިންގ އެޑްޖުޑިކޭޝަން' ކެޓަގަރީއެއް ތައާރަފުކުރުން ހިމެނެ އެވެ.

މައުލޫމާތު ސައްހަކޮށް ރިޕޯޓުކުރުމަށް ޕެންޓަގަނުން އޮތް ޔަގީންކަން ތަކުރާރުކޮށް، އެ ފަރާތުން ބުނީ "ސިފައިންގެ ހުރިހާ މަރުތަކެއްގެ ހިސާބުތައް ދެފުށް ފެންނަ އަދި ސައްހަ ގޮތެއްގައި ބެލެހެއްޓުމަށް އަބަދުވެސް ސާބިތުކަމާއެކު މަސައްކަތްކުރަމުންދާނެ" ކަމަށެވެ.