އީރާނާ ދެކޮޅަށް ކުރަމުންދާ ހަނގުރާމަ ހުއްޓާލުމަށް އެމެރިކާގެ ހައުސް އޮފް ރެޕްރެޒެންޓެޓިވްސް އިން ތިންވަނަ ފަހަރަށް ވޯޓު ދީފި
16 ސެޕްޓެމްބަރު 2026 | ބުދަ 08:48އީރާނާ ދެކޮޅަށް ކުރާ ހަނގުރާމައަށް ބޮޑު ހޭދައެއްވެ، އިންފްލޭޝަން މަތިވަމުންދާތީ އެމެރިކާގެ ހައުސް އިން ވަނީ ރައީސް ޓްރަމްޕްގެ އަސްކަރީ ބާރުތައް ހަނިކުރުމަށް ތިންވަނަ ފަހަރަށް ގަރާރެއް ފާސްކޮށްފައި. ކުރިއަށް އޮތް އިންތިޚާބާ ދިމާކޮށް މި ގަރާރަށް ރިޕަބްލިކަން ޕާޓީގެ ބައެއް މެންބަރުން ވެސް ތާއީދުކުރެއްވި ނަމަވެސް، ރައީސް މި ނިންމުން ވީޓޯ ކުރައްވާނެ ކަމަށް ބެލެވޭ
އެމެރިކާގެ ވެރިރަށް ވޮޝިންގޓަން ޑީސީގައި ހުންނަ ހައުސް ފައިނޭންޝަލް ސަރވިސަސް ކޮމިޓީގައި، އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ހާޒިރުވެ ޖަވާބުދާރީވެވަޑައިގަންނަވަމުން ދަނިކޮށް، އިހުތިޖާޖު ކުރާ މީހަކު ބޯޑެއް ހިފައިގެން. މި އަޑުއެހުން ބާއްވާފައިވަނީ 2026 ސެޕްޓެމްބަރު 15 ގައި | ގެޓީ އިމޭޖަސް
އީރާނާ ދެކޮޅަށް ކުރަމުންދާ ހަނގުރާމަ ހުއްޓާލުމަށް އެމެރިކާގެ ހައުސް އޮފް ރެޕްރެޒެންޓެޓިވްސް އިން ތިންވަނަ ފަހަރަށް ވޯޓު ދީފި އެވެ. މި ގަރާރަކީ ކޮންގްރެސްގެ ހުއްދައާ ނުލައި އަސްކަރީ ފިޔަވަޅުތައް ކުރިއަށް ގެންދިއުމަށް ރައީސް ޑޮނަލްޑް ޓްރަމްޕަށް އޮތް ބާރު ހަނިކުރުމަށް ފާސްކުރި "ވޯ ޕަވާސް ރިޒޮލިއުޝަން" އެކެވެ.
އަންގާރަ ދުވަހުގެ ރޭ ނެގި މި ވޯޓުގައި، ހަނގުރާމަ ހުއްޓާލުމަށް 220 މެންބަރުން ވޯޓު ދެއްވިއިރު، ދެކޮޅަށް ވޯޓު ދެއްވީ 204 މެންބަރުންނެވެ. މިއީ މިދިޔަ ހޫނު މޫސުމުގައި ކުރި މަސައްކަތްތަކާ އެއްގޮތް ނަތީޖާއެއް ނަމަވެސް، މިފަހަރު ހުރިހާ ޑިމޮކްރެޓުންނާއެކު ރިޕަބްލިކަން ޕާޓީގެ އިތުރު މެންބަރުންތަކެއް ވެސް ވަނީ މި ހަނގުރާމަ ނިމުމަކަށް ގެނައުމަށް ތާއީދުކުރައްވާފަ އެވެ.
ރިޕަބްލިކަން ޕާޓީގެ ހަތް މެންބަރަކު މި ގަރާރަށް ތާއީދުކުރެއްވިއިރު، އޭގެ ތެރެއިން ތިން މެންބަރަކީ މިއީ މިފަދަ ގަރާރަކަށް ތާއީދުކުރެއްވި ފުރަތަމަ ފަހަރެވެ.
އަޔޯވާގެ ރިޕަބްލިކަން ކޮންގްރެސް މެންބަރު ޒެކް ނަން އޭނާގެ ވޯޓާ ގުޅޭގޮތުން ވިދާޅުވީ، މަޝްވަރާގެ ދޮރުތައް ބަންދުވެފައިވާތީ، ދެން ކުރިއަށްދާ އަސްކަރީ އޮޕަރޭޝަންތަކަށް ކޮންގްރެސްގެ ހުއްދަ ހޯދަން ޖެހޭނެ ކަމަށެވެ.
"ނިމުމެއް ނެތް ހަނގުރާމައަކަށް އަޅުގަނޑު ތާއީދެއް ނުކުރާނަން،" ނަން ވިދާޅުވި އެވެ.
މިހާތަނަށް ފާސްކުރި އެއްވެސް ގަރާރެއް ރައީސްގެ މޭޒާ ހަމައަށް ގޮސްފައެއް ނުވެ އެވެ. އެފަދަ ގަރާރެއް ރައީސް ޓްރަމްޕާ ހަމައަށް ގޮސްފިނަމަ، އެމަނިކުފާނު އެ ވީޓޯ ކުރައްވާނެކަން ވަނީ ގާތްގަނޑަކަށް ކަށަވަރުވެފަ އެވެ.
މިޑްޓާމް އިންތިޚާބު
މިއީ ކުރިއަށް އޮތް މިޑްޓާމް އިންތިޚާބުގެ ކުރިން އީރާނު ހަނގުރާމައާ ގުޅޭގޮތުން ހައުސްގައި ނެގޭނެ ފަހު ވޯޓަށް ވުން އެކަށީގެންވެ އެވެ. މި އިންތިޚާބުގެ ކެމްޕޭންތަކުގައި ބޭރު ގައުމެއްގައި ކުރަމުންދާ މި ހަނގުރާމަ ބޮޑު ދައުރެއް އަދާކުރެ އެވެ. ފެބްރުއަރީ 28 ގައި ޓްރަމްޕް ފެއްޓެވި މި ހަނގުރާމަ ދިގުލައިގެން ގޮސްފައިވާއިރު، މިދިޔަ ހަތް މަސް ދުވަހު ދެފަރާތުގެ މެދުގައި ބަދަލުކުރެވުނު ނުރައްކާތެރި މިސައިލް ހަމަލާތަކުގެ ސަބަބުން އެ ސަރަހައްދަށް ވަނީ ބޮޑެތި ގެއްލުންތަކެއް ލިބިފަ އެވެ.
ކޮންގްރެސްގެ ކޮންޓްރޯލް ހޯދުމަށް ޑިމޮކްރެޓުން މަސައްކަތް ކުރަމުންދާއިރު، އިންތިޚާބަށް 50 ދުވަހަށްވުރެ ކުޑަތަންވެފައިވާތީ، މެންބަރުން މި ހަފުތާ ނިމުމުން ކެމްޕޭނަށް އެނބުރި ވަޑައިގަންނަވާނެ އެވެ.
އީރާނުގައި އެމެރިކާއިން ކުރާ ހަނގުރާމަ
އީރާނުގައި އެމެރިކާއިން ކުރަމުންދާ ހަނގުރާމައިގެ ސަބަބުން ތަކެތީގެ އަގު އުފުލި، ގައުމުގެ ހަތިޔާރުގެ ރަސްމީ ރިޒާވަށް ބާރުބޮޑުވަމުންދާކަން މިނިވަން އިދާރާއެއް ކަމަށްވާ ކޮންގްރެޝަނަލް ބަޖެޓް އޮފީސް (ސީ.ބީ.އޯ) ގެ ރިޕޯޓަކުން ވަނީ ހާމަވެފަ އެވެ.
އަންގާރަ ދުވަހު އާންމުކުރި މި ރިޕޯޓުގައިވާ ގޮތުން، ހަ މަސް ދުވަހުގެ މި ހަނގުރާމައަށް މިހާތަނަށް 38 ބިލިއަން ޑޮލަރު ހޭދަވެފައިވާއިރު، ކޮންމެ މަހަކު އިތުރު 3 ބިލިއަން ޑޮލަރު ހޭދަވާނެ ކަމަށް ބެލެވެ އެވެ. އަދި މި ހަނގުރާމައިގެ ސަބަބުން 2027 ވަނަ އަހަރުގެ ފުރަތަމަ ތިން މަސްދުވަހު އިންފްލޭޝަން 0.5 އިންސައްތަ އިތުރުވާނެ ކަމަށް ވަނީ ލަފާކޮށްފަ އެވެ.
ވައިޓް ހައުސްގެ ދެވަނަ ދައުރަކަށް އިންތިޚާބުވެވަޑައިގަތުމަށްފަހު، ބޭރުގެ ހަނގުރާމަތަކުގައި އެމެރިކާ ބައިވެރިނުކުރައްވާނެ ކަމަށް ޓްރަމްޕް ވައުދުވެވަޑައިގެންނެވި ނަމަވެސް، އީރާނާ ދެކޮޅަށް އެމަނިކުފާނު އަޅުއްވަމުންދާ ފިޔަވަޅުތަކުގެ ސަބަބުން، ހައުސް އާއި ސެނެޓުގެ ކޮންޓްރޯލް އޮތް ރިޕަބްލިކަން ޕާޓީއަށް ވަނީ ސިޔާސީ ގޮތުން ބޮޑެތި ގޮންޖެހުންތަކެއް ކުރިމަތިވެފަ އެވެ.
ޖުލައި މަހު ނެގި އޭޕީ-ނޯކް (AP-NORC) ޕޯލަކުން ދައްކާގޮތުގައި، ގިނަ އެމެރިކާ ރައްޔިތުން ގަބޫލުކުރަނީ އީރާނު ހަނގުރާމައަކީ ކުރަން ފައިދާހުރި ހަނގުރާމައެއް ނޫން ކަމަށެވެ.
މީގެ ކުރިން ފާސްކުރި ގަރާރުތައް
އީރާނު ހަނގުރާމައިގެ މިސްރާބު ބަދަލުކުރުމަށް ކޮންގްރެސްއިން ތަކުރާރުކޮށް މަސައްކަތް ކުރި ނަމަވެސް، ރައީސް ޓްރަމްޕް އެ ފިޔަވަޅުތަކަށް ހުރަސްއަޅުއްވައި ވީޓޯ ކުރައްވާހާ ހިނދަކު، ސަރުކާރުގެ އަސްކަރީ ބާރުތައް ހަނިކުރުމަކީ އުނދަގޫ ކަމެކެވެ.
އީރާނުގައި އެމެރިކާގެ އަސްކަރީ ހަރަކާތްތައް ހުއްޓުވުމަށް ހައުސް އިން ފުރަތަމަ ގަރާރެއް ފާސްކުރީ ޖޫން މަހުގަ އެވެ. އޭގެ ފަހުން ޖުލައި މަހު ވެސް އިތުރު ގަރާރެއް ފާސްކުރި އެވެ. ސެނެޓުން ވެސް 10 ވަނަ ފަހަރަށް ކުރި މަސައްކަތުން މި ހަނގުރާމަ ހުއްޓާލުމުގެ ގަރާރެއް ފާސްކުރި އެވެ. ނަމަވެސް، ބައްދަލުވުމެއްގައި ޓްރަމްޕް ރިޕަބްލިކަން ސެނެޓަރުންނަށް ވަރަށް ބޮޑަށް ފާޑުވިދާޅުވުމާ ގުޅިގެން، ޖެހިގެން އައި ދުވަހު އެ ބޭފުޅުން ވަނީ އެ ނިންމުން ބަދަލުކުރައްވާފަ އެވެ.
އެމެރިކާގެ ގާނޫނުއަސާސީން ހަނގުރާމަ އިއުލާންކުރުމުގެ ބާރު ކޮންގްރެސްއަށް ދީފައިވީ ނަމަވެސް، ކޮމާންޑަރ-އިން-ޗީފްގެ ހައިސިއްޔަތުން ބައެއް އަސްކަރީ ފިޔަވަޅުތައް އެޅުމުގެ ބާރު ރައީސަށް ލިބިވަޑައިގަންނަވަ އެވެ. ވިއެޓްނާމް ހަނގުރާމައަށްފަހު އުފެއްދި "ވޯ ޕަވާސް އެކްޓް" ގެ މަގްސަދަކީ ރައީސަށް ލިބިދޭ މި ބާރު ވަކި މުއްދަތަކަށް ހަނިކުރުމެވެ. އެ ގާނޫނު ބުނާގޮތުން 60 ނުވަތަ 90 ދުވަހަށްވުރެ އިތުރަށް އަސްކަރީ ހަރަކާތްތައް ކުރިއަށް ގެންދާނަމަ ކޮންގްރެސްގެ ހުއްދަ ހޯދަން ޖެހޭނެ އެވެ.
