އައިސިސްއާ ދެކޮޅަށް ހަނގުރާމަކުރަން އިރާގަށް ފޮނުވި އެމެރިކާ ސިފައިން ބާލައިފި
30 ސެޕްޓެމްބަރު 2026 | ބުދަ 08:52އައިސިސްއާ ދެކޮޅަށް އެމެރިކާ އިސްވެ އުފެއްދި ބައިނަލްއަގްވާމީ ލަޝްކަރުގެ މިޝަން ނިންމާލައި، އިރާގުގައި ތިބި އެމެރިކާ ސިފައިން އެ ގައުމުގެ ހުރިހާ މަރުކަޒުތަކަކުން ފައިބައިފި. މި ބަދަލާއެކު ދެ ގައުމުގެ ގުޅުން އަސްކަރީ ބައިވެރިވުމަކުން ދޭދޭ ގައުމުތަކުގެ ސަލާމަތީ އަދި ޖާސޫސީ ގުޅުމަކަށް ބަދަލުވާނެ ކަމަށް އިރާގު ސަރުކާރުން ވަނީ ހާމަކޮށްފައި
އިރާގުގައި ތިބި އެމެރިކާގެ އިސްތިއުމާރީ ސިފައިން އެ ގައުމުން ފޭބުމުގެ އެންމެ ފަހުގެ ތައްޔާރީތައް ކުރަނީ | އަނަދޮލު އޭޖެންސީ
ނިރުބަވެރި ޖަމާއަތެއް ކަމަށްވާ އައިސިސްއާ ދެކޮޅަށް ހަނގުރާމަ ކުރުމަށް އެމެރިކާއިން އިސްވެ އެކުލަވާލި ލަޝްކަރުގެ މިޝަން ނިންމާލައި، އިރާގަށް ފޮނުވާފައި ތިބި އެމެރިކާ ސިފައިން އެ ގައުމުން ބާލައިފި އެވެ. މި ކަން ރަސްމީކޮށް ހާމަކުރަމުން އިރާގު ސަރުކާރުން ބުނީ، އެމެރިކާއިން އިސްވެ އޮންނަ ބައިނަލްއަގްވާމީ ލަޝްކަރުގެ މިޝަން ނިމުމަކަށް ގެނެސްފައިވާ ކަމަށާއި، މިއާއެކު ބޭރު ގައުމުތަކާއެކު ދޭދޭ ގުޅުންތައް ބަދަހިކުރުމުގެ މަސައްކަތް ފެށިގެންދާނެ ކަމަށެވެ. އިރާގުގެ ބޮޑުވަޒީރު ޢަލީ އަލް-ޒައިދީގެ އިސް ސަލާމަތީ މުޝީރު ޤާސިމް އަލް-އަޢުރަޖީ ވަނީ މި ކަން ކަށަވަރު ކޮށްދެއްވާފަ އެވެ.
އިރާގުގެ ރަސްމީ ނޫސް އޭޖެންސީއަށް ދެއްވި ބަސްދީގަތުމެއްގައި އަލް-އަޢުރަޖީ ވަނީ މިއީ ވަރަށް މުހިންމު "ކާމިޔާބީއެއްގެ" ގޮތުގައި ސިފަކުރައްވާފަ އެވެ. އަދި، މި ބަދަލު އައިސްފައި ވަނީ 2021 ވަނަ އަހަރުގެ ޖުލައި މަހު ފެށުނު މަޝްވަރާތަކާއި އެއްބަސްވުންތަކަށް ފަހު ކަމަށް ވެސް އޭނާ ވިދާޅުވި އެވެ. މީގެއިތުރުން، މި މަހުގެ ނިޔަލަށް އިރާގުގައި ބާކީ ތިބި އެމެރިކާގެ ސިފައިން އެ ޤައުމުގައި އެ މީހުން ތިބި ހުރިހާ މަރުކަޒުތަކަކުން ފައިބާ ނިންމާފައިވާ ކަން ވެސް އޭނާ ހާމަކުރެއްވި އެވެ.
މިއާއެކު ފެށިގެންދިޔަ އާ މަރުހަލާ އަމާޒުކުރެވިފައި ވަނީ އިރާގުގެ އިސްތިގުލާލާއި ސިޔާދަތު ވަރުގަދަކުރުމަށް ޓަކައި "އެ ޤައުމުތަކާއެކު ބާއްވާ ދޭދޭ ގުޅުން" ދެމެހެއްޓުމަށް ކަމަށް އަލް-އަޢުރަޖީ ވިދާޅުވި އެވެ. އައިސިސް ޓެރަރިސްޓް ޖަމާއަތުގެ މައްޗަށް ކާމިޔާބީ ހޯދުމުގެ ޝަރަފު ލިބޭނީ "އިރާގުގެ ރައްޔިތުންގެ ގުރުބާނީތަކާއި، އަޅުގަނޑުމެންގެ ހަތިޔާރުއެޅި ސިފައިންގެ އެކި ގޮފިތަކާއި ފައުޖުތަކުގެ ހިތްވަރުގަދަކަމަށް" ކަމަށް އޭނާ ވިދާޅުވި އެވެ. އަދި، ބައިނަލްއަގްވާމީ ލަޝްކަރާއި އަޚުވަންތަ އަދި އެކުވެރި ގައުމުތަކުން ލިބުނު އެއްބާރުލުމަށް ވެސް އޭނާ ޝުކުރު އަދާކުރެއްވި އެވެ.
ލަޝްކަރުގެ މިޝަން ނިމުމަކަށް އައުމަކީ "ބައިވެރިވުން ނިމުމަކަށް އައުން ނޫން" ކަމަށާއި، މިއީ މެންބަރު ގައުމުތަކާއެކު އޮންނަ ދޭދޭ ގުޅުމަކަށް ބަދަލުވުން ކަމަށް އަލް-އަޢުރަޖީ ވިދާޅުވި އެވެ. ސަލާމަތީ އަދި ޖާސޫސީ އެއްބާރުލުމާއި، މައުލޫމާތާއި ތަޖުރިބާ ބަދަލުކުރުމުގެ އިތުރުން ގާބިލުކަން އިތުރުކުރުމުގެ މަސައްކަތްތައް ކުރިއަށްދާނީ "ދެ ފަރާތުގެ އިޙްތިރާމާއި ހިއްސާވާ މަސްލަހަތުތަކުގެ މައްޗަށް" ބިނާކޮށް ކަމަށް ވެސް އޭނާ ވިދާޅުވި އެވެ.
އިރާގުގައި ކުރިއަށްދާ ކޯލިޝަންގެ އަސްކަރީ މިޝަން 2026 ވަނަ އަހަރުގެ ސެޕްޓެމްބަރު މަހުގެ ނިޔަލަށް ދެމިގެންދާ ތާވަލެއްގެ ދަށުން ނިންމުމަށާއި، އިރާގާއި މެންބަރު ޤައުމުތަކާ ދެމެދު ދެ ފަރާތުގެ ސަލާމަތީ ގުޅުންތަކަކަށް ބަދަލުވުމަށް ބަޣުދާދާއި ވޮޝިންގޓަން އެއްބަސްވެފައި ވަނީ 2024 ވަނަ އަހަރުގެ ސެޕްޓެންބަރު މަހު އެވެ. އިރާގާއި ސޫރިޔާގެ ބޮޑެތި ސަރަހައްދުތަކެއް އައިސިސްއިން ހިފުމާ ގުޅިގެން، އެމެރިކާގެ އިސްނެގުމުގެ ދަށުން މި ލަޝްކަރު އުފެއްދީ 2014 ވަނަ އަހަރު އެވެ. އެ ޖަމާއަތާ ދެކޮޅަށް ހިންގި އޮޕަރޭޝަންތަކުގައި މި ލަޝްކަރުން ވަނީ އިރާގުގެ ސިފައިންނަށް ވައިގެ މަގުންނާއި، ޖާސޫސީ ގޮތުން އަދި ތަމްރީނުގެ ގޮތުން އެހީތެރިކަން ފޯރުކޮށްދީފަ އެވެ. އައިސިސްއިން ހިފާފައިވާ ސަރަހައްދުތަކުގެ ފުރިހަމަ ކޮންޓްރޯލް އަލުން ހޯދާފައިވާ ކަން އިރާގުން އިއުލާނުކުރީ 2017 ވަނަ އަހަރުގެ ޑިސެންބަރު މަހު އެވެ.
މަސްދަރު: އަނަދޮލު އޭޖެންސީ
