"ބޭރުގެ ނުރައްކާތަކުން" އެމެރިކާގެ މިޑްޓާމް އިންތިޚާބު ހިމާޔަތްކުރަން ހެގްސެތު އަމުރުކުރައްވައިފި
29 ސެޕްޓެމްބަރު 2026 | އަންގާރަ 02:10އެމެރިކާގެ އިންތިޚާބީ ނިޒާމަށް ބޭރުގެ ގައުމުތަކުން ނުފޫޒު ފޯރުވުން ހުއްޓުވުމަށް ޓަކައި، އެ ގައުމުގެ ސައިބާ އަދި ޖާސޫސީ ވަސީލަތްތައް ބޭނުންކުރުމަށް ދިފާއީ ވަޒީރު ޕީޓް ހެގްސެތު ޕެންޓަގަނަށް އަމުރުކުރައްވައިފި. މި ފިޔަވަޅަކީ އިންތިޚާބުގެ ނަޒާހަތްތެރިކަން ދަމަހައްޓައި، ޑިމޮކްރެޓިކް ހަރަކާތްތަކަށް ކުރިމަތިވާ ސައިބާ ނުރައްކާތަކުން ދިފާއުވުމަށް އެޅި މުހިންމު ފިޔަވަޅެއް ކަމަށް ޕެންޓެގަނުން ބުނޭ
ޕެންޓެގަންގައި ބޭއްވި ނޫސްވެރިންގެ ބައްދަލުވުމެއްގައި އެމެރިކާގެ ދިފާއީ ވަޒީރު ޕީޓް ހެގްސެތު ވާހަކަފުޅު ދައްކަވަނީ | އަނަދޮލު އޭޖެންސީ
ކުރިއަށް އޮތް މިޑްޓާމް އިންތިޚާބުގެ ކުރިން، "ބޭރުގެ ނުރައްކާތަކުން" އެމެރިކާގެ އިންތިޚާބީ އޮނިގަނޑު ހިމާޔަތްކުރުމަށް ޓަކައި ޑިޕާޓްމަންޓް އޮފް ޑިފެންސްގެ ސައިބާ އަދި ޖާސޫސީ ގާބިލުކަން ރުކުރުވާލުމަށް އަންގަވައި، އެމެރިކާގެ ދިފާއީ ވަޒީރު ޕީޓް ހެގްސެތު އެ ގައުމުގެ ދިފާއީ އިދާރާ، ޕެންޓަގަނަށް އަމުރު ކުރައްވައިފި އެވެ.
ހެގްސެތުގެ މި އެންގެވުމުގައި، އެމެރިކާގެ ޑިމޮކްރެޓިކް ހަރަކާތްތަކަށް ބޭރުގެ ނުފޫޒު ފޯރުވުމަށް ކުރާ މަސައްކަތްތައް ދެނެގަނެ، އެ ކަންކަން ހުއްޓުވައި އަދި އެ ކަންކަމާ ދެކޮޅަށް ފިޔަވަޅު އެޅުމަށް އަމާޒުކޮށް ޖާސޫސީ އަދި ސައިބާ ވަސީލަތްތައް ބޭނުންކުރުމަށް އެމެރިކާގެ އަސްކަރިއްޔާގެ ސައިބާ ކޮމާންޑަށާއި އެ އިދާރާގެ ކޮމްބެޓް ސަޕޯޓް އޭޖެންސީތަކަށް ވަނީ އަންގަވާފަ އެވެ.
"މިނިވަން އަދި އިންސާފުވެރި އިންތިޚާބުތަކަކީ އަޅުގަނޑުމެންގެ ޖުމްހޫރިއްޔާގެ ބިންގާ،" ޕެންޓެގަނުން ނެރުނު ބަޔާނެއްގައި އެ އިދާރާގެ ތަރުޖަމާނު ޝޯން ޕާނެލް ވިދާޅުވި އެވެ.
"ފެޑެރަލް، ސްޓޭޓް އަދި ލޯކަލް ބައިވެރިންނާއެކު އެއް އަމާޒެއްގައި މަސައްކަތްކޮށްގެން، ޔޫއެސް ސައިބާ ކޮމާންޑާއި އަޅުގަނޑުމެންގެ ޑިފެންސް އިންޓެލިޖެންސް ޓީމުތަކުން އެމެރިކާގެ ވޯޓުލާ ނިޒާމުތަކުގެ ނަޒާހަތްތެރިކަން ދިފާއުކޮށް، ބޭރުގެ ނުބައި ނުފޫޒުތައް ފަޅާއަރުވާލާނެ. އަދި، އެމެރިކާގެ ރައްޔިތުންގެ އަސާސީ މިނިވަންކަން ހިމާޔަތްކުރާ ހިނދު، ބޭރުގެ ނުފޫޒުތަކުން އަޅުގަނޑުމެންގެ ޑިމޮކްރެޓިކް ހަރަކާތްތައް ރައްކާތެރިކަންމަތީ ދެމިއޮތުން ކަށަވަރުކުރާނެ،" ޕާނެލް ވިދާޅުވި އެވެ.
މިއާއެކު، އެމެރިކާއަށް އަމާޒުވާ ސައިބާ ނުރައްކާތައް ދެނެގަނެ، އެ ކަންކަމުން ދިފާއުވުމަށް އެ ދެ އިދާރާ ގުޅިގެން މަސައްކަތްކުރަމުން އަންނަ ކަމަށް، ޔޫއެސް ސައިބާ ކޮމާންޑުގެ ކޮމާންޑަރު އަދި ނޭޝަނަލް ސެކިއުރިޓީ އެޖެންސީގެ ޑިރެކްޓަރު ޖެނެރަލް ޖޯޝުއާ އެމް. ރަޑް ވިދާޅުވި އެވެ.
މަސްދަރު: އަނަދޮލު އޭޖެންސީ
