އެމެރިކާގެ އަސްކަރީ މަތިންދާބޯޓު އުފުލާ ތިންވަނަ މަނަވަރެއް މެދުއިރުމައްޗަށް ފޮނުވަނީ

އީރާނާ ދެކޮޅަށް އެމެރިކާއިން ފަށާފައިވާ ޣައިރުގާނޫނީ ހަނގުރާމަައިގައި ބައިވެރިކުރުމަށް މެދުއިރުމައްޗަށް އަސްކަރީ މަތިންދާބޯޓު އުފުލާ ތިންވަނަ މަނަަވަރަކާއި މެރިން ކޯގެ އިތުރު ސިފައިން ފޮނުވަން ޕެންޓަގަނުން ތައްޔާރުވަމުންދާ ކަމަށް ރިޕޯޓުކޮށްފި އެވެ. މި ކަން ފުރަތަމަ ރިޕޯޓުކޮށްފައި ވަނީ އެމެރިކާގެ ނޫހެއް ކަމަށްވާ ދި ވޯލް ސްޓްރީޓް ޖާނަލްއިންނެވެ.

އީރާން ހަނގުރާމައިގައި ބައިވެރިކުރުމަށް އެމެރިކާއިން އިތުރު 9,000 އާއި 10,000 އާ ދެމެދުގެ އަދަދަކަށް ސިފައިން ފުރުވާފައިވާ ކަމަށް ރިޕޯޓުތައް ބުނެ އެވެ. އިތުރު ސިފައިންނާއި މަނަވަރުތައް މެދުއިރުމައްޗަށް ފޮނުވަން ޕެންޓަގަނުން ނިންމާފައި މި ވަނީ، ނޮވެންބަރު މަހު ބާއްވާ މިޑްޓާމް އިންތިޚާބަށް ފަހު ހަނގުރާމަ އިތުރަށް ފުޅާކުރަން ވިސްނަވަމުންދާ ކަން އެމެރިކާގެ ރައީސް ޑޮނަލްޑް ޓްރަމްޕް ހާމަކުރައްވާފައިވާ ދަނޑިވަޅެއްގަ އެވެ.

Advertisement

އެމެރިކާ ސަރުކާރުގެ އިސް އޮފިޝަލުންނާ ހަވާލާދީ ޖާނަލުން ބުނީ، މި މަނަވަރުތަކާއި، އަސްކަރީ މަތިންދާބޯޓުތަކާއި، މެރިން ކޯއާއި ނޭވީގެ (ކަނޑުގެ ސިފައިން) ސިފައިން ނޮވެންބަރު މަހުގެ ނިޔަލަށް މެދުއިރުމައްޗަށް ޖަމާވާނެ ކަމަށް ލަފާކުރެވޭ ކަމަށެވެ. މީގެ އެއް ހެއްކަކީ، މަތިންދާބޯޓު އުފުލާ މަނަވަރު، ޔޫއެސްއެސް ތިއޮޑޯ ރޫޒެވެލްޓް އާދީއްތަ ދުވަހު ސެން ޑިއޭގޯގެ ބަނދަރުން ފުރާފައިވުމެވެ. އަދި، 13 ވަނަ މެރިން އެކްސްޕެޑިޝަނަރީ ޔުނިޓުގެ ސިފައިންނާއެކު ޔޫއެސްއެސް މާކިން އައިލެންޑް އެމްފިބިއަސް ރެޑީ ގްރޫޕް ވެސް ހޯމަ ދުވަހު ވަނީ މެދުއިރުމައްޗަށް ފުރާފަ އެވެ.

އެމެރިކާގެ އަސްކަރިއްޔާގެ ވަރުގަދަ ފައުޖަކާއި ގިނަ އަދަދެއްގެ މަނަވަރުތައް މިހާރު ވެސް ދަނީ އީރާން ކައިރީގައި ހަރަކާތްތެރިވަމުންނެވެ. މީގެ ތެރޭގައި، އަސްކަރީ މަތިންދާބޯޓު އުފުލާ މަނަވަރުތައް ކަމަށްވާ ޔޫއެސްއެސް ޖޯޖް އެޗްޑަބްލިޔު ބުޝް އަދި ޔޫއެސްއެސް ޖޯޖް ވޮޝިންގޓަނާއި، އެ ދެ މަނަވަރުގެ ސްޓްރައިކް ގުރޫޕުތައް ހިމެނެ އެވެ. އެ ސަރަހައްދަށް ޔޫއެސްއެސް ރޫޒެވެލްޓް ދިޔުމުން، އެ ސަރަހައްދުގައި އޮތް އެމެރިކާގެ އަސްކަރީ މަތިންދާބޯޓު އުފުލާ މަނަވަރުތަކުގެ އަދަދު ތިނަކަށް އުފުލޭނެ އެވެ. މިއީ، އެޕްރީލު މަހަށް ފަހު، މެދުއިރުމަތީގައި އެމެރިކާގެ އަސްކަރީ މަތިންދާބޯޓު އުފުލާ ތިން މަަނަވަރު އެއް ފަހަރާ ހަރަކާތްތެރިވާ ފުރަތަމަ ފަހަރުކަމަށް ވެސް ވާނެ އެވެ.

މިހާރު ވެސް މެދުއިރުމަތީގެ ހަނގުރާމައިގައި އެމެރިކާ ސިފައިންގެ 50,000 މީހުން ދަނީ ހަރަކާތްތެރިވަމުންނެވެ. ނަމަވެސް، ޔޫއެސްއެސް ޖޯޖް ވޮޝިންގޓަން އެނބުރި ޖަޕާނުގެ ބަނދަރަކަށް ދަތުރުކުރުމުގެ ފުރުސަތު އޮތް ކަމަށް މަސްދަރުތަކުން ބުނެ އެވެ.

އީރާނާއެކު ދެމެދު ނުތަނަވަސްކަން އިތުރުވަމުން

އެމެރިކާއިން މެދުއިރުމައްޗަށް އިތުރު ފައުޖުތައް ފޮނުވަން ނިންމާފައި ވަނީ، އީރާނުން އެންމެ ފަހުން ހުށަހެޅި ހަތް ދުވަހުގެ ހަމަލާބަދަލުކުރުން ހުއްޓާލުމުގެ އެއްބަސްވުމާ ރައީސް ޓްރަމްޕް ދެކޮޅު ހައްދަވާފައިވާ ދަނޑިވަޅެއްގަ އެވެ. ބުރާސްފަތި ދުވަހު ޓައިމްސް މެގަޒިންގައި ޝާއިއުކުރި އިންޓަވިއުއެއްގައި ޓްރަމްޕް ވިދާޅުވީ، އެއްބަސްވުމަކާ ހަމައަށް ނާދެވިއްޖެނަމަ، މިޑްޓާމް އިންތިޚާބަށްފަހު އީރާނަށް ދެމުންދާ ހަމަލާތައް އަލުން ފެށިދާނެ ކަމަށެވެ.

ތެހްރާންގެ ހުށަހެޅުމުގައި ގޮވާލާފައިވަނީ ދުނިޔޭގެ ތެލުގެ ސަޕްލައިގެ ފަސްބައިކުޅަ އެއްބައި އާންމުކޮށް އުފުލާ ހުރްމުޒް ކަނޑުއޮޅި އަލުން ހުޅުވާލުމަށާއި، އީރާނުގެ ބަނދަރުތަކަށް އެމެރިކާއިން ކޮށްފައިވާ ހިސާރު އުވާލުމުގެ ބަދަލެއްގެ ގޮތުން އީރާނުގެ ނިއުކްލިއާ ޕްރޮގްރާމާމެދު އަލުން މަޝްވަރާތައް ފެށުމަށެވެ.

މި ދަނޑިވަޅުގައި، އެމެރިކާގެ ދިފާއީ ވަޒީރު ޕީޓް ހެގްސެތު ވަނީ ވައިގެ ދިފާއީ ޔުނިޓުތަކާއި އާމީގެ 82 ވަނަ އެއާބޯން ޑިވިޝަންގެ އޮޕަރޭޝަންގެ މުއްދަތު އިތުރުކުރައްވާފަ އެވެ. ދަތިކުރުމުގެ ފިޔަވަޅުތައް ތަންފީޒުކުރުމަށާއި، ކަނޑުއޮޅި ހުރަސްކޮށް ވިޔަފާރި ބޯޓުފަހަރަށް ރައްކާތެރިކަން ފޯރުކޮށްދިނުމަށް އެމެރިކާގެ އަސްކަރިއްޔާގެ ގާތްގަނޑަކަށް 20 މަނަވަރު މިހާރު ވެސް އެ ސަރަހައްދުގައި ދަނީ ހަރަކާތްތެރިވަމުންނެވެ.

މި ލަޝްކަރު ޖަމާކުރަމުން މި ދަނީ، އެމެރިކާގެ މަނަވަރުތަކަށް ސަޕްލައިގެ ދަތިކަމާއި، ރެކޯޑު މިންވަރަކަށް ސިފައިން ފޮނުވަންޖެހުމުގެ ގޮންޖެހުންތަކާ ކުރިމަތިލާންޖެހިފައިވާ ދަނޑިވަޅެއްގަ އެވެ. ފަހަކަށް އައިސް އީރާނުން ވަނީ އެމެރިކާގެ މަނަވަރުތަކަށް ބެލިސްޓިކް މިސައިލް ހަމަލާތަކެއް ދީފައި އެވެ. ހަމަމިއާއެކު، އެމެރިކާގެ އަސްކަރިއްޔާއިން ވަނީ ޔޫއެސްއެސް ތިއޮޑޯ ރޫޒެވެލްޓްގެ ފަޅުވެރިން ދިގު މުއްދަތަކަށް އެ ސަރަހައްދުގައި ހަރަކާތްތެރިވާން ޖެހިދާނެ ކަމަށް އަންގާ، އެ ކަމުގެ ތަމްރީނުތައް ދީފަ އެވެ.