އީރާނުގެ އެއާލައިންތަކަށް އެމެރިކާއިން އެޅި ފިޔަވަޅުތަކުން އިސްތިސްނާ ހޯދަން އިރާގުން މަސައްކަތް ކުރަނީ
27 ސެޕްޓެމްބަރު 2026 | އާދީއްތަ 05:05އީރާނުގެ އެއާލައިންތަކާ ދެކޮޅަށް އެމެރިކާއިން އެޅި ފިޔަވަޅުތަކުގެ ސަބަބުން އިރާގުގެ ހަތަރު އެއާޕޯޓަކުން ދަތުރުތައް މެދުކަނޑާލުމާ ގުޅިގެން، އިންސާނީ ސަބަބުތަކަށް ޓަކައި އެ ގައުމަށް އިސްތިސްނާއެއް ދިނުމަށް ބަޣުދާދުން ވޮޝިންގޓަނާއެކު މަޝްވަރާ ފަށައިފި. މި ނިންމުމާ ދެކޮޅަށް އިރާގުގައި މުޒާހަރާކުރަމުންދާއިރު، ދަތުރުތައް އަލުން ފެށުމަށް ޓަކައި އިރާގު ސަރުކާރުން ދަނީ އީރާނުގެ ކަމާބެހޭ އިދާރާތަކާ އެކުވެސް ވާހަކަދައްކަމުން
އީރާނުގެ އެއާލައިންތަކާ ދެކޮޅަށް ފިޔަވަޅު އެޅުމަށް އެމެރިކާއިން ނިންމި ނިންމުމާ ދެކޮޅަށް އަޑުއުފުލުމަށް އިރާގުގެ ވެރިރަށް ބަޣުދާދުގައި ބޭއްވި މުޒާހަރާއެއްގެ ބައިވެރިން | އަނަދޮލު އޭޖެންސީ
އީރާނުގެ އެއާލައިންތަކުގެ ދަތުރުތަކަށް އަމާޒުކޮށް އެމެރިކާއިން އަޅަމުންދާ ދަތިކުރުމުގެ ފިޔަވަޅުތަކުން އިރާގުގެ ބައެއް ވައިގެ ބަނދަރުތައް އިސްތިސްނާ ކުރުމަށް ޓަކައި، ވޮޝިންގޓަނާ މަޝްވަރާކުރަމުންދާ ކަން އިރާގުން ހާމަކޮށްފި އެވެ.
އީރާނުގެ އެއާލައިންތަކާއެކު ވިޔަފާރިކުރާ ބައިނަލްއަގްވާމީ ހުރިހާ ކުންފުންޏަކާ ދެކޮޅަށް ވައިގެ ދަތުރުފަތުރާ ގުޅޭ އާ ދަތިކުރުމުގެ ފިޔަވަޅުތަކެއް ވޮޝިންގޓަނުން އިޢުލާނު ކުރިތާ މަދު ދުވަސްކޮޅެއްގެ ތެރޭގައި، އިރާގުގެ ހަތަރު ވައިގެ ބަނދަރަކުން ވަނީ އީރާނާ ދެމެދު ކުރާ ހުރިހާ ދަތުރުތަކެއް މެދުކަނޑާލާފަ އެވެ.
ބަޣުދާދަށް އެމެރިކާއިން އިސްތިސްނާއެއް ދީފި ނަމަ، "ބޭސްފަރުވާއާއި، ތަޢުލީމާއި، ދީނީ ކަންކަމަށް ކުރާ ދަތުރުތަކާއި، އާންމު ރައްޔިތުންގެ މަސްލަހަތާ ގުޅިފައިވާ އިންސާނީ ސަބަބުތަކަށް ޓަކައި" އަލުން ދަތުރުތައް ފެށުމުގެ ފުރުސަތު ލިބިގެންދާނެ ކަމަށް އިރާގުގެ ބޮޑުވަޒީރުގެ އޮފީހުން ހޮނިހިރު ދުވަހު ވަނީ ހާމަކޮށްފައި އެވެ.
ބޮޑުވަޒީރު ޢަލީ އަލް-ޒަޢިދީގެ މީޑިއާ އޮފީހުން ނެރުނު ބަޔާނުގައި ބުނީ، ސަރަހައްދީ ނުތަނަވަސްކަން ކުޑަކުރުމަށް ބަޣުދާދުން އަބަދުވެސް މަސައްކަތް ކުރަމުން އަންނަ ކަމަށެވެ. "މައްސަލަތައް ދިގުލައިގެން ދިޔުމަކީ ހާލަތު އިތުރަށް ގޯސްވާނެ ކަމެއް" އެ ބަޔާނުގައި ބުނެފައިވެ އެވެ. އަދި، ސަރަހައްދުގެ ގައުމުތަކާއި ރައްޔިތުންގެ މަސްލަހަތަށް ޓަކައި މިހާރު ހިނގަމުންދާ ކާރިސާއާއި ހަމަނުޖެހުންތައް ނިމުމަކަށް ގެނައުމަށް ވާހަކަދެއްކުމާއި މަޝްވަރާގެ މަގު ޚިޔާރުކުރުމަށް ހުރިހާ ފަރާތްތަކަކަށް ވެސް އެ ބަޔާނުގައި ވަނީ ގޮވާލާފަ އެވެ.
ބަޣުދާދާއި، ނަޖަފް، އަރްބީލް އަދި ސުލައިމާނިއްޔާގެ އެއާޕޯޓުތަކުގައި އީރާނުގެ ފްލައިޓްތައް ހުއްޓުމަކަށް އައުމާ ގުޅިގެން، ދަތުރުވެރިންނަށް މިހާރު ވަނީ މަދުވެގެން 12 ގަޑިއިރުގެ ދިގު އެއްގަމު ދަތުރުތައް ކުރަން މަޖުބޫރުވެފަ އެވެ.
އެމެރިކާއާއި އީރާނުގެ ދެމެދުގައި އިރާގު "ފިތިފައި"
ދަތުރުތައް މެދުކަނޑާލުމާ ދެކޮޅަށް އަޑުއުފުލުމަށް ޓަކައި، ހޮނިހިރު ދުވަހު އެތަކެއް ސަތޭކަ ބަޔަކު ވަނީ ބަޣުދާދުގެ މަގުތަކަށް އެއްވެ މުޒާހަރާކޮށްފަ އެވެ. މި މުޒާހަރާއަކީ އިރާގުގައި ހަރަކާތްތެރިވާ، އީރާނާ ގުޅުން އޮންނަ ހަނގުރާމަވެރި ޖަމާއަތްތަކުން އިންތިޒާމުކުރި އެއްވުމެކެވެ.
އިރާގުގެ ނަޖަފު ބައިނަލްއަގުވާމީ ވައިގެ ބަނދަރުން ފަސިންޖަރެއް ނިކުންނަނީ | ރޮއިޓާސް
ދެ ގައުމުގެ ދެމެދުގައި ފްލައިޓްތައް މެދުކަނޑާލުމަކީ ވަގުތީ ކަމެއް ކަމަށާއި، އޭގެ ސަބަބުން ދެމެހެއްޓެނިވި ގުޅުމަށް އެއްވެސް ބުރުލެއް ނާރާނެ ކަމަށް ތެހެރާނުގައި ހުންނަވާ އިރާގުގެ ސަފީރު ޔާސިރު އަލް-ހައްޖާޖު ވަނީ ވިދާޅުވެފަ އެވެ. އިރާގުގެ ދައުލަތުގެ ނޫސް އޭޖެންސީއަށް މައުލޫމާތު ދެއްވަމުން އޭނާ ވިދާޅުވީ، ވައިގެ އުދުހުންތައް ވީ އެންމެ އަވަހަކަށް އާންމު ހާލަތަކަށް ގެނައުމަށް ޓަކައި ބަޣުދާދުން އީރާނުގެ ކަމާބެހޭ އިދާރާތަކާއެކު މަޝްވަރާ ކުރަމުން އަންނަ ކަމަށެވެ.
އިރާގާއި އީރާނުގެ ގުޅުމަކީ "ވަގުތީ ކާރިސާއަކުން އަސަރުކުރާ ވަރަށް ވުރެ މާ ފުޅާ ގުޅުމެއް" ސަފީރު ވިދާޅުވި އެވެ. މި ގޮތުން، އީރާނުގެ ތައުލީމީ މުއައްސަސާތަކުގައި އިރާގުގެ ގާތްގަނޑަކަށް 100،000 ދަރިވަރުން ކިޔަވަމުންދާ ކަމާއި، އެތައް ސަތޭކަ ހާސް އިރާގު ރައްޔިތުންނެއް އީރާނުގައި ދިރިއުޅެމުންދާ ކަމުގެ އިތުރުން، ކޮންމެ ދުވަހަކު ދެ ގައުމުގެ ދެމެދުގައި އެތައް ހާސް ބަޔަކު ދަތުރުފަތުރުކުރާ ކަން އޭނާ ފާހަގަކުރެއްވި އެވެ.
ދެ ގައުމުގެ އޮފިޝަލުންގެ މެދުގައި މުވާސަލާތުތައް ކުރިއަށްދާ ކަމަށާއި، ދަތުރުތަކާ ގުޅޭ އާ ނިންމުމެއް ވަރަށް އަވަހަށް އިއުލާނު ކުރެވޭނެ ކަމަށް ބެލެވޭ ކަމަށް، އިރާގުގައި ހުންނަވާ އީރާނުގެ ސަފީރު މުޙައްމަދު ކާޒިމް އަލްސާދިގާ ހަވާލާދީ އީރާނުގެ އައިއާރްއެންއޭ ނޫސް އޭޖެންސީން ބުނެފައިވެ އެވެ.
މަސްރަހު ދިރާސާކުރައްވާ ބޭފުޅެއް ކަމަށްވާ ޖެކް ހިއުސަން ވިދާޅުވީ، "އިރާގު މިއޮތީ ވަރަށް ދަތި އުނދަގޫ ހާލަތެއް،" ކަމުގައެވެ. "އެމެރިކާއާއި އީރާނަކީ ވެސް އިރާގުން ގާތް ގުޅުންތަކެއް ބާއްވާ ދެ ގައުމު. މި ފަދަ ދަނޑިވަޅުތަކުގައި، އިރާގު މި ވަނީ އެ ދެ ގައުމުގެ ދެމެދުގައި ފިތިފައި،" އޭނާ ވިދާޅުވި އެވެ. "މި ކަމުގައި ބައެއް ފަރާތްތަކުން އީރާނުގެ ބޮލުގައި އިލްޒާމް އަޅުވަނީ، އިރާގުގެ މައްޗަށް އީރާނުގެ ކޮންޓްރޯލް މާ ބޮޑު ކަމަށް ދެކޭތީ. އަނެއް ބަޔަކު ތުހުމަތުކުރަނީ މި ހަނގުރާމަ ފުރަތަމަ ވެސް ފެށީ އެމެރިކާއާއި އިސްރާއީލުން ކަމަށް. އަދި ޒިންމާ ނަގަންޖެހޭނީ އެ ދެ ގައުމުން ކަމަށް."
"ކޮންމެ ގޮތެއް ވިޔަސް، މި ހުރިހާ ބާރުގަދަ ބޮޑެތި ދައުލަތްތަކުގެ ދެމެދުގައި އިރާގު އަދިވެސް އޮތީ ވަރަށް ނާޒުކު ހާލަތެއްގައި. އަދި އޭގެ އިގުތިސާދީ ނޭދެވޭ އަސަރުތަކާއި ގެއްލުންތައް އެ ގައުމަށް ދަނީ ތަހައްމަލުކުރަން ޖެހެމުން،" އޭނާ ފާހަގަކުރެއްވި އެވެ.
މަސްދަރު: އަލް ޖަޒީރާ
