ސުލްހައިގެ މަޝްވަރާތައް އަލުން ފަށަން ނިއުކްލިއާ ޕްރޮގްރާމަށް ދޫދޭން މެދުވެރިން އީރާނަށް ބާރުއަޅަނީ
28 ސެޕްޓެމްބަރު 2026 | ހޯމަ 09:10އީރާނުގެ ނިއުކްލިއާ ޕްރޮގްރާމަށް ދޫދިނުމަށް މެދުވެރިން ބާރުއަޅަމުންދާއިރު، އެމެރިކާއިން ދަތިކުރުމުގެ ފިޔަވަޅުތައް ލުއިކޮށްދީފިނަމަ މަޝްވަރާއަށް ތައްޔާރަށް އޮތް ކަމަށް ތެހެރާނުން ވަނީ ބުނެފައި. ނަމަވެސް، އިތުރު އުދުވާނެއް ކުރިމަތިވެއްޖެނަމަ އަސްކަރީ ގޮތުން ވަރުގަދަ ރައްދެއް ދޭނެ ކަމުގެ އިންޒާރު އީރާނުން ދީފައިވާއިރު، މި މައްސަލަ ހައްލުކުރުން ދަނީ ދުވަހެއް ދުވަހަކަށް އުނދަގޫވަމުން
އީރާނުގެ ނަޠަންޒް ސިޓީ ކައިރީގައި ހުންނަ އެ ގައުމުގެ ނިއުކްލިއާ ފެސިލިޓީއެއް ކަމަށްވާ ޕިކްއެކްސް ފަރުބަދައިގެ ޓަނަލްތަކަށް ވަންނަ ދޮރުތައް ސެޓެލައިޓް ފޮޓޯއަކުން ފެންނަ މަންޒަރު | އެކްސް
އީރާން-އެމެރިކާ ހަނގުރާމަ ހުއްޓާލުމުގެ މަޝްވަރާތައް އަލުން ފެށުމުގެ މަސައްކަތުގެ ތެރެއިން، އީރާނުގެ ނިއުކްލިއާ ޕްރޮގްރާމަށް ދޫދިނުމަށް މެދުވެރިން އެ ގައުމަށް ބާރުއަޅަމުންދާ ކަމަށް އެމެރިކާގެ ނޫހެއް ކަމަށްވާ ދި ވޯލް ސްޓްރީޓް ޖާނަލްއިން ރިޕޯޓުކޮށްފައި ވެ އެވެ. ޖާނަލްގައި ވާ ގޮތުން، މި މަސައްކަތް ފަށާފައި މި ވަނީ ހަތް ދުވަހުގެ މުއްދަތަކަށް ހަނގުރާމަ ހުއްޓާލުމަށް އީރާނުން ހުށަހެޅި ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ދެކޮޅު ހެއްދެވުމާ ގުޅިގެންނެވެ. މި ހުށަހެޅުމަކީ ހުރްމުޒް ކަނޑުއޮޅި އަލުން ހުޅުވާލައި، އީރާނުގެ ބަނދަރުތަކަށް އެމެރިކާއިން އަޅާފައިވާ ހިސާރު ނިމުމަކަށް ގެނައުމަށް ހުށަހެޅި ހުށަހެޅުމެކެވެ.
މިއީ ނިއުކްލިއާ ޕްރޮގްރާމާ ގުޅޭ ގޮތުން ތެހެރާނުގެ ފަރާތުން ބަދަލެއް ހޯދުމަށް ކުރާ، ކާމިޔާބުވުމުގެ ފުރުސަތު ކުޑަ މަސައްކަތެއްގެ ގޮތުގައި މެދުވެރިން ވަނީ ސިފަކޮށްފަ އެވެ. އަދި, މި މައްސަލައާމެދު މަޝްވަރާކުރުމަށް ތައްޔާރަށް އޮތް ކަމުގެ އެއްވެސް އިޝާރާތެއް އީރާނުން މިހާތަނަށް ދީފައެއް ނުވެ އެވެ.
މަޝްވަރާތަކަށް ތެހެރާން އަދިވެސް ތައްޔާރަށް އޮތް ނަމަވެސް، އަލުން ދޭ އަސްކަރީ ހަމަލާތަކަށް ރައްދު ދޭނެ ކަމަށް އީރާނުގެ ޚާރިޖީ ވަޒީރު އައްބާސް އިރާގިޗީ އާދީއްތަ ދުވަހު ވިދާޅުވި އެވެ. ޖާނަލްގެ ރިޕޯޓާ ގުޅޭ ގޮތުން އެންބީސީ ނޫހުން ސުވާލު ދެންނެވުމުން، "ހަނގުރާމަ އަލުން ފެށުމަށް އަޅުގަނޑުމެން މި ތިބީ ފުރިހަމައަށް ތައްޔާރަށް،" ކަމަށް އިރާގިޗީ ވިދާޅުވި އެވެ. "ދުނިޔެ ނެތިދާ ފަދަ ހަނގުރާމައަކާ ކުރިމަތިލާން ޖެހުނު ނަމަވެސް، އަލަށް ކުރިމަތިވާ ކޮންމެ އުދުވާނަކާ ދެކޮޅަށް އަޅުގަނޑުމެން ސާބިތުކަމާ އެކު ދެމިތިބޭނަން. އެކަމަކު، އަޅުގަނޑުމެން މި ތިބީ ޑިޕްލޮމެސީއަށް ވެސް ތައްޔާރަށް. ގޮތެއް އިޚްތިޔާރު ކުރެއްވުން އޮތީ ރައީސް ޓްރަމްޕަށް،" އޭނާ ވިދާޅުވި އެވެ.
ތެހްރާންގެ ހުށަހެޅުމަށް ޓްރަމްޕް ދެކޮޅު ހެއްދެވި ފަހުން އީރާނުން އެއްވެސް ދޫދިނުމެއް ދީފައި ނުވާ ކަމަށް އަރަބި މެދުވެރިން ބުނެ އެވެ. މިއާއެކު، މަޝްވަރާތައް ކުރިއަށް ގެންދިއުމުގެ ކުރިން ވޮޝިންގޓަނުން ދޫތަކެއް ދިނުމަށް ތެހެރާނުން އެދޭ ކަމަށް ގަލްފުގެ ގައުމުތަކުގެ އޮފިޝަލުން ބުނެ އެވެ. ވޮޝިންގޓަނާއި ތެހެރާނާ ދެމެދު މެސެޖުތައް ބަދަލުކުރުމުގައި މެދުވެރިއެއްގެ ދައުރު އަދާކުރާ ގަތަރުގެ ބޮޑުވަޒީރު ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލް-ޘާނީ ވަނީ، މި މައްސަލަ ހައްލުކުރުން ދަނީ ދުވަހެއް ދުވަހަކަށް އުނދަގޫވަމުން ކަމަށް ވިދާޅުވެފަ އެވެ. ނިއު ޔޯކުގައި ބޭއްވި އދ. ގެ އާންމު މަޖިލީހުގެ ހަވާސާގައި އޮތް ގަތަރު އިކޮނޮމިކް ފޯރަމްގެ ޚާއްސަ ބައްދަލުވުމެއްގައި ވާހަކަފުޅު ދައްކަވަމުން، "މި ހަމަނުޖެހުމަކީ ވަރަށް ބޮޑަށް އޮޅުންބޮޅުންވެފައިވާ ކަމެއް،" ކަމަށް އޭނާ ވިދާޅުވި އެވެ.
އީރާނުން އެދެނީ ޖޫން މަހު އެއްބަސްވި ފަހުމުނާމާއަށް ވޮޝިންގޓަނުން އަލުން ރުޖޫއަވުމަށެވެ. އެ ފަހުމުނާމާގައި ވަނީ ދަތިކުރުމުގެ ފިޔަވަޅުތަކަށް ލުއިދިނުމާއި، ބޭރުގެ ގައުމުތަކުގައި ފްރީޒްކޮށްފައިވާ އީރާނުގެ އެތައް ބިލިއަން ޑޮލަރެއްގެ ފައިސާ ދޫކޮށްލުމުގެ އިތުރުން، އެމެރިކާއިން އަޅާފައިވާ ހުރަސްތައް ނިމުމަކަށް ގެނައުމަށެވެ. އަދި, އޭގެ ބަދަލުގައި ހުރްމުޒް ކަނޑުއޮޅި އަލުން ހުޅުވާލައި، ނިއުކްލިއާ މަޝްވަރާތައް ފެށުމަށް ވެސް ތެހްރާނުން ވަނީ ހުށަހަޅާފަ އެވެ. ނަމަވެސް، އެ އެއްބަސްވުމަށް އަލުން އެނބުރި ދިއުމަށް ޓްރަމްޕް މިހާރު ބޭނުންފުޅުނުވާ ކަމަށް އެމެރިކާގެ އޮފިޝަލުން ބުނެ އެވެ. އަދި، ވޮޝިންގޓަނުން ވަނީ ދަތިކުރުމުގެ ފިޔަވަޅުތައް އިތުރަށް ހަރުކަށިކޮށް، ބަނދަރުތަކަށް އަޅާފައިވާ ހިސާރު ދަމަހައްޓާފަ އެވެ.
އީރާނުގެ ނިއުކްލިއާ ޕްރޮގްރާމާ މެދު އެ ގައުމުން ދޫދިނުމުގެ ފުރުސަތު އޮތް ކަމަށް މަޝްވަރާތަކުގައި ބައިވެރިވެވަޑައިގަންނަވާ މެދުއިރުމަތީގެ އިސް އޮފިޝަލަކު ވިދާޅުވި އެވެ. ނަމަވެސް، އެއީ އެމެރިކާއާއި އީރާނާ ދެމެދު ވެވޭ އެއްބަސްވުމަކަށް ފަހު، އިސްރާއީލުން ދެން އިތުރަށް ހަމަލާއެއް ނުދޭނެ ކަމުގެ ސާފު ޔަގީންކަމެއް ލިބިގެން ކަމަށް ވެސް އެ އޮފިޝަލް ވިދާޅުވި އެވެ.
މަސްދަރު: އަނަދޮލު އޭޖެންސީ
