އޭޝިޔާއަށް ކުރަމުންދާ ވިއްސާރައިގައި ތައިލެންޑާއި އިންޑިޔާއިން 100 އަށްވުރެ ގިނަ މަރު!
29 ސެޕްޓެމްބަރު 2026 | އަންގާރަ 08:08ތައިލެންޑުގެ 29 ޕްރޮވިންސަކަށް ބޯކޮށް ވާރޭވެހި ފެންބޮޑުވުމުގެ ސަބަބުން 23 މީހުން މަރުވެ، 900,000 އަށްވުރެ ގިނަ ގޭބިސީއަށް ވަނީ ބޮޑެތި ގެއްލުންތަކެއް ލިބިފައި. ހަމައެއާއެކު، އިންޑިޔާގެ އުއްތަރު ޕްރަދޭޝްއަށް އާދަޔާޚިލާފަށް ގިނައިން ވާރޭވެހި 81 މީހުން މަރުވެފައިވާއިރު، މިޔަންމާގައި ވެސް ފެންބޮޑުވެ ބައެއް މީހުން ވަނީ ގެއްލިފައި. މި ގައުމުތަކުގެ ކަމާބެހޭ އިދާރާތަކުން މިހާރު ދަނީ ފެންބޮޑުވި ސަރަހައްދުތަކަށް އެހީތެރިކަން ފޯރުކޮށްދީ، ލިބުނު ގެއްލުންތައް ވަޒަންކުރަމުން
ތައިލެންޑުގެ ވެރިރަށް ބެންގކޮކުގައި ފެންބޮޑުވެފައިވާ މަގެއްގައި އެއްގަމު އުޅަނދުފަހަރުގައި ބަޔަކު ދަތުރުކުރަނީ | އެކްސް
ތައިލެންޑާއި އިންޑިޔާގެ އެކި ސަރަހައްދުތަކަށް ބޯކޮށް ވާރޭވެހި ފެންބޮޑުވުމާ ގުޅިގެން 100 އަށް ވުރެ ގިނަ މީހުން މަރުވެ، އެތައް މިލިޔަން ބައެއްގެ ދިރިއުޅުމަށް އަސަރުކޮށްފައިވާ ކަމަށް އެ ޤައުމުތަކުގެ ކަމާބެހޭ އިދާރާތަކާއި މީޑިއާތަކުން ހާމަކޮށްފި އެވެ.
ތައިލެންޑުގެ 29 ޕްރޮވިންސަކަށާއި ވެރިރަށް ބެންގކޮކަށް ކުރިމަތިވި ފެންބޮޑުވުމުގެ ހާދިސާތަކުގައި 23 މީހުން މަރުވެ، 2.6 މިލިޔަނަށް ވުރެ ގިނަ މީހުންނަށް އޭގެ އަސަރު ފޯރާފައިވާ ކަމަށް، އެ ޤައުމުގެ ޑިޕާޓްމަންޓް އޮފް ޑިޒާސްޓާ ޕްރިވެންޝަން އެންޑް މިޓިގޭޝަނުން ހާމަކުރި އެވެ. އެ އިދާރާއިން އަންގާރަ ދުވަހުގެ ހެނދުނު ނެރުނު އެންމެ ފަހުގެ ރިޕޯޓުގައި ބަޔާންކޮށްފައިވާ ގޮތުގައި، 167 ޑިސްޓްރިކްޓަކާއި 890 ސަބް-ޑިސްޓްރިކްޓެއްގެ އިތުރުން 5،077 އަވަށެއްގައި އަދިވެސް އޮތީ ފެންބޮޑުވެފަ އެވެ. މީގެ ސަބަބުން 940،300 ގޭބިސީއަކަށް ވަނީ އަސަރުކޮށްފަ އެވެ.
އެ އިދާރާއިން ހާމަކޮށްފައިވާ ގޮތުގައި، 14 ޕްރޮވިންސެއްގައި ފެންގަނޑު އުފުލެމުންދާއިރު، ބެންގކޮކް ހިމެނޭހެން ހަ ޕްރޮވިންސެއްގައި ފެންގަނޑު ހުރީ އެއްވަރެއްގައި ހިފެހެއްޓިފަ އެވެ. އަދި، އަނެއް ނުވަ ޕްރޮވިންސުން ފެންގަނޑު ދަނީ ހިނދެމުންނެވެ. ވިއްސާރައިގައި މަގުތަކާއި އާންމުން ދިރިއުޅޭ ސަރަހައްދުތަކުގައި ފެންބޮޑުވުމާ ގުޅިގެން، އެންމެ ބޮޑަށް ގެއްލުންވި ސަރަހައްދުތަކުގެ ތެރޭގައި ވެރިރަށް ބެންގކޮކް ހިމެނެ އެވެ. އަދި، ވާރޭވެހުން މަޑުޖެހުމާ ގުޅިގެން، ފެންބޮޑުވެފައިވާ ސަރަހައްދުތަކުން ފެން ހިންދުމުގެ މަސައްކަތް ކަމާބެހޭ އިދާރާތަކުން މެދުކެނޑުމެއް ނެތި ކުރިއަށްގެންދާ ކަމަށް ވެސް ރިޕޯޓްކޮށްފައިވެ އެވެ.
މީގެ އިތުރުން، ސެޕްޓެންބަރު 25 އިން 27 އަށް އިންޑިޔާގެ އުތުރުގެ ސްޓޭޓެއް ކަމަށްވާ އުއްތަރު ޕްރަދޭޝްއަށް ކުރި ވިއްސާރައިގައި ގާތްގަނޑަކަށް 81 މީހުން މަރުވެ، އިތުރު 62 މީހަކު ޒަޚަމްވެފައިވާ ކަމަށް އެ ސްޓޭޓުގެ ރިލީފް ކޮމިޝަނަރުގެ އޮފީހުން ހާމަކުރި އެވެ. އަދި، ގާތްގަނޑަކަށް 2،254 ގެއަކަށް ގެއްލުން ލިބި، 154 ނައަމްސޫފި މަރުވި ކަމަށް ވެސް އެ އިދާރާއިން ހާމަކުރި އެވެ. މީގެ އިތުރުން، ދަނޑުބިންތަކަށް ލިބުނު ގެއްލުންތައް ވަޒަންކުރުމުގެ މަސައްކަތް ކަމާބެހޭ އިދާރާތަކުން މެދުކެނޑުމެއް ނެތި ކުރަމުންދާ ކަމަށް ވެސް އެ އިދާރާއިން ބުންޏެވެ.
48 ގަޑިއިރުގެ ތެރޭގައި އެ ސްޓޭޓަށް އެވްރެޖްކޮށް 66.5 މިލިމީޓަރުގެ ވާރޭ ވެހިފައިވާ ކަމަށް އިންޑިޔާގެ ކަމާބެހޭ އިދާރާތަކުން ހާމަކުރިއެވެ. މިއީ، އެ ސްޓޭޓަށް އާންމުކޮށް ވެހޭ 7.6 މިލިމީޓަރުގެ ވާރެއާ އަޅާބަލާއިރު %775 އިތުރު މިންވަރެކެވެ. އަދި، އުއްތަރު ޕްރަދޭޝްގެ 75 ޑިސްޓްރިކްޓުގެ ތެރެއިން 56 ޑިސްޓްރިކްޓަކަށް އާދަޔާޚިލާފަށް ބޯކޮށް ވާރޭވެހިފައިވާ ކަމަށް ވެސް އެ ގައުމުގެ އިދާރާތަކުން ހާމަކުރި އެވެ.
މީގެ އިތުރުން، މިޔަންމާގެ ދެކުނުގެ ތަނިންތާރީ ސަރަހައްދުގައި ފެންބޮޑުވުމުގެ ސަބަބުން އެކަކު މަރުވެފައިވާ ކަމަށް އެ ގައުމުގެ އިދާރާތަކުން ވެސް ވަނީ ހާމަކޮށްފަ އެވެ. އެ ގައުމުގެ މީޑިއާތަކުން ބުނީ، ފެންބޮޑުވުމާ ގުޅިގެން ގާތްގަނޑަށް 12 މީހުން ގެއްލިފައިވާ ކަމަށެވެ. ފެންބޮޑުވުމާ ގުޅިގެން ތައިލެންޑުގެ ވެރިރަށުގެ އެއާޕޯޓުތަކުގެ އުދުހުންތަކަށް ވެސް ވަނީ ބުރޫއަރާފަ އެވެ.
މަސްދަރު: އަނަދޮލު އޭޖެންސީ
