ރާއްޖޭގެ ކްރެޑިޓް ރޭޓިންގ ކޮވިޑް ހާލުތައި އޮތް މިންވަރަށް މޫޑީސްއިން މަތިކޮށްފި

ކޮވިޑްގެ އާލަމީ ވަބާގެ ދުވަސްވަރު ދިވެހިރާއްޖޭގެ ކްރެޑިޓް ރޭޓިންގ އޮތް މިންވަރަށް މޫޑީސް އިން ރާއްޖޭގެ ކްރެޑިޓް ރޭޓިން މައްޗަށް ޖައްސައިފި އެވެ.

މޫޑީސް އިން ވަނީ ރާއްޖޭގެ ރޭޓިންގ "ސީ.އޭ.އޭ.2" (Caa2) އިން "ސީ.އޭ.އޭ.1" (Caa1) އަށް މަތިކޮށްފި ކަމަށާއި، ރާއްޖޭގެ އިގްތިސާދީ ކުރިމަގު އޮތީ ސްޓޭބަލް ނުވަތަ އެއްވަރެއްގައި ހިފެހެއްޓިފައި ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ބުރާސްފަތި ދުވަހު ވަނީ ހާމަކޮށްފަ އެވެ. މޫޑީސްއިން މި ނިންމުން ނިންމާފައިވަނީ، ދިވެހި ސަރުކާރުން ކުރު މުއްދަތެއްގެ ތެރޭގައި ދައްކަންޖެހޭ ދަރަނި ނުދެއްކިދާނެ ކަމަށް ބެލެވުނު ނުރައްކާ ކުޑަވުމާ ގުޅިގެން ކަމަށްވެސް ވަނީ ބުނެފަ އެވެ.

މޫޑީސް އިން ރާއްޖޭގެ ކްރެޑިޓް ރޭޓިން ދާދިފަހުން މަތިކޮށްފައިވީ ނަމަވެސް، މިއީ އެމްޑީޕީގެ ސަރުކާރުގައި 2021 ވަނަ އަހަރު ކޮވިޑް-19 ގެ ބަލިމަޑުކަމުގެ ތެރޭގައި ރާއްޖެއަށް ދީފައިވާ ރޭޓިންއާ އެއްވަރުގެ ރޭޓިންއެއްކަން ފާހަގަ ކުރެވެ އެވެ.

ވޭތުވެދިޔަ ދެ އަހަރާއި ތިން މަސްދުވަހުގެ ތެރޭގައި މޫޑީސް އިން ރާއްޖެއަށް ދީފައިވާ ރޭޓިން ހުރީ، ކޮވިޑްގެ ދަތި އުނދަގޫ ދުވަސްވަރު އެމްޑީޕީގެ ސަރުކާރުގައި ރާއްޖޭގެ ރޭޓިން އެންމެ ދަށަށް ދިޔަ މިންވަރަށް ވުރެ ވެސް ދަށްކޮށެވެ.

އަނެއްކޮޅުން ސުކޫކަށް ދައްކަންޖެހޭ ފައިސާ ދެއްކުމާ ގުޅިގެން ކްރެޑިޓް އޭޖެންސީ ފިޗުން މިހާރު ބަދަލުތަކެއް ގެނެސްފައިވީ ނަމަވެސް، މިއަދާ ހަމައަށް ވެސް އެ އިދާރާގެ ރޭޓިން ހުރީ ކޮވިޑްގެ ތެރޭގައި ރާއްޖެއަށް ލިބުނު އެންމެ ދަށް ރޭޓިންއަށް ވުރެ ވެސް ދަށް މިންވަރެއްގަ އެވެ.

ރާއްޖޭގެ ކްރެޑިޓް ރޭޓިންގް މޫޑީސް އިން އެކި އަހަރުތަކުގައި ދީފައިވާ ގޮތް | ރާއްޖެއެމްވީ

ފައިނޭންސް މިނިސްޓްރީން ބުނި ގޮތުގައި ރޭޓިންގ މަތިކޮށްފައިވަނީ، މިއަހަރުގެ އޭޕްރިލް މަހު 500 މިލިއަން އެމެރިކާ ޑޮލަރުގެ ސުކޫކް ބޮންޑެއް ކާމިޔާބުކަމާއެކު އަނބުރާ ދެއްކުމާއި، ރިޒާވް ބޭންކް އޮފް އިންޑިއާއިން ނަގާފައިވާ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއަށް ފައިސާ ދައްކާ ނިންމުމުންނެވެ. މީގެ އިތުރުން، މެއި އަދި ސެޕްޓެމްބަރު މަހު ސްޓޭޓް ބޭންކް އޮފް އިންޑިއާއިން ލިބުނު 100 މިލިއަން ޑޮލަރުގެ ސެކިއުރިޓީޒް އިންވެސްޓްމަންޓްތަކަކީ ވެސް މި ކުރިއެރުމަށް މަގުފަހިވި ކަންކަން ކަމުގައި ފިނޭންސުން ބުނެ އެވެ.

ސަރުކާރުން ލޯނުތައް ބަރާބަރަށް ދައްކަމުންދާ ކަމަށް ބުނާއިރު ބައެއް ލޯނުތައް ދެއްކުމުގެ ބަދަލުގައި ދަރަނި ދެއްކުން ވަނީ ފަސްކޮށްފަ އެވެ. އެ ގޮތުން 100 މިލިއަން ޑޮލަރުގެ ޔޫރޯ ބޮންޑެއް އަނބުރާ ދެއްކުން 2031 ވަނަ އަހަރާ ހަމައަށް ފަސްކޮށްފައިވުމާއެކު އެ ދަރަނި ދައްކަން ޖެހޭނީ ދެން އަންނަ ސަރުކާރަކުންނެވެ.

ލޯނު ދައްކަމުން ގެންދާ ކަމަށް ސަރުކާރުން ބުނާއިރު، އަނެއްކޮޅުން ވޯލްޑް ބޭންކުން 40 މިލިއަން ޑޮލަރު، އޭޝިއަން ޑިވެލޮޕްމަންޓް ބޭންކުން 50 މިލިއަން ޑޮލަރު އަދި އޯޕެކް ފަންޑުން 40 މިލިއަން ޑޮލަރުގެ ލޯނު ރައީސް މުއިއްޒުގެ ސަރުކާރުން ވަނީ ނަގާފަ އެވެ. އަދި އިތުރު ލޯނު ނުވަތަ ކޮންސެޝަނަލް ފައިނޭންސިންގ ހޯދުމަށް ތަރައްގީގެ ބައިވެރިންނާއެކު ސަރުކާރުން ދަނީ މަޝްވަރާ ކުރަމުންނެވެ.

ފައިނޭންސް މިނިސްޓްރީގެ ތަފާސްހިސާބުތަކަށް ބަލާއިރު، 2025 ވަނަ އަހަރުގެ ނިޔަލަށް ރާއްޖޭގެ އުފެއްދުންތެރިކަމުގެ ނިސްބަތުން (ޖީ.ޑީ.ޕީ) ދައުލަތުގެ ދަރަނި 129.2 އިންސައްތައިގައި ހުރި ނަމަވެސް، 2026 ވަނަ އަހަރުގެ ޖުލައި މަހުގެ ނިޔަލަށް އެ އަދަދު ވަނީ 122.6 އިންސައްތައަށް ދަށްވެފަ އެވެ.

އަނެއްކޮޅުން، މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ހަކަތައިގެ އަގު އުފުލި، ރާއްޖޭގެ އިގްތިސާދަށް އޭގެ ނޭދެވޭ އަސަރު ފޯރުމުގެ ބިރު އެބައޮތް ކަމަށް މިނިސްޓްރީން ފާހަގަކުރި އެވެ.

ސަރުކާރުގެ އެންމެ އިސް އަމާޒަކީ ރާއްޖޭގެ ބޭރުގެ މުއާމަލާތްތަކުގެ ދާއިރާ ހަރުދަނާކުރުމާއި، މެކްރޯ އިކޮނޮމިކް ހަމަޖެހުން ގާއިމުކުރުމެވެ. މީގެ އިތުރުން، އިއާދަކުރަނިވި ހަކަތައަށް ބަދަލުވުމުގެ މަސައްކަތް އަވަސްކުރުމާއި، ވިޔަފާރީގެ އުމްރާނީ ވަސީލަތްތައް ވަރުގަދަކުރުމަށް އިސްކަންދޭނެ ކަމަށް ސަރުކާރުން ބުނެފައިވެ އެވެ.