ބައިނަލްއަގުވާމީ ދެ އިދާރާއަކުން 100 މިލިއަން އެމެރިކާ ޑޮލަރު ހޯދުމަށް ސަރުކާރުން މަޝްވަރާ ކުރަނީ
މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލެމުންދާތީ، ރާއްޖޭގެ ރިޒާވް ވަރުގަދަކުރުމަށް ބައިނަލްއަގުވާމީ ދެ އިދާރާއަކުން 100 މިލިއަން ޑޮލަރު ހޯދުމުގެ މަސައްކަތް ސަރުކާރުން ފަށައިފި. މި ފައިސާ ހޯދުމަށް ބޭނުންވާ ހުއްދަ ހޯދުމަށް ރައީސުލްޖުމްހޫރިއްޔާއަށް ހުށަހަޅާފައިވާކަމަށް ފިނޭންސް މިނިސްޓަރު މޫސާ ޒަމީރު ވިދާޅުވި. ސަރުކާރުން ޚަރަދު ކުޑަކުރުމުގެ އެއްވެސް ފިޔަވަޅެއް އަޅާފައި ނުވާ ކަމަށާއި، އޭގެ ބަދަލުގައި އިސްރާފު ކުރުން އިންތިހާ އަށް ބޮޑު ކަމަށް ބުނެ ގިނަ ފަރާތްތަކަކުން އަންނަނީ ސަރުކާރަށް ފާޑު ކިޔަމުން.
ފިނޭންސް މިނިސްޓަރ މޫސާ ޒަމީރު | ގެޓީ އިމޭޖަސް
ރާއްޖޭގެ ބޭރު ފައިސާގެ ރިޒާވް ވަރުގަދަކުރުމަށްޓަކައި ބައިނަލްއަގުވާމީ ދެ އިދާރާއަކުން 100 މިލިއަން އެމެރިކާ ޑޮލަރު ހޯދުމަށް ސަރުކާރުން މަޝްވަރާ ކުރަން ފަށައިފިއެވެ.
މި މަޝްވަރާތަކާ ގުޅޭ މައުލޫމާތު ފިނޭންސް މިނިސްޓަރު މޫސާ ޒަމީރު ހާމަކުރެއްވީ، ހަނގުރާމައިގެ ސަބަބުން ކުރިމަތިވެދާނެ އިގްތިސާދީ ނޭދެވޭ އަސަރުތަކުން އަރައިގަތުމަށް ރައީސުލްޖުމްހޫރިއްޔާ އެކުލަވާލެއްވި ވަޒީރުންގެ ކޮމިޓީގެ ބައްދަލުވުމެއްގައެވެ. މި ކޮމިޓީގެ މައިގަނޑު މަސްއޫލިއްޔަތަކީ ހަނގުރާމައާ ގުޅިގެން ހިނގަމުންދާ ކަންކަން ދިރާސާކޮށް، ރާއްޖޭގެ އިގްތިސާދަށް ކުރިމަތިވެދާނެ ލޮޅުންތައް ކުޑަކުރުމަށް އަޅަންޖެހޭ ފިޔަވަޅުތައް ވިލަރެސްކުރުން ކަމަށް ރައީސް އޮފީހުން ބުނެއެވެ.
މިނިސްޓަރު ޒަމީރު ވިދާޅުވީ، މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، މި ފައިސާ ބޭނުންކުރާނީ ރާއްޖޭގެ ރިޒާވް އިތުރަށް ވަރުގަދަކުރުމަށް ކަމަށެވެ. އަދި ރިޒާވް ބެލެހެއްޓުމާ ގުޅޭގޮތުން އަޅަންޖެހޭ ފިޔަވަޅުތަކާ ބެހޭގޮތުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރާ ގުޅިގެން ސަރުކާރުން މަސައްކަތް ކުރަމުންދާކަން ވެސް މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، ބައިނަލްއަގުވާމީ ދެ އިދާރާއަކާއެކު މި މަޝްވަރާތައް ކުރިއަށް ގެންދިއުމަށްޓަކައި ސަރުކާރުގެ ފަރާތުން އެންމެ ފަހުގެ ހުއްދަ ހޯދުމަށް މިހާރު ވަނީ ރައީސުލްޖުމްހޫރިއްޔާގެ އަރިހުގައި އެދިފައެވެ. ނަމަވެސް، އެއީ ބައިނަލްއަގުވާމީ ކޮން ދެ އިދާރާއެއް ކަމެއް ސަރުކާރުން އަދި ހާމައެއް ނުކުރެއެވެ.
މި ފައިސާ ހޯދުމުގެ މަސައްކަތް ސަރުކާރުން ފަށާފައި މިވަނީ، އަންނަ އަހަރުގެ އޭޕްރިލް 8 ވަނަ ދުވަހު އަނބުރާ ދައްކަންޖެހޭ 500 މިލިއަން ޑޮލަރުގެ ސުކޫކަށް ތައްޔާރުވަމުންދާ ދަނޑިވަޅެއްގައެވެ. ރައީސް މުއިއްޒު މީގެކުރިން ވިދާޅުވެފައިވަނީ، ސުކޫކު ދެއްކުމަށް ބޭނުންވާ 650 މިލިއަން ޑޮލަރު މިހާރު ހަމަޖެހިފައިވާ ކަމަށާއި، އެ ފައިސާ ދައްކައި ނިމުމުން ވެސް ދައުލަތުގައި ބާކީ ފައިސާ ހުންނާނެ ކަމަށެވެ.
ބޭރުގެ ދެ ފަރާތަކުން 100 މިލިއަން ޑޮލަރު ހޯދުމަށް ސަރުކާރުން މަސައްކަތް ކުރާކަން ހާމަކޮށްފައިވާއިރު، ސަރުކާރުން ޚަރަދު ކުޑަކުރުމުގެ އެއްވެސް ފިޔަވަޅެއް އަޅާފައި ނުވާ ކަމަށާއި، އޭގެ ބަދަލުގައި އިސްރާފު ކުރުން އިންތިހާ އަށް ބޮޑު ކަމަށް ބުނެ ގިނަ ފަރާތްތަކަކުން އަންނަނީ ސަރުކާރަށް ފާޑު ކިޔަމުންނެވެ.
