ރައީސް މުއިއްޒު 1 އަހަރުން ނަންގަވާ ލޯނުގެ އަދަދު، ދައްކަވާ ކަމަށް ވިދާޅުވާ ލޯނުތަކަށް ވުރެ ބޮޑު: ރިޔާޒް މަންސޫރު
ދަރަނި ދެއްކުމަކީ ކޮންމެ ސަރުކާރަކުން ވެސް ކުރަންޖެހޭ އަސާސީ ކަމަކަށްވާއިރު، އެއީ ރައީސަކު ޕޯޑިއަމްތަކުގައި އިއުލާނުކުރަންޖެހޭ ވަރުގެ ކަމެއް ނޫން ކަމަށް ކުރީގެ ޑެޕިއުޓީ މިނިސްޓަރު ރިޔާޒް މަންސޫރު ވިދާޅުވެއްޖެ. މި ސަރުކާރުން ދަރަނި ދައްކާ ވާހަކަ ދައްކާއިރު، ދައްކާ މިންވަރަށް ވުރެ އިތުރަށް ލޯނު ނަގަމުންދާކަން ބަޖެޓުން އެނގޭ ކަމަށާއި، ތަރައްގީގެ މަޝްރޫއުތައް ހުއްޓިފައިވަނީ ސަރުކާރުގެ ހިންގުންތެރިކަން ކުޑަވުމުން ކަމަށް އޭނާ ފާހަގަކުރެއްވި. އެހެންކަމުން ދަރަނި ދެއްކި ނަމަވެސް ގައުމުގެ ޖުމްލަ ދަރަނި ދަށަށް ނުދާކަން އޭނާ ވަނީ ފާހަގަކުރައްވާފަ.
އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު ރިޔާޒު މަންސޫރު | ރާއްޖެއެމްވީ
ރައީސް ޑރ. މުހައްމަދު މުއިއްޒު، ލޯނުތައް ދައްކަވާ ކަމަށް ވިދާޅުވާއިރު، އެމަނިކުފާނު 1 އަހަރުން ނަންގަވާ ލޯނުގެ އަދަދު އެ ދައްކަވާ ލޯނަށް ވުރެ މާ ބޮޑު ކަމަށް އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު ރިޔާޒު މަންސޫރު ވިދާޅުވެއްޖެ އެވެ.
ރާއްޖެޓީވީ ގެ 'ޓީވީ ޓޯކް' ޕްރޮގްރާމްގައި ވާހަކަދައްކަވަމުން ރިޔާޒް ވިދާޅުވީ ދަރަންޏަކީ އެ ދެއްކުމަށް ކަނޑައަޅާފައިވާ މުއްދަތުގައި ދައްކަން ޖެހޭ އެއްޗެއް ކަމަށެވެ. އެއީ މިއަދު ރައީސް މުއިއްޒު ވެރިކަމުގައި ހުންނެވި ނަމަވެސް ނުވަތަ އެހެން ރައީސަކު ހުއްޓަސް އެކަނޑަ އެޅިފައިވާ މުއްދަތެއްގައި ދައްކަން ޖެހޭނެ އެއްޗެއް ކަމަށެވެ.
ދެން އަންނަ ރައީސަކު، އެއީ އަދި ކޮންމެ ރައީސެއް ވިޔަސް ރައީސް މުއިއްޒު މި ދެއްވި ކަހަލަ ޕްރެޒެންޓޭޝަނެއް ދޭކަމުގައި ވާނަމަ ވިދާޅުވާނެ އެންމެ ބޮޑު ދަރަންޏެއް ދައްކާފަ މިއޮތީ ރައީސް މުއިއްޒު ނެންގެވި ލޯނުންނޭ. އާންމު އުސޫލަކުން ވެއްޖެޔާ މިސާލަކަށް ކުންފުންޏެއް ހިންގާއިރު، ލޯނުތައް ކުރިއަށް އަނބުރާ ދައްކަނީކީ ނޫން. ހަމަ އެ ހުންނަ މުއްދަތުތަކަށް ދައްކަމުން ދަނީ. އޭގެ ބޭނުމެއް އެބަ އޮވޭ ވަރަށް ބޮޑު. އެ ކޭޝް އަތުގަ ހިފެހެއްޓުނީމަ މާލީ މިނިވަންކަން އެބަ ލިބޭ. މަސައްކަތް ކުރުމާ، ތަރައްގީ ގެނައުމާ ޕްރޮޖެކްޓް ހިންގުމުގެ.އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު ރިޔާޒު މަންސޫރު
ރިޔާޒް ވިދާޅުވީ ލޯނެއް ދެއްކުމަކީ ރައީސަކު ޕޯޑިއަމަކަށް އަރައި، ޕްރެޒެންޓޭޝަނެއް ދީގެން އިއުލާނު ކުރަން ޖެހޭ ވަރު ކަމެއް ވެސް ނޫން ކަމަށެވެ. އެއީ ކޮންމެ ރައީސަކު ވެރިކަމުގައި ހުރި ނަމަވެސް ކުރަން ޖެހޭ ކަމެއް ކަމަށާ ރައީސަކު ގައުމަކަށް ކޮށްދޭންޖެހޭ އެންމެ ކުޑަ މިންވަރުގެ ތެރޭގައި ލޯނު ދެއްކުން ހިމެނޭ ކަމަށެވެ.
އެހެން ކަމުން ފުރަތަމަ އެއް އަހަރު ތެރޭ މިވަރު ދެއްކީމޭ ނުވަތަ ދޮޅު އަހަރު ތެރޭ މިވަރު ދެއްކީމޭ ބުނުމަކީ އެއީ އެއްވެސް މާނައެއް އޮތް ކަމެއް ނޫން ކަމަށް ރިޔާޒް ވިދާޅުވި އެވެ. މާނައެއް އޮތް ކަމެއް ދަންނަވާނަމަ އެންމެ ރަނގަޅު ވާނީ ރައީސް މުއިއްޒުގެ ދައުރުގަ މިހާރު ދަރަނި އިތުރު ވެއްޖެ ތޯ ބެލުން ކަމަށާ ދަރަނިވީ ކިހާ ވަރަކަށް ތޯ ބެލުން ކަމަށް ވެސް އޭނާ ވިދާޅުވި އެވެ.
އެހެންވީމަ ހަމަޖެހޭ މުއްދަތައް ރާވައިގެން ފައިސާ ދެއްކުން މި އޮންނަނީ. ރައީސް މުއިއްޒަށް މި ދިމާވި ގޮތަކީ އެމްޑީޕީ ސަރުކާރުން ނަގާފަ އޮތް ސުކޫކު ދައްކަން މި އޮތީ މި އަހަރަށް. އެހެންވީމަ އޭތި ދައްކަން ޖެހޭނެ. އެ ވާހަކަ އެ ވިދާޅުވަނީ. އެއީކީ ރައީސަކު ތިމަންނަ ލޯނު ދައްކައިފީމޭ ވިދާޅުވާވަރު ކަމެއް ނޫން. ރައީސެއް ވެއްޖެޔާ ލޯނު ދައްކަން ޖެހޭނެ. ލޯނު ނުދައްކައިފިއްޔާ އެ ފެއިލް ވީ. ލޯނު ދެއްކުމަކީ އޭގެ ޒާތުގަ އެންމެ ދަށް މިންގަނޑު. ދަރަނި އިތުރު ވެއްޖެ އިނގޭތޯ ވަރަށް ބޮޑަށް. އެހެންވީމަ އެވާހަކަ ނުދައްކާ މި ވިދާޅުވަނީ ލޯނު ދައްކައިފީމޭ. އެކަމު ލޯނު ދެއްކޭ ވަރަށްވުރެ މާ ބޮޑަށް ދަރަނި އިތުރު ވީމަ ކޮބާތޯ އޭގެ ފައިދާ އަކީ.އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު ރިޔާޒު މަންސޫރު
މި ސަރުކާރަށް ދިމާވެގެން އުޅޭ އެންމެ ބޮޑު މައްސަލައަކީ ތަރައްގީގެ އެއްވެސް މަޝްރޫއެއް ނުހިންގުން ކަމަށް އޭނާ ވިދާޅުވި އެވެ. އެކަން ނުވުމުން އެއީ ދަރަނީގެ ސަބަބުން ވާ ކަމެކޭ ވިދާޅުވަނީ ކަމަށް ވެސް ރިޔާޒް ވިދާޅުވި އެވެ.
ރިޔާޒް ވިދާޅުވީ ބޮޑެތި އަދަދުތަކެއް ދައްކާފައިވާ ކަމަށް ރައީސް މުއިއްޒު ވިދާޅުވާއިރު، 2026 ގައި ވެސް ދަރަނި ދަށަށް ނުދާ ކަމަށެވެ. މި ސަރުކާރުން މަޖިލީހަށް ހުށަހެޅި ބަޖެޓުން އެކަން އެނގޭ ކަމަށާ މި އަހަރު ވެސް ދަރަނި ދަށަން ނުދާނަމަ އޭގެ މާނައަކީ މިއަހަރު ދެއްކި ސުކޫކާ ލޯނުތަކާ އެއްވަރަށް ނުވަތަ އެއަށް ވުރެ ގިނައިން ލޯނު މި ސަރުކާރުން ނަގާކަން ކަމަށް އޭނާ ވިދާޅުވި އެވެ. ދަރަނި ދެއްކި ވާހަކަ ވިދާޅުވާއިރު އެއް އަހަރު ތެރޭ ދެއްކި ވަރަށް ވުރެ ގިނައިން ލޯނު ނަގާ ކަމަށް ވެސް ރިޔާޒް ވިދާޅުވި އެވެ.
